1) 1 एप्रिल आव कक्राझार आव फैगोन भारत नि गाहाय मन्थ्रि नरेन्द्र मडि बिथाङा. बिथाङा फैनायनि सिगां कक्राझार आव गोबां बिबांनि हाथियारफोर मोनदों। कक्राझार जिला पुलिस बिबानगिरि मावखुलियाव खुंफुंनाय मोनसे खौरांगिरि मेल आव बिटिआर नि आईजिपि एल आर बिष्णोई बिथाङा कक्राझार पुलिस आ सम्बारखालि फुङाव मोनसे स्रोद सुलुं नि बिथा जों संदाननानै गसाइगांव नि सिङाव थानाय सरायबिल पुलिस आउतपस्त नि रिपु रिजार्भ हाग्रा ओनसोलनिफ्राय गं 3 एके 56 रायफल, गं 3 मेगजिन, गर 157 गोथां गुलि, 11 प्लास्तिक नि गिलान, प्लास्तिक पेपार, थाव 100 केजि मायरं, गोरान जाग्रा आरो जोमग्रा कम्बलफोरजों लोगोसे आरो गोबां मोनदों होनना फोरमायो। 12 घन्टा नागिरनायाव मोनो, बे हाथियारफोरखौ एम बाथा गोट नि होनना बुङो, लोगोसे बिथाङा एम बाथाजों लोगोसे एनदिएफबि नि आरो बक मुंनि मोनसे दोलो आ अरुनासल आव दं होनना बो बुंबावो।
2) आसामनि दिजिपि भास्करज्योति महन्त आ काजलगांव आव गोजौ थाखो नि अफिसार, सिरांनि रैखाथि नि बिबान आव थानाय एसएसबि, आरमि नि अफिसार बिथांमोनजों आयेन आब्रुथि नि सायाव गुवारै सावरायलायो। फैगो 6 एप्रिल आव 3 थि खोलोबनि बिसायखथि आ जागो, बेनि सायाव नोजोर होनानै बे गुवारै सावरायलायो। सावरायलायनायनि उनाव खौरांगिरि नि सिगाङाव बिथाङा दाननैयाव 65 एके सिरिज नि रायफल जों लोगोसे गोबां हाथियारफोरा बोखांनो हादों। बिटिआर आव 87 लाख रां जों लोगोसे 50 रोजा लिटार जौ जब्द खालामनो हादों। बिथआङा लोगोसे राजखान्थियारि दोलो नि बिजाथि एबा दोलो नि मावथि फोरा धोन- बोलो बाहायनानै, सिगिनानै भट लानो नागिरोब्ला बेनि सायाव गोख्रों एक्सन लानाय जागोन। लोगोसे चिरां नि लाइसेन्स थानाय हाथियारफोरखौ जिला पुलिस आ लाबाय होननना बुंदों आरो बारग एनदिएफबि नि दैदेनगिरि एम बाथा नि दैदेननायाव जोनोम जानाय एनएलएफबि नि सायाव नोजोर लाखिदों होनना बो बुङो बिथाङा। बिथाङा सिरां जों लोगोसे कक्राझार, धुबुरि, आरो बङायगांव आव बो आयेन आब्रुथि नि सायाव सावरायनाय आव बाहागो लायो होनना खौरां मोनदों। 31 मार्च आव बिजनि आव फैगोन मिरु नखर मन्थ्रि अमित साह बिथाङा। दिजिपि बिथाङा उनाव कक्राझार आव थांनानै थासारि नि खौरां लायो। बिथाङा आईजिपि एल आर बिष्णोई, एस पि राकेस रोसन बिथांमोनजों गुवारै सावरायलायो, उनाव खौरांगिरिफोरनि सिगाङाव सोरबा हाथियार बाहायनानै थासारिखौ सान्ति गैयि खालामनो नागिरोब्ला रेहाय होनाय जानाय नङा। लोगोसे बिसायखथि नि थाखाय रैखाथि नि फारसे गोरा खालामनाय जादों होनना बो बुङो, बिटिआर आव दासिम 87 कम्पानि रैखाथि नि थाखाय बिबान होदों, बेनिनो 46 सिआरपिएफ दं। बिटिआर नि मोन 4 जिला याव गासै 3584 भट मिरु दं, बेनिनो कक्राधार आव 981 दं होनना बो बुङो बिथाङा।
