UPPL and BPF condition will be same as AGP says APCC president Gaurav Gogoi ~ Bodoinfo.com

आसाम प्रदेश कंग्रेस कमिटिनि आफादगिरि गौरब गगैआ बिटिआरआव हाबनायनि उनाव इउपिपिएल दोलोनो सांग्रांथि रादाब फोसावदों। प्रदेश कंग्रेस कमिटि (एम.पि.सि.सि.) नि आफादगिरिया बि.टि.आर.नि खुंथायाव थानाय दोलोखौ हुमखि होदोंमोन, आसामनि राजखान्थियाव बबे दोलोआ सोरखौ गोबानानै लादों आरो फोजोबस्रांनायनि लामायाव नारख्लायहरदों। लकसभायाव बेरेखा हान्जानि दैदेनगिरिया बेखौबो बिबुंथि होदोंमोन दि बबे दोलोनि बेंखनाव बबे ओनसोलारि दोलोआ जोबस्रांनो थांगासिनो दं।

गौरब गगैआ बड'फा उपेन्द्र नाथ ब्रह्मनो मान बावदों

ए.जि.पि.आ सानै-साथाम सुबुंनि दोलो जाबाय:

असम प्रदेश कांग्रेस कमेटी (एपीसीसी) नि आफादगिरिया सम्बारखालि कक्राझाराव थांनानै बिजेपिनि बेरेखा गोख्रों बिबुंथि होयो। जिल्लानि बाउखुंग्रि बियाबनि आदाबारियाव कंग्रेसनि बान्जायनायाव खुंफुंनाय मोनसे हान्जा सुरनाय हाबाफारिनि उनाव खौरांगिरिफोरनि सिगाङाव गौरब गगैआ बि जे पिखौ सोंखारिदोंमोन आरो बुङो, "दिनै एजिपिनि थासारि बादिनो इउपिपिएल आरो बिपिएफनिया बो जागोन। एजिपिआ दा सानै-साथामल' सुबुंनि दोलो जाबाय। दोलोआ आसाम सोमावसारनायनि समाव मोनसे गोख्रों ओनसोलारि दोलो महरै जोनोम जानानै गोबां मावनो हागौमोन। आसाम गोरोबथाया गासैबो मावफुंजानांगौमोन; नाथाय बि.जे.पि.नि फान्दायनायाव आगान होनानै, बेयो लासै-लासै सानैनिफ्राय साथामल' सुबुंनि दोलोआव सोलायगासिनो दं होनना गौरब गगैया बुङो।

बिपिएफ आरो इउपिपिएलनि बेलायावबो बेबादिनो जादों होनना बुंनानै बिथाङा बुङो दि बेयो जोबोद दुखु नांथाव बाथ्रा दि दा बयबो हिमन्त बिस्व शर्मानि सिगाङाव हान्थु खेरायनो गोनां जादों।

कंग्रेस सोरखार थायोब्ला, ओनसोलारि दोलोफोरा गोख्रों जायो:

असम प्रदेश कांग्रेस कमेटी (एपीसीसी) नि आफादगिरिया बुंदोंदि कंग्रेस दोलोआ ओनसोलारि दोलोनि सान्दांथिफोरखौ बुजियो आरो मान होयो, बेनि थाखायनो कंग्रेसनि सोरखार थायोब्ला ओनसोलारि दोलोआ गोख्रों जायो। कंग्रेसआ जेब्लाबो बावसोमबोदों आरो बांसिन ओनसोलबादनि थाखाय बेबादि खालामनो थियारि। गोहोआ फैगोन, गोहोआ थांगोन; नाथाय बेवहाय ओनसोलारि सानथौ थानांगौ। ओनसोलारि आरो हायुंआरि सानथौनि गेजेराव मोनसे मोजां सोमोन्दो थानांगौ। सा-सानजा रायजोफोरा ओनसोलारि आरो रावनि सिनायथियाव जोनोम जायो। "

"कंग्रेसआ सा-सानजानि सुबुंफोरनि सान्दांथिफोरखौ बुजियो जायखौ बि.जे.पि.आ बुजिनो हाया। बिसोरनि थांखिया गंसे हादोर, मोनसे हानजा, न’ एजिपि, न’ बिपिएफ, न’ इउपिपिएलबो नङा। "

बर'नि हानि रिम'ट कन्ट्र'ला गिबि मन्थ्रिनि आखायाव:

असम प्रदेश कांग्रेस कमेटी (एपीसीसी) नि आफादगिरिया फिन बुंबावदोंदि दानि बरनि हानि रिमोत कनत्रला गिबि मन्थ्रि हिमन्त बिश्व शर्मानि आखायव दं। रुंसारि तरुन गगैनि समाव रिम'ट कन्ट्र'ला बर' सुबुंफोरनि आखायावमोन। बेनिखायनो सुबुंफोरा दा बेखौ बुजिबाय आरो कंग्रेसखौ बरायनो थाखाय फिन ओंखारबोगासिनो दं होनना बुङो बिथाङा।