28 March morning news

एनदिएफबि नि गायसनगिबि आफादगिरि रन्जन दैमारि बिथाङा माब्ला जेल निफ्राय उदां जागोन। बि टि आर गोरोबथानि सागानगिरि आरो बारग' एन डि एफ बि नि गाइसनगिरि रन्जन दैमारिनि हियरिंआ आ दिनै जागोन। बेयो मोजाङै मोजां जोबलांनानै थाबैनो उदां जानायखौ हास्थायनानै मैया मोनाबिलि नि समाव उदालगुरि जिल्ला BONSU आ आलारि बाथि फोजोंनानै आर'ज खालामदों। बिथाङा जाहाथे थाबैनो उदां जानानै बर हारि नि थाखाय मोजां खामानि मावलाङो बेखौ नो लुबैदों होनना फोरमायो।

     जों सावरायलायनानै सो जेंना फोरखौ सुस्रांनागोन, पिआईएल होनानै नङा, जोंनि फारागफोरखौ फोजोबननानै जों माबोरै खौसे जानो हायो बेखौ नाजालांबाय थानो नांगोन, जयै माबोरै खामानि मावनो हायो बेखौ नाजानांगौ। जों बरफोरनो दायो खौसेथि राजखान्थियारि सांवसारनायसो नांगौ, हाथियार नांला, बेखौ लाबोनो हायोब्ला थाबोनाय थांखि फोर, मावनो लानाय, गासैबो दाबि फोरा नो जाफुंगोन। बेखौ बिकेदाब्लिउएसि नि गाहाय मिहिनिस्वर बसुमतारि बिथाङा बुंदों। बिथाङा लोगोसे गोदोनि दैदेनगिरिफोरखौ मान सन्मान होनो रोंनांगौ होनना बो बुंबावो। आगु नि दैदेनगिरिफोरा माबायदि गिलु बालु थासारि जों जुजिबोदोंमोन, दानि थासारि आ बै सम नि थासारि जों गोरोबा। सानसुमा खुंगुर बैसुमुथियारि बिथांमोना बै समाव हारसा फोरा बर हारि खौ नो फोजोबस्रांनो नागिरनाय, पुलिस मिलिटारि लगायनानै बुथारग्लुंनाय, जोबथेसालि आव सोनाय, जिनाहारि खालामजानाय बायदि जाथायफोरजों सौसिबोनांदों, बेनि गोबां फोरमान बो थालांदों, बेफोरखौ बावनानै थाबा जाया, बै समाव माबायदि थासारि आव थानानै खामानि मावनांदोंमोन, बर फरायसा आफाद आव थानानै खामानि मावनांदोंमोन बेफोरखौ दिनै नि दैदेनगिरिफोरा बुजिनो नाजायोब्ला मोजां, बिथांमोना मा बिहोमा होलांदों बेखौ ईसे बुजिनो नाजायोब्ला मोजां आरो सिनियर फोरखौ सन्मान होनायखौ लाखियोब्ला मोजां। बांद्राय सिमा गैयि बाथ्रा बुंनाय आ जाया। बयहाबो उदां यै बुंनायनि मोनथाय दं, नाथाय जानला मानला सोदोब बाहायनानै बुंबानो जाया, रायनाय मुं सुनाय आ जाया। मुसुखा बानायनानै सावनाय आ जायो, नाथाय जोनाय, गाग्लिनाय आ बारा जादों होनना बो बुंबावदों बिथाङा।

       मानास माहारियारि हाग्रामा याव गोबां दावबायारिफोर फैदों। जोंनि हादरनि जों लोगोसे गुबुन हादरनि बो दावबायारिफोर फैदों हाग्रामा याव, कभिद नि थाखाय गोबां सान बन्ध थानायनि उनाव खुलिफिनना होनायनि उनाव नो गोबां रां मोननो हादों होनना बिबानगिरिफोरा बुंदों। दावबायारिफोरनि थाखाय बेखौ खुलिना होनायनि उनाव नो थआंनाय 5 दान आव 1 कौटि 7 लाख रां मोननो हादों। गावनि गारि खौ सोनो होयि आव रां खौ खम मोनगोन होनना साननाय जादोंमोनब्लाबो बेनि उल्था सो जायो। जिप साफारि जों ल दावबायारिफोरनो नायनायनि सुबिदा होनायनि उनाव बो खम जायाखै रां मोननाय आ। थांनाय 5 दान आव हादरनि दावबायारिफोरनि अनजिमा या 8 लाख बारबाय, गुबुन हादरनि दावबायारि नि अनजिमा या 34 होनना मिथिना मोनदों

