गौहाति
गोजौ बिजिरसालि नि गाहाय बिजिरगिरि नि बिबान होनाय जादों बिजिरगिरि बिजय बिष्णोइ
बिथांनो, 2 फेब्रुवारि आव मोनसे फोसावलायनि गेजेरजों गोजौ बिजिरसालि आ बेखौ मिथिहोयो,
खौरां मोननाय बादिब्ला बिजिरगिरि बिजय बिष्णोइ बिथाङा राजस्थान नि बिजिरगिरि महरै
खामानि मावनो मोनदोंमोन, दायो बिथांनि गोदान बिबान नि गनाय़थि होदों मिरु आयेन
बिफान आ।
बिजेपि
दोलो नि बिफा बायदि, बैसो जानाय राजखान्थिगिरि भारत नि बारग लेङाय गाहाय मन्थ्रि
लाल कृष्ण आदवानि बिथांनो भारत रत्न बान्था नि सन्मान खौ होनाय जादों, भारत नि
दानि गाहाय मन्थ्रि आ एक्स नि गेजेरजों बेखौ मिथिहोदों। मखजाथावदि बिजेपि नि बे
दैदेनगिरि बिथाङा नो राम मन्दिर बानायनो थाखाय हादोरनाङैनो रथ यात्रा खौ
खालामदोंमोन, बिजेपि दोलो जों लोगोसे हादरनि नि थाखाय गोबां खामानि मावनाय बिथांनो
हादरनि गिदिरसिन बान्था खौ होनो मोननानै जोबोद गोजोननाय मोननाय फोरमायदों दानि
भारत नि गाहाय मन्थ्रि आ।
कक्राझार
आरो धुबुरि जिल्ला नि सिमा नि दिपलाइबिल ओनसोल आव सनिबारखालि बेलासि समाव मोननै
गोथै देहा मोननाय जाथाय आ जिल्ला याव सोमोनांथाव थासारि सोमजिहोदों, सानैनि सासे
खौ कक्राजार नि प्रदिप कुमार बसुमतारि आरो गुबुन सासे खौ धुबुरि नि महम्मद बादशाह
सेख होनना सिनायनाय जादों, सानैनि बैसो आ फारियै 50 आरो 60 सो जागोन होनना मिथिना
मोनदों, कक्राझार नि एएसपि पृथ्विराज राजखोवा बिथांनि दैदेननाय दोलो आ जाथायसालि
आव थांनानै दायो बेखौ पस्त मर्तेम नि थाखाय दैथायहरबाय, गोथै देहा खौ नायनानै
सानैबो बुथारजानायनि बोलि जानो गोनां जादों होनना सन्देह खालामनाय जादों, नाथाय
सोर माबोरै खालामखो बेखौ मिथिनाय जायाखै। मिथिना मोननाय बादिब्ला प्रदिप कुमार
बसुमतारि या अमा नि फालांगि खालामोमोन आरो ओनसोलाव गोबां सिनायजायोमोन बयजोंबो,
गोथै देहा खौ 1 किमि जानथाइ नि गेजेराव मोनदों सानैनिखौ, महम्मद बादशाह सेख आ मैगं
नि फालांगि खालामोमोन होनना मिथिना मोनदों, दायो ASP बिथाङा
जाथायनि सायाव नायबिजिरनाय खामानि खौ जागायबाय होनना मिथिहोदों आरो लोगोसे थाबैनो
गासै जाथाय आ सोराङाव फैगोन होनना बुङो।
कक्राझार
आव बिपिएफ नि गिदिर सुबुं गौमा हाबाफारि, लोकसभा बिसायखथि आ खाथि मोनफैनाय लोगो
लोगो नो राजखान्थि दोलो फोरनि गेजेराव बिसायखथि फोसावदिंनायनि हाबाफारि लानायफोरखौ
नुनो मोनगासिनो दं। कक्राझार नि जानागांव आव सनिबारखालि कक्राझार जिल्ला बिपिएफ नि
दैदेननायाव गिदिर सुबुं गौमा हाबाफारि आ जानानै थाङो, मैया नि हाबाफारि आव गिबिआव
फिरफिला बिरहोनायनि उनाव मुंख्लं फोरनो मान बावनाय आरो गोजोननि थाखाय आरज गाबनायबो
जायो होनना खौरां मोनदों, बे हाबाफारि आव बिपिएफ दोलो नि गाहाय हाग्रामा महिलारि
बिथाङा बो बाहागो लादोंमोन, बिथाङा बाहागो लानानै मार्च दान आव कक्राझार आरो दरं
उदालगुरि बियाब नि थाखाय बिपिएफ दोलो नि बिजाथि नि मुं खौ फोसावना होगोन होनना
मिथिहोदों, बिथाङा इउपिपिएल दोलो खौ गोख्रों राव जों सोंखारिनायखौबो नुनो
मोनदोंमोन मैया, इउपिपिएल दोलो आ जेबोखौनो मावनो हायाखै, साख्रि होनायनि बोलो खौ
दिसपुर आ लाना थांदों, जोंनि सोरखार आ जायोब्ला 40 ता बिफान नि लांदां जाना थानाय
मासि नि साख्रि खौ थिसनगोन आरो बेयो जिल्ला हिसाबै जागोन होनना बो बुङो, जेरै
कक्राझार नि या कक्राझार आव चिरां नि या चिरां आव नो साख्रि खौ मोनगोन। गुबुनफारसे
बिपिएफ आव जइन जायोब्ला प्रधानमन्त्रि आवास य़ोजना, अरुनुदय बिथांखि नि सुबिदा
निफ्राय गोजानाव थाहोगोन होनना बिसोर सिगिदों होनना बो हाग्रामामहिलारि बिथाङा अजद
