10 August 2024 bodo news ~ Bodoinfo.com

सुक्रुबाराव रायजो सोरखारनि मोनसे केबिनेट जथुम खुंनाय जादोंमोन। केबिनेट जथुमनि जोबनायाव मोनसे खौरां मेलाव गिबि मन्थ्रि ड° हिमन्त बिश्व शर्माया बुङो, "फरायसालिफोराव सानखान्थि आयदानि ग्रेजुवेट फोरोंगिरिफोर थिसननाय जागोन। सा 1,766 सानखान्थि फोरोंगिरिफोरनि थिसनथाइ होनाय जागोन। पलिटेक्निक, इन्जिनियारिं फरायसालिमाफोराव 221 मासिफोरखौ थिसननाय जागोन। आरो थामथि आरो ब्रैथि ग्रेदनि मासिफोराव सा 221 सुबुंफोरखौ थिसननाय जागोन। "

सुक्रुबाराव रायजो सोरखारनि केबिनेट जथुमाव गोबां गोनांथार थिरांथाफोर लानाय जादोंमोन। गिबि मन्थ्रि ड: हिमन्त बिश्व सर्माया बिटिआरआव गोदानै गं 16 गामिफोरखौ सोफादेरनो फोसावदों। गिबि मन्थ्रिआ बेखौबो बुंदोंमोन दि फैबाय थानाय समाव आरोबाव गंथाम गामिनि सुबुं अनजिमानि हिसाबनि उनावनो सोनायनि थिरांथा लानाय जागोन।

गिबि मन्थ्रिआ बुङो दि बिटिआरनि सिमाखौ सनितपुर आरो बिस्वनाथ जिल्लासिम बांहोनाय जागोन होनना बितिआर सुक्तियाव गिदिर बाथ्रा दंमोन। नाथाय 80 जौखोन्दोनि बांसिन बर' एबा जनजातिफोर थानाय गामिफोरखौ लानानै बारायनाय जागोन। बेबादि 60 गामिफोरखौ सायख'दोंमोन। 41 खौ सिगाङाव होनाय जाबाय, गं 19 खौ खालामोब्लानो समायखिराखौ जाफुंहोनाय जायो। बेनिनो गं 16 खौ दायो गथायबाय आरो मोनथामाव बर'फोरनि अनजिमाखौ फिन खेबसे नायफिन्नो थाखाय गिबि मन्थ्रिनो केबिनेता बिबान होदों।

रायखांनो गोनां दि केबिनेटआव फिसा फालांगिफोरनि सायावबो थिरांथाफोर लानाय जादोंमोन। गिबि मन्थ्रि ड° हिमन्त बिश्व सर्माया बुंदों, "जि.एस.टि. नटिस हरनायनि सोमोन्दै केबिनेटआव मोनसे थिरांथा लानाय जादों। नटिसआ अब्लासो थांगोन जेब्ला 5 लाख रांनि गोजौआव खाजोनानि बेसेन थायो। 5 लाख रांनि गाहायनि खाजोना गोनां फिसा फालांगिरिफोरनो रेहाय। केबिनेटनि बे थिरांथाया जि.एस.टि. नि सेक्शन 161 बायदियै जादों। फिसा फालांगिरिफोराबो गोजाम फोसावनायफोरनिफ्राय रेहाय मोनगोन। "

सोरखारा जायगायारि बिजोंनि सोरखारि नङि फरायसालिफोरखौ नायगासिनो दं। सोरखारा 25 जौखोन्दो मासि लानो सानगासिनो दं। 25 जौखोन्दो मासुल खौ सोरखारा होगोन। बे मासिया गोरिब फरायसाफोरनो गुनगोनां सोलोंथाइ होगोन। " होनना बो गिबि मन्थ्रिया बुङो।

रायजोनि गुबुन गुबुन जायगायाव मोसौ खावनाय जाथायफोर जानायनि खौरांफोर मोनबाय थायो।। पुलिसाबो मोसौ खावनायनि बेरेखा हाबाफारिखौ मावगासिनो दं। सेंग्राफोरनिफ्राय लानानै बोराय सुबुंफोरसिम पुलिस अपारेसनाव बाहागो लानायनि खौरां मोन्दों जानो हागौ। नाथाय बे खेबाव सासे आइजोआ जारिमिन सोरजिनो हादों। सासे आइजोआ मासे मोसौ खावनो फैदोंमोन आरो उनाव हमजायो। बियो जानो हागौ रायजोनि गिबिसिन आइजो जायनि सायाव मोसौ खावनायजों लोब्बा थानायनि दाय होनाय जागोन। आइजो नि मुङा जानमनि हाजरिका।

