दिनै 29 जुलाइ 2025 मंगलबार साननि दासिमनि मोननैसो गोनां खौरांफोरजों दिनैनि सानखौ नोंथांमोना जागायदो।
1. फैबाय थानाय बिटिसि बिसायख'थिखौ लानानै बर'लेण्ड तेरितरियेल काउन्सिलाव बर'नि राजखान्थि दोलो इउपिपिएल आरो बिपिएफनि गेजेराव गोरोबथा जानांगौनि बाथ्रा सावरायजाबाय थानाय समावनो एबसुनि आफादगिरि दिपेन बर' बिथाङा बेनि सायाव फिनजाथाय होदों। समबारखालि उदालगुरिआव मोनसे खौरां मेलाव दिपेन बर'आ माखासे गोनां बिबुंथि होदोंमोन।
बिटिआरआव गोजोन
आरो खौसेथिनि आबहावा सोरजिनो मोन्नै ओनसोलारि दोलोनि गेजेराव गोरोबलायनायनि थाखाय
दुलाराय बर' फरायसा आफादा गेजेरारि बिफाव लागासिनो दं। बावैसो सानफोराव मोननैबो
दोलोनि गेजेराव फिन बाथ्रानि दावहाखौ नोजोर होनानै मोनसे खौरां मेलाव बिथाङा फिन गोरोबथा
खालामनो खावलायदोंमोन।
दिपेन बर'आ
मोनसे खौरांगिरि मेलनि गेजेरजों फोरमायोदि 34 बोसोर गोजाम बर' सोमावसारनायनि फिथाय
महरै दाजानाय मोननै बर' ओनसोलारि दोलो बिपिएफ आरो इउपिपिएलनि ज' जानाया बिटिआरआव
थानाय गासै बर' सुबुंफोरजों लोगोसे गुबुन हारिनि सुबुंफोरा ज' जानायखौ गोसो गोथारै
हास्थायदों। गोहोखौ दखल खालामनाया बर'नि माहारियारि राजखान्थि दोलोनि थांखि जानाङा। बदफा उपेन्द्रनाथ ब्रह्मनि गाहाय मोन्थोरनि
फारसे सन्मान होनानै ओनसोलारि दोलोखौ फिन सानफिननो खावलायदों आफादगिरि बिथाङा।
गुबुनफारसे
आगोलनि समाव सावरायलायनायनि सोमोन्दै बिथाङा बुंदों। 2024 मायथाइनि आगस्तनिफ्रायनो
सावरायलायगासिनो होनना फोरमायो। गिबि सावरायलायनायाव मोजां जादोंमोन, नाथाय उफ्रा
बिसायखथिनि उननिफ्रायनो दैदेनगिरिफोरनि गेजेराव गोरोबलायि नुनो मोननायनि सोमोन्दै
बुङो बिथाङा।
2. प्रफेसार गणेश चन्द्र वारि बिथाङा नेम बादियै, मैया ककराझार मुलुगसोलोंसालिनि गोदान भाइस चेन्सेलर महरै बिबान रुजुनबाय।
मुलुग सोलोंसालिनि लांगोनायाव मोनसे बरायनाय हाबाफारि
खुंनाय जादोंमोन, जेराव बर' साहित्य सभा, दुलाराय बर' फरायसा आफाद (एबसु) आरो बारग'
फरायसा आफादजों लोगोसे गुबुन गुबुन आफादफोरनि मावख'गिरिफोर, मावफारियाफोर आरो थान्दैफोरा
बाहागो लादोंमोन, जाय गोदान भाइस चेन्सेलरखौ गोसो गोथारै बरायदोंमोन।
फिजिक्सनि बिबुंगोरा प्रफेसार वारीआ क'कराझार मुलुगसोलोंसालियाव
बिबान नाजावनायनि सिगां कटन मुलुगसोलोंसालिनि प्र-भाइस चेन्सेलर महरै हाबा मावदोंमोन।
3. उदखारिफोरनि बेरेखा मोनसे अपारेसन, मुङा अपारेशन महादेव, बेखौ जम्मु-काश्मीरनि लिदवाश ओनसोलाव जागायजेनो। भारतारि रौनिया हानजानि चिनार कर्प्सआ समबाराव उदखारि बेरेखा अपारेसन जागायदोंमोन। रिपर्ट दाखिल खालामनाय समसिम मोननाय खौरांनि बायदिब्ला, श्रीनगरनि हरवाननि लिद्दास ओनसोलाव उदखारि आरो रैखाथि हान्जानि गेजेराव गावलायनाय सोलिगासिनो दंमोन। भारतारि रौनिया हानजाया सिगाङावनो फोरमायखाबाय दि अपारेसनाव साथाम उदखारिफोरा बुथारजादोंमोन।
