27 सेप्तेम्बर खालि भारत बन्ध जागोन। आबाद नि मोन 3 बिल खौ बोखारहोनो नारसिननो थाखाय सोमावसारनायखौ गोरासिन खालामगोन। मैया मुजाफ्फर नगर आव जानाय किषान महापन्सायत नि मन्स निफ्राय बे समायखिरा आबादारिफोरनि। मोन 3 बिल खौ बोखारनायनि दाबि जों 27 सेप्तेम्बर आव आबुं भारत बन्ध फोसावदों। संयुक्त किषान मर्चा नि सिङाव मैया रबिबारखालि हदरनि 15 रायजो नि 300 नि बारा आबादारि ईउनियन आ बाहागो लानाय महा पन्सायत आव आबादारि खौसे जनायखौ दिन्थियो। आबादारिफोरा बुंदों थांनाय 9 दान नि गेजेराव मजाफ्फरनगर नि पन्सायत आव दसिमनि खुंजानाय गिदिरसिन महापन्सायत महरै मिथिगोन होनना बुङो। लोगोसे आबादारि दैदेनगिरिफोरा सोरखारा बिथांमोननि दाबिफोरखौ मानिना लायब्ला फैबाय थानाय उत्तर प्रदेश आरो उत्तराखन्द नि बिसायखति आव बिजेपि नि बेरेखा फोसावदिं मेल खुंगोन होनना बो बुङो। लोगो बिथांमोना 2024 सिम आन्दोलन खालामबाय थागोन होनना बो बुङो।
फाहामथायनि मुङाव कौटि कौटि रां नि केलेंकारि खालामदों सोरखारि मावथिफोरा। एपिदिसिएल, एलिमेन्टारि ईदिकेशन एन्द फाइनेन्स बिफाननि गोबां अफिसारफोर, मावथिफोरनि बेरेखा गसर। रि एम्बसमेन्ट नि मुङाव बे मोनथाम बिफाननि गोबां अफिसार मावफारियाफोरा फोरमान बिलायनि बेले बेजे खालामदों। रि एम्बसमेन्ट नि मुङाव बेले बेजे खालामनाय सा 41 सुबुंफोरनि बेरेखा जिएमसिएइस नि बिबानगिरिनि गसर। जेबो रोखोमनि रेफारेल गैयालासैनो बे सुबुंफोरा गुबुन गुबुन समाव फाहामथाय लादोंमोन रयजो नि बाहेरनि, सिंनि गोबां मुंदांखा देहाफाहामसालिफोराव। फाहामथाय लाखांनायनि उनाव बे अफिसारपोरा रि एम्बसमेन्ट नि रां खौ मोननो थाखाय एक्स पस्त फेक्ट’ एप्रभेल खौ दाखिल खालामदोंमोन। नाथाय बेखौ होनायनि मुङाव नो गोबां फोरमान बिलाय नि बेले बेजे खालामबोदों। नंखाय सहि, नंखाय नम्बर जों एक्स पस्त फेक्ट’ एप्रभेल होदोंमोन गावनि बिफाननि सेराव। नाथाय बेयावनो सन्देह जानायाव जिएमसिएइस नि स्तेत लेबेल रेफारेल बर्ड निसिम एप्रभेलफोरखौ दैथायहरो। बेयावनो हमजायो गोरोन्थि मावनायफोरा। बे सोरखारि मावथि फोरा जिएमसिएइस नि गाहाय, स्तेत लेबेल रेफारेल बर्ड नि गोबां अफिसारफोरनि सहि खौ नंखयै होनानै नंखाय एप्रभेल होदोंमोन। उनाव जिएमसिएइस आ बेफोरखौ नंखाय होनना बुङो आरो गवनो सा 42 अफिसारपोरनि बेरेखा गसर थिसनो। खौरां मोननाय बादिब्ला पुलिसफोरा नायबिजिरगासिनो दं।
हाग्रामा महिलारि दैदेननाय बिपिएफ दोलो आ बिजेपि आव हाबोब्ला ईउपिपिएल नि बुंनांगौ जेबो गैया, बुंदों आसामनि मन्थ्रि ईउजि ब्रह्म बिथाङा। नाथाय लोगो दोलो ईउपिपिएल आरो एजिपि नि मदद मोनाब्ला बिपिएफ खौ बिजेपि आव सोआ। बाक्सा जिला नि बिजेपि नि मावखुलि आव खुंनाय मोनसे मेल आव बाहागो लानानै बिजेपि दोलो आ दासिमबो बिपिएफ खौ सोआखै होनना बुङो, जानो हागौ इयुन आव बो खालामा। जुदि बिपिएफ आ आबुङै बिजेपि आव हाबो, बेयव ईउपिपिएल आ बुंनांगौ जेबो गैया, हाग्रामा महिलारि आ गावनि राजखान्थियारि ई.नखौ माबोरै मोजाङै लाखियो बेयो गावनि बाथ्रा। लोगोसे बिथाङा बिसायखथि नि सोमोन्दै बो बुङो, उफ्रा बिसायखथि आव गसायगांव आरो तामुलपुर बियाब आव ईउपिपिएल आ नो गेलेगोन।
