फाहामनो हायै केन्सारनि बेसेन गोसा फाहामथाया थाबैनो जोबहैनो हागौ। केन्सार नि भेकसिनखौ थाबैनो मोननो हागौ। रासियानि हादोरगिरि भ्लादिमिर पुटिनआ मुलुगनि फाहामथाय बिथिङाव बे मोजां खौरां खौ होदों।
रासियानि हादोरगिरिया फोसावदों दि केन्सारनि भेकसिन खौ मोननायनि लामायाव दं एबा बेरामिफोरनि थाखाय थाबैनो मोननो हागोन। पुतिनआ रासियानि बिगियानारि नाजानायाव मख'जाथाव दावगानायखौ दिन्थिनानै फोसावदों।
पुतिनआ बुंदोंमोन, "जों केन्सार भेकसिनफोर आरो फैगौ जोलैनि इम्युनोमडुलेटरी मुलिफोरनि जौगानायाव मोनसे मख'जाथाव थांखि सिम सहैनो हादों। बिथाङा बुंदोंमोन दि रासियानि बिगियानगिरिफोरा केन्सार भेकसिन थियारि खालामनायनि खाथियाव सौहैगासिनो दं।
पुतिनआ मिजिं थिदोंमोन दि भेकसिनखौ थाबैनो गावारि फाहामथायनि मोनसे आदब महरै गोहोम गोनां महरै बाहायनाय जागोन। बबेखानि, पुतिनआ बेखौ रोखा खालामाखै दि थांखि लानाय भेकसिनया मा रोखोमनि केन्सारखौ नोजोर होगोन।बेखौ नोजोर होनो गोनां दि गोबां हादोरफोर आरो मुलि कम्पानिफोरा केन्सार भेकसिनफोराव खामानि मावगासिनो दं। थांनाय बोसोराव, इउ.के. सोरखारा बेबादि मोनसे आयदायाव जार्माननि कम्पानी बाय'एनटेकजों मोनसे गोरोबथायाव सागान होदोंमोन।
मुलि कम्पानिफोर मडार्ना आरो मार्क एन्ड कम्पानिया मोनसे आनजादारि केन्सार भेकसिन बानायगासिनो दं। बेनि फरायसंनायाव मोननाय जादों दि मेलेनोमा, बयनिख्रुइ गिख्रंथावसिन बिगुरनि केन्सार, फाहामथायनि उनाव फिन जाफिन्नाय एबा थैनायनि खाबुखौ थाम बोसोरसिम बाङाय खालामो।
बुहुमनां सावस्रि आफाद (WHO) नि
बायदिब्ला, आथिखालाव सार्भाइकेल केन्सार जों
लोगोसे गोबां केन्सार बेराम खालामनाय हिउमेन पेपिल'मा
भायरास (एच.पि.भि.) नि हेंथायै मोनद' लाइसेन्स
गोनां भेकसिनफोर दं, लोगोसे नो लिभार केन्सार जानो हाथावना
हेपाताइतिस बि नि भेकसिन बो दं होनना मिथिना मोनदों।
दायो पुटिननि फोसावनाया गोदान
दिहुनथायनि बिथिङाव मोनसे मख'जाथाव दावगानायनि जागायजेन्नायखौ
दिन्थियो। रासियानि हादोरगिरिनि फोसावनाया मुलुगनाङैनो केन्सार फाहामथायनि थाखाय
मोनसे गुबुन फाहामथाय राहानि जाथावना सोमजिहोदों।
बेखौ नोजोर होनो गोनां दि बे खेबाव
आनजादाव मोनब्रै आयदायाव मोनसे गिदिर सोलायनाय जादों। बे बोसोराव गिबि खेबनि थाखाय
फरायसाफोरा मेट्रिक आनजादाव अ.एम.आर. सिटखौ बाहायनांगोन। फरायसाफोरा गासै मोन 4
आयदायाव अ.एम.आर. शीटआव फिन्नाय होनांगोन। अ.एम.आर. शीटखौ सानखान्थि, इंराजि, साधारन
बिगियान आरो समाज बिगियान आयदाफोराव आन्जाद होगिरिफोरनो होनाय जागोन। बे मोनब्रै
आयदायाव मोनफ्रोमावबो 45 नम्बर मोनसे सोंथि थागोन आरो मोनसे गुबुन फिन्नाय बहि आव