      मनिपुर नि गिबि मन्थ्रि महरै नैथि खेब समायखिरा लानायनि उनाव नो गिबि मन्थ्रि एन बिरेन सिंह आ सान 5 नि खामानि मावनाय सान फोसावनानै होदों। दानिया मनिपुर आव सोरखारि मावथिफोरा सम्बार निफ्राय सुक्रबार सिम मावोब्ला नो जागोन। नाथाय बेयाव गोलाव बन्ध मोननाय बिफानफोरखौ लाफानाय जायाखै। 1 एप्रिल निफ्राय बे नेम आ जागोन। बेनि सिगां गिबि मन्थ्रि आ बिबान लानायनि उनाव नो रायजो नि गुदि फरायसालि फोरखौ फुंनि 8 बाजि आव खुलिगोन होनना फोसावनानै होदोंमोन। मखजाथावदि साननैसो सिगाङाव जालांनाय बिधानसभा बिसायखथि आव बिजेपि दोलो आ हारसिंनो सोरखार दानायनि मासि मोनदोंमोन।

       बे रायजो नि गुबुन गुबुन जायगा याव आलु पियाज नि बेसेन आव बमा मोनो। गोसो जायोब्ला नो 100-150 सो रां आव नो बायनो हायो मोनसे बम. जाथाय आ सोनाब बंग नि। रायजो नि गुबुन गुबुन जायगा जों लोगोसे बिरभुम आव 24 घन्टा याव 200 नि बारा आखायजों बानायनाय बम मोनदों। गासै रायजो आव नो 400 नि बारा मोनदों। मखजाथावदि बिरभुम आव नो साननै सिगाङाव न सावना होनायै सा 10 नि जिउ फोजोबनाय जाथाय जादोंमोन। पुलिसफोरा गासै रायजो आव नो नागिरनाय आव 400 नि बारा बम मोननायजों लोगोसे सा 11 खौ हमनो हादों। बिरभुम आव जानाय जाथायनि उनाव नो गिबि मन्थ्रि आ गासैबो आयेन बेरेखा हाथियार आरो बम फोरखौ नागिरनो बिथोन होदोंमोन।

         ट्रेद ईउनियन आ मिरु सोरखार नि खान्थि नि बेरेखा साननै नि थाखाय भारत बन्ध फोसावदों। 28 आरो 29 मार्च आव बन्ध फोसावदों। बे बन्ध फोसावनायखौ अल ईन्दिया बेंक एमप्लयिस एशसियेशन आ बो मदद होदों। भारत बन्ध जों लोगोसे धर्ना हाबाफारि बो लादों होनना फोसावदों। बेंक ईउनियन आ बुंदों सोरखारि बेंकफोरखौ सोरखारि नङि बानायनाय आरो बेंकिं आयेन 2021 नि बेरेखा बेखौ फोसावनानै होदों। स्तेत बेंक आ बुंनाय बादिब्ला बेंकिं सारभिस आव बे बन्ध फोसावनाय आ गोबां गोहोम खोख्लैगोन। मिरु सोरखार नि मावथिफोरनि बेरेखा, आबादारिफोरनि बेरेखा, रायजोपोरनि बेरेखा आरो हादर बेरेखा खान्थि नि थाखायनो धर्ना होनाय हाबाफारि लादों होनना बुङो। मिरु सोरखार आ 2021 आव गंनै सोरखारि बेंक फोरखौ प्राईभेत बानायनायनि थिरांथा लादोंमोन। ट्रेद ईउनियन आ फोरमायनाय बादिब्ला बे बन्ध आव लामा, हान्थामेल आरो मोब्लिब नि मावथिफोरा बो बेखौ मदद खालामगोन होनना बुंदों, बेजों लोगोसे खैला, स्तिल, थाव, तेलिकम, पस्तेल, ईन्काम टेक्स, कपार आरो ईन्सुरेन्स नि मावथिफोरा बो बाहागो लानो हागौ होनना बुंदों।

• Tweet
• Share
• Share
• Share
• Share

About Mridul

bodoinfo.com provides informations regarding State Government, Central Government and Private sector jobs for the aspirants of assam.

Related Post