APSC जों सायखजानाय कक्राझार सोरखारि कलेज नि सा 12 एसिसतेन्त प्रफेसार नो मैया एपईन्टमेन्ट लेटार होनाय जायो, बेनि थाखाय जनता भवन आव मोनसे हाबाफारि लानाय जादोंमोन, बेयाव मन्थ्रि रनुज पेगु, उर्खाव गोरा ब्रहम बिथांमोना बाहागो लादोंमोन, मखजाथावदि सा 12 नि ईंराजि आयदा नि सा 2, जोलजि नि सा 3, कम्पिउतार बिगियान नि सा 1, राजखान्थि बिगियान नि सा 2, ईकनमिक्स, बर, एसमिया आरो फिजिक्स नि सासे सासे एसिसतेन्त प्रफेसारफोरनो होदों साख्रि थिसनलाय। गासैबोनिसिम साबायखर बावनानै मन्थ्रि बिथांमोना गावनि खामानि खौ मोजाङै मावनो खावलायो। साख्रि मोननाय सुबुंफोरनि मुङा निजिरा ब्रह्म, लनि बसुमतारि, अलका बसुमतारि, पालकि हाजरिका, मरमिता रय, गोपा दास तालुकदार, ईलिया ईंटिहिपि, दिपेन नाथ, जयश्रि शर्मा, सुनिता शर्मा, नुरजामाल हक आरो शौरभ भत्टाचार्य।
कक्राझार आव लामा नि जाब्रबथाय। सानै सुबुंफोरनि जिउ गोमादों जायगा याव नो, सानै जोखोम, सासे थैनाय सुबुं नि मुं खौ रुजुम बसुमतारि होनना मिथिना मोनदों, गुबुन सासे नि खौरां मोनाखै, जोखोम जानायफोरनि मुं खौ पुनम आरो कर्नजित बसुमतारि होनना मिथिना मोनदों। कक्राझार नि बालाजान तिनिआलि कावरिपारा याव जादोंमोन। जोखोम जानाय सुबुंफोरखौ कक्राझार आरएनबि चिभिल देहाफाहामसालि आव लाना थांबाय होनना मिथिना मोनदों। थैनाय रुजुम बसुमतारि खौ रेल बिफान आव खामानि मावो होनना मिथिना मोनदों।
बिटिआर नि मोन 5 जिला नि 4 रोजा फोरोंगिरिफोरखौ गोजौ सोलोंथायनि थाखाय थाबैनो गोदान दिल्लि आव होनाय जागोन स्पेशियेल सोलोंथाय। दासिम सा 500 फोरोंगिरिफोरखौ गोदान दिल्लि आव दैथायहरनाय जाबाय, बेखौ बुंदों बिटिआर नि ईएम राकेश ब्रह्म बिथाङा। मैया बाक्सा जिला नि भालुकदङा याव थानाय ईउपिपिएल नि मुशलपुर ब्लक कमिटि नि मावखुलि आव खुंनाय रंजालि बैसागु नि थाखाय दखना, खाम बायदिफोर रानना होनाय हाबाफारि आव नुजाथिनानै बिथाङा बिटिआर सोरखार आ सोलोंथाय नि फारसे बांसिन गोसो होगोन होनना बुंदों। फरायसालि आव दिजितेल लामा जों सोलोंथाय होनाय जों लोगोसे लेपतप, कम्पिउटार बायदि रानना होनानै गंसे आदर्ष फरायसालि दानाय जागोन होनना बुंदों, सावस्रि नि फारसे बो बांसिन गोसो होगोन होनना बुंदों, मोनफ्रोमबो खोन्दो आव नो मोनसे मोनसे यै सावस्रि एटिएम नि बेबस्था खालामना होनाय जागोन होनना बो बुंबावो।
मरिउपोल आव गावखौनो गथायदों 1 रोजा सो ईउक्रेईन नि आरमि फोरा, मैया बे दाबि खौ दैखांदों रासिया नि रैखाथि बिफान आ, दासिम 50 सान फ्राम जाबाय रासिया आरो ईउक्रेईन नि दावहा या, रासिया या ईउक्रेईन खौ गाग्लोबगासिनो दं। मस्को आ फोसावनाय मोनसे प्रेस रिलिज नि बादिब्ला ईउक्रेईन नि 36 थि मेरिन ब्रिगेद नि 1 रोजा 26 आरमिफोरा मारिओपोल सोहोर आव गावखौनो गथायदों, बिसोर नि गेजेर आव 162 आ एफिसार, सा 47 आ आयजो फोर।