रौनिया हानजानि
चिनार कर्प्सआ माइक्र'-ब्लगिं प्लेटफर्म एक्सआव लिरदों,
"लिडवाशनि सरासनस्रा ओनसोलाव
फोनांजाबनाय गायसननाय जादों। अपारेसना सोलिगासिनो दं। पीटीआईनि बायदिब्ला, समबारखालि सोहोरनि दासिगाम नेशनेल पार्कनि
खाथिनि हरवान ओनसोलाव एनकाउन्टार जादोंमोन। इन्टेलिजेन्स इनपुटनि सायाव बिथा
खालामनानै, रैखाथि गोहोआ हरवाननि मुलनार ओनसोलाव उदखारि बेरेखा अपारेसन
जागायदोंमोन।
गुदि खौरांनि
बायदिब्ला, पुलिस, रौनिया हानजा आरो सीआरपीएफनि मोनसे हानजाया दाचीगाम
हायुंआरि पार्कनि खाथियाव
मुलनारनि हाग्रा ओनसोलाव गाग्लोबनायनि उनाव जागायजेन्नाय अपारेसनाव खमैबो साथाम
उदखारिफोरा थाबथाना दंमोन।
रिपर्टनि बायदिब्ला, बुथारजानाय उदखारिफोरा पाकिस्तानाव थानाय आफाद
लश्कर-ए-तैयबा (एलईटी)निमोन।
बेखौ
गोसोखांहोनो हायोदि 22 एप्रिलाव पहलगाम गाग्लोबनायनि उनाव दानसेनि गोलाव उदखारि
बेरेखा अपारेसननि गेजेराव बे एनकाउन्टारआ जादोंमोन । बुथारजानाय उदखारिफोरा पहलगाम
गाग्लोबनायाव सोमोन्दो दंमोन होननाबो मिथिना मोनदों।
4. बिपिएफ नि एमएलए रबिराम नार्जारि बिथांनि खौरांगिरिफोरनि सिगाङाव गोनां बाथ्रा बुंदों। बिथाङा बुंदों-- जुदि बिजेपिजों लोगोसे थानानै खामानि मावनो हायाखै अब्ला जों बिजेपिजों गैला होनना ओंखारबोनानै फै, जों बिपिएफ आरो इउपिपिएल लोगोसे जानानै खामानि मावगोन, एसेबांनो जुदि असान्ति खालामदों एसेबांनो जुदि प्रेसाराव लाखिनानै खामानि मावगासिनो अब्ला नोंथांमोना मानो बेयाव थानांगौ, नोंथांमोना साफ्रोमबो आन्दोलन खालामनाय दैदेनगिरि, नोंथांमोना दुखु मोनोब्ला जोंबो दुखु मोनो, नोंथांमोना असान्तियाव थादों होनना बुंनायखौ नुनानै जोंबो गाज्रि मोनदों, दुखु मोनदों। मखजाथावदि इउपिपिएल नि गाहाय नेहाथारि राजु नार्जारि बिथाङा साननै सिगां मोनसे मेलाव मोजाङै खामानि मावनो हायाखै होनना बुंदोंमोन। बेनि सायावनो एमएलए बिथाङा एसेबां असान्तियाव थानानै प्रेसाराव थानानै, आन्थु खेरायनानै खामानि मावनाङा, ओंखारबो, जोंनिबो मोनसे मान सन्मान दं, जों बेखौ लानानै लोगोसे खामानि मावगोन, बेनो बिपिएफ इउपिपिएल लोगोसे जानानै खामानि मावनायनि मोनसे सुबिदा, ओंखारबो होननाबो बुंबावो।