देरगावनि रंगामातीनि जाथाय। मोनसे हानजाया सुक्रुबारनि मोनायाव रंगामाटीनि दानहबाबा थानानि खाथिनि भुयानलाइननि मोखाङाव गंसे इन्डिग' गारियाव नारै नारै दैखांनानै मोसौ खावनो नाजादोंमोन। बे गेंगखौ सासे आइजोआ दैदेनदोंमोन। बिजों लोगोसे गोबां मानसिफोर दंमोन।

जेब्ला जायगानि सुबुंफोरा खौरां मोननानै हरखाब जाथाय जायगायाव सौहैयो अब्ला हौवा सुबुंफोरा खोमसिनि खाबु लानानै खारलांदोंमोन। आइजोआ हारसिं थालाङो। बेयावनो मोनसे दुंहाव थासारि सोमजियो। रागा जोंनाय रायजोफोरा आइजोखौ हमनानै गारिनिफ्राय खावनाय मोसौखौ रैखा खालामदोंमोन। थासारिया गाज्रि जानायनि सिगां, आत्सानि मोनसे हानजाया जाथाय जायगायाव सहैयो आरो थासारिखौ सामलायो।

रायजो राजानि खौरांनि सायाव बिथा खालामनानै, गारिजों लोगोसे आइजोखौ जाय जाथाय जायगायाव सहैनाय देरगाव पुलिसनो गथायना होनाय जायो । सुक्रुबाराव मोसौनि बिगोमाजों लोगोसे देरगाव पुलिस थानायाव रायजोआरि महरै मोनसे एफ.आइ.आर. होनाय जादोंमोन।

राङानो रां। नआव थानानैनो अनलाइन नि गेजेरजों लाखपति जागोन। 1 लाख रां सोनानै सानसेयावनो 6,000 रां मोनगोन। 1 लाख रां थिसननायजों दानसेआव 1 लाख 80 रोजा रां मोननो हायो। वाईबीवाई नि बिगोमायाबो सरासनस्रा सुबुंखौ बेबादिनो करोड़पति जानायनि सिमां नुहोदोंमोन। बयनिबो खुगा खुगा वाईबीवाई मुंनि फालांगियारि एपनि सोमोन्दै मिथिनो मोनदोंमोन। हरसेआवनो, लाख-लाख सुबुंफोरा 6 जौखोन्दो मुलाम्फा लादोंमोन। दानसेयावनो करोड़पति जानायनि सिमाङाव, वाईबीवाई मुंनि फालांगियारि एपआव गासैबो खस्थ'जों आर्जिनाय रांखौ थिसनदोंमोन। गोबाङानो गुबुन खामानिखौ गारलायनानै बेयाव जइन जादोंमोन हरनि गेजेरावनो।

लाइमोन सेंग्रा सिख्लाफोरा थामथि आरो ब्रैथि थाखोनि आन्जादनि थाखाय थियारि खालामनायखौबो गारलायदोंमोन आरो वाईबीवाई मुंनि मोनसे फालांगियारि एपआव रां थिसनदोंमोन। फेसबुक युतुब जेरावबो बेनो ल सोलिदोंमोन, गोबां सुबुंफोरानो गावनि खामानि मावनायखौ बावगारनायबायदि जालांबायमोन। मानसि सोनाय आरो गोरलैयै रां खामायनायनि फारसेल गोसोमोन।

