हादोरनि गोजौसिन नोगोरारि बान्था भारत रत्नखौ बारग' गाहाय मन्थ्रि चौधरी चरण सिंह, पीबी नरसिम्हा राव आरो आबाद बिगियानगिरि एम एस स्वामीनाथननो होनाय जादों। बे बाथ्राखौ गाहाय मन्थ्रि नरेन्द्र म'दिआ X नि गेजेरजों फोसावदोंमोन।
म'दिआ बुंदोंमोन दि बेयो जोंनि सोरखारनि मोजां खाफाल दि बारग' गाहाय मन्थ्रि चरण सिंहनो भारत रत्न बान्था होनाय जागोन। बे सन्मानआ हादोरनि थाखाय बिथांनि साबसिन बिहोमानि थाखाय। बिथाङा आबादारिफोरनि मोनथाय आरो जौगानायनि थाखाय गावनि जिउखौ बावदोंमोन। उत्तर प्रदेशनि गिबि मन्थ्रि, हादोरनि नखर मन्थ्रि आरो सासे एम.एल.ए. महरै बिथाङा जेब्लाबो हादोर दानायखौ थुलुंगा होयो। बिथाङा गोनांथार बेबस्था नि बेरेखायैबो गोख्रोङै गसंदोंमोन। जोंनि आबादारि बिदा-फंबाय आरो बिब'-बिनानावफोरनि फारसे बिथांनि बावसोमनाय आरो एमारजेन्सिनि समाव सुबुंखान्थिनि फारसे बिथांनि बावसोमनाया गासै हादोरखौनो थुलुंगा होयो।
आबाद बिगियानगिरि एमएस स्वामीनाथननो
भारत रत्न बान्थाखौ फोसावनानै मदिआ बुङो, "बेयो जोबोद गोग्गाथाव बाथ्रा दि भारत
सोरखारा आबाद आरो आबादारिफोरनि जौगानायनि बिथिङाव जोंनि हादोरनि थाखाय बिथांनि
गोसोखांथाव बिहोमाखौ गनायथि होनानै ड. एम.एस. स्वामीनाथनजीनो भारत रत्न बान्था
होदों। बिथाङा जेंनागोनां समाव भारतआव आबादाव गाव-सोनारनाय मोनफुंनायाव गोनांथार
बिफाव लादोंमोन आरो भारतारि आबादखौ गोदान मुगायारि खालामनायनि फारसे साबसिन
नाजादोंमोन। बारग' गाहाय मन्थ्रि नरसिम्हा रावनो भारत
रत्न बान्थाखौ फोसावनानै, बिथाङा बुंदोंमोन, "नरसिम्हा रावआ भारतखौ मख'जाथाव सोलायनायनि गेजेरजों सिगांथिं
लांदोंमोन आरो बिनि हारिमुआरि आरो मेलेमारि उनमोनथाइखौबो जौगाहोदोंमोन।
रायजो आव HIV नि गिथावना महर, 2023 मायथाइसिम, आसामआव 13,729 HIV पजिटिभ बेरामिफोर मोननाय जादों। बे फोरमायथिखौ सावस्रि मन्थ्रि केशव महन्तआ फोसावदोंमोन। सुक्रबारखालि आसाम आयेन आफादनि रांबावजा जथुमनि बाथि सानाव सदनाव एच.आई.वी. नि आयदाखौ दैखांनाय जादोंमोन।
एम.एल.ए. शिवमणि बराया रायजोआव सानफ्रोमबो एच.आइ.भि. पजिटिभनि अनजिमाया गिथावना महरै बांनायनि सायाव सदनाव गोबां सोंलु दैखांदोंमोन। एम.एल.ए. बराया सदननि नोजोर बोनो हादोंमोन आरो बुंदोंमोन दि रायजोआव 50 जौखोन्दो एच.आइ.भि. पजिटिभ ड्रागस बाहायग्राफोर होनना सिनायनाय जादों।
