बर' गोरोबथा 2020 खौ मावफुंनायनि सायाव दिनै सावरायनाय जायो। ~ Bodoinfo.com

बर' गोरोबथा 2020 खौ मावफुंनायनि सायाव दिनै नर्थ ब्लक, नखर बिफान (MHA), गोदान दिल्लीआव मोनसे थाम खनायारि सावरायनाय जथुम खुंनाय जादोंमोन, जेराव भारत सोरखार, आसाम सोरखार आरो सागानगिरि बर' आफादफोरनि थान्दैफोर दंमोन।

बे मेलखौ लोगो नेहाथारि (सा-सानजा), एमएचए, निरज कुमार बनस'दआ दैदेनदोंमोन आरो बेवहाय एमएचएनि लेङाइ नेहाथारि एन. आर. मिन्ज, आसाम सोरखारनि नखर बिफाननि नेहाथारि पार्थ मजुमदार, एडिजिपि हिरेन नाथ आरो बिटिसिनि गाहाय नेहाथारि आकाश दीपआ बाहागो लादोंमोन।

सावरायनायाव सागानगिरि आफादफोर - दुलाराय बर' फरायसा आफाद (एबसु), बारग' एनडिएफबि आरो इउनाइटेड बर' पिपुल्स अर्गेनाइजेसन (इउबिपिअ')नि सा 10 सोद्रोमानि थान्दै हान्जाया बाहागो लादोंमोन। बे जथुमायाव गोरोबथानि सिङाव सुस्रांजायै गाहाय जेंनाफोर आरो गोनांथि दाबिफोरनि सायाव नोजोर होनाय जादोंमोन।

सनितपुर, बिस्वनाथ आरो बिटिआरजों नांजाबनाय खोलायारि ओनसोलफोराव बर'-बांसिन गामिफोरखौ सोफादेरनो थाखाय बिटिआरनि फेहेरनाय बायदि आयदाफोर; बिटिआरनि बांसिन जारखुंथाय आरो गोहोखौ रोखा खालामनो थाखाय दफा 280 आव सोदांनाय आरो थाथ'नाय 125थि संबिजिरारि सोदांनाय बिल; कार्बि आंलंआव थाग्रा बर' कछारी सुबुंफोरनो सेडियुल ट्राइब (हिल्स) बिमुं होनाय; TAC आरो RHAC नि सिङाव BKWAC गामिफोरनि गोख्रै फोसावनाय; बिटिआर ओनसोलनि सिङाव एफआरए आयेनखौ आबुङै मावफुंनाय; सोरखारि रायजोआरि खालामनायनि सिङाव सोलोंथायारि फसंथानफोरखौ सोफादेरनाय; केस बोखांनाय, मुंख्लंफोरनि नखरफोरनो अनसुंथाइ होनाय आरो बारग' केडारफोरनि फिन थांना थाफिन्नायनि राहानि सायाव सावरायनाय जादोंमोन।

सागान होग्रा बर' आफादफोरा सावरायनायखौ सोरजिलु आरो फिथाइ-गोनां होनना बुंदोंमोन, जेराव आद्रा थानाय रादायफोरखौ गोख्रै आरो सम सिमा गोनां मावफुंनायाव गोसो होनाय जादोंमोन।

ABSU दैदेन्नाया 2026 माइथायनि सिगां नुनाय दावगानायनि दाबिखौ गोख्रोङै बुंफिन्दोंमोन आरो सांग्रांथि होदोंमोन दि थिखानाय समसिमानि गेजेराव खामानि मावनो हायाब्ला बर' सुबुंफोरनि मोन्थाय आरो लुबैनायफोरखौ जाफुंहोनो थाखाय सुबुंखान्थियारि सोमावसारनायनि गोनांथि जानो हागौ।