रायजो नि सोलोंथाय खोन्दो आव मोनसे आरो दाजाबदेरनाय, बर फोरनि
थाखाय मोनसे मोजां खौरां, हायार सेकन्दारि आव बर बिजों खौ सोनाय जाबाय, बर बिजों
खौ हायार सेकन्दारि नि सोलोंथाय नि बिजों महरै रायजो बेंगिरि आ गनायथि होयो,
मखजाथावदि आगोलनिफ्राय नो बेखौ जानायनि खौरांफोर मोनबाय थादोंमोन, कक्राझार आव जानाय
केबिनेत नि जथुम आव बेखौ बाहायनायनि थिरांथा लानायनि खौरां बो मोनदोंमोन, दायो
बाहायजासिगोन।
बितिसि ओनसोल नि 1999 मायथाय आव साख्रि मोननाय फोरोंगिरिफोरनि जेंना
या। बितिसि नि सोलोंथाय बिफान नि मोनसे गेदेर जेंना या सुस्रांजाबाय। प्रमद बर दैदेननाय
बितिसि परिषद आ सनिबारखालि फिन सा 591 फोरोंगिरिफोरनो साख्रि खौ रेगुलार खालामनाय
नि थिसनलाय होयो, मुशलपुर आव होनाय जायो साख्रि थिसनलाय खौ, मिथिना मोननाय
बादिब्ला 1999 मायथाइ आव सोखावजायि नलबारि जिल्ला याव बिसोरनो फोरोंगिरि नि साख्रि
होदोंमोन, नाथाय 2009 मायथाइ आव साख्रि निफ्राय बोख्लायदोंमोन, नाथाय 2015 मायथाइ
आव फिन गोजौ बिजिरसालि आ सा 1300 फोरोंगिरिफोरखौ जइन जानायनि बिथोन होदोंमोनब्लाबो
नाथाय दरमाहा मोनाखैमोन, दायो बिजिरसालि नि बिथोन बादियै रेगुलार खालामो। मानगोनां
केबिनेट मन्थ्रि इउजि ब्रह्म, लेङाइ बुंथिगिरि बिटिसिएलए अभिराम महानायक, मावफुं
सोद्रोमाफोर राकेश ब्रह्म, घनस्याम दास, रन्जित बसुमतारी, धनन्जय
बसुमतारी, एमएलए जलेन दैमारी, एमसिएलए
फोर दिलिप कुमार बर', मन्तु बर' आरो हेमन्त कुमार राभा बिथांमोनहाबो बे हाबाफारियाव नुजाथि
फैदोंमोन।
बितिसि सोरखार नि ईएम घनश्याम दास बिथांनि बेरेखा थगायनाय नि
अजद। मन्तु बर मुंनि सासे खौ 3 कौति रां नि खामानि होगोन होननानै फख्रि
जावहोदोंमोन आरो लोगोसे नो अन्थाय जाबहोदोंमोन नि अजद, दिहिरा नि बरकफा याव, बोसोर
1 जालांबाय नाथाय दासिमबो रां खौ सेंकसन खालामना होनो हायासै, लिस्त आव सोना होगोन,
आगोलाव खामानि मावग्रो होनना बुंदोंमोन, बेखायनो खामानि खौ मावदोंमोन, होगोन होगोन
होनना बुङो, नाथाय दासिम जेबो होआखै, गोबां सुबुंफोरनिफ्राय दाहार लानानै सो
खामानि मावदोंमोन, दायो जायफोरनिफ्राय रां लादोंमोन बिसोर रां खौ मोनि नि न नि
मुवा बेसादफोरखौ नो लाना थांदों होनना बो बुङो बिथाङा, लिस्त आ फैयि नि थाखाय
गावनो गावनिफ्राय स्किम होगोन होनना बुंदोंमोन होनना बो बुङो, बे खामानि नि थाखाय
1 कौति 20 लाख रां खरसा जादों होनना बुङो। बिथाङा ईएम बिथांखौ थाबैनो खामानि होनो
खावलायदों, दायो 80 लाख रां दाहार जाना दं होनना बुङो बिथाङा।
बितिसि प्रसासन नि दैदेननाय आव गिबि खेब ISSPL(Inter Sixth
Schedule Premier Leage) 2022 खुंनो थांगासिनो दं, सा सानजा भारत नि रायजोफोरनि अतनमास
काउन्सिल फोरखौ लानानै बे जोलुर गेलेनाय बादायलायनाय खौ खुंनो थियारि, गासै 10 ता
अतनमास काउन्सिल आ बेयाव बाहागो लागोन, मोन 10 नि मोन 3 आ आसामनि, दिमा हासाव