नाथाय हरखाब बन्द जाबाय बेयो, लोगो लोगो दावराव दायो। वाइ.बि.वाइ. बिबानगिरिफोरा फालांगियारि एपआव मोनसे फोसावथाय होदों। वाईबीवाई बिबानगिरिफोरा बुंदोंमोन दि रां थिसनगिरिफोरा 6,000 रां गोदानै जमा खालामनानै आरो केवाईसीखौ आपडेट खालामनानै सिगांनि बायदि रां आर्जिनो हागोन आरो दिहुननो हागोन। नाथाय जेब्लानो बिसोरो बे फोसावथायखौ नुदोंमोन, रां थिसनगिरिफोरा बुजिनो थाखाय जेबो आद्रा गैला। विश्वनाथनि गोसो गुदुं रां थिसनगिरिफोरा सिमांआ फेलें जानायनि उनाव बेबायदि फालांगि एपआव रां थिसननाय नंलिया होन्ना समायखिरा लादों। बे समावनो, वाईबीवाई ट्रेडिं एपआ बिस्वनाथ चारियालीजों लोगोसे खाथि-खालानिफ्राय 150 कौटिसो रां लुथिना लाना थादों होनना खौरां मोन्नानै रोजा-रोजा सुबुंफोरा दुखु। दायो बे एपनि सायाव गोबां अदिअ रेकर्दिंबो भाइरेल जागासिनो, सोरबा सोरबा केवाइसि आपदेत खालामना लाना बेंक एकाउन्त निफ्राय रां लांजादों होनना अदिअ रेकर्द आव खोनानो मोनदों, नाथाय बेफोर बेसेबां सैथो मिथिनाय जायाखै, थेवब्लाबो दायो केवाइसि आपदेत खालामनो होनायखौ रावबो खालामनो नांखाया मानोना बिसोर रांखौ होनाय नंखाया, बेनि सोलाय नोंनि फोरमान बिलाइखौ लानानै गुबुन गाज्रि खामानियावसो बाहायनो हागौ।

द'थि मेदेल पेरिस अलिम्पिकनिफ्राय भारतआव फैदों। अमन शेहरावतआ हादोरनि थाखाय खमलायनायाव ब्रन्जनि मेडेल देरहादों। भारतारि खमलायगिरिया 57 किल'ग्राम थाखोआव बे जाफुंसारनायखौ मोननो हादों। बेखौ मुंख'नो गोनां दि दासिम भारतआ पेरिस अलिम्पिकआव मोनसे रुपा आरो मोनबा ब्रन्जनि मेडेल देरहानो हादों।

अमन शेहरावतआ बे मेदेलखौ देरहाना आरोबाव मोनसे जारिमिन सोरजिदोंमोन। अमनआ 2024 मायथाइनि अलिम्पिकआव गिबि खेबनि थाखाय अलिम्पिकआव हाबनानैनो मेडेल देरहानाय सासेल' भारतारि गेलेगिरि जानो हादोंमोन।

बेयाव आरोबाव मोनसे मुंख'जाथाव बाथ्राया बेनोदि भारतआ 2008 मायथाइनि बेइजिं अलिम्पिकनिफ्राय खमलायनायाव मेडेल देरहागासिनो दं। सुशील कुमारा 2008 मायथाइयाव ब्रन्जनि मेडेल देरहादोंमोन, सुशील कुमारा 2012 आव रुपानि मेडेल आरो योगेश्वर दत्तआ ब्रन्जनि मेडेल देरहादोंमोन।

बेबायदिनो, 2016 मायथाइनि रिय' अलिम्पिकआव साक्षी मलिकआ ब्रन्जनि मेडेल, 2020 मायथाइयाव रवि दहिया आरो बजरंग पुनियाया मेडेल देरहादोंमोन। 2024 मायथाइयाव, अमनआ मेडेल देरहादोंमोन आरो अलिम्पिकआव खमलायनायाव मोनसे मेडेल देरहानाय सोलिबाय थानायखौ लाखिदों।

इराकनि संसदाव मोनसे दान्थे-बिदान्थे गोनां बिल लाबोनायनि प्लेन। जाय हिनजावसाफोरनि थाखाय आयेनारि हाबानि बैसोखौ गु बोसोरसिम आरो हौवासानि आयेनारि हाबानि बैसोखौ 15 बोसोरसिम बाङाइ खालामनायनि।

बे बिलआ नोगोरारिफोरखौ नख'रारि आयदाफोराव थिरांथा लानो थाखाय धोरोमारि बिबानगिरि एबा नोगोरारि न्यायबिफाननि जायखिजाया मोनसे सायख'ना लानो होगोन, जायनि जाहोनाव उनमोनथाय, खुदिया जोथोन लानाय आरो फाथैलाइ बिसिनायजों लोब्बा थानाय आयेनारि खान्थिफोरखौ माबोरै गाज्रि खालामनो हायो बेनि बागै जिंगा सिखांदों।