होदों, मैया नि हाबाफारि आव बिपिएफ दोलो नि गोबां दैदेनगिरि बिथांमोना बाहागो
लादोंमो, बारग मन्थ्रि प्रमिलारानि ब्रह्म, बारग लेङाय गाहाय खाम्फा बरगयारि,
देरहासाद बसुमतारि जों लोगोसे गोबां। लोगोसे नो मैया नि हाबाफारि आव इउपिपिएल दोलो
नि मोनसे सम नि दैदेनगिरि कमल आजाद आ बिपिएफ दोलो आव जइन जादों नि खौरां मोनदों।
आमेरिका
निफ्राय आसाम आव फैनानै आयेन नि जे आव गोग्लैबाय सानै आमेरिका नि थागिबिफोरा,
धोरोमारि हाबाफारि आव बाहागो लानायनि दाय आव तेजपुर पुलिस आ जरिमाना खालामो
बिसोरनि सायाव। मखजाथावदि थांनाय 1 फेब्रुवारि आव दावबायारि महरै आसाम आव
हाबफैदोंमोन आमेरिका नि दावबायारिफोरा, नाथाय तेजपुर बाप्तिस खृस्तियान मिसनारि
देहाफाहामसालि आव धोरोम फोसावनायनि अजद मोनो बिसोरनि बेरेखा, जायनि थाखाय तेजपुर
पुलिस आ बिसोरनि बेरेखा 500 मार्किन दलार जरिमाना खालामो, तेजपुर जिल्ला नि एएसपि
मधुरिमा दास आ बुंनाय बादिब्ला जन मेथिउ बुने आरो माइकेल जेम्स फ्लिनसाम आ नो
दावबायारि भिजा याव भारत आव फैदोंमोन। मखजाथावदि नेम बादियै दावबायारि महरै फैनाय
सुबुंआ गुबुन हादर नि जायखिजाया धोरोमारि हाबाफारि आव बाहागो लानो मोना। बिसोर
बेबायदि बाहागो लानायनि थाखाय मोनसे गसर थिसननाय जादोंमोन, आरो बेनि उनाव 500 दलार
एबा भारत नि रां आव 41 रोजा सो रां जरिमाना खालामना हगारना होफिनो।
लादाख
खौ आबुं रायजो नि मान होनो नांगौ नि दाबि जों धर्ना हाबाफारि। रायजो आव गुसु बोथोर
आव बो धर्ना हाबाफारि लादों होनना मिथिना मोनदों, 2019 माय़थाइ आव आर्तिकल 370 खौ
बोखारनायनि उनावनो जम्मु काश्मिर रायजो निफ्राय आलादा जानायनि उनाव जायगा नि
सुबुंफोरनो साख्रि जों लोगोसे गोबाव सम नि सुस्रांजायि दाबिफोर, 6 थि सिदिउल आरो
गुबु गुबुन गेरान्ति फोरनि थाखाय लेह जिल्ला याव धर्ना हाबाफारि लानाय जादोंमोन,
रोजा रोजा सुबुंफोरा दायो फोसावना होनाय लेह सलो हाबाफारि आव बाहागो लानानै बे
खामानि खौ मावो, 6थि सिदिउल नि सिङाव रायजो नि मान आरो गुबुन गुबुन रैखाथि नि दाबि
दैखांदों होनना खौरां मोनदों।
सासे
फावखुंग्रि या थैबाय होनना फोसावनायनि उनाव दायो थैयाखै होनना मिथिना मोनदों, पुनम
पान्दे मुंनि फावखुंग्रि आ थैबाय होनना बिनि दोलो आ नो फोसावना होदोंमोन, नाथाय
दायो फावखुंग्रि या गावनो थैयाखै होनना फोसावदों। सोमोनांथाव जाथाय, मुम्बाइ नि
मदेल फावखुंग्रि या सार्भाइकेल केन्सार जानानै थैदों होनना फोसावदोंमोन, बेनि
उनावनो गोबां बलिउद नि फाव खालामग्रा फोरा दुखु मोननाय फोरमायदोंमोन, कंगना रानावत
निफ्राय लानानै अनुपम खेर बिथांमोना, नाथाय मैया सोमोनांथावै थैयाखै होनना सो
खौरां मोनो, आरो बेबायदि थैनायनि खौरां फोसावनाया केन्सार नि फारसे सांग्रां खालामनो थाखायसो बेबायदि नंखायै
फोसावदोंमोन होनना मिथिहोयो, आयजोफोरखौ सांग्रां खालामनो थाखायसो बेखौ खालामदोंमोन
होनना बुङो। मखजाथावदि भारत नि रांखान्थि बिफान नि मन्थ्रि आ बो साननै सिगां नि बाजेत आव बे बेराम नि थाखाय भेकसिन होनायनि
बाथ्रा फोसावदोंमोन, बेनि उनावनो बेबायदि फावखुंग्रि नि नंखाय थैनायनि खौरां आ
गोसारदोंमोन। नाथाय दायो बेबायदि थैनायनि नंखाय खौरां फोसावनायनि थाखाय ससियेल
मिदिया याव गोबां सुबुंफोरजों नो बुंजानो गोनां जादों होनना बो खौरां मोनदों।
bodoinfo.com provides informations regarding State Government, Central Government and Private sector jobs for the aspirants of assam.
Please do not enter any spam link in the comment box. ConversionConversion EmoticonEmoticon