अतनमास काउन्सिल, कार्बिआंलं अतनमास काउन्सिल आरो बितिआर। फैगो 9 अक्तोबर आव
उदालगुरि जिल्ला नि दिमाकुसि आव गिबि गेलेनाय आ जागोन, 9 अक्तूबर निफ्राय 23
अक्तोबर सिम जागोन, बादायलायनाय नि लिग नि गेलेनाय आ उदालगुरि जों लोगोसे
कक्राझार, सिरां आरो बाक्सा जिल्ला याव बो जागोन।
गासैबो जथायै सावरायलायनानै सोरबा रोंगौथि गोनां आयेन कानुन नि
सायाव बिसोरनि साजेसन लानानै माबाफोर राहा दंब्ला बे राहा नि गेजेरजों आवगायलाङोब्ला
माबा मोनसे मोजां फिथाय मोननो हागौ होनना बुंदों आसाम आयेन आफाद नि बुंथिगिरि
बिस्वजित दैमारि बिथाङा, जों कोर्त खौ दाय होनो हाया, कोर्त आ आलादा, सोरखार आ
आलादा आरो आफाद फोरा बो आलादा होनना बो बुङो। जों बयबो खौसे जानो नांगौ, खौसे
जानानै सो लामा दिहुननो नांगौ होनना बुंदों। लोगोसे नो सानसे सिगाङाव डा. अन्जालि
दैमारि बिथाङा खौरांमेल नि गेजेरजों दानि आसाम आयेन आफाद नि बुंथिगिरि बिस्वजित दैमारि
बिथांखौ रन्जन दैमारि बिथांनि उदां खालामनायनि थाखाय आसामनि दानि गिबि मन्थ्रि
हिमन्त बिस्व शर्मा बिथांखौ लोगो हमहोनो थाखाय एपइन्तमेन होनो थाखाय खावलायदोंमोन,
नाथाय 5 दान आव खनसेबो होनो हायासै होनना बुंदोंमोन, बेनि सायाव नो मैया
खौरांगिरिफोरनि सिगाङाव बुंदों बिस्वजित दैमारि बिथाङा— आं नाजादोंमोन, माब्लाबा बिथाङा
सम मोना, आंबो गुवाहाति आव थाबाय थाया, माब्लाबा बावगारो, एपइन्तमेन्त खौ थ आं
होनो हाया सुबुं आ सो होनो नांगोन, आं हाजासे नाजादोंमोन, माब्लाबा सम गैया जायो
होनना बुंदों। बेफोरखौ रायलायनानै फोजोबनो हाया होनना बुंदों। मखजाथावदि आसाम आयेन आफाद नि बुंथिगिरि बिस्वजित दैमारि बिथाङा
बडफा उपेन्द्र नाथ ब्रह्म बिथांनि बियादै थुलाव ब्रह्म बिथांनो अरायथा साख्रि नि
थिसनलाय होदों, खौरां मोननाय बादिब्ला बडफा नि जोनोम गामि बरागारि आव थांनानै नो
बेखौ होयो। लोगोसे नो गुबुन सासे सोलेरारि हेंथा गोनां बियादै मुस्रि मेनला ब्रह्मनो
इलेक्ट्रिक हुइल चेयार गथायना होदों होनना खौरां मोनदों।
दरं जिल्ला नि धुला पुलिस थाना नि असि खौ सासपेन्द खालामबाय,
असि नि मुं खौ निताइ चन्द्र रय होनना मिथिना मोनदों, नेम खौ सिफायनाय नि दाय आव
सासपेन्द खालामनायनि खौरां मोनदों, बिबान आव थानाय समाव नो गोबां जौ लोंनायनि अजद
बिनि बेरेखा, जिल्ला नि एसपि प्रसान्त शइकिया बिथाङा लोगो लोगो सासपेन्द
खालामनायनि बिथोन होयो।
बितिसि सोरखार आ फिन रोदोमखां मिशन नि गभार्निं बदि खौ दानानै
होबाय, बेयो बारग एनदिएफबि फोरनि थाखाय, रांखान्थियारि जौगानाय लाबोनो थाखाय नो बे
फिन रोदोमखां मिशन आ। बितिसि नि गाहाय प्रमद बर, लेङाय गाहाय गोबिन्द चन्द्र
बसुमतारि, ईएम रन्जित बसुमतारि, बितिसि नि प्रिन्सिपाल सेक्रेतारि अनुराग गोवेल, एदिजिपि
हिरेन चन्द्र नाथ आरो एमसिएलए सन्जय स्वर्गियारि बिथांमोना एदभाइजार महरै थागोन
आरो बेनि आफादगिरि खालामनाय जादों ईएम धनन्जय बसुमतारि बिथांखौ, लेङाय आफादगिरि आ
