Actress Shefali Jariwala known for kaanta laga dies at 42. ~ Bodoinfo.com

फावखुंग्रि शेफाली जरीवाला, जाय गावनि मिउजिक भिदिअ ‘कांता लागा’ आरो बिग बस 13 नि थाखाय मुंदांखा जादोंमोन, मुम्बाइआव 42 बोसोर बैसोआव रुंसारि जायो।

फावखुंग्रिनि खाथि सोमोन्दोनि बायदिब्ला, सुक्रुबारनि मोनायाव मुम्बाइनि गंसे देहा फाहामसालियाव हार्ट एतेकजों बिथांजोआ रुंसारि जादोंमोन। हार्ट एटेक जानायनि उनाव शेफालीखौ बिथांनि फिसाय पराग त्यागीआ थाबैनो देहा फाहामसालियाव लांदोंमोन, नाथाय सौहैनायाव, डाक्टारफोरा बिथांखौ थैबाय होनना फोसावदोंमोन।

शेफाली जरीवालानि थैनाय (Photo : Instagram)

बिथांजोनि नखरा शेफाली जरवाला थैनायनि सोमोन्दै दासिमबो जेबो मावख'आरि बिबुंथि फोसावाखै।

जरीवालाया इं 2002 माइथायाव मिउजिक वीडिय' 'कांता लागा' आव फाव खालामनानै सोराङाव फैदोंमोन। बे वीडिय'आ जोबोद बाङाय समनि गेजेरावनो सुबुंफोरनि गेजेराव मोनसे मोजां मुं मोननो हादोंमोन, बे मिउजिक वीडिय'आ भारतारि प'प हारिमुनि मोनसे मख'जाथाव बाहागो।

उनाव बिथाङा इं 2004 माइथायनि हिट सावथुन 'मुझसे शादी करोगी' आव मोनसे गोसोखांथाव फाव खालामनानै बलीवुडआव गावनि जिउ राहाखौ फुवारदोंमोन। बे सावथुनाव बिथाङा सलमान खान आरो अक्षय कुमारजों लोगोसे फाव खालामदोंमोन।

फावखुंग्रिखौ टेलीविजनआवबो सिनायथि होनाय जादों। बिथाङा फिसाय-फावखुंगुर पराग त्यागीजों लोगोसे 'बिग बस 13' (2019) आरो 'नच बलिए' (सीजन 5 आरो 7) बायदि मुंदांखा रियेलिटी श'आव बाहागो लादोंमोन।

रंजानाय दारिमिननि अनगायैबो जरीवालाया गुबुन आयदाफोरावबो सांग्रांमोन, बिथाङा गोसोआरि सावस्रि सांग्रांथियाव खामानि मावदोंमोन बिथाङा आइजो गोहो होनायावबो सांग्रां बिफाव लादोंमोन। मिर्गी बेरामजों गावनि दावहानि सोमोन्दै बेखेवनानै बिथाङा गुबुनफोरखौबो गावनि प्लेटफर्मखौ बाहायनानै रोखोमसे जुजिनायजों मोगा-मोगि जानो थाखाय थुलुंगा होदोंमोन।

मुंदांखा फावखुंग्रि शेफाली जरीवालानि अबथिरायै रुंसारि जानाया रंजाथाय मुलुगाव दुखुनि थासारि सोमजिहोदों। जरीवालाया गावनि फिसाय पराग त्यागीखौ गारना बे बुहुमनिफ्राय थांबाय, बिथांहा गावनि फिसायजों मोनसे गोख्रों सोमोन्दो दंमोन।