सिलं आव दुंहाव थासारि। आसामनि थागिबि फोरखौ स्पेशियेल दिजिपि जिपि सिंह बिथाङा थासारि आ मोजाङाव फैनायनि सिगां सिलं आव थांनो होआखै। सासे बारग एइस एन एल सि नि दैदेनगिरि चेष्टारफिल्द थांखिउ खौ बुथारनाखौ मिरु खालामनानै मेघालय आव दुंहाव थासारि सोमजिदों। रायजो नि गुबुन गुबुन जायगायाव गोसोम फिरफिला बिरहोनायजों लोगोसे अन्थाय खुबैना रागा जोंनायखौ दिन्थियो। रायजोनि हिंसायारि थासारि खौ नोजोर होनानै कारफिउ बो फोसवदों। गुबुन फारसे रायजो नि गं 4 जिला याव थासारि आ जाहाथे गाज्रि सिन जाया बेनि थाखाय 48 घन्टा एसएमएस आरो मबाईल ईन्टारनेत सेवा खौ बन्ध खालामना होदों। शिलं आव कारफिउ फोसावनायनि उनाव नो स्पेसियेल दिजिपि बिथाङा त्वितार नि गेजेरजों शिलं आव थांथनो नाङा होनन खावलायो। खौरां मोननय बादिब्ला मेघालय नि नखर मन्थ्रि आ बे जाथायनि थाखाय गावनि बिबान खौ एंगारबाय। एनदिएफबि नि गायसनगिबि आफादगिरि रन्जन दैमारि आ माब्ला उदां जागोन जेल निफ्राय, मोनसे गिदिर सोंलु। आसामनि केबिनेत मन्थ्रि उर्खाव गोरा ब्रह्म बिथाङा मैया खौरांगिरिफोरनि सिगाङाव बिथांनि उदां नि थाखाय धर्ना होनायखौ गाज्रि मोनाखै होनना बुङो, बेबायदि ओंखारबोनाया साधारन खोथा, नाथाय सोरखार आ बिथांनि उदां नि थाखाय खामानि मावगासिनो, दायो बिथाङा बेल मोननो नांगौ, सोरखार आ बेल मोननायाव जेबो हेंथा होलिया, हायकर्त आव केस सोलिगासिनो दं, बेयाव आयेन नि खामानि दं। महामारि कभिद-19 नि गिख्रंथाव समाव गावनि जिउखौ बावसोमना हाबा मावनाय सिरां जिल्ला बासुगावनि मिनि पि एसह सि देहाफाहासालिआव कनत्राक्सुयेल हिसाबै साख्रि मावनाय मुस्रिमा रेबा रय नि न’आव आसामनि केबिनेट आरो चिरां जिल्लानि गार्जियन मन्थ्रि उरखाव गोरा ब्रह्म लोगोसे ऐम एल ए जयन्त बसुमतारि बिथांमोनहा दावबायहैदों। मख’नो गोनांदि बिथां नि हाबा मावनायनि थाखाय दिनै चिरां जिल्लानिफ्राय 75थि उदांस्रि सान फालिनायाव मान बानथा होयो। महामारि कभिद-19 नि थासारिनि समाव गावनि जिउखौ बाउसोमनानैब्लाबो बेरामिफोरखौ फाहामथाय होनायाव हर सान खामानि मावबोनाय सुबुंफोरखौ दिनैनि 75थि भारत उदांस्रि सानजों लोबबा लानानै आसाम सोरखारनि बिथोन बादियै मन्थ्रि उर्खाउ गोरा ब्रह्मा बिथांमोन चिरां जिल्लानि रेबा रयनि न’आव दावबायफैनाय जायो होनना मोन्थि होयो।
सैनिक फरायसालि आव दानिया हिनजावसाफोरा बो फरायनो मोनसिगोन, हदरनि गुबुन गुबुन जायगानि सुबुंफोरनि खावलायनायखौ लाखिनानै बे थिरांथा खौ लायो। 