दिनै 27 जुलाइ 2025 रबिबार साननि दासिमनि मोननैसो गोनां खौरांफोरजों दिनैनि सानखौ नोंथांमोना जागायदो।
भारतारि रौनिया
हान्जानि दैदेन्नायाव आरो बिटिसि काउन्सिल सोरखारनि हेफाजाबाव क'कराझारनि साइ
स्टेडियामाव दिनैनिफ्राय खुंफुंजानो गोनां जोलुर बादायलायनायनि थाखाय साखा-फारा
जाखाबाय। बादायलायनाय आरो बेखेवनाय हाबाफारिखौ गोसो बोनो हानाय खालामनो थाखाय
भारतारि रौनिया हानजानि हाबाफारिया गोख्रोङै सोलिगासिनो दं। बेनि अनगायैबो बिटिसि
सोरखारनि नाजानायाव गुबुन गुबुन हारिमुआरि आरो दिन्थिफुंनाय हाबाफारिफोरबो आखायाव
लानाय जादों।
साइ स्टेडियामाव
खुंफुंजानो गोनां डुरान्ड काप बादायलायनायाव
मोनब्रै हानजाया बाहागो लागोन। बेफोरनि गेजेराव मोनब्रै हानजाया
जाबाय बड'लेन्ड एफसि, पान्जाब एफसि, आइटिबिपि एफ सि आरो
कार्बि आंलं मर्निं स्टार्स। आसाम फुटबल एस'सिएशननि गाहाय नेहाथारि ड. सांग्रं
ब्रह्मआ बुंदों दि बेखेवनाय बादायलायनाया आइटिबिपि एफ सि आरो कार्बिआंलं मर्निं
स्टारनि गेजेराव जागोन।
क'कराझारा
डुरान्द कापआव मोनद' लीग मेचफोरनि अनगायै क्वार्टर फाइनाल बादायलायनायखौ खुंगोन। बेखेवनाय हाबाफारियाव बिटिसिनि सिइअ' प्रमद बर' आरो रौनिया हान्जानि गोजौ थाखोनि
मावख'गिरिफोराबो नुजाथिगोन।
तिकेतनि बेसेननि
सोमोन्दै मिथिना मोननाय बादिब्ला सोनाब आरो भि.आइ.पि. स्टेन्डनि थाखाय टिकेटनि
बेसेना 250 रां, सानजा
स्टेन्डनि बेसेना 150 रां आरो सा आरो खोलानि थाखाय 120 रां थि
खालामनाय जादों। गोसोब्ला बुक माइ श नि गेजेरजों बेखौ अनलाइन बायनो हागोन "
2. बिजनीनि पानबारी पुलिस थानानि सिङाव थानाय 4 नं दैलांझारआव मोनसे पुलिसनि अपारेसनाव गोबां बिबांनि हाग्रानि जुनार अंगजों लोगोसे सासे मैहुर खालामग्राखौ हमनाय जादों। पुलिसजों हमजानाय मैहुर खालामग्राया 4 नं दैलांझार गामिनि कमल मन्डल (40)।
सिग्रोमग्रा
पुलिस हानजाया सिखारिनि आवथानिफ्राय गंथाम मोसानि हाथाइ, मोन 10 आसुगुर , मोसानि
हारा 144 थुख्रा आरो गंसे मटर साइकेल आरो गंसे अप्प' मबाइल
हेन्डसेट बोखांनो हायो।
मोनसे थि स्रोद
सुलुंनि बिथाजों संदान्नानै सुक्रबारनि मोनायाव पानबारी पुलिस थानानि पुलिसा
सिग्रोमदोंमोन आरो जब्द खालामनाय मुवा-बेसादफोरजों लोगोसे सिखाव फालांगिरि कमल
मन्दलखौ खादोंमोन। उनाव, हमजानाय सिखाव फालांगिरि कमल मन्दलजों लोगोसे जब्द
खालामनाय मुवाफोरखौ पानबारी पुलिस थानायाव लाबोनाय जादोंमोन। बांसिन गुवारै मिथिनो
थाखाय हमजानाय मैहुर खालामग्रा कमल मन्डलनि सायाव नायबिजिरनाया सोलिगासिनो दं।