धुबुरि गौरिपुर नि बिदिअ, एकाउन्टेन्ट आ खामानि मावलासै नो रां जाख्लनायनि दाय आव हमजाबाय। धुबुरि पुलिस आ हमो, हमजानाय सानै नि मुङा गौरिपुर जौगाखां खोन्दो नि अफिसार खबिर उददिन आहमेद आरो एकाउन्टेन्ट आखिरुल ईस्लाम। मखजाथावदि धुबुरि जिल्ला याव पन्सायत आऱो गामि जौगाखां बिफाननि केलेंकारि जों सोमोन्दो थानाय सासे नि उनाव सासे अफिसर हमजागासिनो दं। साननैसो सिगाङाव गौरिपुर जौगाखां खोन्दो नि सानै ईन्जिनियार आब्दुलल्लाह आल मासुद आरो साददाम हुसेइन खौ खारना थानाय आव सोनाब बंग आव हमदोंमोन। बिसोरखौ हमनायनि उनाव सोंनायावनो दायो आरो सानै खौ हमनो हाबाय। सोरखारि बिथांखि नि खामानि मावालासैनो लाख लाख रां जानायनि अजद आव सासे बारग ईन्जिनियार आ धुबुरि सदर थाना याव एजाहार होदोंमोन। साननैसो सिगां हमजाना सानै ईन्जिनियार जों लोगोसे जाहिदुल एन्टारप्राइज नि मालिक जाहिदुल ईस्लाम नि बेरेखा एजाहार होदोंमोन, दायो जाहिदुल आ खारखुमाना दं।
गोबाव समनिफ्राय मोजां देहा फाहामसालि गैयैनि जाहोनाव जेंनाजों मोगा मोगि जाबोनांनाय गसाइगाव महकुमानि सिङाव थानाय खासियाबारि गामिनि रायजो राजाफोरनो दिनै बिटिसि सरखारनिफ्राय बिटिआरनि गाहाइ मावफुंगिरि सोद्रोमा प्रमद बर’ बिथांआ गं 30 बैसां गोनां गंसे देहा फाहामसालिनि अनथाइ खामफा गायसननाय हाबाफारियाव बाहागो लादों बिटिसिनि मावफुंगिरि सोद्रोमाफोर फारियै अरुप कुमार दे, रेव रेवा नार्जीहारी, कक्राझार जिला सावस्रि बिफाननि दैदेनगिरि आरो इउपिपिएल, बिजेपि आरोबाव खासियाबारी ओनसोलनि गोबां रायजो राजाफोरा बाहागो लायो। बे हाबाफारियाव बाहागो लानानै आथिखालनि बिटिसिनि गाहाइ मावफुंगिरि सोद्रोमाया बुंथियो, खासियाबारि ओनसोलनि रायजो राजाफोरा मोजां देहा फाहामसालि गैयैनि जाहोनाव गोबां जेंनायाव गोलैनो गोनां जायोमोन बेनिखायनो खासियाबारी ओनसोलनि रायजो राजाफोरा थांनाय बिटिसि बिसायख’थिनि सिगांयावनो खासियाबारि ओनसोलाव गंसे मोजां देहा फाहामसालि नांगौ होनना खावलायदोंमोन। बेनिखायनो मैया बिटिसि सोरखारनिफ्राय मैया खासियाबारी ओनसोलनि रायजो राजाफोरनि गाहामनि थाखाय गंसे गं 30 बैसां गोनां देहा फाहामसालि गायसननाय जायो। बेनि गेजेरजों बे ओनसोलनि रायजो राजाफोरा बायदि रोखोमनि बेराम जायोबा खाथियावनो नायजानो हासिगोन आरो बे गं 30 बैसां गोनां देहा फाहामसालियाव मोजां मोजां देहा फाहामगिरिफोरखौ लाबोना दोनफैनाय जागोन आरो रायजो राजाफोरा गासैबो सुबिदाखौ मोननो हागोन होनना बुंथियो।
