1) मिनिस्त्रि अफ रोड ट्रेन्सपर्ट एन्द हायवे या द्राइभिं लाइसेन्स आरो फितनेस चार्तिफिकेत नि जोबथा सम खौ 30 जुन 2021 सिम बारायना होबाय। आगोलावबो बेबायदिनो बारायना होदोंमोन, थांनाय बोसोरनि 30 मार्च निफ्राय नो बारायना होबोगासिनो, 31 मार्च आव जोबगोन होनना बुंदोंमोन, नाथाय फिन खनसेबाव बारायना होबाय। गासैखौबो करना नि थाखायनो खालामनाय जादों। जायनि फिटनेस, पार्मित, द्राईभिं लाइसेन्स, रेजिसत्रेसन आरो गुबुन फोरमान बिलायफोरनि जोबथा सम आ बारबाय एबा बारगोन, बिथांमोना 30 जुन सिम सालायनो हागोन बेजोंनो।
2) जोनाई आव बारहुंखा याव खहा जानाय 500 नखरनो ईउबिपिअ नि तिर्पाल रानना होनाय। थांनाय 25 मार्च आव अखा, बार नि थाखाय रामधन दिखारि, लाइमेकुरि, गालि सिकारि गामि पन्सायत नि सिंनि खहा जानाय नखरफोरनो ईउबिपिअ आरो एबसु आ तिर्पाल रानना होयो। ईउबिपिअ नि हेमकान्त दैमारि, गुनेस्वर दैमारि, सोमनाथ महिलारि, हरि बसुमतारि, रजनि रामसियार, एबसु नि लिखन बर, मथुराज मोसाहारि, गाइदां बसुमतारि बिथांमोना रानना होयो। लोगोसे अन्थाय नि अखा, बारहुंखा नि थाखाय गोबां न बां, मुवा बेसाद खहा जानायनि थाखाय खहा सुफुंनो खावलायो। बिथांमोना महकुमा नि गाहाय आरो चार्कल अफिसार निसिम गांसे आरजलाय होयो।
3) मैया 6 बाजिनाय लोगो लोगो नैथि खोलोबनि बिसायखथि नि फोसावदिंनाय आ जोबनानै थाङो। 2 थि खोलोबनि बिसायखथि या गासै 39 बियाब आव जागोन। 73,44,631 भटार फोरा गासै 345 बिजाथिफोरनि थाखाय भट होगोन गासै 10,592 बियाबफोराव।
4) बिरखं गाथोनाव कभिद नि नेम मानिनो नांगोन, नङाब्ला जरिमाना जों लोगोसे दावबायनो मोना बो जानो हागौ। दिजिसिए आ 30 मार्च खालि गांसे फोसावलायनि गेजेरजों नेम फालिथारनांगौ नि सोमोन्दै बुङो। कभिद नि नेम बादियै खुगा, गन्थं कौ खोबथेजोबनायै मास्क लानो नांगोन आरो ससियेल दिस्तेन्स खौ मानिनांगोन।
5) आसामनि बिसायखथि बिफान आ बिसायखथि नि बिबान आव थानाय समाव जिउ गोमानाय सा 4 सुबुंफोरनि नखरनिसिम दुखु मोननाय फोरमायनायजों लोगोसे नखरनो 15 लाख रां होनाय जागोन होनना फोसावो। सा 4 नि सा 2 आ बास नि जाब्ब्रथाय आव जिउ गोमादोंमोन, सासे द्रायभार पापु भुयान आरो सासे हम गार्ड हेम कान्त गगै, आरो सासे हमगार्ड हेमन्त दास आ बिबान आव थानाय समाव नो देहा या गाज्रि जानायाव देहाफाहामसालियाव लाङो, जिउ गोमायो आरो सासे पुलिं अफिसार तुलसि खनिकर बिथाङा बो खामानि मावबाय थानाय समाव नो गोलैनानै जिउ गोमायो। गासैनोबो 15 लाख रां यै होगोन, लोगोसे जायफोरा बास नि जाब्रबथायय आव जोखोम जादों बिथांमोना फ्रि फाहामथाय जों लोगोसे रां नि मदद बो मोनगोन होनना फोसावो।
6) बिजेपि नि दैदेनगिरि हिमन्त बिस्व शर्मा नि बेरेखा कंग्रेश नि अजद बिसायखथि आयोग निसिम। बिपिएफ नि आफादगिरि हाग्रामा महिलारि खौ सिगिनायनि अजद होनानै बिसायखथि आयोगखौ बेनि सायाव गोख्रों एक्सन लानो खावलायो। कंग्रेस दोलो आ बिसायखथि आयोग निसिम हरनाय लायजाम आव मदेल कड अफ कन्दाक खौ सिफायनाय नि अजद होदों।
