आसाम आयेन आफादनि रांबावजा जथुम्माया मैया समबारनिफ्राय जागायबाय। मिथिना मोननाय बादिब्ला मैय़ा जथुम्मानि गिबि सानाव आयेन आफादाव गोदान बिलखौ थिसननाय जादोंमोन। आनजादनि सायाव दैखांनाय बिल- आसाम पाब्लिक एग्जामिनेशन बिल, 2024।
बे बिलनि थांखिया आनजादफोराव मोजां नङै
राहा बाहायनायखौ होबथानो थाखाय। बिलआव सोंथि बिलाइ लिक जानायनि बेरेखायै गोख्रों
राहा लानाय जागोन। रावबो सोंथि बिलायखौ मोनथाय गैयाजासे गावसोरजों लाखिनो हाया।
बेनि अनगायैबो, बे बिलआ सोंथि बिलाइ फान्नाय, आनजाद होगिरिफोरखौ हेफाजाब होनाय
बायदिनि बेरेखायैबो गोख्रों। सोंथि बिलाइफोरखौ थिखानाय प्रेसनि अनगा जेरावबो
सेबखांनो हानाय नङा। बे नेमआ रायजो सोरखारनि जायखिजाया आनजादाव बाहाय जागोन। बे बिलआ ए.पि.एस.सि., गुवाहाटी गोजौ बिजिरसालि, एस.एल.आर.सि. ग्रेड III आरो ग्रेड 4 खौ लाफानानै मेट्रिक, हायार सेकेन्डारि, टेट बायदिफोरनि थाखायबो बाहाय जागोन।
जुदि बिलनि सिङाव थगायनाय हमजायो, अब्ला हमजानाय सुबुं आ थाम बोसोरनि जेल
आरो 10 लाख रां
जुरिमाना होनांगोन। गुबुनफारसेथिं, सोंथि बिलाइ लिक खालामोब्ला बिथाङा 10 बोसोर जोबथेसालिनि साजा आरो 10 कौटि रां जुरिमाना होनांगोन।
मालदीवनि हादरगिरिया गावनि भारतनि बेरेखा गसंथानायाव गोरा जानानैनो दं। भारतनि बेरेखायै गावनि गसंथानायखौ बुंफिन्नानै मालदीवनि हादोरगिरि महम्मद मुइज'आ समबाराव पार्लियामेन्टआव बुंदोंमोन दि मालदीवआ रावबो हादोरखौ गावनि हादर आव आखाय होनो एबा खहा खालामनो गनायथि होआ।
हायुंआरि खौरां बिजोंनि रिपर्टनि बायदिब्ला, बिथाङा बुंदोंमोन दि गोदान दिल्ली आरो मालदीवआ गनायथि
जादों दि भारतनि रौनियाफोरा 10 मे सिम नि गेजेराव मालदीवखौ नागारगोन। हादोरगिरिया
बुंदोंमोन दि दिप हादोरनि गंथाम बिरखंनि प्लेटफर्मफोरनि गेजेराव मोनसेआव थानाय
भारतारि रौनियाफोरा 10 मार्च सिम नि गेजेराव गिदिंना थांफिनगोन आरो गुबुन मोननैनि
रौनियाफोरखौ 10 मेसिम बोखारफिननाय जागोन।
"मालदीवआ भारतजों गावनि गोरोबथाखौ गोदान
खालामनाय नङा। जों जायखिजाया हादोरखौ जोंनि हादर आव आखाय होनो गनायथि होनाय नङा।
हादोरगिरिनि बे थिरांथाया मालदीव सोरखारनि बेरेखा दोलोफोरजों सोंखारिजादोंमोन आरो
बुंदोंमोन दि बे थिरांथाया हादोरनि थाखाय खहा गोनां।
मिथिना
मोननाय़ बादिब्ला दायो मालदीवआव भारतआव सा 80 सो रौनिया हान्जानि सोद्रोमाफोर दं।
थांनाय बोसोरनि नबेम्बराव मुइजुआ
गोहोआव फैनायनि उनाव मोन्नैबो हादोरनि गेजेराव सोमोन्दोआ गाज्रि जादों। बिबान
सामलायनायनि उनाव, चीन मददगिरि हादोरगिरिया बुंदोंमोन दि
बिथाङा हादोरनिफ्राय भारतारि रौनियाफोरखौ बोखारनानै गावनि बिसायख'थिनि समायखिराफोरखौ मावफुंगोन।