बेखौबो बुङो दि कभिडनि उननिफ्राय एच.आइ.भि. नि बागै सांग्रांथिनि आंखाल जादों रायजो आव, एम.एल.ए. बराया आसामजों लोगोसे नसुंसेनि रायजोफोराव एच.आइ.भि. पजिटिभनि अनजिमाया बांनायनि सायाव दुखु फोरमायो। एम.एल.ए. आ बुंदोंमोन दि एच.आइ.भि. नि बिथिङाव नगांव जिल्लाया रायजोनि थामथि मासियाव दं। लाइमोन फोरनि गेजेराव सांग्रांथि लाबोनायाव गोसो होनो खावलायो बिथाङा।
बे सोंथिनि फिननायाव मन्थ्रि केशव महन्तआ बे आयदानि गोनांथिखौ हमदांनो हायो आरो बुङो दि बेयो मोनसे गोनांथार आयदा। 2002 निफ्राय 2023 मायथाइनि गेजेराव रायजोआव 89,84,519 आनजाद खालामनाय जादोंमोन आरो बेनि गेजेराव 31,729 आ एच.आई.वी. पजिटिभ मोननाय जादोंमोन। मन्थ्रिआ मानिना लादोंमोन दि आगोलनि रुजुनायाव थांनाय बोसोराव HIV पजिटिभनि अनजिमाया बांदोंमोन। बिथाङा दाजाबदेरनानै बुंदोंमोन दि थांनाय बोसोराव 9,90,372 आनजाद खालामनाय जादोंमोन आरो बेनि गेजेराव 5,791 एच.आइ.भि. पजिटिभ मोननाय जादों।
एचआईवीनि गुवार फोसावनायाव हेंथाफोर दं
होन्नानै मन्थ्रिआ बुंदों दि एन.जि.अ.फोरा सांग्रांथि लाबोनो थाखाय खामानि
मावगासिनो दं। आसाम स्टेट एइड्स कन्ट्रल ससाइटीनि खामानिखौ मुंख'नानै मन्थ्रि महन्तआ बुङो दि
ए.आर.टि.खौ रायजोनि मिरुफोरनि गेजेरजों होनाय जादों। रायजोआव आसाम रायजो एइड्स
होबथाग्रा स'साइटीनि सिङाव मोन 107 ता इन्तिग्रेतेद काउन्सिलिं एन्द
तेस्तिं सेन्तारफोर दं।
मन्थ्रिआ आरोबाव बुंदोंमोन दि सोरखारा
सांग्रांथि लाबोनो थाखाय मावनाय खामानिनि थाखाय सुबुंफोरा आथिखालाव मिरुफोराव
फैगासिनो दं आरो जायनि जाहोनाव सिनायथिनि अनजिमाया बांदों। खौरां मोननाय बादिब्ला
जिल्ला महरै बांसिन कामरुप मेत्र आव 8960, कासार आव 5823, नगांव आव 3089 बेरामि
फोर दं, बितिआर नि जिल्ला फोरनि गेजेराव बाक्सा याव 109, सिरां आव 71, कक्राझार आव
377 आरो उदालगुरि आव 84 सुबुंफोरा बे बेराम आव गोग्लैना दं, बेबायदिनो सनितपुर आव
959, बङायगांव आव 599, बिस्वनाथ आव 122 बेरामिफोर दं होनना मिथिना मोनदों।
बृहस्पतिबाराव उत्तराखन्डनि हल्द्वानीनि बनभुलपुरायाव सोरखारि हा खौ दखल खालामनानै आयेन बेरेखा मस्जिदफोर आरो माद्रासाफोर बानायनायखौ बोखारनायखौ लानानै गिथावना हिंसायारि जाथाय जादोंमोन। बे जाथाया ओरैबादि गोसारदोंमोन दि पुलिस खुंथाइ आरो रायजो राजानि गेजेराव दाङाबाजि जादोंमोन। पुलिसनि फारसे अन्थाइ आरो पेट्रल बमा खुबैदोंमोनबो। गुबुन फारसेथिं, थासारिया सामलायनायनि बायजोआव थांनायनि जाहोनाव गुलि गावनायनि बिथोन होनाय जादोंमोन। जाउनाव पुलिसनि गुलिजों बिफा आरो फिसाज्लाजों लोगोसे साब्रै गाग्लोबग्राफोरा जिउ गोमायो। गुबुन फारसेथिं, गोबां गाग्लोबग्राफोरा जोखोम जादोंमोन। बे समावनो, अन्थाय खुबैनाय आरो अर सावनाय जाथायफोराव पुलिस खुंथाइ आरो खौरां बिजोंनि मावथिफोरजों लोगोसे सा 300 निबो बांसिन सुबुंफोरा जोखोम जायो।
