दिनै 2 आगस्त नि जथाय खौरांफोर। ~ Bodoinfo.com

बिटिआर आव हाबबाय धुबुरि जिला नि चापर चार्कल अफिस नि सिंनि अबर फोरनि गामि या। बेनि थाखाय चापर नि फलिमारि आव बायदिसिना स्लगानफोरजों सात्र मुक्ति संग्राम समिति आ धर्ना होदों।बिसोर बुंनाय बादिब्ला गोबां अबर गामिफोरा बिटिआर नि सिङाव हाबबाय, बेखायनो रागा जोंदों। आफादगिरि आखतार हुसेइन आ बुंनाय बादिब्ला भाइरेल जागासिनो बिटिआर नि मानसावगारि, जाय मानसावगारि आव गोबां गामिफोरखौ सोसननाय नुनो मोनदों। मानसावगारि आव चापर नि कृष्णकलि-फलिमारि गामि पन्सायत नि फलिमारि गामि, धिरबिल नि गिदिर ओनसोल आरो रङामाति गामि पन्सायत नि चैबारि हिन्दुपारा गामि जों लोगोसे धुबुरि नि गोबां गामिफोरखौ सोसननो नाजादों होनना बुंदों। मखजाथावदि फलिमारि गामि आव बर नि सुबुं अन्जामिमा या 0 जौखोन्दो, बेबायदिनो चैबारि हिन्दुपारा गामि आव 3 जौखोन्दो बरफोर दं। बेबायदि आव माबोरै बिटिआर आव सोसन्दों होनना सोंनाय खालामदों आपादगिरि या। मानसावगारि भाइरेल जानाय आ सोरखारि नंगौ ना नङा दासिम मिथिनाय जायाखै, सोरखार आ बो बेनि सोमोन्दै जेबो बुङाखै।

कक्राझार जिल्ला कमिटि दुलाराय बर फरायसा आफादआ कक्राझार टेंङापारायाव थानाय एबसुनि मावखुलि माइबं हाउसआव खुंफुंनाय मोनसे खौरांगिरि मेलआव बिटिआर गोरोबथानि गेजेरजों बरफोरा खैफोदनि लामायाव होन्ना माखासे खौरां बिलाइनि गेजेरजों ओंथि गोयै बिबुंथि होनाय आरो एन एल एफ बिनि सायाव ओंथि गोयै बिबुंथि होनायनि हेंथायै गोख्रों फिनजाथाय फोरमायदों। कक्राझार जिल्ला एबसुनि आफादगिरि ख्रीपेस्त दैमारीआ बुङोदि बड’लेण्ड जनजाति सुरझा मन्जनि मावफुं आफादगिरि दावराव देख्रेब नार्जारीआ दुलाराय बर फरायसा आफादनि सायाव ओंथि गोयै बिबुंथि होनाय आरो आसामनि मन्थ्रि इउ जि ब्रह्म, बिटिसिनि गाहाइ मावफुं सोद्रोमा प्रमद बर’ आरो दुलाराय बर’ फरायसा आफादनि आफादगिरि दिपेन बर’नि सायाव ओंथि गोयै बिबुंथिनि गेजेरजों खौरां बिजोंआव बाथ्रा फोसावनायखौ बन्द’ खालामनांगौ होन्ना फोरमायो। खौरांगिरिनि सिगाङाव दैमारीआ बुंबावयोदि न’ सिंआव थाना बाथ्रा बुंनायनि सोलाय फोथाराव ओंखार बोनानै बिटिआर सुक्टिनि दफा फोरखौ आखरे आखरे मावफुंनांगौनि थाखाय गोख्रों खामानि मावनो ओंखार बोनांगौ होन्ना रोखा बुंथियो।

कभिद नि थासारि नि थाखाय बे बोसोर आव मेट्रिक आरो हायार सेकन्दारि आनजाद आ जायासै। गोबां फरायसाफोरा पास जाबाय आनजाद होआलासै नो, बे बोसोराव रेकर्ड सिफायदों। नाथाय बेबायदि फिथायनि उनाव दायो मुं थिसननायखौ लानानै सावरायलायनाय नुनो मोनदों। मेट्रिक आरो हायार सेकन्दारि खौ लाफायोब्ला गासै 6.5 लाख फ्राम जाहैयो, नाथाय आसाम आव फरायसाफोरनि थाखाय नांगौ जानाय मासिफोर दं ना, बे सोंनाय आ नो फरायसाफोरजों लोगोसे बिमा बिफा फोरखौ साननो गोनां खालामदों। मुं थिसननायाव मोनसे गिदिर जेंना नुजाथिनो हागौ होनना सानदों गोबां आ नो। आसामनि सोलोंथाय मन्थ्रि रनुज पेगु बिथाङा मुं थिसननायाव जेबो जेंना नुजाथिनाय नङा होनना बुंदोंब्लाबो गोबां फरायसाफोरजों लोगोसे जोथोन लागिरिफोरा बेबायदि साननाय निफ्राय गोजान जानो हायाखै। गुबुनफारसे सिबिएसई नि फरायसाफोरबो दं, बेखौ लाफायोब्ला 7 लाख नि खाथियाव जाहैयो। हायार सेकन्दारि आव गासै 2,47,378 फरायसाफोरा पास जादों, नाथाय आसाम आव दिग्रि फरायनायनि मासि दं 1.73 लाख, बेखायनो थाबावनाय 74,278 फरायसाफोरा फरायनोमोनगोन ना मोना बेयो मोनसे सोंनाय जाना फैदों, सानैसो फरायसाफोरा गुबुन बिफान आव फरायनो थांगोन, थेवब्लाबो होनो हामारगोन ना एदमिशन, एदमिशन मोनमारगोन ना फरायसाफोरा, सम आ सो खोन्थागोन।

