उन्दै बैसो आव हाबा जानायनि बेरेखा गोरा जादों रायजो सोरखार आ। मैया हर निफ्राय नो नायगिरनाय आरो हमनाय खामानि खौ जागायबाय, दावहा फोसावनाय बादि जादों। आसामनि गिबि मन्थ्रि आ दिनैनिफ्रायसो जागायगोन बुंदोंमोनब्लाबो नाथाय मैय हर निफ्राय नो हमो, आसाम आव उन्दै बैसो आव हाबा जानाय आरो उन्दै बैसो आव गथ जोनोम होनायखौ गैया खालामनायनि गिदिर थांखि, मैया बिजेपि नि रायजोआरि गाहाय मावखुलि आव खुंनाय खौरांमेल नि गेजेरजों बेखौ मिथिहोयो। थांनाय 9 सान आव रायजो आव 4004 गसर थिसननाय जादों होनना बुंनानै दिनै बेनि अनजिमा या 5 रोजा नि बारा जागोन होनना बुंदों, बिथाङा बुंनाय बादिब्ला आसाम आव बोसोर आव 50 रोजा उन्दै बैसो नि हाबा जायो, बेबायदि आयेन बेरेखा हाबा खौ गैया खालामनो नांगोन। हाबा खालामनायफोराल नङा, हाबा खालामना होग्राफोरा बो हमजागोन होनना बुङो बिथाङा, मोल्ला, जोनाब, पुजारि नि फारसे बो नोजोर होनो बिथोन होदों, बेबायदि हाबा या जोबि सम सिम बेनि अपारेसन आ सोलिबायनो थागोन होनना बुंबावो बिथाङा।
मखजाथावदि मैया बिथाङा 36 जिल्ला नि गासै 4004 केस रेजिस्तार जानायनि सायाव फोसावना होदोंमोन, जिल्ला महरै नायोब्ला धुबरि आव नो बांसिन 370 गसर थिसननाय जादोंमोन, बेनि उनाव होजाई आव 255 आरो उदालगुरि आव 235. बितिआर नि गुबुन जिल्ला फोरनि खौ नायोब्ला बाक्सा याव 153, चिरां आव 54, कक्राझार आव 204, तामुलपुर आव 110 केस दं। बेबायदिनो सनितपुर आव 60, दरं आव 125, नलबारि आव 171 केस फोर दं उन्दै बैसो आव हाबा जानायनि। बेनि अनजिमा या बारा जागोन होनना बुंखादों बिथाङा। पुलिस आ 14 बोसोर बैसो नि उन्दै खौ हाबा खालामनाय आयजो फोरनि बेरेखा हाबा खालामनायनि दाय मावदों बिसोरनि बेरेखा पस्को आयेन नि सिङाव गसर लागोन, बे आयेन नि सिङाव बांसिन साजा या जिउ जोबजासिम जेल नि साजा। गुबुनफारसे बेखौ फोसावनायनि उनावनो रायजो आव मैया अपारेशन फिसाय खौ जागायो, मैया नो आयेन बेरेखा फिसाय महरै गोबां सुबुंफोरखौ हमदों, जामुगुरिहात आव रबबुल हुसेइन, मोजाफर आलि, रक्तिम दास आरो लोगोसे गोबांखौ हमदों, मरिगांव जिल्ला याव दासिम सा 10 खौ हमदों होनना खौरां मोनदों, गिबि मन्थ्रि आ जेल आव जायगा गैया जायोब्ला बारायनो नांगोन होनना बो रोखा खालामना होदों, बे हिसाबै रावबो बारगनाय नङा।
गुबुनफारसे बेबायदि उन्दै बैसो नि हाबा खालामनाय सुबुं एबा फिसायनि बिसि आरो नखर नि थाखाय सोरखार आ बेबस्था खालामगोन, फिसाय आ जेल आव थायोब्लाबो बिसि आ फ्रि मायरं, अरुनुदय बिथांखि नि रां होनायनि बेबस्था खालामगोन होनना बो बुङो।
दिनै लक्षिमपुर जिल्ला याव जायगायारि बन्ध फोसावदों। आसाम साहित्य सभा नि बोसोरारि जथुम्मा या नारायनपुर आव सोलिगासिनो थांनाय 31 जानुवारि निफ्राय, नाथाय आगोलनि बादि बेयाव थांनो थाखाय सोरखारि मावथि फोरनो सुति होआखै रायजो सोरखार आ, मिथिना मोननाय बादिब्ला दायो लक्षिमपुर जिल्ला प्रसासन आ 3 फेब्रुवारि दिनै जायगायारि बन्ध फोसावदों, सोलोंथायारि फसंथान, सोरखारि मावथि फोरा बेयाव बाहागो लानायनि सुबिदा जानाय महरै बेखौ होदों होनना फोसावना होदों। गाबोन 4 फेब्रुवारि आव जोबगोन बेयो।
bodoinfo.com provides informations regarding State Government, Central Government and Private sector jobs for the aspirants of assam.
Please do not enter any spam link in the comment box. ConversionConversion EmoticonEmoticon