Morning news 9 September ~ Bodoinfo.com

माजुलियाव दुखुनांथाव नाव नि जाब्र’बथाय। माजुलियाव नाव गोदोनानै गोबां दावबायारिफोरनि जिउ खहा जानायजों लोगोसे गोबां दावबायारिफोरा गोदोनानै थानायनि सन्देह, जाथाय आ मैया बेलासि सम नि 3.30 सो आव जादोंमोन। नाव नि मुङा मा कमला, मखनो गोनांदि, फारसे बिथिंनिफ्राय बे नावआ फारसे बिथिंनि रुगुंसिम थांबाय थानाय समावनो बे जाथाया जानानै थाङो। मा कमला आऱो त्रिपकाई मुंनि गंनै नाव आ सौग्रावलायनायावनो जायो. मोन्थिनो मोननाय बादिब्ला, गंसे नाव आ सा 100 नि बारा दावबायारिफोरखौ लानानै मैया सानजौफु समाव माजुलिनि बुरलुंबुथुर दैमानि साजों होन्थिदोंमोन। सा 100 दावबायारिफोरनि गेजेरावनो आइजोफोरखौ लाफानानै गथ’ गथायफोरबो दङोमोन आरो गं 25 निफ्राय 30 सो मथर साइकेलबो दङोमोन। बे समाव मोन्थिनो हानाय बादिब्ला, एनडिआरएफ रैखाथि बिफाना जाथायसालियाव सौहैना बोखांनाय हाबाफारि लागासिनो। आसामनि गिबि मन्थ्रि हिमन्त आरो हान्थामेला बिफाननि मन्थ्रि चन्द्रमोहन पातवारि बिथाङा दुखु मोननाय फोरमायनायजों लोगोसे सा 3 सोरखारि मावथि खौ सासपेन्द खालामो, मुंफोरा बिक्रमादित्य चौधुरि, मुकुत गगै आरो रातुल तामुलि, गासैबो ईन्जिनियार। बे जाथाय आव सासे परिनिता दास मुंनि सासे बिबुंसारगिरि नि जिउ गोमादों, गरमुर कलेज आव मावोमोन। सा 4 सुबुंफोर गोमाना थानायनि खौरां, बेयाव बिक्रमजित मुंनि देहाफाहामगिरि बो दं। प्रसासन नि आखायाव रावबो दावबायारि नि जेबो थं गैया, मानोना रावबो दावबायारि नो नो टिकेट होनाय जाया, बेखायनो सोरबा गोमाना दंब्ला माजुलि प्रसासन आ खौरां हरनो मोननै टलफ्रि नम्बर होदों—1077 आरो 7635961522

आसाम सोरखार आ 2021-22 मायथाइनि थाखायबो मुं थिसननायाव बेसेन होनाङि प्रग्यान भारति बिथांखि आ थागोन होनना बुंदों। जाय बिमा बिफा नि बोसोरारि आय आ 2 लाख नि खम, बिथांमोननि गथ आ हायार सेकन्दारि, दिग्रि, एमए, एमएससि, एमकम आव बेसेन होनाङालासै नो मुं थिसननो हागोन। जायफोरा आगोलाव बे बिथांखि खौ लाबाय बिथांमोना बो नैथि आरो थामथि बोसोरनि एदमिशन आव बेनि मुलाम्फा खौ लानो हागोन। नाथाय जायनि बिमा बिफा या रायजो एबा मिरु सोरखार नि साख्रि मावो, बिथांमोना बे सुबिदा खौ लानो मोना। सोरखारि नङि फरायसालि, फरायसालिमा फोरनि थाखाय नङा बेयो।

आसामनि गिबि मन्थ्रि ड: हिमन्त बिश्व शर्माया कभिद-19 नि नेम-खान्थिखौ गनायनानै बे बोसोरनि दुर्गा फुजाखौ फालिनो हागोन हान्नानै फोसावदों। बे बोसोरनि दिर्गा फुजाया 11 अक्तबर निफ्राय 15 अक्तबर 2021 सिम जागोन। गोबां सुबुंफोरा नो जागोन ना जाया सानदों फुजा खौ। गिबि मन्थ्रि बिथाङा फालिनो हायोब्लाबो करनाया जोबस्रांथाराखै होन्नानैबो बुङो। मखथावनादि, दासिमाव 0.96 जौखोन्दो आरो बेरामि महरै 1,347 दं होन्नानैबो फोरमाय बावो गिबि मन्थ्रिआ। बेफोर गोदान पजितिबखौ कामरुप मेट्र’, सनितपुर, सिबसागर आरो गलाघादाव मोन्नाय जादों होन्नानै फोरमायो।

एपिडिसिएल आ जाख्लनायनि थाखाय सा 36 मावख’गिरिफोरखौ साख्रिनिफ्राय एरख’नाय जादों। नंखाय सावस्रि फाहामथायनि फोरमानलाय लानानै सोरखारनिफ्राय रां लानायनि थाखाय एरख’नाय जादों । मखथावनादि, एरख’जानाय मावख’गिरिफोरनि सायाव दासिम रङिया आारो पल्टन बाजार पुलिस थानायाव गसर थिसननाय जाबाय । एरख’जानाय मावख’गिरिफोरा बिजुलि भबननि मावथिमोन एरख’जानाय मावख’गिरिफोरनि गेजेराव एजिएम थाखोनि मावथिबो दंमोन ।बिसोर जाबाय एएस-हेमन्त कुमार रय, सरजिनि राजबंसि, कल्पना टाकुरिया, जुनु दास, नजरुल हक, रहिम आलि, अनिसा बर्मन, बिजिता देवि, सुमित्रा दास, बरुन राभा, निलिमा देउ, बानिकान्ट देखा, संगिता बर, ललिता कुमार, मजिबुर रहमान, अन्जलि पाटक, मयुरनात दास, भबरटन कलिता, दीपालि बैस, कुमा़रि चाहु, प्रियंका राभा,मधुराम रय, सुनान्दिता बरडलै, साहु अनिल, जोतिसि दास, पुष्पान्जलि बरुवा, पुजा बर्मन, रबिन मेधि, तारिकान बेगम, जाफार आलि, नगेन दास, टिलक देका, सनोहि तालुकदार, गबिन्द बर जि एस सि एइस सामलायगिरि अजद दैखांनायनि उनावनो एपिडिसिएलनि मावथिफोरखौ एरख’नाय जायो।

