आसामनि बारग’ गिबि मन्थ्रि सर्बानन्द सन’वालआ मिरु केबिनेट मन्थ्रि महरै समायखिरा लाबाय। हादरगिरिनि भबन आव मैया गोदान मिरु केबिनेट मन्थ्रिनि समायखिरा लानाय हाबाफारिखौ खुंफुंनाय जायो। हादरगिरि रामनाथ कभिन्दआ गासै सा 43 गोदान केबिनेट मन्थ्रिफोरखौ समायखिरालाइ फरायहोनानै समायखिरा लाहोयो। मैया दिल्लीआव गासै सा 43 मिरु केबिनेट मन्थ्रिजों आसामनि बारग’ गिबिमन्थ्रि सर्बानन्द सन’वालआबो समायखिरा लायो। सर्बानन्द सन’वालजों लोगोसे किरेन रिजिजु बिथाङाबो मिरु केबिनेट मन्थ्रि महरै समायखिरा लादों। आसामनि बारग गिबि मन्थ्रि नो आयुश, जाहाज आरो दै लामा नि बिबान खौ होदों। किरन रिजिजु बिथांनो आयेन आरो न्याय नि मन्थ्रि नि बिबान होनाय जादों। राजनाथ सिंह आ रैखाथि, अमित साह आ नखर, निर्मला सितारामन आ रांखान्थि, नरेन्द्र सिंह तोमार आ आबाद, स्म्रिति ईरानि आ आयजो आरो गथफोरनि बिफान, धर्मेन्द्र प्रधान नो सोलोंथाय, अश्विनि बैश्नव नो रेल, हर्सदिप सिंह पुरि नो पेट्रलियाम आरो थिंगायारि गेस नि बिबान, भुपेन्दर यादव नो हाग्रा बिफान फोरखौ होनाय जायो। गुबुन फारसे रायजोआरि मन्थ्रि नि बिबना महरै आसामनि रामेश्वर टेलि नो पेट्रलियाम आरो मिथिंगायारि गेस नि बिबान होनाय जायो। मदि नि मन्थ्रि आफाद आव आयजोफोरनि बोलो। सा 7 आयजो मन्थ्रि फोरखौ सोदों, दायो गासै सा 11 जाहैबाय।
2020 माइथायनि 27 जानुवारी खालि बर’नि थामथि गोजोन गोरोबथा, बिटिआर गोरोबथानि उनाव एनडिएफबिनि मोनब्रै हान्जायाबो हाथियार गथायना होदोंमोन। गोरोबथा बादियै बारग’ एनडिएफबिनि सोद्रोमाफोरखौ साख्रि होनाय एबा थोंजोङै थिसनथाय होनायनि बाथ्रा दंमोन नाथाय बेफोरखौ दासिमबो जेबो खालामनायखौ नुनो मोननाय जायाखै। बेखौ नोजोर होनानै दिनै बाक्सा जिल्लानि बारग’ एनडिएफबि सोद्रोमाफोरा बिटिसिनि गाहाइ मावफुंगिरि सोद्रोमा प्रमद बर’निसिम खावलायनानै गांसे लाइजाम लिरो। बे लाइजामाव बारग’ एनडिएफबि सोद्रोमा बिथांमोना बारग’ एनडिएफबिफोरनि जेंनाफोरखौ दोनथ’नानै स्किल ट्रेइनिं होनानै बुरखायनो नाजादों नामा होननानै सोंथि खालामो। बेजों लोगोसे माखासे गावआरी सेंग्रा-सिख्लाफोरनि प्रि-रिक्रिउटमेन्ट ट्रेइनिं खालामनायजों एनडिएफबि केडारफोरखौ सरजाबना होफानो नाजानायखौसो नुनो मोन्दों होनानै फोरमायो। बारग’ एनडिएफबि हा स्किल ट्रेइनिं आरो जेनेरेल प्रि-रिक्रिउटमेन्ट ट्रेइनिंनि गोनांथि गैया होनना फोरमायो। एनडिएफबि केडारफोरखौ सोरखारि साख्रि, पुलिस-मिलिटारी आव थोजोङै थिसनथाय होनांगौ आरो 34 बोसोर आलादा राइजोनि थाखाय दाबि खालामना हाथियार लानाय सोद्रोमाफोरनि जेंना आरो रिहेबिलिटेसननि खामानिखौ सिगांग्रो मावनांगौ होननानै प्रमद बर’निसिम खावलायो।