ककराझार सदर पुलिस थानायाव बिमा
सावेत्रि दासआ होनाय एफआइआर बायदिब्ला, ककराझार
सदर पुलिस थानानि सिङाव थानाय पाथरघाटनि थागिबि शरत दासनि दैदेन्नायाव बिशाल दासखौ
खर'आव बुनाय जायो आरो गोब्राबै जोखोम जायो, रबिबारनि
हरनि 9.30 रिंगासोआव न'आव
सौहैनो थाखाय ससे ल' दंबावोमोन। जेब्ला बिशाल दासआ गावनि
जिउनि गिथावना थासारियाव होसिख्रावदोंमोन अब्ला जायगानि सुबुंफोरा ओंखारबोदोंमोन
अब्ला दुथांफोरा खारखोमालाङो।
उनाव गोब्राबै जखम जानाय बिशाल दासखौ
ककराझारनि रुपनाथ ब्रह्म सिभिल देहा फाहामसालियाव थिसननाय जादोंमोन नाथाय जोखोम
जानायफोरखौ गोब्राब जानायखौ नुनानै डाक्टारफोरा बिथांखौ मोनायाव साबसिन फाहामथायनि
थाखाय बरपेटा मेडिकेल कलेज आरो देहा फाहामसालियाव दैथाय हरो।
बिशाल दासआ मोनसे समाव शरत दासनि मबाइल
फन गलायाव खामानि मावोमोन। नाथाय शरत दासआ जेब्लानिफ्राय खामानि नागारदोंमोन
अब्लानिफ्रायनो विशाल दासखौ सोंखारिगासिनो दं नि अजद। विशाल दासआ आथिखालाव गुबुन
मबाइल फननि गलायाव खामानि मावो आरो बे जाथाया बै गलानि बिगोमाया विशाल दासखौ
स्कुटीजों न'नि साखाथियाव दोनलांनायनि उनाव जादोंमोन।
दायनिगिरि शरत दासआ दायो खारखोमानानै
दं आरो पुलिसआ शरत दासनि बिदा भरत दासखौ सोंनाय फिन्नायनि थाखाय पुलिस थानायाव
लाबोदों होनना खौरां मोनदों।
मिथिंगाखौ मोजां मोनग्रा सौरभ बरकटकीआ दाबि खालामदोंमोन दि दासिमबो गोसारना थानाय गोथै दावफोरखौ पस्टमर्टेम खालामनायनि गोनांथि दं आरो जाथायनि सायाव नायबिजिरनायनि गोनांथि दं। बे ओनसोलाव दावफोरनि मोनथाम फोलेरा थैखाबायब्लाबो, बरकटेकीआ फैबाय थानाय समाव गोथै दावफोरनि अनजिमाया बांनो हागौ होनना गिदों।
"जुदि
बबेबा गुबुन देहा जाग्रा दाव एबा जुनारा बे गोथै दावफोरखौ जायोब्लाबो, बेफोरबायदि
जाथायनि अनजिमाया बांगोन," बिथाङा बुंबावो।
बेबादि थासारियाव बरकतकिआ दाउ थैनायनि गुमुरखौ मिथिनो थाखाय हाग्रा बिफानजों लोगोसे सनितपुर खुंथायनिसिम खावलायदों। जुदि सोरबा सुबुङा बे गाज्रि खामानियाव लोब्बा दं अब्ला बे आयदानि सायाव गोख्रों नायबिजिरनाय आरो खामानि मावनायखौ मिथिंगा मोजां मोनग्राया खावलायदों।
मख'नो गोनांदि रबिबारखालि बे ओनसोलाव दाव थैनायनि गिबि जाथाया सोराङाव फैदोंमोन। बिनि उनाव मैया फिन दावफोर थैनायनि खौरांआ सरासनस्रा सुबुंफोरखौ गिखांहोदों। नोजोर होथावना दि गोबां दावफोरा बिन्दुकुरियाव थानाय भारतारि जाग्रा निगमनि दोनथुमग्रा न'आव आश्रय लागासिनो दं। बेबादि थासारियाव बेवहाय जेबो मुवा लोंनायनि जाहोनाव दावफोरनि थैनायखौ गिनायबो नुनो मोनदों।
रासियानि अख्रां दावबायारि अलेग कन'नेनक'आ