अभिराम बसुमतारि बिथाङा, लोगोसे नो नेहाथारि खौ बिनुवेल वारि बिथांखौ खालामनाय
जादों, गासैनिबो बिबान नि फारिलाय खौ होनाय जाबाय, बे बिथांखि आ बारग एनदिएफबि आरो
मुंख्लं जानाय एनदिएफबि बिथांमोननि थाखाय।
दिनै भारत आरो खोला आफ्रिका नि गेजेरान नैथि ति-20 गेलेनाय आ
जागोन, मोनाबिलि नि 7 बाजिनाय लोगो लोगो जागोन गेलेनाय आ, जायफोरा गेलेनाय खौ
नायनो थांगोन बिथांमोननि थाखाय मोननैसो नेम फोर दिहुनना होनायनि खौरां मोनदों,
मैया आसाम क्रिकेत एशसियेशन आरो आसाम पुलिस आ लोगोसेयै खौरांमेल खुंदोंमोन। गारि
पार्किं नि बेबस्था खालामदों होनना बुंदों, लोगोसे स्तेदियाम नि सिङाव मबाइल फन
आरो मानि बेग नि बादै जेबो लांनो मोना होनना एसिए नि नेहाथारि देबजित शइकिया
बिथाङा बुंदों, दै बथल बो लांनो मोना होनना बुङो, स्तेदियाम नि सिङाव गासैबो
जानाय, दै बायदि फोरनि बेबस्था खालामना होदों होनना बो फोरमायो, मखजाथावदि गेलेनाय
आ 7 बाजि निफ्राय जागायनानै 11 बाजि आव जोबगोन, गेतफोरखौ 4 बाजि आव खुलिना होगोन,
5 आरो 6 नं गेत खौ 3 बाजि आव नो खुलिना होगोन होनना बो खौरां मोनदों।
36थि माहारियारि गेलेनाय एबा नेशनेल गेम्स आ गुजरात आव
सोलिगासिनो दं, मैया आसाम आव मोन 5 मेदेल मोननाय नि खौरां मोनदों, 100 मितार खारनाय
आव अम्लान बरगोहाइ आ सना नि मेदेल मोनदों, लोनबोल आव मृदुल बरगोहाइ आ सना मोननाय नि
खौरां बो मोनदों। 10.38 सेकेन्द आव खारखाङो, बेनि उनाव साइखेल सालायनाय आव सयनिका
गगै आ सिलभार मोनदों, 10 किमि साइकेल सालायनाय आव, वेइथलिफ्तिं आव पपि हाजरिका या
सिलभार मोनो 59 केजि आव, नयनमनि सइकिया या लन बल आव ब्रन्ज मेदेल मोनदों होनना मिथिना
मोनदों
उत्तर प्रदेश नि कानपुर नि घतमपुर आव जादों गिथावना जाब्रबथाय,
त्रेक्तर नि त्रलि गोलैनानै हाबबाय फख्रि आव, बे जाथाय आव खमावनो सा 24 सुबुंफोरनि
जिउ गोमादों होनना मिथिना मोनदों, सा 22 नि गोथै देहा खौ बोखांबाय, सन्दिका मन्दिर
खौ नायना फैफिनायनि उनाव नो जायो, मिथिना मोननाय बादिब्ला त्रेक्तर आव सा 50 सो
दावबायारिफोर दंमोन, बे जाथाय नि खौरां मोननाय नि उनाव भारत नि गाहाय मन्थ्रि आ
दुखु मोननाय फोरमायो, थैनाय नि नखर नो 2 लाख रां यै होगोन होनना फोसावनायनि खौरां
मोनदों, लोगोसे जोखोम जानाय फोरनो 50 रोजां रां होगोन।
भारत आव बन्ध खालामबाय पाकिस्तान नि त्वितार एकाउन्त, त्वितार आ
आयेन नि दाबि नि फारसे सनमान होनानै बिसोरनि एकाउन्त खौ बोखारदों होनना बुङो, ANI आ बेनि मोनसे स्क्रिन शत होदों जेराव लिरदों- एकाउन्त विथहेल्द,
पाकिस्तान नि एकाउन्त खौ बन्ध खालामनाय आ बेनो गिबि नङा, थांनाय जुलाइ दान आव बो
खालामदोंमोन, नाथाय उनाव बोखांफिनदोंमोन, भारत आव पाकिस्तान नि गोबांखौनो बेन
खालामनाय जायो, जेरै दासिम गोबां इउतुब चेनेल फोरखौ बेन खालामदों आरो बेबायदिनो
गोबां दं।
Please do not enter any spam link in the comment box. ConversionConversion EmoticonEmoticon