3. बिसायख'थिनि सिगां बिटिआरआव बि.जे.पि. नि थाखाय मोनसे गिदिर खहा। बि.जे.पि. नि क'कराझार जिल्लानि बारग' आफादगिरि शिबनाथ ब्रह्मआ बि.जे.पि. नागारो आरो बिपिएफआव हाबो। बि.जे.पि. नि सासे गागि दैदेनगिरि जानायनि अनगायैबो, शिवनाथ ब्रह्मआ बि.जे.पि. एस.टि. मर्चानिबो आफादगिरिमोन। बाक्सा जिल्लानि बरमानि खारुवायाव सनिबारखालि जानाय बिपिएफनि 90थि मिरु मावफुं मेलाव शिबनाथ ब्रह्मआ दोलोनि आफादगिरि हाग्रामा मोहिलारिनि नुजाथिनायाव बिपिएफ दोलोआव हाबो। बिथाङा दोलोआव हाबनायनि उनाव हाग्रामा महिलारि बिथाङा मा बिबान होयो बेखौनो मावगोननि सोमोन्दै बुङो, लोगोसेनो बिसायखथि गेलेनो लुबैनायनि सोमोन्दैबो बुङो। बिथाङा बिजेपि दोलोखौ जेबो गाज्रि मोना, बिजेपि आ माहारियारि दोलो, गासैबो फिसा फिसा दोलोफोरखौ लोगोसे लाफाना सोलियो, नाथाय बितिसि आव बेबादि लोगोसे लाफाना सोलिनायनि थाखायनो मासिखौ हगारना होनो गोनां जायो एबा बिजेपि आ गेलेनो मोना जायो। बेफोरबादिनि थाखायनो ओंखारदों होनना फोरमायो बिथाङा।
4. रायजोआव स्मार्ट मिटार फोनांजाबनाय खामानिया सोलिबायनो थागोन। मोननैसो खौरां बिजोंआव स्मार्त मितारनि जायगायाव आगोलनि बादिनो दिजितेल पस्तपेइत मितार लानो हागोन होनना, नाथाय बेबादि जानाय नङा, एपीडीसीएलआ स्मार्ट मिटारनि सोलायै गोजाम डिजिटेल मिटार खान्थियाव फैफिनगोन होनना फोसावनायखौ नुनो मोनदोंमोन खौरां बिजोंफोरखौ। नाथाय एपीडीसीएलआ बेखौ नेवसिगारदों। बेखौ मिथिनो मोनदोंमोन दि जिवन धारा आरो नख'रारि (ए) थाखोनि बायगिरिफोरा पस्टपेड मिटार मोनगोन होनना।
मोनसे ससियेल
मेडियायाव एपीडीसीएलआ बुंदोंमोन
दि "बावैसो गुबुन गुबुन प्रिन्ट आरो इलेक्ट्रनिक बिजोंआव 'स्मार्ट मिटार फज'नायखौ बन्द' खालामनायनि मोनसे खौरां रिपर्टआ एपीडीसीएलनि
नोजोराव फैदों। बे बिथिङाव, एपीडीसीएलआ रोखा खालामनो लुबैदों दि एपीडीसीएल आरो
रायजो सोरखारा स्मार्ट मिटारखौ बन्द खालामनो आरो फिन स्मार्ट मिटारआव थांफिन्नो
थाखाय जेबो बिथोन होआखै। ए.पि.डि.सि.एल.आ स्मार्ट मिटार मोनजासिम गामियारि ओनसोलाव
बाहायगिरिफोरनो गोदान मोब्लिब फोनांजाबनायखौ गोख्रै होनो मोनसे अरायथा नङि राहा
लादों। नाथाय बे बिथोनखौ गुबुन गुबुन राहाजों गोरोन्थि ओंथि बेखेवनाय जादों,
बेनिखायनो बाहायगिरिफोरा
जेबो रोखोमनि गोनो गोथोनिफ्राय बारग'नो हायो बेनि थाखाय बे बिथोनखौ बोखारनाय जादों।
मोब्लिब बिफान, भारत सोरखार आरो आसाम
मोब्लिब सामलायग्रा आय'गजों फोसावजानाय नेम-खान्थि बायदियै रायजोआव स्मार्ट मिटार
फज'नाया सोलिबाय थागोन। जोंनि मानगोनां बायगिरिफोरखौ बे बिखान्थियाव हेफाजाब होनो
थाखाय गुरैयै खावलायनाय जायो। होनना लिरदों बिथांमोना '' मखजाथावदि बिथांमोना गोदान
मोब्लिब बाहायगिरिफोरनि थाखायलसो साननैसोनि थाखाय दिजितेल मितार होगोननि बाथ्रा बुंदोंमोन,
नाथाय आगोलाव थाखानायफोरनि थाखाय नङामोन बेयो। बेखौनो गोबाङानो नंखायै फोसावनायखौ
नुनो मोनदोंमोन आरो गासै आसामावनो दावराव जादोंमोन।
5. रायजोनाङैनो होखारनाय हाबाफारिया सोलिगासिनो दं । गिबि मन्थ्रि हिमन्त बिश्व सर्मा सोरखारा रैखाथि होजानाय हाग्राफोरजों लोगोसे सोरखारि हायाव दखल खालामनायनि बेरेखायै गोबां हाबाफारि लागासिनो दं । रोजा रोजा हेक्टर हाखौ सिगांनिफ्रायनो दखल खालामग्राफोरनिफ्राय उदां खालामनाय जाबाय ।