खौरां एजेन्सि ए.एफ.पि.जों मोनसे मोगा-मोगियाव, हिउमेन राइट्स वाच (HRW) नि बिजिरसंगिरि सारा सानबरआ बुंदोंमोन दि जुदि आयेनखौ बारहोनाय जायो, अब्ला मोनसे हादोरखौ उन जानानै थानाय नुनो मोनगोन, आवगायनाय नङा।

सानबारनि आफादा बे बोसोरनि जागायजेन्नायाव सांग्रांथि होदोंमोन दि इराकनि धोरोमारि दैदेनगिरिफोरा आथिखालनि आयेनफोरखौ सिफायनानै बोसोरफ्रोमबो गथ'सा हाबाजों लोगोसे रोजा-रोजा रेबथुमजायै हाबा खालामो।

इराकाव उन्दै बैसोआव हाबा जानाया जिंगासिनो गोनां आयदा जानानै दं। युनिसेफनि खारि बायदिब्ला, 20 निफ्राय 24 बोसोर बैसोनि गेजेरनि 28 जौखोन्दो आइजोफोरा 18 बोसोर बैसोनि सिगां हाबा जानायमोन। बेनि अनगायैबो, बिसोरनि गेजेराव 7 जौखोन्दो आइजोफोरा 15 बोसोर बैसोनि सिगां हाबा जानायमोन।

अमल काबासीआ इराक आयजो नेटवर्कनि उकिल हानजानिफ्राय ए.एफ.पि.नो खोन्थादोंमोन, बे सोदांनाया सिगांनिफ्रायनो सोलिबाय थानाय समाजाव "नख'रारि आयदाफोराव हौवाफोरनि गोहोमथिनि बिथिंखौ दिन्थियो"।

एम.पि.फोरनि गोख्रों फिनजाथायजों मोगा-मोगि जानायनि उनाव जुलाइनि जोबनायाव बे थांखिखौ संसदनिफ्राय बोखारनाय जादोंमोन। बेखौ 4 आगस्तआव शिया ब्लकनि मददजों फिन सिनायथि होनाय जादोंमोन जाय गोबां गोहो लादोंमोन।

गोजाम शराइघाट दालांआ दिनै हर आव बन्द' थागोन। दिनै हरनि 10 रिंगानिफ्राय गाबोन रबिबारनि फुंनि 5 रिंगासिम गोजाम शराइघाट दालांआव गारिफोरनि थांलाय-फैलाया बन्द' थागोन। दालांखौ फाहामनो थिरांथा लानाय जादों। आसामनि गोबां जिल्लाफोरनि पुलिस सामलायगिरिफोरनो बिथोन होनाय जादों। गोबां गारि-मथर खारनायनि थासारियाव राहा लानो बिथोन।

रायखांनो गोनां दि गोजाम शराइघाट दालांआ सानफ्रोमबो थांलाय-फैलायनि थाखाय मोजां नङि जादों। दालांआव गिदिर हाखरफोर सोमजिदों। बेखायनो दायो फाहामनायनि गोनांथि जाना फैदों। आरो बेनिखायनो बिफाना दिनै हराव गोजाम दालांखौ फाहामनायनि थाखाय बन्द' खालामगोन।

"आसामनि मोनफ्रोमबोफ्राम जिल्लायानो दा मिनि बांग्लादेशआव सोलायदों। नसुंसेनि बांग्लादेशनि बागै बयबो मिथिखागौ जानो हागौ। माबोरै हिन्दुफोरनि सायाव गाग्लोबनायफोरा बेयाव सोलिगासिनो दं।" मैया फिन खेबसेबाव आसामनि गिबि मन्थ्रि हिमन्त बिस्व सर्माया बेबादि बुंदों।

आसामाव बांग्लादेश बायदि आबहावा :

बांग्लादेशआव माब्लाबा-माब्लाबा जेंनायाव गोग्लैनाय हिन्दु सुबुंफोरनि खौरां मोननाय जायो। बेखौ नुनानै रायजोनि गिबि मन्थ्रि हिमन्त बिश्व सर्माया गिनाय मोननाय फोरमायदों इयुनाव आसामावबो बेबादिनो जागोन नामा होनना। सुक्रबारखालि गुवाहाटीआव हिन्दु धोरोमनि बैष्णव दोरोंनि सत्रनि खुंनाय हाबाफारियाव गिबि मन्थ्रिआ धोरोमारि बिथायाव आसामाव गाग्लोबनायनि सायाव गोबां बेरफ्रुसार बिबुंथि होयो।