बिटिआरनि गाहाइ सदर सहर कक्राझार नोगोरखौ फैगौ थाम बोसोराव मास्तार प्लेन बानायना स्मार्ट टाउन महरै गायसनगोन होन्ना रोखा बुंथियो बिटिसिनि गाहाइ मावफुं सोद्रोमा प्रमद बर’आ। कक्राझार सहरखौ जौगाखां होनायनि थाखाय माखासे प्रजेक लागासिनो दं होन्ना फोरमायो आरो आथिखालआव अर्गानिक साहा आबाद मावनानै रांखान्थियारी जांख्रिथाय लाबोनो हानाय साहा आबादारि फोरखौ माबोरै बिटिसि सोरखारा आरोबाव दिहुनथाय गोहोखौ बांहोनो हागोन बिनि सायाव थाबैनो ‘स्मल टि ग्र’वार एस’सियेशन’ जों गुवारै सावराय ज्लायगोन होन्नानैबो बुंबावयो। बे आयदायावनो बर’ बिथांआ बुंबावयोदि पाब्लिकनि साइख’ हरजानाय महरै दिनैनि समाव पाब्लिक फोरनिनो खामानि मावलांगोन होन्नानैबो रोखा फोरमायो। मख’नो गोनांदि कक्राझार सहरनि HMB साहा गलाया बिटिसिनि गाहाइ मावफुं सोद्रोमा प्रमद बर’आ हर्खाबै गुबुन दाबसे जायगायाव थांनाय समाव हाब्रना साहा लोंलांनायखौ जोबोद गोजोन्नाय फोरमायदों।

दरं पुलिस आ मैया बेलासि सम आव मंगलदै नि भेबारघात निफ्राय गोबां बिबांनि नंखाय रां एबा जाल नोत मोनदों। जिला नि एसपि शुशान्त बिश्व शर्मा बिथाङा बुंनाय बादिब्ल उदालगुरि जिला नि पनेरि थाना नि सिङाव थानाय साहा किलखुरा गामि नि रफिक आलि आरो 1 नं गरियाझार गामि नि जुन आलि मुंनि सानै सुबुं आ 500 रां नि बान्दोलनि गासै 2 लाख78 रोजा 500 रांनि नंखाय रां मंगलदैनि भेबारघात आव लांनो नागिरनायैवनो सानैखौबो हमो पुलिसफोरा। बिसोर बुंनाय बादिब्ला रङिया निफ्राय बे नंखाय रां फोरखौ लांदोंमोन। जाथाय नि सायाव पुलिस आ मंगलदै सदर पुलिस थाना याव गसर रेजिस्तार खालामो।

भारत नि थाखाय मोनसे रेकर्ड। बेदमिन्तन गेलेगिरि पिभि सिन्धु आ चिन नि हे बिंजियाअ खौ फेजेननानै ब्रन्ज मेडेल मोननो हादों, 21-13 आरो 21-15 सेत आव फेजेनो। मोननै अलिम्पिक आव मेडेल मोननाय भारत नि गिबिसिन आयजो गेलेगिरि जानो हादों। बिथाङा 2016 मायथाइआव रिअ अलिम्पिक आव रुफा नि मेडेल मोननो हादोंमोन। गुबुनफारसे भारतनि हौवाफोरनि हकि नि दोलो आ 41 बोसोरनि उनाव सेमिफाइनेल सिम मोनहैनो हाबाय। मनप्रित सिंह नि दैदेननाय दोलो आ ग्रेत ब्रितेइन खौ 3-1 गल जों फेजेननो।

उत्तर प्रदेश आव उदांश्रि दावहारु भगत सिं नि थैनाय नि फाव नि रिहार्सल खालामनो थांनानै जिउ गोमायो सासे 10 बोसोर बैसो नि गथ आ, बुदाउननि बाबा गामि आव जादों। शिभम मुंनि गथ आ लोगो फोरजों भगत सिंह, राजगुरु आरो सुखदेब नि सायाव उदांश्रि सान खालि मोनसे नायजाब खालामनायनि थिरांथा लादोंमोन, बेखायनो रिहार्चल खालामदोंमोन। जोबथा सिन नि थाखाय शिबम आ फासि नि फाव खालामनाय समाव नो टेबुलनिफ्राय फिस्लायन गोग्लैयो। बियो हां लानो खस्त मोनदोंमोन, नाय लोगोफोरा बेखौ फाव सो खालामदों सान्दोंमोन। बिनि देहा या दलर थानाय आव सो लोगोफोरा गिदोंमोन, बिसोर गामिनि सुबुंफोरखौ लिंनो थांदोंमोन उनाव, नाथाय बै सम सिम गथ नि जिउ आ गोमाबायमोन।