4 October bodo news 2022 ~ Bodoinfo.com

मोनसे दुखुनांथाव खौरां, बर हारि नि थाखाय मोनसे गिदिर खहा, पानेरि आरो माजबात बियाब नि बारग एमएलए, एबसु नि मोनसे सम नि आफादगिरि करेन्द्र बसुमतारि बिथांनि जिउ आ गोमाबाय, मैया 3 अक्तोबर बेलासि नि 5 बाजि सो आव बिथांनि जिउ गोमानाय नि खौरां मोनदों, बिथांनि बैसो आ 64 मोन। गोबाव सम निफ्राय बिथाङा बेराम आव गोग्लैना दंमोन, थांनाय जुलाइ दान आव आसामनि गिबि मन्थ्रि बिथाङा बिथांखौ लोगो हमहैनानै खौरां लादोंमोन, बिथांनि जिउ गोमानाय आव गोबां सुबुंफोरा नो दुखु मोननाय खौ फोरमायदों, बितिआर नि गाहाय प्रमद बर बिथाङा बो दुखु मोननाय फोरमायदों, बिथांनि जिउ गोमानाय आव फैगो 6 अक्तोबर खालि बितिआर आव मावखवारि बन्ध थागोन होनना बुंदों। बिथांनि जिउ गोमानाय आव बितिसि नि बारग गाहाय हाग्रामा महिलारि बिथाङा बो दुखु मोननाय फोरमायदों। मथजाथावदि 2001 आरो 2006 आव खननै माजबात नि एमएलए जादोंमोन आरो बेनि सिगां नो 1991 आव पानेरि नि बो एमएलए जादोंमोन होनना मिथिना मोनदों।

मोनसे सोमोनांथाव आरो मानसि महरै खालामजाथावै लाजिनांथाव गाज्रि जाथाय, हादर नि राजधानि दिल्लि आव जादों मोनसे जाथाय, खोमसि फोथायनाय नि मुङाव सानै सेंग्रा फोरा बोलि होबाय 6 बोसोर बैसो नि उन्दै गथ खौ। दिल्लि नि लोधि कलनि आव जादों, मिथिना मोननाय बादिब्ला रबिबारखालि हर आव लोधि कलनि निफ्राय दिल्लि पुलिस आ मोनसे फन कल मोनदोंमोन दि सिआरपिएफ नि गोदानै बानायना गाहाय मावखुलि आव सानै सुबुं आ 6 बोसोर बैसो नि सासे गथ खौ गोदना हानानै बुथारदों होनना, लोगो लोगो पुलिसफोरा जाथायसालि आन थाङो आरो सानै खौ बो एरेस्त खालामो, सानै नि मुङा बिजय कुमार आरो अमन कुमार, सानैनिबो न आ बिहार आव, श्रमिक मोन सानैबो, बिसोर बुंना लानाय बादिब्ला सानैनिबो सिमां आव ईसोर आ फैदोंमोन आरो ईसोर आ सासे उन्दै गथ नि बोलि बिदोंमोन, ईसोर खौ गोजोन होनो नो बेबायदि खालामदों होनना बुंना लायो आरो बोलि होयो बो, गथ नि मुङा धर्मेन्द्र मोन, बिनि बिफा या बो सासे श्रमिक मोन, बेयावनो खामानि मावोमोन, रबिबारखालि हर नि 10.30 सो आव खालामदोंमोन जाथाय खौ, सोमोनांथाव।

बिफा नि जिउ गोमानाय नि उनाव नखर नि गासैबो बिबान खौ लानो गोनां जादोंमोन रबिराम आ, बेखायनो 11 दान सिगां खामानि नागिरनानै बांगालुरु आव थांदोंमोन सेंग्रा या, बैयाव श्रमिक महरै खामानि मावनानै रबिराम आ न आव फैफिननाय समाव नो जायो जाथाय आ, न फारसे फैनाय रेल निफ्राय गोग्लैनानै कोसबिहार आव जिउ गोमायो रबिराम बसुमतारि मुंनि सेंग्रा नि, सिलापथार नि थागिबि मोन, मिथिना मोननाय बादिब्ला सिलापथार नि दिपा नमारि गामि नि थागिबि रबिराम बसुमतारि नि बिफा नि जिउ गोमानाय आव नखर नि थाखाय बाहेर आव खामानि मावनो थांदोंमोन, दुर्गा फुजा नि समाव बांगालुरु एक्सप्रेसजों फैगासिनोमोन, न आव रेल जों फैनायखौबो बिमा नो खोन्थादोंमोन, नाथाय दुखुनांथाव जाथाय आ जायो उनाव।

