बितिआर आव फिन खनसेबाव दाखाथि नि जाथाय, चिरां नि सिदलि थाना नि सिंनि 31
नं राजालामा नि सामथायबारि आव थानाय ईन्दियान अइल पेत्रल पाम्प आव जादों जाथाय आ,
मथर साइखेल जों फैनाय सानै सिनायमोनि पिस्तल लानाय दकाइत फोरा लुथिना लाङो 3 लाख नि
बारा रां, पेत्रल पाम्प नि खामानि मावग्रा फोरा बुंनाय बादिब्ला मोनाबिलि नि 5
बाजि 30 सो आव हेलमेत गानना फैनाय सानै सेग्रा फोरा पिस्तल दिन्थिना रां बिदोंमोन
आरो रां खौ होआब्ला गुलि गावगोन होनना बुंदोंमोन, गिनानै केस बक्स निफ्राय 3 लाख
50 रोजा रां दिहुनना होयो होनना बुङो, दाखाथि नि जाथायनि उनाव पुलिसफोरा बे खौरां
खौ मोननानै जाथायसालि आव थाङो, पुलिसफोरा सिसितिभि फुतेज खौ नायनानै नायबिजिरनायखौ
जागायो, दासिम रावखौबो हमाखै होनना खौरां मोनदों।
उन्दै बैसो नि हिनजावसा खौ हाबा खालामनायनि दाय आव फिसाय नङाब्ला बिनि बिफा
खौ हमनाय आ रायजो आव सोलिगासिनो दं, मैया बो गोबां सुबुंफोरखौ हमो, फरायसा आफाद नि
लेङाय आफादगिरि आ बो बारगआसै, सासे 16 बोसोर बैसो नि हिनजावसा खौ हाबा खालामनायनि
दाय आव आमसु नि लेङाय आफादगिरि खौ हमदों, मुङा आनारुल ईश्लाम, गिबि मन्थ्रि नि
गोरा बिथोन नि उनाव नो रायजोनाङैनो हमनाय आ 2 रोजा नि बारा जाबाय, बेखौ गुबुन
गुबुन दोलो संगथन फोरजों लोगोसे आमसु आ बो मदद होदोंमोन, संगथन आ 2017 मायथाइ
निफ्रायनो उन्दै बैसो नि हाबा खालामनायखौ होबथाबोदोंमोन, दासिम 3500 सो उन्दै बैसो
नि हाबा खौ होबथानो हादोंमोन। गुबुनफारसे मानकासार आव मोनसे जाथाय जादों होनना
खौरां मोनदों, बिमा बिफा जेल आव थांनांगौ जानो हानायनि थाखाय गिनानै सासे आयजो आ
गावखौनो बुथारना लादों होनना मिथिना मोनदों, खुसबु बेगम मुंनि आयजो आ 12 बोसोर
बैसो आव नो हाबा जादोंमोन, सानै फिसा नि बिमा, दायो बैसो आ 23, झावदाङा पुबेर गामि
आव जादों, बिनि फिसाय आ कभिद नि थाखाय थैदोंमोन होनना खौरां मोनदों, नाथाय बेनि
गेजेरावनो बेखौ खालामना लादों होनना बुंदों, नाथाय गुबुनफारसे पुलिसफोरा जिल्ला
पुलिस आ बेखौ नंखाय होनना बुंदों, धुबुरि आव पस्तमर्तेम नि थाखाय गोथै देहा खौ
लांनाय जायो, एएसपि फारुक आहमेद बिथाङा बुंनाय बादिब्ला बिफा नि मुङाव जेबो गसर
गैयामोन, पुलिसफोरा दायो बेनि सायाव नायबिजिरनाय खौ खालामगासिनो होनना मिथिना
मोनदों। उनावसो गुबै जाहोन आ सोराङाव फैगोन। मिथिना मोननाय बादिब्ला 4074 केसफोरनि
गेजेराव 2258 सुबुंफोरखौ हमबाय दासिम, जिल्ला महरै नायोब्ला बिस्वनाथ आव बांसिन
139 खौ हमदों। आसामनि गिबि मन्थ्रि आ मैया रोखा खालामना होदों दि 2026 मायथाइ नि
बिधानसभा बिसायखथि सिम बेयो सोलिगोन, जायफोरा 14 बोसोर बैसो नि हिनजावसा फोरखौ जाय
हाबा खालामगोन बिसोर जामिन मोननाय नङा होनना रोखा खालामना होदों, गोबां
दायनिगिरिफोरनि बिमा बिफा या बो फारिलाय आव दं, नाथाय बिमा बिफा खौ थोंजोङै हमनाय
जानाय नङा होनना रोखा खालामना बो होदों, गिबि आव नतिस होग्रोगोन होनना बुङो, लाख
लाख हिन्जावसा फोरनि उन्दै बैसो नि हाबा खौ होबथानो थाखाय मोनसे जेनेरेसन आ खस्त
मोननो नो नांगोन, बेयाव जेबो अननाय एबा दुखु मोननाय थाया एबा बेफोर आंखौ जेबो
खालामनो हाया होनना बुङो बिथाङा।
नलबारि आव गोबां बिबांनि हाथियारफोर मोनदों, सनिबारखालि सिआरपिएफ नि 136 नं
बेतेलियान आ सेंनै हाग्रा नि गेजेराव नायबिजिरनाय आव मोननो हादों होनना खौरां
मोनों, बेयाव गं 6 पिस्तल जों लोगोसे गोबां गोथां गुलि, मेगजिन मोनदों, नाथाय
गुबुनफारसे बेजों सोमोन्दो थानाय नि दाय आव रावखौबो हमनो हायाखै दासिम, पुलिसफोरा
गावनि बादियै मोनसे गसर थिसननाय जाबाय, बेनि सायाव नायबिजिरनाय आ बो सोलिगासिनो
दं।
हादरनि सुबुंफोरखौ ईन्काम तेक्स बिफान नि वारनिं, पान कार्द बाहायग्राफोरखौ
थाबैनो आधार कार्द खौ लिंक खालामनो बिथोन होदों जायफोरा दासिमबो खालामाखै, ईन्काम
तेक्स बिफान आ बुंनाय बादिब्ला सोलिनाय बोसोर नि 31 मार्च नि सिगां नो बे खामानि
खौ मावना लानो बिथोन होदों, बेनि अनगायैबो जायफोरा सम सिमा नि उनाव जुदि पान
नाम्बार बेंक नि लेनदेन जों सोमोन्दो दंमोन बिबो बन्ध जागोन होनना बुङो, ईन्काम
तेक्स रितार्न आव बो असुबिदा जागोन होनना बुंदों, नाथाय गुबुनफारसे आधार आरो पान
लिंक आव रां नांगोन होनना बो मिथिना मोनदों।
bodoinfo.com provides informations regarding State Government, Central Government and Private sector jobs for the aspirants of assam.
Please do not enter any spam link in the comment box. ConversionConversion EmoticonEmoticon