बेखौ नोजोर होनो गोनां दि थासारि या गिथावना सिन जानायनि जाहोनाव जिल्ला खुंथाया नोगोराव कारफिउबो होदोंमोन। बेराफारसेथिं, सोमावसारगिरिफोरा बनभुलपुरा पुलिस थानायावबो अर सावना होयो। बे समाव गं 70 नि बांसिन गारिफोरखौ सावनाय जादोंमोन आरो गोबां गारिफोरखौ बुफायनाय जादोंमोन। दासिम मोननाय खौरांनि बायदिब्ला, हल्द्वानीआव हिंसानि समाव साब्रै सुबुंफोरा थैदों।
बे समावनो, पेरामिलिटारी फर्सनि गोबां कम्पानिफोरा थासारिखौ सामलायनो थाखाय हरनि समाव जाथाय जायगायाव सौहैदोंमोन। बबेखानि आथिखालाव थासारिया सरासनस्रा होनना बुंनाय जायो।
जाथायनि सोमोन्दै मिथिनाय बायदिब्ला, हल्द्वानीनि मोनसे मुस्लिम गोहोम गोनां ओनसोल बनबुलपुरानि मिउनिसिपाल कर्परेसननि हायाव मस्जिद आरो माद्रासाफोरखौ आयेन बेरेखायै लुनाय जादोंमोन। जिल्ला खुंथाइ आरो हल्द्वानी नोगोर निगमा माद्रासा आरो मस्जिद सामलाय आफादफोरनो फोसाव बिलाइ हरदोंमोन आरो बिसोरखौ खालि खालामनो बिथोन होदोंमोन। नाथाय जेब्ला बिथांमोनहा दखल खालामनायखौ बोखारनो हायाखैमोन एबा गोसो होआखैमोन, बेनिखायनो पुलिस खुंथायनि हानजाया बृहस्पतिबाराव मोनसे गिदिर पुलिस हानजा आरो जेसीबी मेसिनफोरजों लोगोसे बिसोरखौ होखारनो थाखाय जाथाय जायगायाव सौहैदोंमोन।
बेराफारसेथिं, सुबुंफोरा बेनि हेंथायै पुलिस, जिल्ला खुंथाइ आरो खौरां बिजोंनि
मावथिफोरनि सायाव अन्थाइ खुबैदोंमोन। बेयावनो दावराव-दावसिआ जागायजेनो।
बुरलुंबुथुर नि सायाव आरो गंसे रेलवे दालांआव लुनाय जागोन।
गोदान रेलवे दालांखौ लुइटनि सायाव
शराइघाटआव लुनाय जागोन।
मिरु केबिनेटआ बे दालांनि थाखाय गोदान
रेलवे ट्रेकखौ गनायथि होबाय।
बेबायदिनो, अग्याथुरीनिफ्राय
कामाख्या-लामडिं-फरकाटिंगनि गेजेराव मोनसेरेल लामा जागोन।
नैथि ट्रेन आरो लामा दालां आरो ब्र'ड गेज
लुनायाव 1,650.37 कौटिसो रां खरसा जागोन।
दालांनि सायाव मोनथाम लेननि लामा
थागोन।
रेलवे दालांआ अग्याथुरी स्टेशनखौ
साहाथिं 2.6 किल'मिटारसिम फोनांजाबगोन।
बेयो खोला फारसे कामाख्या स्टेशनआव
3.07 किल'मिटार फोनांजाबगोन।
बेराफारसेथिं, लामडिं-तिनसुकिया-डिब्रुगढ़खौ
381 किल'मिटारजों फोनांजाबनाय जागोन।
लामडिं-फार्केटिंआव 140 किल'मिटार
डाबल लाइन थागोन।
मिरु केबिनेटआ बे मावथांखिनि थाखाय 2,333.84
कौटि रांनि राङारि गनायथिबो होदों।