3) गोजा नङा, गुफुर नङा, बिजेपि गाब नि बुलेत होगोन हिमन्त बिस्व शर्मा या। कमलपुर बिधानसभा बियाब बिजेपि नि बिजाथि दिगन्त कलिता नि बिसायखथि फोसावदिं मेल आव बाहागो लानानै बुंदों, लोगोसे आयजोफोरनि सेल्फ हेल्प ग्रुप नो रां नि मदद, 10 लाख सेंग्राफोरखौ स्वयम स्किम आव सोगोन, सरुसजाय आव 1 लाख हिनजावसाफोरनो साख्रि होगोन होनना बो बुङो। बुलेत होनायनियाव मोनसे ल चर्त थागोन होनना बुङो, बेनो जाबाय उनथि बिमा आरो बिनानाव खौ ल फजनो हागोन।
4) लक्षिमपुरनिफ्राय कासार सिम बिसायखथि नि बिबान नि थाखाय थांनाय हमगार्ड नि गारिया जाब्रथाय जायो। मेघालय आव जायो जाथाय आ। गोबां हमगार्ड नि जिउ गोमानो हागौ होनना खौरां मोनदों। खौरां मोननाय बादिब्ला हरनि बिस जों कासार सिम थांगासिनो दंमोन, बास आ मेघालय रायजो आव हाबनाय समावनो जाथाय आ जायो, हमथानो हायि जानानै 90 फुट गाहायाव गोलैयो। दासिम सा 5 नि जिउ गोमादों होनना खौरां मोनदों, लोगोसे गोबां जोखोम जादों होनना खौरां मोनदों।
5) महाजोत आ सोरखार दायोब्ला सोर गिबि मन्थ्रि जागोन, तामुलपुर बियाब नि बिसायखथि फोसावदिं मेल आव बाहागो लानानै बेनि सोमोन्दै जेबो सावरायलायनाय जायाखै होनना बुङो। बिथाङा महाजोत आ सोरखार दानो हायोब्ला गोर्खाफोरनो आलादा काउन्सिल दाना होगोन, मोन 6 हारिनो ट्राइबेल नि मर्जादा होनायनि खामानिखौ मावफुंगोन, माद्रासा नि सायाव सावरायलायगोन, बेखौ हिमन्त आ सो बन्ध खालामदों, भारत सोरखार आ खालामाखै होनना बो बुङो। बिथाङा गिबि खोलोबनि बिसायखथि याव महाजोत आ 30 बियाब आव देरहागोन होनना बुङो आरो 70 मासि देरहानानै सोरखार दागोन होनना बो बुंबावो।
6) सासे खौरांगिरि नि गोथै देहा बोखांदों। बुथारनायनि सन्देह, मुङा पर्बज्योति चुटिया। बिथाङा नियमिया बार्ता मुंनि खौरां बिजोंनि खौरांगिरि मोन। नखरनि सुबुंपोरा बुथारनायनि सन्देह खालामदों।गुवाहाति हातिगांव नि न नि खाथि नि नाला याव मोनदों होनना खौरां मोनदों। पुलिसफोरा गिबि नायबिजिरनायाव आन्थु आव बोना लाङोब्ला जानाय दाग बायदि नुनो मोनदों होनना बुङो। पस्त मर्तेम नि थाखाय गुवाहाति मेदिक्ल कलेज आव लाङो। हातिगाव पुलिस आ जुलफिकुर आहमेद मुंनि सासे सुबुंखौ गिबियाव सोंनो लांदोंमोन, बेनि उनाव एरेस्त खालामो। तुटिया बिथाङा गेलेनाय नि खौरांगिरिमोन।
7) भारत आरो ईउएई नि गेजेराव जानाय फुतबल गेलेनाय आव ईउएई आ भारत खौ मैया गाज्रियै फेजेनो। 6-0 गल जों फेजेनो। ईउएई नि जानानै ए माबखाउत आ 12, 32 आरो 60 मिनित आव हेत्रिक गल होनो हायो, बेनि उनाव 64 आव के ईब्राहिम, 71 आव एफ लिमा, आरो 84 आव एस ताब्लियाबु आव गल होनानै देरहासाद जानो हायो। बर फिसा हलिचरन नार्जारि बिथाङा बो गेलेनो खाबु मोनदोंमोन।