2 बोसोर सिगां बेनि टेष्ट खौ नायखादोंमोन मिजराम नि सैनिक फरायसालि आव, दायो गासै भारत आव नो बेनि सुबिदा खालामनाय जागोन। आगोलाव हौवासाफोरा ल सो फरायसालि आव फरायनो मोनोमोन, आरमि नि फोरोंथायखौ लानो हायोमोन। बे फरायसालि आव फरायनो थाखाय हाबनायनि आनजाद होनो नंगौ, आनजादनि गेजेरजों फरायसाफोरा थाको 6 आरो 9 आव फरायनो मोनो। थाखो 6 नि थाखाय बैसो आ 10 निफ्राय 12 बोसोर जानो नांगोन, थाखो 9 नि थाखाय 13 निफ्राय 15 जानो नांगोन। हादराव हायद्रजेन मिशन फोसावदों, बोलो नि फिल्द आव भारत आ गोजौ फारसे थांगोन, आत्मनिर्भर जागोन। गोदान सोलोंथाय खान्थि आव राव आ माब्लाबाबो हेंथा नङा, माब्लाबाबो हेंथा खालामा। गेलेनायाव बेनि गाहाय बाहागो महरै हमनाय जादों। गेलेनायनि फारसे गोसो बोहोनायानो बेनि गुबै थांखि, अलिम्पिक आ नो बेनि थार बिदिन्थि। गोबां गोजाम आयेनफोरखौ बोखारबाय। 200 बोसोर निफ्राय सोलिबोनाय आयेनफोरनि थाखाय हादरनि नोगोरारिफोरा मेपिं आव हेंथा मोनदोंमोन, बेफोरबायदि आयेनफोरखौ बन्ध खालामबाय। 75 सप्तायाव 75 बन्दे भारत रेल। करना नि बयनिख्रुय गिदिरसिन भेकसिनेशन अभियान। 54 कौटि नि बारा सुबुंफोरा भेकसिन लाबाय। मैया उदांश्रि सान आव भारत नि गाहाय मन्थ्रि बिथाङा बेफोर गासैखौबो बुंदों।
उदालगुरि बारग एनदिएफबि नि सोद्रोमाफोरा उदालगुरि नि जिला बेंगिरि एबा दि सि नि गेजेरजों आसामनि गिबि मन्थ्रि, मिरु नखर मन्थ्रि आरो आसामनि एदिजिपि नि सिम गांसे मेमरेन्दाम गथायो। बेनि गेजेरजों बिथांमोना एनदिएफबि नि गायसनगिबि आफादगिरि रन्जन दैमारि बिथांखौ उदां खलामनो खावलायदों। बिटिआर गोरोबथा नि उनाव बो गोबां केडारफोरा दासिमबो जेल आव नो थानो गोनां जादों। लोगोसे गोरोबथा बादियै थांना थानायनि राहा बो खालामना होआखै, मुंख्लं नखरनो मदद होआखै होनना बुङो। बे दाबिफोरखौ मावफुङाब्ला फैबाय थानाय समाव सोरखार नि बेरेखा आन्दोलन खालामनो गोनं जानो बो हागौ होनना बुङो बिथांमोना।
आसामनि गिबि मन्थ्रि हिमन्त बिश्व शर्मा बिथाङा मैया उदांश्रि सान फालिनाय आव आसामनि रायजोफोरनो मोन 10 खावलायदों। बेनिनो मोननैसो आ--- बृध्याश्रम एबा अल्द एज हम आव बिमा बिफा खौ दैथायहरनो नाङा, बिमा बिफा जों लोगोसे थानो थाखाय 7 सान नि स्पेसियेल सुति होगोन होनना बुङो साख्रि मावग्राफोरनि थाखाय। गावनि खामानि मावनाय जायगायाव फां 75 दंफां पुलि गायनो होदों बिथाङा। पाब्लिक हाबाफारि आव माहारिया, हारियारि सेंमेथाय रोजाबनो होदों, पलिथिन निफ्राय उदां समाज दानायनि समायखिरा लानो होयो। सोरखारि मावथि फोरखौ 1 घन्टा बारा खामानि मावनो खावलायो, हिनजावसा फिसा खौ 2 1 बोसोरनि सिगां हाबा होयनि नि समायखिरा लानो होयो। गथ आरो आयजो फालांगिगिरिफोरनि बेरेखा सांग्रां जा।