पितिसिए नि बिबानगिरि थानेश्वर बर बिथाङा एनदिएफबि नि गायसनगिबि आफादगिरि रन्जन दैमारि बिथांनि जिउ जोबजासिम जेल नि साजा मोननाय नि सोमोन्दै बुंदों- बिथांनि उदां नि थाखाय आगोलाव जेबो मोजां बेबस्था खालामि नि थाखाय नो बेयो जादों होनना। जिउ जोबजासिम जेल नि साजा होजानाय आ एनदिएफबि जों लोगोसे गोबां बर फोरजों नो सावरायलायजादों, एनदिएफबि नि केदार एबा मावथि फोरा दायो ज जानाय नि सम, रन्जन दैमारि बिथांङा जेल आव थायोब्ला बर फोरनि दानि सानैसो दैदेनगिरिफोरा राजखान्थियारि लाभ जायो एबा सुबिदा मोनो होनना बो बुंनाय नि खौरां मोनदों, 2020 मायथाइ नि जानुवारि आव जानाय सान्ति सुक्ति आव उदां नि सोमोन्दै जेबो सोआसै होनना बो बुंदों।

दुखुनांथाव, फिसा नि जिउ गोमानाय नि खौरां मोननानै बिफा नि बो जिउ गोमाबाय, हादोर आव दुर्गा फुजा सोलिगासिनो दं, बे समाव नो जादों मोनसे दुखुनांथाव जाथाय, बेयो महारास्त्र नि पालघर आव जादों, भिरा सोहोर आव मोनसे गरबा हाबाफारि आव मोसाबाय थानाय समाव नो सासे 35 बोसोर बैसो नि सेंग्रा नि जिउ गोमायो, रबिबारखालि हर आव बिरार नि ग्लोबेल सिति कमप्लेक्स आव बे गरबा हाबाफारि आव मोसाबाय थादोंमोन, सेंग्रा नि मुङा मनिष। मोसाबाय थानाय समाव नो हर्खाब गोग्लैना होयो, लोगो लोगो देहाफाहामसालि आव लांदोंमोनब्लाबो थैबाय होनना बुङो, फिसाज्ला नि थैनाय नि खौरां मोननानै बिफा या बो गोग्लैयो, लोगो लोगो बिफा खौ बो देहाफाहामसालि आव लांदोंमोनब्लाबो नाथाय जिउ गोमायो होनना मिथिना मोनदों, दायो पुलिस फोरा नखर नो खौरां हरनानै पस्त मर्तेम नि थाखाय गोथै देहा खौ लाना थाङो।

गावखौनो एसआइ होनना सिनायथि होनानै राजालामा याव गारि लाखिनानै रां लानाय 180 केजि लिरथाय नि सासे नंखाय एसआइ खौ पुलिसफोरा हमदों, उत्तर प्रदेश नि तुन्दला नि जाथाय, 180 केजि नि मोदोम गिदिर सुबुं आ साननैसो सिगां निफ्राय बेबायदि खालामबोगासिनोमोन, उनाव बिनि बेरेखा अजद मोननाय आव थार पुलिस फोरा नायबिजिरनानै हमो, बिनि मुं खौ रामकिषान यादब होनना मिथिना मोनदों, गाजियाबाद नि थागिबि, बिनिफ्राय गारि, नंखाय धार, पान कार्द आरो पुलिसनि द्रेस जब्द खालामदों होनना मिथिना मोनदों।

फुजा नि रंजानाय बोथोर सोलिगासिनो भारत आव, बेनि गेजेराव नो थांनाय 2 अक्तोबर खालि गान्धि जयन्ति जाना थाङो, बे समाव नो कलकाता याव अखिल भारतिय हिन्दु महासभा या खुंनाय फुजा या हादोरनाङैनो गोबां गाज्रि सावरायजादों, बिसोर महिसासुर नि मोखां नि जायगा याव महात्मा गान्धि नि सो मुसुखा लागायना होदों, मोनसे सावगारि आ ससियेल मिदिया याव गोबां सावरायजादों, दायो बेनि बेरेखा गोबां दोलो संगथन फोरा एजाहार होबाय, महात्मा गान्धि जों एखे खा, ससमा बो दं, बेबायदि असन्मान खालामनायनि थाखाय नो गोबां सुबुंफोरा नो दुखु मोननाय फोरमायदों।