8) उर्खाव गोरा ब्रह्म नि जानानै बिसायखथि फोसावदिं मेल आव बिटिआर नि गाहाय प्रमद बर बिथाङा बाहागो लादोंमोन। बाक्सा नि भुटेपुवाबरि याव सापागुरि बिधानसभा बियाब नि बिजाथि उर्खाव गोरा ब्रह्म नि जानानै। बिथाङा थांनाय 17 बोसोराव हाग्रामा या जाख्लनाय भ्रस्तासार, आरो गुबुन हारि माहारि खौ थगायनाय नि थाखाय नो रायजोफोरा गारदों होनना बुङो। बे बाराव हाग्रामा नि जेबो राहा गैया, मानोना महाजोत नि सासेनिबो फेस भेलु गैया, हाग्रामा बदरुददिन खौ नायनानै सोर भट होगोन होनना बुङो, बारग गिबि मन्थ्रि तरुन गगै नि थैनायनि उनाव सासेबो बिजाथि गैया जायखौ नायनानै सुबुंफोरा भट होगोन। उर्खाव गोरा ब्रह्म बिथाङा बो बर अबर नि राजखान्थि खौ फोजोबस्रांनो थाखाय नो ईउपिपिएल बिजेपि जिएसपि लोगो नांदों होननना बो बुङो।
9) महारास्त्र नि गिदिर खौरां, उदखारिफोरजों गावलायनाय रैखाथि होनजा नि, बेयाव सानै आयजो केदारजों लोगोसे सा 5 उदखारिफोरनि जिउ गोमादों। रायजो नि गरसिरोलि जिला याव जादोंमोन। सानफ्रोमबो खालामनाय पेत्रलिं नि समाव सि60 पुलिस कामान्दो नि मोनसे दोलो नि सायाव सा 25-30 सो उदखारि नि दोलो आ गाग्लोबदोंमोन। बेनि फिननायखौ रैखाथि हानजा या बो होयो आरो सा 5 खौ बुथारनो हायो। जाथाय जानाय जायगायाव गोबां बिबांनि हाथियारफोर मोनदों। थांनाय 5 मार्च आव बे जिला याव नो अदखारिफोरनि आइईदि बेरफ्रुहोनायाव सा 5 जवान मुंख्लं जादोंमोन।
10) बारग एनदिएफबि कवर्दिनेशन कमिटि आ बिपिएफ हानजा खौ मदद खालामगोन, रिहन दैमारि नि जानानै भट होनो खावलायदों। बे कमिटि नि सोद्रोमा बाबुल बर आ एनदिएफबि नि केसफोरकौ फोजोबस्रांनो थाखाय हाग्रामा महिलारि नि सोरखार दानायाव मदद खालामनो खावलायो।
11) ईउनाइतेद खृष्तियान फराम आ ईउपिपिएल दोलो खौ मदद खालामगोन, बिपिएफ नि सानै खृष्तियान धोरोमनि मन्थ्रि थानायावबो खृष्तियान धोरोमनि जौगालु बिथांखिफोरखौ मावफुंनो हायाखै होनना बुङो। साननैसो सिगाङाव बिटिआर नि गाहाय प्रमद बर जों खृष्तियान फराम नि थान्दै हानजाजों गुवारै सावरायलायदोंमोन बायदिसिना जेंना सुस्रांनायनि सोमोनदै। दायो बिथांमोना आसाम बिधानसभा बिसायखथि याव ईउपिपिएल दोलो खौ मदद खालामगोन होनना बुङो।
bodoinfo.com provides informations regarding State Government, Central Government and Private sector jobs for the aspirants of assam.
Please do not enter any spam link in the comment box. ConversionConversion EmoticonEmoticon