बिटिसिनि सोलोंथाइ बिफाननि बान्जायनायाव कक्राझार बिगियान फरायसालिमानि निल कमल ब्रह्म सावराय जथुम नब्लांआव डः सर्बपल्ली राधाकृष्णनि जोनोम सान 5 सेप्तेम्बरखौ फोरोंगिरि सान महरै मेहेरगोनां हाबाफारिजों फालिदों। बे हाबाफारियावनो आसाम आयेन आफादनि बुंथिगिरि बिस्वजित दैमारीजों लोगोसे बिटिसिनि गाहाइ मावफुंगिरि सोद्रोमा प्रमद बर’आ गाहाइ आलासि महरै बाहागो लायो। हाबाफारि बायदियै फुंबिलियाव डः सर्बपल्ली राधाकृष्णनि सावगारीयाव आलारि बाथि फोजोंनानै बिबारजों मान बाउनाय आरो सानजौफुआव बिथांनि सानथौ आरो फोरोंगिरि समाजाव होलांनाय बिहोमाफोर फोरोंगिरिफोरनि मान दानदा मावनांगौ बिबान बायदि बायदि आयदानि सायाव गुवारै सावराय ज्लायो। बे हाबाफारियावनो बिटिसिनि मावफुंगिरि सोद्रोमा अरुप कुमार दे जों लोगोसे जायगानि एम एल ए लरेन्स इसलारी कक्राझार जिल्लानि जिल्ला बेंगिरि भरनालि देका आरो सोलोंथाय बिफाननि डाइरेक्टर आरो गुबुन गुबुन बिफाननि बिबानगिरिफोरा बाहागो लायो। खौरांगिरिनि सिगाङाव बिटिसिनि गाहाइ मावफुंगिरि सोद्रोमा प्रमद बर’आ बुङोदि बिटिआर सुक्टिनि 6.3 दफा बायदियै बड’लेण्ड ओनसोलाव फरायसालिनि जेंनाफोरखौ फोजोबस्रांनो सोरखारा गोख्रों खामानि मावलांगोन होन्ना रोखा फोरमायो आरो रायजो सोरखारजों बिटिसि ओनसोलनि सोलोंथाइनि जेंनाखौ बोस्रांनो थाखाय गुवारै सावरायनाय जागोन होन्नानैबो बुंबावयो।
गोजाम भारत नि रां खौ फाननानै लाखपति जानो गोसो नामा, सांग्रां जा, आरबिआई आ होदों वारनिं, लखपति जायालासै लाख रां सो होनो गोनां जानो हागौ। नोंथआंनावबो दं नामा गोजाम भारत नि रां, थाय1, 2 बायदिफोर, बेखौ लाख रां आव फाननो थाखाय थियारि नामा, सांग्रां जानायनि सम फैबाय। मिरु नि बेंक आरबिआइ आ सांग्रां खालामना होदों। बेबायदि रां खौ फाननायनि सिगां आरबिआई नि फोसावलायखौ फरायना नायनो होदों। फरायालासैनो फानोब्ला 50 लाख सिम जरिमाना जानो हागौ। बम्बे मार्केताइल को अपारेतिभ बेंक नि सायाव रिजर्भ बेंक आ 50 लाख रां नि जरिमाना खालामदों, लोगोसे बुंदों दि बेबायदि गोजाम रं बायनाय फाननायाव आरबिई नि आखाय गैया होनना।
ससियेल मिदिया याव हादर बेरेखा पस्त, हमजाबाय सासे। बाक्सा जिला नि सालबारि आव हादर नि बेरेखा फेसबुक आव पस्त खालामदोंमोन। पपुलार फ्रन्त अफ ईन्दिया मुंनि संगथन नि सोद्रोमा रफिकुल ईस्लाम उरपे पाखि होनना मिथिना मोनदों बे सुबुंखौ। बे सुबुं नि न आ बाक्सा नि सालबारि नि आनन्द बाजार नि पुलिस चक नि सिंनि भकुवामारि आव। गोबाव समनिफ्रायनो बियो हादरनि बेरेखा पस्त खालामबोबाय थादोंमोन। खौरांगिरिफोरनि सिगाङाव पुलिसफोरा बेनि सोमोन्दै जेबो बुंथवाखै।
bodoinfo.com provides informations regarding State Government, Central Government and Private sector jobs for the aspirants of assam.
Please do not enter any spam link in the comment box. ConversionConversion EmoticonEmoticon