आन्जाद होगिरिया 45 नम्बरनि गोलाव सोंथिनि फिन्नायखौ लिरनांगोन। थामहिनबा, सानखान्थि, साधारन
बिगियान, समाजारि बिगियान, इंराजि
आयदायाव 90 नम्बरनि सोंथिनि फिन्नायखौ मोन्नै बहियाव 45 नम्बरजों लिरनांगौ।
संयुक्त किसान मोर्चाजों लोगोसे गोबां आबादारि आफादफोरा 16 फेब्रुआरि एबा दिनै भारत बन्द होदों। आबादारिफोरनि आफादफोरा दिनै मिरु सोरखारनिफ्राय गोबां दाबिफोरजों भारत बन्दनि खावलायदों। गोबाव सान सिगांनिफ्रायनो संयुक्त किसान मर्चाया गासैबो आबादारि आफादफोरखौ ज' जानो आरो मिरुआरि फालांगियारि आफादफोरजों 16 फेब्रुआरिआव होजानाय ग्रामीण भारत बन्दआव बाहागो लानो खावलायदोंमोन।
दिल्लीनिफ्राय फ्राय 200 किल'मिटार गोजानाव अंबालानि खाथियाव हरियाणा सिमायाव पान्जाबनिफ्राय हानजा सुरनाय रोजा रोजा आबादारिफोरखौ होबथानाय जादों आरो आफादफोरा भारत बन्द खावलायदों। हरियाणानि रैखाथि गोहोआ मोदै गग्रा गेस बाहायनानै सोमावसारारि आबादारिफोरखौ होखारनो नाजागासिनो दं। दिल्ली पुलिसनि बायदिब्ला, सोमावसारगिरिफोरखौ हादोरनि राजथावनियाव हाबनो होनाय जायाखै, जुदि बिसोरो आवगायलांदोंमोनब्लाबो।
आसाम आव बेनि बन्ध नि गोहोम गग्लैनाय़खौ
बारा नुनो मोननाय नङा होनना साननाय जादों, मानो होनब्ला आसामनिफ्राय आबादारि फोरा
बे धर्ना होनाय आव बाहागो लायाखै। आसामनि गोबाङानो बेनि सोमोन्दै मिथियाखै,
बेफोरखौ नोजोर होनानै बारा गोहोम गोग्लैनाय नङा होनना साननाय जादों, लोगोसे नो बे
बन्दआ हरखाब सिबिथायफोर जेरै एम्बुलेन्स, खौरां
बिलाइ राननाय, हाबा, मेडिकेलनि
गलाफोर, बर्ड आनजादनि थाखाय थांनाय फरायसाफोर
बायदि गोहोम खोख्लैनायनि थ आसा गैखाया।
गोजौसिन बिजिरसालिनि गाहाय बिजिरगिरि
डीवाई चन्द्रचूड़नि दैदेन्नायाव साबा बिजिरगिरिफोरनि संबिजिरारि बेन्सआ 2 नबेम्बर, 2023
मायथाइयाव केसनि हियारिंखौ फोजोबनानै बेखौ लाखिनानै दोन्दोंमोन।
थांनाय बोसोराव बिसायख'थियारि
बन्ड मावथांखिनि गनायथिखौ फेरफाथिनाय मोनसे आर'जलाइनि
खोनासंनायनि समाव, बेखौ मोन्नाय जादोंमोन दि बिसायख'थि
बन्डनि गेजेरजों खुंथायाव थानाय दोलोखौ सोर रां होदों बेनि सोमोन्दै गासै
फोरमायथिया आन्दोआव थायो, बे रोखोमसे आदबआनो बै सुबुंफोरनि
सोमोन्दै फोरमायथि दिन्थिनो हागौ जाय बेरेखा दोलोफोरनो बिसायख'थियारि
रां होयो। खुंथायाव थानाय दोलोआ गोजौसिन बिजिरसालियाव जुक्थि होदोंमोन दि भ'ट
होग्राफोरा बेखौ मिथिनायनि मोनथाय गैया दि राजखान्थियारि दोलोफोरनि धोननि फुंखाया
मा।