5. बितिसि नि सिंनि भिसिदिसि नि सेक्रेतारि नि मासि नि साख्रि नि लिरनाय आन्जादनि रिजाल्तखौ फोसावबाय। गासै 1335 आनजाद होगिरिफोरखौ सायखनाय जादों, नोंथांमोना नायनानै लायोब्लानो जाबाय, रल नम्बरनि गेजेरजों नायनो हागोन रिजाल्तखौ। मिथिना मोननाय बादिब्ला फैगो 3 आरो 4 आगस्त आव बेनि भाइभा तेस्त आ जागोन, जायगाया कक्राझारनि स्तेसन रदनि सिएसबि अफिस बिल्दिंआव जागोन। एदमित कार्दखौ गाबोन 30 जुलाइनिफ्राय बिथांमोननि अफिसियेल वेबसाइत सेन्त्रेल सेलेकसन बर्द दत कम निफ्राय दाउनलद खालामनो हागोन।
6. शराइघाटनि गोजाम दालांआ सानब्रैनि थाखाय बन्द थागोन। बे दालांखौ फाहामनायनि थाखाय बन्द' दोननाय जागोन।
शराइघाटनि गोजाम
दालांखौ थाबैनो फाहामफिननाय जागोन। दालांनि गोबां बाहागोफोरा गाज्रि जादों
फाहामनाय समाव
गोदान दालांजों थांलाय फैलाया सोलिबाय थागोन।
बे बाथ्राखौ नर्थ ईस्टार्न फ्रन्टियार रेलवेनि सुबुं फोनांजाब मावख'गिरिया
फोरमायदोंमोन।
थांनाय गोबां
साननिफ्रायनो दावबायनाया गोजाम लामाजों सोलिगासिनो दं।
बबेखानि,
फाहामनायनि अक्ट'आ दासिमबो थि जायाखै।
रेलवे बिफाना
दालांखौ बन्द' खालामनो थाखाय जिल्ला खुंथायनिफ्राय गनायथि बिदोंमोन।
7. भारतनि 19 बोसोर बैसोनि दिव्या देशमुखआ जॉर्जियानि बाटुमीआव फिदे आयजो चेस वर्ल्द काप 2025 नि बिमुं देरहादोंमोन । बिथाङा बे जाफुंसारनायखौ मोननो हानाय गिबिसिन भारतारि आरो 88थि भारतारि ग्रैंडमास्टर जानो हादोंमोन ।
दिव्या देशमुखआ
समबाराव टुर्नामेन्ट फाइनालनि टाइब्रेकआव भारतनिनो कनेरू हम्पिखौ 2.5-1.5 स्क'रजों
फेजेननो हानानै गिबिसिन भारतारि चेम्पियन जानो हादोंमोन। देशमुखआ दा 43.23 लाख रां
($50,000) नि बान्था मोनगोन, जेराव हम्पीआ 30.26लाख रां
($35,000) मोनगोन।
दिव्या देशमुखआ
टाइब्रेकआव देरहादों
बे फाइनालनि
फिथाइया टाइब्रेकआव सौहैदोंमोन मानोना सानैबो गेलेगिरिफोरा फाइनालाव मोन्नै
क्लासिकेल मेचनि जोबनायाव 1-1 जों समान-समान जादोंमोन । जायनि थाखाय फिथाइया 10 मिनिटनि मोननै रेपिड
मेचफोरनि फिथायनि सायाव सोनारो, जेराव मोनफ्रोम आगाननि उनाव समआ 10 सेकेन्ड बांदोंमोन।
8. कर्परेट सेक्टराव खामानि मावग्रा रोजा रोजा मावफारियाफोरा साख्रि गोमाजानो थांगासिनो दं! बे खौरांआ सिगांनिफ्रायनो गासै हादोरावनो गोसारबाय। हादोरनि बयनिख्रुइबो देरसिन आई.टी. कम्पानिफोरनि गेजेराव मोनसे, टाटा कन्सल्टेन्सी सार्विसेस (टी.सी.एस.) आ गोबां अनजिमानि मावफारियाफोरखौ साख्रिनिफ्राय बोख्लायनो नागिरदों। कम्पानिया बुंदोंमोन दि सोलिफु रांखान्थियारि बोसोराव फ्राय 12,000 मावफारियाफोरखौ साख्रिनिफ्राय बोख्लायनाय जागोन।
जेब्लानिफ्राय
आर्टिफिसियेल इन्टेलिजेन्सनि जौगानाया जागायजेन्दोंमोन, अब्लानिफ्रायनो गिनाय
दंमोन दि बे खेबाव सरासनस्रा सुबुंफोरा गावसोरनि साख्रिखौ खोमानांगोन। बेबादि
गोबां रिपर्टफोरा फोसाव जाबाय। बे खेबाव टी.सी.एस. मावफारियाफोरा ए.आइ.