अख्रांमायाव फारियै बांसिन सम बारहोनायनि वर्ल्द रेकर्डखौ सिफायदों। रासियानि
अख्रांमा एजेन्सि रसकसमसआ रबिबाराव बे बाथ्राखौ बुंदोंमोन।
59 बोसोर बैसोनि सुबुङा आथिखालाव अख्रांमायाव 878 सान आरो 12 घन्टानि बांसिन सम हगारो। बिनि सिगाङाव, गुबुन सासे रासियानि अख्रां दावबायारि, गेनाडी पडलकाया 2015 मायथाइयाव 878 सान, 11 घन्टा, 29 मिनिट आरो 48 सेकेन्ड बाहायनानै बे रेकर्डखौ बानायदोंमोन।
कन'नेनक'आ 2008 मायथाइनिफ्राय हादोर गेजेरारि अख्रांमा स्टेशनाव खेबबा दावबायदोंमोन। रासियानि हायुंआरि खौरां एजेन्सि तास जों लानाय मोनसे मोगा-मोगियाव, इन्जिनियारआ बुंदोंमोन दि स्टेशनखौ जौगाहोबाय थानायनि जाहोनाव ISS आव मोनफ्रोम दावबायनायनि थाखाय सांग्राङै थियारि खालामनायनि गोनांथि दं। नाथाय सासे अख्रां दावबायारि महरै थांना थानायनि उन्दै समनि सिमांआ मोगथाङाव जाफुंसारबाय।
"आं
जायखौ मोजां मोनो बेखौ मावनो थाखाय अख्रांमायाव बिरलाङो, रेकर्ड
बानायनो थाखाय नङा। आं उन्दै बैसोनिफ्रायनो सासे अख्रां दावबायारि जानायनि सिमां
नुदोंमोन। बेयो बै गोसो गुदुं जानायानो आंखौ अख्रांमायाव बिरलांनो, कक्षलामायाव
थानो आरो अख्रांमायाव खामानि मावनो थुलुंगा होदोंमोन। "बियो तासखौ बुङो।
कन'नेनक'नि आथिखालनि आइ.एस.एस. दावबायनाया 15 सेप्तेम्बर, 2023 मायथाइयाव जागायदोंमोन। बिथाङा नासानि अख्रां दावबायारि लरेल अ'हारा आरो रसक'स्मस निक'लाई चुबनि रासियानि अख्रां दावबायारिजों दावबायनायखौ जुरिजेनदोंमोन। मिशननि जोबनायसिम बिथाङा 1,000 सानसिम अख्रांमायाव थाग्रा गिबिसिन सुबुं जानो हागौ होनना साननाय जादों।
गेजेर हायुंआरि अख्रांमा स्टेशना बैफोर माखासे बिथिंफोरनि गेजेराव मोनसे जेराव फेब्रुआरि 2022 मायथाइयाव मस्क'नि युक्रेनखौ गाग्लोबनायनि उनाव आमेरिका आरो रासियाया दासिमबो खाथिनिफ्राय हेफाजाब होगासिनो दं। बेराफारसेथिं, रसक'स्म'सआ दिसेम्बराव फोसावदोंमोन दि नासाया 2025 मायथाइसिमाव अख्रां दावबायारिफोरखौ आइ.एस.एस.आव दैथायहरनो थाखाय गावसिनि क्रस-फ्लाइट हाबाफारिखौ बारायदों।
मुंदांखा मेथाइ रोजाबगिरि कुमार सानुआ ककराझारआव फैदोंमोन, मुंदांखा बलीवुड मेथाइ रोजाबगिरि कुमार सानुआ समबाराव बंगाइगावआव मोनसे हाबाफारियाव बाहागो लानो थांनायाव ककराझारनि थागिरि जादोंमोन। ककराझार सौहैनायनि उनाव, कुमार चानुआ बीटीआरनि मावफुं सोद्रोमा अरुप कुमार देनि न'आव एसे जिरायदोंमोन।कुमार सानुआ ककराझारआव फैनायनि खौरांआ दसे समनि थाखाय गोसारनायनि उनावनो महरगिरिजों लोगोसे अनसायगिरिफोरा बिटिआरनि मावफुं सोद्रोमा अरुप कुमार देनि न'आव सेल्फि लानो होंगो-दोंगो खालामदोंमोन आरो मेथाइ रोजाबगिरिखौ बिबारनि थफ्ला, अरनाइ, गाबसा बायदि बायदिजों मान बावदोंमोन।