होखारनायनि
सोमोन्दै गिबि मन्थ्रिया बावैसो मोनसे खौरां मेलाव बुंदोंमोन दि 2021
मायथाइनिफ्राय बे बोसोरनि 12 जुलाइसिम थांनाय ब्रै बोसोराव गासै 1,19,548 बिघा
हाखौ दखल खालामनायनिफ्राय बोखारनाय जाबाय।
दखल
खालामनायनिफ्राय बोखारनाय हानि गेजेराव 84,743 बिघा थिखानाय हाग्रा हा, 4,643 बिघा भिजिआर आरो पिजिआर हा, 26,713 बिघा सोरखारि खासलेन्ड हा आरो 4,449 बिघा
सत्र-नामघरनि हा। बे समाव 160 बर्ग किल'मिटार हाखौ दखल खालामनायनिफ्राय उदां
खालामनाय जादों आरो 50,000 सुबुंफोरखौ होखारनाय जाबाय।
बेराफारसेथिं, गिबि मन्थ्रिनि बायदिब्ला, रायजोनि हाग्रा
ओनसोलफोरजों लोगोसे गुबुन गुबुन थाखोनि गोबां लाख बिघा हाया दासिमबो दखल
खालामग्राफोरनि आखायाव दं । नाथाय बे गिदिर होखारनाय हाबाफारिनिफ्राय त्राइबेल
बेल्ट आरो ब्लकफोराव दखल खालामनायखौ नागारनाय जादों । त्राइबेल बेल्ट आरो
ब्लकफोराव लाख लाख बिघा हाया दखल खालामग्राफोरनि आखाइयाव दं । दुलाराय आसाम
ट्राइबेल संघआ सोरखारा बे हाखौ दखल खालामनायनिफ्राय उदां खालामनो जेबो हाबाफारि
लायैयाव दुखु मोननाय फोरमायदों ।
अल आसाम
ट्राइबेल एस'सिएशननि नेहाथारि आदित्य खाखलारीआ सोरखारखौ होखारनाय हाबाफारिखौ मदद
होयो आरो बुङो, "सोरखारा मानो हादोरसानि थागिबि सुबुंफोरनि थाखाय थिखानाय हायाव दखल खालामनायखौ
बोखारनो साहस गैया ? सोरखारा रायजोआव त्राइबेल बेल्ट आरो ब्लकफोरखौ दखल
खालामनायनिफ्राय बोखारनांगौ । जों थिखानाय हाग्राफोराव आयेन बेरेखा दखल
खालामग्राफोरखौ होखारनो थाखाय रायजो सोरखारजों लाजानाय हाबाफारिखौ बरायदों आरो
आबुङै हेफाजाब होयो । " होननाबो बुङो बिथाङा।
6. हाबानि सिगां मेघालयआव HIV/AIDS आनजाद नायनायखौ गोनांथार खालामनो हागौ। रायजोनि सावस्रि आरो नखर अनसाइ मन्थ्रि माजेल अम्पारिन लिंगद'हआ सुक्रुबाराव मोनसे फोसावलाइआव बुंदोंमोन दि मेघालयआव ग'वानि बायदि बेबादि आयेनारि राहा लानायनि थांखिखौ साननाय जादों।
लिंगद'हआ
बुंदोंमोन दि मेघालय एड्सद
कन्ट्रल ससाइटी (एमएसीएस) जों होजानाय
गिथावना रिपर्टआ रायजो सोरखारखौ बेबादि आयेन बानायनानै हाबानि सिगां एचआईवी/एड्स
आनजाद नायनायखौ गोनांथार खालामनायनि गोनांथिखौ हमदांनो हादों।
"गवा बायदि, जोंनि रायजोआवबो आयेनारि राहाफोर थानांगौ
जायनि गेजेरजों हाबानि सिगां एचआईवी/एड्सनि आनजाद नायनाया गोनांथार जागोन। बे
खान्थिया समाजनि थाखाय मुलाम्फा गोनां जागोन, "लिंगद'हआ
शिलंआव खौरांगिरिफोरनो बुंदोंमोन।
बृहस्पतिबाराव
लेङाइ गिबि मन्थ्रि प्रेस्ट'न टिनसंनि
दैदेन्नायाव जानाय मोनसे जथुमाव मोनसे आबुं एचआईवी/एड्स खान्थि
बानायनायनि सायाव सावरायनाय जादोंमोन। लिंगद'हआ बुंदोंमोन दि सावस्रि बिफानखौ