अरुण जेटलीआ 2018 मायथाइयाव बिसायख'थियारि बन्डखौ फोसावदोंमोन जेब्ला बिथाङा मिरुआरि रांखान्थि मन्थ्रिमोन। 2017 मायथाइयाव, मिरु सोरखारा रांखान्थि बिलनि गेजेरजों आयेनआव गोबां सोदांनानै 2018 मायथाइनिफ्राय बिसायख'थियारि बन्ड खान्थि लाबोदोंमोन।
जायनि जाउनाव, जुदि सोरबा सुबुं, आफादा बबेबा राजखान्थि दोलोनो राङारि हेफाजाब होनो लुबैयो, अब्ला बिसोरो बन्ड बायनांगोन। बे बन्डफोरा 1,000 रां, 10,000 रां, 10 लाख आरो 1 कौटि रांमोन। राजखान्थियारि दोलोफोरा बेफोरखौ मोननायनि उनाव बे बन्डफोरखौ एकाउन्त आव रिदिम खालामनो हायो। नाथाय बेखौ मिथिनाय जाया दि सोर, बेसेबां रां होखो एबा बायखो।
बे खान्थिखौ सिनायथि होनायनि उननिफ्रायनो गासै खान्थिनि रोखाथिनि सायाव सोंलु सिखांदों। बेरेखा हान्जाफोरा सान्दोंमोन दि बे खान्थिया रोखाथिखौ बोखाराखै, बेयो बेखौ बांहोदोंल'। मुलुगनि मोनसेबो हादोराव बेबादि खान्थि गैया होनना बो अजद।
मोनसे गोलाव आयेनारि दावहानि जोबनायाव, गोजौसिन
बिजिरसालिया मैया बे केसनि सायाव गावनि जोबथा रायखौ होयो। बेरेखा हानजानि बाथ्राया
बेमोनदि मिरु आरो बांसिन रायजोआव गोहोआव थानाय बिजेपि दोलोआ संबिजिरारि नङै महरै
रां लाबोनो थाखाय मोनसे "अरायथा गोरोबथा" खालामनायनि राहा खालामदों।
बेनिखायनो बि.जे.पि.आ बे खान्थिखौ अरायथा लाखिनो नाजागासिनो दं।
दुलाराय बर' फरायसा आफादा आफादनि 57थि गोथार गायसन्थाइ सानखौ देग्लाइ बागसा जिल्ला एबसुनि मददजों सालबारि फरायसालिमानि गेलेग्रा फोथाराव सानसेनि मेहेरगोनां हाबाफारिजों गाजा गोमजायै खुंफुंनाय जायो ।
हाबाफारि बादियै फुंबिलिनि गोथार आर'जखौ जागायनानै आफादनि गोथार फिर्फिलाखौ बिरहोयो मिरु एबसुनि मानावगेदेद आफादगिरि मुस्रि दिपेन बर'आ । बड'लेण्ड मुंख्लं आरो एबसुनि रुंसारिफोरनिसिम बिबार बाउजेनो एबसुनि बोसोनगिरि मानगोनां मुस्रि खुंख्रा स्वर्गियारीया आरो बड'फानो बिबार बाउजेनो लोगो आफादगिरि मुस्रि रोमदोन बसुमतारी आरो आसामनि बारग' आफादगिरि, राज्य' सभानि बारग' एम.पि आरो आसामनि केबिनेट मिनिस्टार मुस्रि उर्खाव गोरा ब्रह्मया ।
गोजोन आरो
खौसेथिनि थाखाय फारौ आरो बेलुन बिरहोयो सालबारि फरायसालिमानि गोरायुं ड० जगत
चनिद्र बसुमतारीया आरो एबसुनि बारग' हारिमु
नेहाथारि मुस्रि सुदिन बड'साया आरो हानजा सुरनाय हाबाफारिखौ बेखेवनानै
होयो बर' थुनलाइ आफादनि लेङाइ आफादगिरि मुस्रि सिताराम बसुमतारीया ।
बेजोंनो
लोब्बा लाखिनानै गेवलां सावराय मेलखौ मासि लानानै दैदेनो मिरु एबसुनि लोगो
आफादगिरि मुस्रि खोरोमदाव वारीया आरो गेवलां सावराय मेलखौ मेहेरगोनाङै बेखेवनानै
होयो एबसुनि मानावगेदेद आफादगिरि मुस्रि दिपेन बर' आ ।
बेयावनो जर'खा आलासि महरै
बाहागो लायो एबसुनि बारग' आफादगिरि आरो राज्य' सभानि एम.पि.