"आसामनि मोनफ्रोमबोफ्राम जिल्लायानो मिनि बांग्लादेशआव सोलायदों। आसामनि गोबां सत्रफोरनि हाखौ सुबुंफोरा दखल खालामबाय।" आसामनि गोबां जिल्लाफोराव मोनसे थि हारि नि सुबुं अनजिमाया गोबां बांनायनि बाथ्रा मख'नानै हिमन्त बिस्व सर्माया मैया आसामाव हिन्दुफोरनि इयुनखौ लानानै दुखु फोरमायदों। बांग्लादेशआव हिन्दुफोरनि अनजिमाया खमायनाय आरो अनागारि खालामनायखौ नोजोर होनानै हिमन्त बिस्व सर्माया बुंदों: "दिनै नसुङारि बांग्लादेशआव हिन्दुफोरनि अनजिमाया 35 जौखोन्दोनिफ्राय खम जालांनानै 8 जौखोन्दो जाबाय।- थानसालिफोरखौ गाज्रियै सिफायनाय जादों। जुदि जों साननो हायोब्ला नुगोन आसामनि बरपेटा, धुबुरि जिल्लायाव 12 जौखोन्दो हिन्दुफोर दं। जेरै बांग्लादेशआव 12 जौखोन्दो हिन्दुफोर दं, बेबायदिनो धुबुरीआव 12 जौखोन्दो हिन्दुफोर दं। बरपेटाबायदि जिल्लाफोराव 30 जौखोन्दो हिन्दु सुबुंफोर दं। मरिगावआव जों 35 जौखोन्दोल' हिन्दु दं होनना बिथाङा बुङो।

समाजारि बिजों पस्टनि गेजेरजों बांग्लादेशनि दावराव-दावसिनि सायाव मदद फोरमायनायनि थाखाय आसामनि सासे लाइमोनखौ बावैसो पुलिसआ हमदोंमोन।

दायनिगिरि रेजुआन उल्ला मजारभुयनखौ हाइलाकान्दि पुलिसा लाला पुलिस थानानि सिङाव थानाय रंगपुरनि वार्ड नम्बर 5 आव थानाय बिनि थाग्रा खुलिनिफ्राय खादोंमोन।

24 बोसोर बैसोनि सेंग्राया फेसबुकआव मोनसे पस्टआव भारतआवबो बांग्लादेशनि हिंसानि एखे रोखोमनि फिथाय होनो खावलायदोंमोन।

बेंग'लिआव मोनसे पस्ट लिरनाय रेजुभाना दाबि खालामो दि नसुङारि हादोराव दावराव-दावसिनि गोहोमखौ आसामआवबो मोनदांनाय जागोन होनना।

गावनि उननि बिबुंथियाव, बियो उदखारि हानजा अल कायदाजों सोमोन्दोनि बाथ्राखौबो मुंख'दोंमोन। दायो पुलिसा बिखौ सोंथि खालामगासिनो दं।

बिखौ आयेन बेरेखा हाबाफोर, दायगोनां फावफान्दायनाय, हान्जाफोरनि गेजेराव सुथुरखौ बांहोनाय आरो सोरखारनि बेरेखायै बिग्रायनायनि दायआव खानाय जादोंमोन।

बांग्लादेशआ 1971 मायथाइयाव बांग्लादेशनि उदांस्रि दावहानि बारग' रौनियाफोरनि नखरफोरनि थाखाय 30 जौखोन्दो सोरखारि साख्रि थिखानानै दोन्नाय कोटा खान्थिखौ लानानै हिंसायारि सोमावसारनायजों मोगा-मोगि जानांदों।

जुनाव जागायजेन्नाय हिंसायारि हेंथा दिन्थिफुंनायाव सा 400 नि बांसिन सुबुंफोरा बुथारजादोंमोन।

हादोर नाङैनो हिंसायारि सोमावसारनायनि गेजेराव गाहाय मन्थ्रि शेख हसीनाया बिबान एंगारनाय आरो खारलांनायनि माखासे साननि उनाव, बांग्लादेशनि नबेल बान्था मोनगिरि महम्मद युनुसआ गेजेरारि सोरखारनि गाहाय महरै समायखिरा लादोंमोन। बेनि गेजेरावनो आसामाव बेबायदि सोमोनांथाव पस्त खालामनाया बयखौबो सोमोनांहोदों।