7) गुवाहाति नि लामायाव ना, सम आ 3.30 मोन। लामा लामा ना ल, ना फोरखौ नुनानै गोबां सुबुंफोरनि गेजेराव नारखाव नारसि, लामा जों थांनाय सुबुंफोरा गारि लाखिलायनानै ना हमदों। बेयो दुखुनांथाव जाथाय सो, जाथाय आ बसिस्त नि। ना लांनाय दि आई गारि, गंसे ट्राक आरो गंसे अयेल टेंकार नि गेजेराव जानाय जाब्रबथाय नि उनाव नो बे जाथाय आ जायो। हरखाब जानाय जाथाय नि उनाव नो गारि निफ्राय ना फोरा गोलैदोंमोन।
8) रायजो आव फाकुवा(होलि)नि साननै याव 279 लामा नि जाब्रबथाय जादों। साननैयाव जानाय जाब्रबथाय आव मृत्योन्जय 108 नि गेजेरजों मदद खालामनाय जायो। 108 नि मावथि या बुंनाय बादिब्ला रायजो आव 28 मार्च खालि 101 आरो 29 मार्च खालि 178 लामा नि जाब्रहथाय जादों। बेनि सायाव बिथांमोना जाथाय जानाय जागायाव थांनानै जोकोम जानायफोरखौ देहाफाहामसालियाव लाना थांदों।
9) सिदलि बियाब आव बिटिआर नि गाहाय प्रमद बर नि बिसायखथि फोसावदिं मेल। चिरां नि सान्तिपुर, भिरानगांव, गरुभासा आरो बामुनगांव आव जयन्त बसुमतारि नि जानानै। बिथाङा हाथियार दैखांफिननाय एनएलएफबि आफादनि सेंग्राफोरखौ फैफिननो खावलायो, दाबो सम दं होनना बुङो बिथाङा, नङाब्ला आरमि पुलिसफोरा रेहाई होनाय नङा। पुलिसफोरा बिसोरखौ जेबो गाज्रि खामानि मावनो सुबिदा होनाय नङा। लोगोसे बिथाङा बिपिएफ नो थांनाय 15 बोसोरनि जाख्लनाय भ्रस्तासारनि फिननाय होगोन होनना बुङो। बिपिएफ आ दोलो नि दैदेनगिरि मावथि फोरनि अनगायै साधारन सुबुंफोरनि थाखाय जेबो मावासै, बिपिएफ आ रां रानना होयोब्लाबो जेबो खामानि होनाय नङा. बिसायखथि नि उनाव हाग्रामा नि मुं थानाय नङा होनना बो बुंबावो।
10) बिपिएफ नि आफादगिरि हाग्रामा महिलारि बिथाङा बिजनि बियाब आव बिपिएफ नि बिजाथि कमलसिं नार्जारि नि जानानै बिसायखथि फोसावदिं मेल आव बाहागो लायो। बेयाव बाहागो लानानै बाथा खौ हेमन्त बिस्व शर्मा या सो मोजाङै मिथियो, बेनि बागै आं जेबो मिथिया होनना बुङो, लोगोसे मन्थ्रि हिमन्त नि जेल आव थांहोगोन बुंनायनि सायाव बिथाङा गावनि जेबो केस गैया, जेल आव थांनांगौब्ला हिमन्त आ सो थांनांगोन मानोना बिनिसो गोबां केस दं होनना बुङो। हाथियारनि सायावबो हिमन्त आ सो गासैखौबो मिथियो होनना बुङो।
11) मैया बिजेपि नि दैदेनगिरि हिमन्त बिस्व शर्मा बिथाङा उदालगुरि बियाब आव ईउपिपिएल नि बिजाथि गोबिन्द बसुमतारि बिथांनि जानानै बिसायखथि फोसावदिं मेल आव बाहागो लायो। बिथाङा सोरकार दानो हायोब्ला माइक्रफाइनेन्स नि होनो गोनां दाहार खौ होनो नाङि खालामगोन होनना बुङो। बिथाङा बे बोसोराव 1 लाख लाइमोन फोरनो साख्रि होगोन होनना बो बुङो। लोगोसे हाग्रामा नि ताला साबि खौ बिनि आखायावसो दं होनना बो फोरमायो।
12) आसाम आरो सोनाब बंग आव बिधानसभा बिसायखथि सोलिबाय थानाय समाव नो आयेन बेरेखा यै भारताव हाबनाय सा 3 बांलादेशि आरो सासे दालाल खौ हमदों बिएसएफ फोरा। सा 4 खौ बो सोनाब बंग नि भारत बांला सिमा नि मुर्सिदाबाद डजिला नि रधुनाथगन्ज आव। साथाम बेलादेशि या हमजानाय दालाल नि मदद जों खामानि मावनो फैदोंमोन भारत आव। मुंफोरा आनारुल सेइख(45), आलामिन सेइख(25), कंकन सेइख(22) आरो बादशाह सेइख(30)।
bodoinfo.com provides informations regarding State Government, Central Government and Private sector jobs for the aspirants of assam.
Please do not enter any spam link in the comment box. ConversionConversion EmoticonEmoticon