बारग' NDFB बिथांमोननि थाखाय बि.टि.आर एकर्टनि बायदियै पेरामिलितारि आव सोनायनि सोमोन्दै मैया गोख्रोंयै बि.टि.सि नि गाहाय मावफुं सोद्रोमा प्रमद बर' लेङाइ मावफुं सोद्रोमा गबिन्द बसुमतारि इ.एम रनजित बसुमतारी आरो MLA लरेन्च इसलारी बिथांमोना SSB नि DIG आरो BTR नि IGP बिथांमोनखौ लानानै सावरायनाय जायो। लोगोसे बेयाव माबोरै बर लाइमोन फोरनो स्पेसियेल सायखजायो बेनि सोमोन्दै बो सावरायलायनाय जायो होनना बुंदों बिटिआर नि गाहाय बिथाङा
मैया रायजो सोरखार आ केबिनेत आव मोननैसो गोनांथार थिरांथाफोर लादों। थिरांथाफोरा जाबाय— टेट पास जानाय नि फोरमान बिलाय नि जोबनाय सम सिमा या जिउ जोबजासिम जाबाय। नाथाय साख्रि नि बैसो नि सिमा या एखे आ नो थागोन। दानिया गासैबो सोरखारि मावखुलि या हारियारि मेथायजों जागायगोन आरो माहारियारि मेथायजों फोजोबगोन। सोरखारि मावखुलियाव जादराव नो बानायना गामसा फोरखौ बाहायगोन, लोगोसे जानायफोरखौबो रायजो आव नो बानायनायखौनो जागोन, जेरै साहा जों लोगोसे लारु बायदिफोर। मोब्लिब बिल होनायनि एनअसि होआब्ला सोरखआरि मावथिफोरनि दरमाहा दानगोन। जुलाई दान सिम रायजोआरि मावथिफोरा मोब्लिब बिल होनायनि एनअसि होनो नांगोन। आगस्त दान निफ्राय दरमाहा मोननोब्ला एनअसि नि गोनांथि जागोन। लोकप्रिय गपिनाथ बरदलै नि सान खौ मावथि सान महरै फालिनाय जागोन, बे सान खालि मोनफ्रोमबो जिला नि सा 5 मावथिफोरनो सन्मान होनाय जागोन। रायजोआरि महरै सा 10 नो सन्मान होनाय जागोन। देसभक्त तरुनराम फुकन नि थैनाय सान खौ देसभक्त सा महरै फालिगोन। आबुं लकदाउन जानाय जिला याव 3 सान थागोन गारजेन मन्थ्रि या।
सोनाब बंग आव नंखाय साख्रि नि रेकेत। दाय आव सा 8 खौ हमो। बिसोर सोनाब बंग नि पुर्ब बर्धमान जिला याव बेखौ सालायोमोन। खौरां मोननाय बादिब्ला फिउसार ईन्दिया मुङै खुलिनाय कम्पानि आ 3000 सो सुबुंफोरखौ थगायबाय रायजोआव। कम्पानि आ 55000 निफ्राय 1 लाख नि गेजेराव रां लायोमोन सासे सुबुंनिफ्राय आरो बिनो राजा लामा नि सिकिउरिति नि साख्रि होगोन होनना बुङोमोन। पुलिसफोरा बिसोरनिफ्राय 1.10 लाख रां, गांनै रिजिसतार, गंनै पेनद्राइभ, गं 7 मबाइल फन आरो थगायनाय सुबुंफोरनि फारिलाय बोखांनो हादों।