केबिनेटआव पलिसिखौ दिन्थिनो थाखाय मोनसे ड्राफ्ट बानायनो बिथोन होनाय जादों। बिथाङा
बुंदोंमोन दि बे जथुमाया गाहायै सानजा खासी हिल्स जिल्लानि थाखाय खुंजादोंमोन,
जेराव 2024 मायथाइयाव 3,432 एच.आई.वी. पजिटिभ बेरामिफोर मोन्नाय
जादोंमोन, जाय सिगांनि बोसोरनि फ्राय नै गुन। बेफोरनि गेजेराव 1,581 आल'
आथिखालाव एन्टी-रेट्रोवायरल थेरापी (ए.आर.टी.) लागासिनो दं।
लिंगद'हआ
बुंबावदों दि रायजोनि गुबुन बाहागोफोरावबो बेबादि जथुमफोर खुंनाय जागोन आरो जायगायारि
बिथा खालामनाय मावखान्थिफोर बानायनाय जागोन, जेराव मावख'आरिफोर आरो सावफाहामारि रोंग'साफोरजों सावरायनाय
जागोन। बिथाङा बुंदोंमोन दि जयन्तिया हिल्स ओनसोलाव बयनिख्रुइ बांसिन पजिटिभ केस
मोननाय जादों।
7. गासैबो 29 जुलाइखौ नेनानै दं। मानोना बे सानावनो गोजौ आसामाव दखल खालामनायनि मिरु थावनियाव होखारनाय जागायजेन्नायनि आसा दं। गिबि मन्थ्रि ड: हिमन्त बिश्व शर्माआ खौरां बिजोंनि गेजेरजों दिन्थिदोंमोन दि माबोरै उरियामघाटआव दखल खालामग्राफोरा गय गायनानै हाग्राफोरखौ फोजोबस्रांदोंमोन आरो मोनसे साम्रायजो गायसनदोंमोन।
खुंथाया
सिगांनिफ्रायनो गलाघाट जिल्लानि उरियामघाटआव होखारनायनि थाखाय न' न' थांनानै नटिस
हरखाबाय । बेनि उनाव सुक्रुबाराव गिबि मन्थ्रिया उरियामघाट सिमायाव फैदोंमोन आरो
दखल खालामजानाय हाफोरखौ नायगिदिंदोंमोन। बेनि गेजेरावनो सरुपथार बियाबनि एमएलए
बिस्वजित फुकनआ ससियेल मेडियायाव होनाय मोनसे पस्ट सावरायजागासिनो दं ।
गिबि मन्थ्रिआ दखल खालामजानाय हाफोरखौ नायनानै फैफिन्नायनि उनाव एमएलए बिस्वजित फुकनआ गावनि एक्स पस्टआव बुंदोंमोन दि 29 जुलाइआ सरुपथारनि थाखाय मोनसे जारिमिनारि सान जागोन आरो गिबि मन्थ्रि ड: हिमन्त बिस्व सर्माखौ साबायखर बावनानै बुङो, "29 जुलाइ, 2025 आ सरुपथारनि थाखाय मोनसे गोनांथार आरो जारिमिनारि सान जानानै थागोन। मानगोनां गिबि मन्थ्रि हिमंत बिस्वा सरमा खौ साबायखर बावो । होनना "
बेखौ नोजोर होनो
गोनां दि होखारनाय हाबाफारिखौ 29 जुलाइआव उरियामघाट सिमायाव खालामनाय जानो हागौ। एम.एल.ए.
आ फेसबुक पस्टनि गेजेरजों बेखौनो बेखेवनो नाजादोंमोन होनना सानदों गोबां
सुबुंफोरानो। दखल खालामजानाय हानि जरिपआ
सोलिबाय थानाय समावबो उरियामघाटनि खौरांआ खौरां बिजोङाव गिबि खौरां जादोंमोन। गिबि
मन्थ्रिजों होजानाय बेरफ्रुग्रा खौरांनि उनाव, बेयो सिमायाव थाग्रा दखल
खालामग्राफोरनि गेजेराव दावराव जादोंमोन। होखारनायनि नटिस मोननायनि उनाव 1,000 नि
बांसिन नखरफोरा सिमा नागारबाय। नाथाय बे समावनो दखल खालामग्राफोरनि मोनसे बाहागोआ
फैफिनबाय।
bodoinfo.com provides informations regarding State Government, Central Government and Private sector jobs for the aspirants of assam.
Please do not enter any spam link in the comment box. ConversionConversion EmoticonEmoticon