तामुलपुर आव फिन खनसेबाव बमा बेरनाय जाथाय। साननै सिगां आव सासे बर सुबुं थैनायनि उनाव दायो आरोबाव सासे गुबुन हारि नि सुबुं नि जिउ गोमानायनि खौरां मोनदों। खुकांजुलि-पहाड़पुर फायारिं रेन्जआव जादोंमोन बे जाथाय आ। बमाफोरनि आद्रा थालांनायफोरखौ बोखांनो नाजानायाव सेंग्राया थैदों। बे जाथाया भारतारि रौनिया हानजानि नेमबादियै बमा गुलि बारुदनि फोरोंथायनि समाव जादोंमोन। थैनाय सुबुंनि मुंखौ लक्ष्मीराम सरेन (32) होनना मिथिनाय जादों। थैनाय सेंग्रानि न'आ बाक्सा जिल्लानि उत्तरकुसि (जालाबस्ति)आव। बे जाथायाव गुबुन सासे लाइमोनआ जोखोम जायो। जोखोम जानाय सेंग्राया हरटोला गामिनि जिरा हाजदा। सानैबो सेंग्राया बमाफोरनि आद्रा थालांनाय फोरखौ बुथुमनो थांदोंमोन।
81 मर्टार बेरफ्रुनानायनि उनाव बेनि आद्रा थालांनाय फोरनि जाहोनाव लाइमोनआ थैदोंनि खौरां मोनदों। मखजाथाव दि बे गुवार जायगायाव माखासे जायगानि सुबुंफोरा सानफ्रोमबो बेयाव सौहैयो रौनिया हानजानि फोरोंथाय होनाय समाव बम बारुदनि आद्रा थालांनायफोरखौ नागिरनो थाखाय। हाजोआव जावखांनायनि उनावबो बिसोरो बमानि आद्रा थालांनायफोरखौ बोखांनानै फालांगियारिनो फाननानै जिउ खुंगासिनो दं।
गोबां मानसिफोरा बेबादिनो बम बारुदनि आद्रा थालांनायफोरखौ बुथुमो आरो फानो। बेखौ लानानै सिगांनिफ्रायनो मोनसे गिदिर बाजार जाखानाय बायदि। बेराफारसेथिं, फायारिं रेन्जखौ लानानै दायो गासै खुकानजुलि पाहारपुर ओनसोलाव थैनायनि जायगा याव सोलायनाय बायदि सो जादों। खुंथाया बमा-बारुदखौ होबथादोंमोनब्लाबो नाथाय दायो बमा बारुदनि आद्रा थालांनायफोरखौ लानानै फालांगि खालामनाया सो सोलिगासिनो दं सिरियै।
बिटिआर ओनसोलनि लाइमोनफोरखौ भारतारि रौनिया हान्जायाव अग्निबिर महरै थिसननायाव गोसो होनो थाखाय उदालगुरि जिल्लानि टंला फरायसालिमायाव मैया सांग्रांथि आरो काउन्सेलिं हाबाफारि खुंफुंनाय जायो। बे बादाखौ बिटिसि आर काउन्सिल सोरखारनि बान्जायनायाव खुंफुंनाय जायो। हाबाफारि आव भारतारि रौनिया हानजा नि लेफ्टिनेन्ट कर्नेल भिजय श्रीजित आरो उदालगुरिनि पुलिस बिबानगिरि पुस्किन जैन बिथांमोना बाहागो लादोंमोन आरो अग्निबिर नि सोमोन्दै एबा बेनि थाखाय गोनां जानाय सोलोंथायारि रोंगौथि आरो बेनि सुबिदा फोरनि सोमोन्दै मोजाङै बुजायनानै होयो
मख'नो गोनांदि बिटिसि गौथुमनि सोद्रोमा सन्जय स्वर्गियारीआ बिटिआर गोरोबथा बादियै बर' लाइमोनफोरखौ भारतारि रौनिया हान्जायाव थिसननायखौ गोनांथि होनो थाखाय सुबिदाफोरखौ लानो लाइमोनफोरखौ आवगायबोनो खावलायो ৷ बे सांग्रांथि रेलिआव जिल्लानि गोबां लाइमोनफोरा नुजाथिदोंमोन।