गाग्लोबनायजों गोहोम खोख्लैजायो । टी.सी.एस.आ बुंदोंमोन दि बियो गावसोरनि
कम्पानीयाव खामानि मावग्रा 2 जौखोन्दो मावफारियाफोरखौ साख्रिनिफ्राय बोख्लायनो
सानथांखि खालामदों।
जुन दाननि
अनजिमानि बायदिब्ला, मुलुगनाङैनो टी.सी.एस.आव फ्राय 613,000 मावफारियाफोरा
खामानि मावो। बेनि नै जौखोन्दो मावफारियाफोरखौ साख्रिनिफ्राय बोख्लायनाय जागोन, जायनि ओंथिया जादों 12,000 मावफारियाफोरा
गावसोरनि साख्रिखौ खोमानांगोन। सुलुंनि बायदिब्ला, जुनियर मावख'गिरिफोर नङा, गुबैयै गेजेर आरो देरसिन
थाखोनि मावफारियाफोरखौ साख्रिनिफ्राय बोख्लायनाय जागोन।
कम्पानीनि सिङाव
आर्टिफिसियेल इन्टेलिजेन्सनि बाहायनायाव जर'खा गोसो होनाय जादों। आर्टिफिसियेल
इन्टेलिजेन्सखौ गुबुन गुबुन थाखोफोराव बाहायनाय जागासिनो दं। बेनिखायनो
मावफारियाफोरनि गोनांथिया खमायलांगासिनो दं। बबेखानि टाटा कन्सल्टेन्सी
सार्विसेजनि सि.इ.अ. के. कृतिवासना ए.आइ.खौ आबुङै दायनिगिरि खालामनो लुबैया, बिथाङा बुंदोंमोन दि मावफारियाफोरखौ लासै-लासै साख्रिनिफ्राय
बोखारनाय जागोन। जायफोरा साख्रिनिफ्राय बोखार जागोन, बिसोरनो गुबुन जायगायाव
साख्रि नागिरनो थाखाय गोबां खाबुफोर होनाय जागोन। बिथाङा बेखौबो बुंदोंमोन दि बेखौ एचआर
खान्थिखौ फालिनानै खालामनाय जागोन।
जाय मावख'गिरिफोरा
कम्पानीखौ नागारनो गोनां जादों बिसोरनो थि हेफाजाब होनाय जागोन। बे
मावफारियाफोरखौ गुबुन गुबुन कम्पानिफोरनि थाखाय आरजलाइ होनो खाबु होनाय जागोन।
बिसोरनि इन्सुरेन्स कभारखौबो जेसेबां हायो एसेबां बांहोनाय जागोन। गोनांथि जायोब्ला काउन्सेलिंनि राहा खालामनाय
जागोन होनना मिथिहोयो।
9. मिथिनाय बायदिब्ला भूटानाव गोदानै लुजानाय गेलेफु गेटनि इमिग्रेशन बिलडिंआव गिख्रंथाव अर खामनाय जाथाय जादोंमोन, जायखौ मोब्लिबारि सर्ट सार्किटनि जाहोनाव जादोंमोन होनना साननाय जादों।
सुलुंनि बायदिब्ला, अरआ दाथायखौ
गोबां खहा खालामदोंमोन, नाथाय रावबो जोखोम जानायनि खौरां मोननाय जायाखै। गोबां लाख रांनि खहा जादों होनना साननाय जादों। बे जाथायनि सायाव
नायबिजिरनाया सोलिगासिनो दं।
10. मोनसे गोलाव समनि उनाव आहम स्वर्गदेवनि जारिमिनखौ एन.सी.ई.आर.टी. नि फराफारियाव सोफादेरनाय जादों। बारग' रायजो बेंगिरि एसके सिन्हानिफ्राय जागायनानै 'लचित' थुनफावथायसिम गुबुन गुबुन राहाफोरनि गेजेरजों हायुंआरि बिथिङाव आहम स्वर्गदेवफोरखौ दिन्थिखांनायनि उनाव, बावैसो मिरु सोरखारा फरायसाफोरनि फराफारियाव आहम स्वर्गदेवनि जारिमिनखौ सोफादेरदों। बे थिरांथाखौ फरायसा आफादफोर, मेलेमजिबिफोर, लिरगिरिफोर आरो गुबुनफोरा बरायदों।