उदांश्रि सान आव ओंखाम जानाय बादायलायनाय। आसामनि गुबुन गुबुन जायगायाव बायदि बायदि हाबाफारि नि गेजेरजों उदांश्रि सानखौ फालिदों। नलबारि जिला नि बरखेत्रि आव मोनसे ओंखाम जानाय बादायलायनाय जायो। बरखेत्रि नि लारकुसि आव सानैसो सेंग्राफोर बे बादायलायनायकौ खुङो। बे बादायलायनाय आव सा 8 बादायारिफोरा बाहागो लायो। मोनसे थि सम नि गेजेराव ओंखाम आरो हांसो बेरखौ जानो होयो। बादायलायनाय आ जागायनाय लोगो लोगो नो सोर बेसेबां जानो हायो बेनि बादायलायनाय आव हाबो। हुसेइन आलि मुंनि सुबुङा देरहायो। जोबनायनि उनाव देरहानाय गेलेग्रा नो नोगोद 1 रोजा रां जों लोगोसे ट्रपि बो होयो। माब्लाबा खोनाफेरदोंमोन ना बेबायदि।
नोंथाङा भुपेन भुया खौ सिनायो ना। मैया उदांश्रि सान खौ गुबुनफोरनिख्रुय ईसे आलादायै फालियो। भुपेन भुया या जोंबायदि साधारन सुबुं नङा, सासे आसाम पुलिस नि जवान। बियो जाबायदि उदांश्रि सानखौ फालिदों बेखौ खोनायोब्ला नोंथाङाबो सोमो नांगोन। नारायनपुर नि सिमलगुरि पुलिस आउतपस्त आव पुलिस जवान महरै खामानि मावो। बिथाङा उदांश्रि सानखालि गोदना सिम मोनफैनाय लोदों जौ खौ। जौ फेनानै गाव मा खालामदों एबा मा खालामगोन जेबो हमना मोनाखै। बेथि थांलाय बैथि थांलाय खालामबाय थायो। गोबाङानो दिनैनि दिन आव बेबायदि खालामनांगौना होनना सानदों। गासैबो बिनि फारसे नो नायगासिनो, जाबायदि फाव खालामदों, गोबाङानो लाजिनाय मोनदों, पुलिस नि द्रेस खौ असन्मान खालामनाय जादों, बुंदों गोबाङानो, सोरबा इन्जय बो खालामदों। जाय समाव रायजो सोरखार आ पुलिसखौ गोदान महर होनो बायदिसिना गोदान गोदान नेम बेबस्था लादों, गोबां पुलिसफोरा नो रायजो नि थाखाय थार गोसोजों खमानि मावदों, बेफोरनि गेजेरावनो बेबायदि सुबुंफोरबो दं जाय पुलिस खौ बदनाम खालामो। बेफोरबायदि पुलिस जवान नि बेरेखा गोजौ थाखो नि अफिसार आ माबाफोर बेबस्था लागोन ना लाया उनाव सो मिथिगोन।
आफगानिस्तान आ तालिबान नि आखायाव थांबाय। उदखारि संगठन आ सालायसिगोन नामा हादरखौ, बेबायदिनो नुहरगासिनो। आफगानिस्तान नि हादरगिरि आश्रफ गानि आ बिबान एंगारबाय। मैया फुङाव तालिबान आ जालालबाद खौ दखल खालामदोंमोन, बेनि उनाव नो राजधानि काबुल खौ बो दखल खालामनो थाखाय हाबो। बिसोर गोजोनै आवगायलांनो लुबैयो होनना बुङो। देहा नि बोलो जों नङा, गोजोनै खुंथाय गोहो खौ सोलायनाखौ लुबैयो, बेनि थाखाय सावरायलायदजोंमोन मैया आरो गोजोनै नो दखल खालामो। आमेरिका या 20 बोसोरनि उनाव गावनि आरमि फोरखौ लांफिननायनि उनाव नो बे थासारि आ सोमजियो। काबुल दखल खालामनायनि सिगं नो आमेरिका या हेलिकप्तार नि गेजेरडजों गावनि गासैबो गोजौ थाखो नि अफिसारफोरखौ लाना थाङो आरो गोनांथार फोरमान बिलायफोरखौ सावना होयो। आफगानिस्तान नि गोदान हादरगिरि या मोल्ला आब्दुल घानि बारादार।
bodoinfo.com provides informations regarding State Government, Central Government and Private sector jobs for the aspirants of assam.
Please do not enter any spam link in the comment box. ConversionConversion EmoticonEmoticon