पेन्सन डाइरेक्ट'रेटनि जुनियर एसिसटेन्ट ममताज बेगमनि न'आव एन्टि-करापसन एन्ड मनितरिं ब्रान्स नि नायबिजिरनाय हाबाफारि। ममताजनि भेटापारानि भारा न' आरो हाटीगढ़नि न'आव खालामदोंमोन। नायबिजिरग्राफोरनि हानजाया ममताजनि न'निफ्राय गोबां बेंकनि पासबुक आरो बीमा पलिसिफोरबो जब्द खालामदोंमोन।
मख'नो गोनांदि पेन्सन दाइरेक्ट'रेटनि जुनियर एसिसटेन्ट ममता बेगमखौ बृहस्पतिबाराव खानाय जादोंमोन। ममता बेगमखौ बृहस्पतिबाराव 20,000 रां घुस लानाय समाव हमनाय जादोंमोन। गलाघाटनि आजिरा मोन्नाय फोरोंगिरि आतुल चन्द्र हाजरिकानिफ्राय घुस लादोंमोन बे सोरखारि साख्रि मावनाय आइजो आ। बिजों लोगोसे सासे गेजेरनि सुबुं खौ बो हमदों होनना मिथिना मोनदों, मुङा हनीफ आहमेद, बृहस्पतिबाराव फाइल दाखिल खालामनायनि मुङाव घुस लानायनि थाखाय खानाय जादों। पेन्सन फाइलखौ दिहुननायनि मुङाव ममताज बेगमआ गेजेरनि सुबुं हानिफ आहमेदनि गेजेरजों अजद होग्रानिफ्राय 20,000 रां घुस बिदोंमोन।
एन्टि करापसन ब्रान्सआ बेनि सोमोन्दै मोनसे केस रेजिस्टार खालामदों आरो, बेयो मख'जाथाव दि माखासे गाज्रि खामानि मावग्राफोरा पेन्सन दाइरेक्ट'रेटआव फाइल दाखिल खालामनायनि मुङाव गोजान-गोजान निफ्राय फैनाय सुबुंफोरनिफ्राय घुस लानायनि बेफोरबायदि अजदखौ गले-गले दैखांनाय जादों।
रतन टाटाया मुलुगनि बयनिख्रुइबो
धोनिसिन फालांगिरिफोरनि गेजेराव सासे। बिथाङा गोबां समावनो सासे फालांगियारि जों लोगोसे
सासे मोजां गोसो नि सुबुं महरै बो मिथिजायो।
बिथाङा ओरैबायदि सासे सुबुं जाय
गुबुननि दुखु आव दुखु आरो खुसिजों खुसि जानो हानाय गुन गोनां। रतन टाटाया
गुबुन-गुबुन समाव होनाय मददनि थाखाय गोबां सुबुंफोरनि नो बांसिन मोजां मोनजाग्रा
सुबुं। बे गेदेमा सुबुंहा सैमानि थाखाय लोरबांथि दं।
बेनिखायनो टाटा ट्रास्टनि गेजेरजों मुम्बाइआव गंसे जुनाद फाहामसालि लुनो थांगासिनो दं। बेखौ मिथिनो मोननाय जादों दि बे देहा फाहामसालियाव गुबैयै सैमाफोरखौ बांसिन गोनांथि होनाय जागोन। टाटा ट्रास्टनि मावख'गिरिफोरनि बायदिब्ला, खोला मुम्बाइनि महालक्ष्मी ओनसोलाव हादोरनि गिबिसिन गोदानथार फिसा जुनाद फाहामसालि जागायनो थाग-थियारि खालामगासिनो दं।
थांखि लानाय देहा फाहामसालिया 200 बिसनाफोरनि जागोन। टाटा त्रास्त जों लुजानो गोनां बे देहा फाहामसालिया 98,000 बर्ग फुटनि गंसे 5 थालानि देहा फाहामसालि जागोन। मुलुगनि गुबुन गुबुन जायगानिफ्राय रोंग'थि गोनां डाक्टार, नार्स आरो मावफारियाफोरखौ थिसननानै बेखौ मोनसे गुनगोनां देहा फाहामसालि बानायनो नाजानाय जागोन।