ईउरो काप फाइनेल मोनबाय ईंग्लेन्द आ। मैया देनमार्क खौ 2-1 गल जों फेजेनो ईंग्लेन्द आ। उफ्रा सम आव हेरि केन आ होनाय गल जों देरहायो। ईंग्लेन्द आ फाइनेल खौ ईतालि नि बेरेखा गेलेगोन। 12 जुलाई नि हर नि 12.30 आव जागोन फाइनेल आ।
चिरां जिल्लानि बिजनी थानानि सिङाव थानाय काचदहाआव मोनसे गिख्रंथाव बुथारनायनि जाथाय जायो। आसाम सोरखारनि रैखाथि हान्जानि जवान इयाद आलीआ बिजनी पुलिस थानानिफ्राय गावनि खामानि फोजोबनानै हरनि खमैबो 12 रिंगासोआव न’ फारसे थांबाय थानाय समावनो माखासे दुथांफोरा लामायाव गोबौ हाथियारजों गाग्लोबनानै खास्रि-बिस्रियै बुथारो। जाथाय जायगायाव चिरां जिल्ला आरो बङाइगाव पुलिस बिबानगिरि सहैयो आरो जाथायनि सायाव नायबिजिरनायखौ जागायो। आमसुनि मिरु आफादगिरि रेजाउल करिम सरकारआ जाथाय जायगायाव सहैनानै दायनिगिरिखौ थाबैनो नायबिजिरनानै हमनांगौ आरो गोख्रों साजा होनांगौ होननानै प्रसासनखौ दाबि खालामो। लोगोसे बुथारजानाय जवाननि नखरनि गासैबो बिबानखौ लानो प्रसासनखौ दाबि खालामो।
कक्राझार जिल्लानि सिङाव थानाय गसाइगाव महकुमानि नागा सेकिं पष्टआव अरुनाचल प्रदेसनिफ्राय आयेननि बेरेखा बिलाथि जौ लाबोनायखौ गसाइगाव महकुमा पुलिस बिफानआ 31नं राजा लामायाव हमदों। गसाइगाव महकुमानि SDPO बिथां सौरभ गुप्ताआ फोरमायनाय बादिबा गंसे UP-23T 5181 नंनि गंसे गारिआ जौखौ अरुनाचल प्रदेसनिफ्राय उत्तर प्रदेसनि मुरादाबाद सिम लांनो नागेरदोंमोन। पुलिसआ गारिजों लोगोसे सालायग्राजों लोगोसे सा 2 सुबुंखौ हमनाय जादों होननानै खौरांआव फोरमायना होदों।आरो दासिमाव बेनि सायाव नायबिजिर नाया सोलिगासि दं होनना बुंथिबावो।
दिल्लि पुलिस आ नंखाय कल चेन्टार नि सा 94 सुबुंफोरखौ हमदों। बिसोर गंनै नंखाय कल चेन्टार आव खामानि मावोमोन। किर्टिनगर आरो मंगोलपुरि ओनसोलाव नागरिरदोंमोन पुलिसफोरा। ग्लबेल एयारफेयार मुंनि ट्रेभेल एजेन्सि नि मुं लानानै पाब्लिक सिकिउरिति नम्बर गोदान खालामनायनि सोलो जों आमेरिका नि थागिबिफोरखौ थगायोमोन। किरतिनगर नि कल चेन्टार निफ्राय सा 28 खौ हमदों।
आसामाव मैया गासै 2289 गोदान केस मोनदों। सा 26 नि जिउ बो गोमादों। दासिम आसामाव गासै 5,24,556 जाबाय पजितिभ मोननाय आ। मैया गासै 101729 टेष्ट खालामना नायदोंमोन।
bodoinfo.com provides informations regarding State Government, Central Government and Private sector jobs for the aspirants of assam.
Please do not enter any spam link in the comment box. ConversionConversion EmoticonEmoticon