"बेयो
आसामनि सुबुंफोरनि थाखाय मोनसे खाबु मोन्थाय" होनना पुलक कुमार डेकाया बुंदोंमोन, जाय आसामाव गिबि
खेबनि थाखाय मोनसे गिदिर बिथांखिजों थुनफावथायनि गेजेरजों लाचित बरफुकनखौ अपेन
फील्डआव सिनायथि होदोंमोन। गासै मुलुगानो आहम जारिमिन आरो लाचित बरफुकननि समायना नुथायनि बागै
मिन्थिनांगौ। फरा बिजाबनि गेजेरजों गियान आरजि; नाथाय दुखुनांथावै जोंनि थाखाय जोबोद गोबाव
जाबायमोन। थेवब्लाबो आथिखालाव आहम जारिमिनखौ एन.सी.ई.आर.टी. नि फराफारियाव
सोफादेरनाय जादों। फरायसाफोरा आह'म स्वर्गदेउफोरजों लोगोसे लाचित बरफुकन, चावलुं सुकाफानि सोमोन्दै मिथिथों होननाबो बुङो।
"
11. बिश्वनाथ पुलिसा फेग्रा मुवानि बेरेखा नागिरनाय हाबाफारि सोलिहोगासिनो दं, गोबां बिबांनि नोगोद रांजों लोगोसे सानै सुबुङा बिस्वनाथ पुलिसनि जेयाव गोग्लैयो, जाय बेसादनि बेरेखायै सम सम सिग्रोमनाय खालामबाय थायो।
रबिबाराव
बिश्वनाथ जिल्ला क्राइम ब्रान्सनि उफ्रा पुलिस सामलायगिरि अमित हजाइ आरो हालेम
पुलिसा 15 नं माहारियारि राजालामानि बुराइ दालांनि खाथियाव गंसे बेसेन गोसा गारिआव
सिग्रोमदोंमोन। पुलिसआ गारिनिफ्राय गोबां बिबांनि नोगोद रां जब्द खालामनो हादोंमोन
। सानै सुबुंखौबो खानाय जादोंमोन।
क्राइम
ब्रान्सनि उफ्रा पुलिस सामलायगिरि अमित ह'जाया बुंदों,
"रबिबाराव जेब्ला हालेम
पुलिसा नागिरगासिनो दंमोन, अब्ला मोनसे लक्जरी गोसोम गाबनि रेनॉल्ट डस्टर गारिखौ
सन्देह खालामनाय जादोंमोन।
पुलिसआ लक्जरी
गारिनिफ्राय नोगोद 67 लाख 69 रोजा 100 रां जब्द खालामो। पुलिस मावख'गिरिनि
बायदिब्ला, अरुणाचल प्रदेशनि इटानगरनिफ्राय गुवाहाटी फारसे थांबाय थादोंमोन बे लक्जरी गारिया। गारिनि गाखोग्रा
सानै सुबुंखौ पुलिसा फारियै वासुदेव पारीक आरो राजस्थाननि कमल कुमार होनना सिनायथि
होदों। सानै सुबुंखौ पुलिसा हमनानै आयकर बिफाननो गथायना होबाय।
बबेखानि, सानै
सुबुङा गारियाव एसेबां बुरजा बिबांनि नोगोद रांखौ बबेहाय आरो मानो
लांदोंमोन बेनि गुबै
गुमुरखौ दासिमबो मिथिनो मोननाय जायाखै।
bodoinfo.com provides informations regarding State Government, Central Government and Private sector jobs for the aspirants of assam.
Please do not enter any spam link in the comment box. ConversionConversion EmoticonEmoticon