थांखि लानाय देहा फाहामसालिनि सोमोन्दै रायज्लायनायाव, टाटा ट्रास्टनि मासिगिरि रतन टाटाया बुंदोंमोन, "जुनार फाहामथाय देहा फाहामसालिनि थांखिया साफ्रोम फिसिनाय जुनारफोरखौ जोथोन, मोजां मोन्नाय आरो मोनसे सुबुंआरि नोजोरथि होनाय। फिसिनाय जुनारफोरा जोंनि नखरफोर आरो बिसोरनि जिउआ साफ्रोमबो बिमा-बिफानि थाखाय गोनांथार। बिथाङा बुंदोंमोन दि आं भारताव फिसिनाय जुनारफोरनि थाखाय नांगौ रोखोमनि लाहार-फाहारनि आंखालखौ नुदोंमोन, जाय आंखौ सोमोनांहोदोंमोन।
बे दानाव अरुणाचल प्रदेशनि तवांआव गोबां बरफ गोग्लैनायाव लामाफोराव बरफ जमा जानायनि जाहोनाव गारि-मथर खारनायखौ गाज्रियैनो हेंथा होदों। सिमा लामा रैखाथि हानजाआ तेजपुराव प्रजेक्त भोरतकनि गेजेरजों जिल्लानि माखासे गोनांथार जायगाफोर जेरै सेला पास, वाई-जेन, सांगेटसार, क्लेमटा आरो जमीथां खोन्दोफोराव बरफखौ बोखारनायनि अनगायैबो लामानि सेर सेर सिमा लामा रैखाथि हानजा थिसनदों।
बि.आर.अ. आरो सुबुंफोरनि गेजेरजों लामाफोरखौ बेखेवनायनि खामानिया सोलिगासिनो दं। बेयो ओनसोलारि सुबुंफोर आरो दावबायारिफोरखौ रैखाथि होनो थाखाय गोबां थिरांथाफोर लायो, गुबैयै बैफोर सुबुंफोर जाय बरफ गोग्लैनायनि मिथिंगायारि समायनाखौ रंजानो थाखाय हायेनफोरनिफ्राय होंगो-दोंगो जायो।
बेखौ गोसोखांहोनो हायोदि 5 फेब्रुवारियाव सोनाबारि अरुणाचल प्रदेशनि तवां जिल्लानि सेला पासनिफ्राय गोबां ओनसोलाव गारिफोरनि थांलाय-फैलाय जागायजेन्दोंमोन। खुंथायनि बिथोन बायदियै, 6 फेब्रुआरि मंगलबारनिफ्राय सेलापास बारनानै दावबायारिफोरनि फैनायखौ तवांआव नुनो मोन्दों। थांनाय सानब्रैनिफ्राय गं 30 नि बांसिन ट्राक आरो दावबायारि गारिफोरा बे लामायाव थाबथानानै दंमोन।
मुवाफोरजों बुंफबनाय ट्राकफोरा सेला
पासनि सिगां गोबां सानसिम थाबथानानै दंमोन, जेब्ला बिसोरो भालुकपुंग दिगनिफ्राय
तवांसिम थांगासिनो दंमोन आरो बिनि उनाव तवांग जिल्ला खुंथाया बिथोन होदोंमोन।
बेनि फिथाय महरै, बे रोजा बरफ गोग्लैनायनि जाहोनाव, सोनाब कामेंं आरो तवांनि गेजेराव लामा फोनांजाबनायखौ 5 फेब्रुआरिनिफ्रायल' दावबायारिफोरनि थाखाय बेखेवनाय जादोंमोन। तवां जिल्ला कमिसनारआ बे सोमोन्दै थांनाय सुक्रुबाराव मोनसे बिथोन फोसावदोंमोन। सिगांनि समाव गोबां बरफ गोग्लैनाया सोनाबारि अरुणाचल प्रदेशनि तवां जिल्लायाव जिउ खुंनायाव हेंथा होदोंमोन।
bodoinfo.com provides informations regarding State Government, Central Government and Private sector jobs for the aspirants of assam.
Please do not enter any spam link in the comment box. ConversionConversion EmoticonEmoticon