बिटिआर सोरखारनि बिथोन बायदियै बिटिसिनि मावफुंगिरि सोद्रोमा उकिल मुसाहारी बिथांआबो गावनि बियाबनि सिंयाव थानाय गुबुन गुबुन भिसिडिसिनि सिङाव थानाय गामि-गामि नखर-नखर हाबनानै गोरिब रायजो राजाफोरनि खौरां लादों आरो रायजो राजाफोरजों बायदि जेंनानि सोमोनदै सावरायलायो । बे हाबाफारियाव बाहागो लाफाबावनो हादोंमोन फारियै भिसिडिसि सियारमेन, मेम्बार, जियारेस आरो समबाय समितिनि मावथिफोरजों लोगोसे इउपिपिएल दोलोनि माखासे दैदेनगिरिफोरा बाहागो लायो बे गोरिब नखरनि रायजो राजाफोरनाव हाबनाय समावनो रायजो राजाफोरा बिपिएलनि माइरंखौ सरखारनि गाइदलाइन बायदि मोननो हायाखै जेराव 35 किलिग्राम मोननांगौ बेवहाय 31 किलग्राम आरो जेराव सासे सुबुंनो 5 किलग्रामै मोननांगौ बेवहाय 4किलग्रामल’ मोननो हादों होनना फोरमायदों । बेनिखायनो बेनि सायाव गोख्रों नायबिजिरनानै जाय दिलारफोरा बेबायदि हाबाजों सोमोनदो दं बिसोरखौ जेलाव दैथाय हरनाय जागोन होनना रोखा बुंथियो उकिल मुसाहारीआ ।

खनसे खननै नङा, 25 बार खारखुमाबाय सासे आयजो आ। बे सोमोनांथाव जाथाय आ आसामनि धिं आव जादों। नगांव नि धिं नि लहकर गामि नि गुलजार हुसेइन नि बिसि या हाबा नि 10 बोसोर नि गेजेराव 25 बार गुबुन हौवा जों खारखुमाबाय। बेयो नंखाय नङा। गुलजार आरो बिनि बिसि नि सा 3 गथ दं। 3 दान, 3 बोसोर आरो सासे 6 बोसोर नि। 10 बोसोराव सा 25 जों खारदों, नाथाय साननैसो उनाव गिदिंनानै फैफिनो। आयजो नि फिसाय आ सासे गारि सालायग्रा, बेनि सायाव फिसाय आ बुङो, 4 सेप्तेम्बर आव जेब्ला आं न आव फैयो, बिसि आ न आव गैयामोन। 3 दान नि गथ खौ खाथि नि नखरसे नो होलांनानै खारबाय बियो। गथ खौ दोनलांनाय समाव बोरमा नो गांसो लायनि होनना बुंनानै थांदोंमोन। ननिफ्राय खारनाय समाव 22 रोजा आरो गाननाय जोमनाय लाना थांदोंमोन। बहा थांदों रावबो मिथिया, नाथाय फिसाय आ पैफिनोब्ला लागोन होनना बुङो।

गसायगांव आव बिटिसि नि मवफुं सोद्रोमा विलसन हासदा नि कनभय नि गंसे गारि आ मैया बेलासि जाब्रथाय जानाय आव गारि सालायग्रा आरो सासे रैखागिरि जोखोम जायो। जोखोम जानाय सालायग्रा खौ गसायगांव सदर सोहोर नि 4 नं वार्द नि अर्जुन बसुमतारि(28) आरो रैखागिरि नि मुं खौ भृगु बर्मन होनना सिनायनाय जादों। खौरां मोननाय बादिब्ला ईएम बिथाङा कक्राझार निफ्राय गसायगांव सिम मोनसे दोलो नि मेल आव बाहागो लानो थांदोंमोन। बेयावनो हरखाब सिगांनिफ्राय फैनाय गारि खौ रैखा खआलामनो थांनायावनो जायो जाथाय आ । जोखोम जानायफोरखौ आरएनबि देहाफाहामसालि आव लांनाय जायो।

आईसिसि टि-20 वर्लद काप नि थाखाय भारत नि दोलो खौ फोसावबाय। मैया बिसिसिआई आ सा 15 नि दोलो खौ फोसावो, भिरात कोहलि आ दैदेनगोन दोलो खौ। Virat Kohli (Capt), Rohit Sharma (vc), KL Rahul, Suryakumar Yadav, Rishabh Pant (wk), Ishan Kishan (wk), Hardik Pandya, Ravindra Jadeja, Rahul Chahar, Ravichandran Ashwin, Axar Patel, Varun Chakravarthy, Jasprit Bumrah, Bhuvneshwar Kumar, Mohd Shami.

थियारि जाना थागोन- स्रेयास आयार. सार्दुल थाकुर आरो दिपक साहार।

MS Dhoni, the former captain returns as a mentor