UGC नि मोननै दिग्रि प्रग्राम, दानिया मोननै दिग्रि खौ लोगोसे नो लानो हागोन, गंनै गुबुन गुबुन कलेज आव लानो हागोन एदमिशन। फैगो सोलोंथाय बोसोर निफ्राय फरायनो हागोन फरायसा फोरा। गोदान मुं थिसननाय फरायसा फोरा ल नङा, दायो मुं थिसननाय फरायसा फोरा फैगो बोसोर निफ्राय नो लानो हागोन। नैथि आरो थामथि बोसोर आव फरायनाय सोरबा फरायसा या बो गोसो जायोब्ला गुबुन आयदा याव गिबि बोसोर आव मुं थिसननो हागोन, बेयाव फरायसा या दायो फरायबाय थानाय, मा बोसोर आव एबा मा कलेज आव फरायना दं बेफोराव जेबो रोखोमनि जेंना नुजाथिनाय नङा। गोदान सोलोंथाय खान्थि नि सिङाव बानायनाय जादों बे नेम खौ।
हायलाकान्दि आव जब्द 2 कौटि रां नि बार्मिज सुपारि। मिजोराम निफ्राय फैनाय रेल आव मोनदों। हायलाकान्दि पुलिस आ नायबिजिरदोंमोन, जिला नि जामिरा रेल स्तेशन आव जब्द खालामो। आयेन बेरेखा मुवा बेसाद लांलाय लाबोलाय नि बेरेखा पुलिस फोरनि अपारेशन, गोसोम बाजार आ सोलिगासिनो दं रायजो आव। मिजोराम निफ्राय सिलशर फारसे थांनाय रेल आव नो नागिरनाय आव मोनो।
जिएमसिएईस निफ्राय गोमादों सासे 7 दान
नि गथ आ, उन्दै गथ नि वार्द निफ्राय गोमादों, जाथाय आ सोमोनांहोदों, माबोरै
बेबायदि गोमानो हाखो बेनो सोमोनांहोदों। गथ नि बिफा या बुंनाय बादिब्ला सासे आयजो
नि सायाव लांनायनि सन्देह दं, गथ आ हर गेजेराव गाबबाय थादोंमोन, गथ गाबनायखौ
नुनानै सासे आयजो आ मदद खालामदोंमोन, बिफा या बे आयजो खौ जिएमसिएईस नि मावथि होनना
सानदोंमोन आरो गथ खौ होयो, हर फुंनि 4.30 आव बिमा आरो बिफा या उन्दुलाङो, जेब्ला
सिखारो गथ आ गैया जायो, मिथिना मोननाय बादिब्ला नखर आ हाज नि थागिबि मोन। दायो
भाङागर पुलिस थाना याव एजाहार होनाय जाबाय, नागिरनाय आ सोलिगासिनो।
30 एप्रिल आव बोसोर नि गिबि सान मननाय आ जागोन, नाथाय भारत आव नुनाय नङा बेखौ, हर गेजेर नि 12 बाजि 15 मिनिट निफ्राय जागायनानै फुंनि 4 बाजि 8 मिनिट आव जोबगोन। खोला आमेरिका नि खोला सोनाब बाहागो, आतलान्टिक लैथोमा, एन्टार्कटिका आरो प्रसान्त लैथोमा याव नुनो मोनगोन, बे बोसोर आव गासै मोन 4 जागोन मननाय आ, बेनिनो मोननै आ सान मननाय आरो मोननै आ अखाफोर मननाय, नैथि सान मननाय आ 25 अक्टोबर आव जागोन। बे दान नि सान मननाय नि सप्तानै नि उनाव नो आबुं अखाफोर मननाय जागोन।
Please do not enter any spam link in the comment box. ConversionConversion EmoticonEmoticon