रोजाबगिरिया मुंख'दोंमोन दि आं आसामी मेथाइफोरजों लोगोसे बिथांनि गोबां मुंदांखा हिन्दी आरो बेंगली मेथाइफोर रोजाबनानै आसामखौ मोजां मोनो। मिथिनो मोननाय बायदिब्ला महरगिरिया बंगाइगावनि नयापारायाव जानाय मोनसे हाबाफारियाव बाहागो लाखांनायनि उनाव मानह नेशनेल पार्कनि आलासि न'आव हर थागोन।
काछारनि बरखला बुरिबालि ओनसोलाव हा नि दान्थे-बिदान्थेखौ लानानै नांलायनाय जादोंमोन। मोन्नैबो हानजानि गेजेराव जानाय दाङाबाजियाव सा 20 सो सुबुंफोरा जोखोम जादोंमोन। रिपर्टनि बायदिब्ला, बुरिबेल थामथि ब्लक गामिनि नाजिम उद्दीन आरो नुर आलीआ गोबाव समनिफ्रायनो हाजों सोमोन्दो थानाय नांलाय-खमलाय जानानै दंमोन। थांनाय बोसोरनि 27 सेप्तेम्बरखालि खुंथाया बिजिरसालिनि बिथोनाव 12 बिघा हायाव होखारनाय हाबाफारि लादोंमोन आरो खुंथाया बिजिरसालिनि बिथोनाव नाजिम उद्दिन पक्षनो बे 12 बिघा हायाव थाग्रा गं 15 नखरफोरनि न'फोरखौ होखारनानै हाखौ गथायदोंमोन।
बिजिरसालिनि बिथोनाव हा मोननायनि उनाव नाजिम उद्दीन नि दोलो आ हायाव मैगं-थाइगंनि आबाद मावनो जागायजेनो। बबेखानि, रबिबारखालि फिन हाखौ लानानै नाजिम उद्दीन आरो नूर आली पक्षनि गेजेराव गिख्रंथाव दाङाबाजि जादोंमोन। आखाइयाव रुवा आरो लावथिफोरजों लोगोसे बायदि रोखोमनि गोबौ हाथियारफोरजों, फारसेथिंजाय गुबुन फारसेथिं नोजोर होदोंमोन आरो गाग्लोबदोंमोन। बुरिबाइल ओनसोला फ्राय दावहानि फोथारनि महर लायो।
मोन्नैबो हानजानि गेजेराव जानाय
दाङाबाजियाव सा 20 नि बांसिन सुबुंफोरा जोखोम जादोंमोन।
जोखोम जानायफोरखौ रैखा खालामनाय जायो आरो थाबैनो देहा फाहामसालियाव थिसननाय जायो।
बिसोरनि माखासेआ सिलचर मेडिकेल कलेजआव थिसनजादोंमोन मानोना बिसोरनि थासारिया
गाज्रिमोन। बे समावनो, मोन्नैबो हानजाया बुनायनि उनाव मोनसे
केस रेजिस्टार खालामदों।
पुलिसआ जाथायनि सायाव नायबिजिरदोंमोन आरो जाथाय जायगानिफ्राय लावथिफोर आरो लावथिफोरजों लोगोसे गुबुन गुबुन हाथियारफोरखौ जब्द खालामदोंमोन।
बरफ गोग्लैनायनि थाखाय तवांआव एस.अ.पि.
फोसावनाय जादों। चेला पास ओनसोलाव गोबां बरफ गोग्लैदों। सोनाब
कामें जिल्लानि तवांनिफ्राय बालिपारा, बैसाखीसिम
थांनाय लामायावबो बरफ गोग्लैनायनि जाहोनाव हान्था-मेलानि जेंनायाव गोग्लैदों।
तवांनि जसवन्त गढ़निफ्राय बैसाखी र'डसिमबो
बरफ गोग्लैगासिनो दं। लामायाव गोबां घन्टानिफ्रायनो ट्राफिक जाम जानानै दं।
अरुणाचल प्रदेश खुंथाया तवांनिफ्राय बैसाखीसिम थांनाय लामानि सायाव एस.अ.पि.
फोसावदों।
Please do not enter any spam link in the comment box. ConversionConversion EmoticonEmoticon