मानगोनां मुस्रि रोनगोरा नार्जारी आरो एबसुनि बारग' आफादगिरि ड०
दिपक बसुमतारीया आरो थांखिजानाय बुंथिगिरि महरै बाहागो लायो बर' थुनलाइ आफादनि
गाहाइ नेहाथारि मुस्रि नील' कान्त गयारीया
।
गोथार
गायसन्थाइ सान फालिनाय हाबाफारिया एबसुनि बारग' दैदेनगिरिफोर, बर' थुनलाइ आफादनि
आथिखाल आरो आगुनि दैदेनगिरिफोर, जिल्लानि मेलेमजिबिफोर, फोरोंगिरिफोर, राइजो राजाफोर
आरो फरायसाफोरनि मैखौमै बाहागो लानायजों हाबाफारिया मेहेरगोनाङैनो जोबलाङो ।
गुजरात पुलिसनि बायदिब्ला मबाइल
खावनायनि दोलो आ गुबुन गुबुन रायजोआव सोलिगासिनो दंमोन। बै दोलोनि खामानिया
होंगो-दोंगोनिफ्राय सोरनिबा मबाइलखौ खावनाय आरो बायजोनि रायजोआव दैथायहरनाय।
नायबिजिरगिरिफोरा सानै सुबुंखौ सोंथि सोंनानै आरोबाव गुवारै मिथिनो नाजागासिनो दं।
गुजरातनि आहमेदाबाद पुलिसनि बायदिब्ला, मबाइल
खावनायनि दायआव हमजानाय सानै सेंग्राया सिगाङाव झारखन्डआव थिखानाय हाजिरा मावग्रा
महरै खामानि मावदोंमोन। बिसोर साननैसो सुरतआव दंमोन। सासे सुबुंनि मुङा अविनाश
महतो। बैसो 19 बोसोर। गुबुन दायनिगिरिया श्याम कुर्मी। 26 बोसोर बैसोनि।
सानैनिफ्रायबो गासै 29 आइफन आरो मोन गु वान प्लास फ'न
मोननाय जादोंमोन।
पुलिसनि सोंनाय फिन्नायाव, हमजानाय
सुबुंफोरा बुंदोंमोन दि मबाइल फनफोरखौ खावनायनि उनाव 'अनलक' खालामनानै
आरो बांग्लादेश आरो नेपालाव दैथायहरनाया बिसोरनि बिबान। सिगाङाव बिसोर बे खामानिनि
थाखाय दानारि बेथन मोनोमोन। बुंनाय जायो दि हमजानायफोरा 45 साननि मबाइल फन
खावनायनि फोरोंथायबो लादोंमोन। बेनि उनाव बे 'job' (साख्रि)
होनाय जायो।
नायबिजिरगिरिफोरनि बायदिब्ला
दायनिगिरिनि प्लेन आ जोबोद गोरलै। गिबियाव सानैबो होंगो दोंगो जानाय जायगायाव लोगो
जाना थागोन । सासेनि मेगना सोरनिबा बेग एबा सिफियाव थायो। मबाइल खावनाय लोगो लोगो बेखौ
पार्टनारजों सोलाय-सोल' खालाम। बेनिफ्रायनो मबाइलखौ गिबियाव 'अनलक' खालामनाय
जायो। बिनि उनाव गुबुन रायजोआव दैथायहरनाय जायो।
जेब्ला सासेखौ हमनाय जायो, अब्ला गुबुन पार्टनारा खारलाङो। बेबादिनो सोलिदोंमोन साख्रि आ। बबेखानि, सानैखौबो सुरतनिफ्राय एखे समावनो हमनायनि उनाव, मबाइल फन खावनायजों सोमोन्दो थानाय गुबुन गुबुन खौरांफोरा सोराङाव फैदों।
बृहस्पतिबाराव नलबारि जिल्लानि घग्रापार पुलिस थानानि सिङाव थानाय मिलन बाजाराव पुलिसआ मासे मोसौखौ बुथारबाय थानाय समाव सासे सुबुंखौ हमनो हादोंमोन। सासे फालांगिरिखौ पुलिसा हमनो हादोंब्लाबो, फालांगिजों सोमोन्दो थानाय सानै गाहाय दायनिगिरिया जायगानिफ्राय खारखोमालांनो हादोंमोन। मिथिनो मोननाय बायदिब्ला गोबाव समनिफ्रायनो बिसोरो मिलन हाथाइयाव आयेन बेरेखायै मोसौखौ बुथारगासिनो दंमोन आरो बेनि बेदरखौ फानगासिनो दंमोन।
बृहस्पतिबाराव घग्रापार पुलिस थानानि बिबानगिरि सीमान्त बरानि दैदेननायाव पुलिस मावख'गिरि लितुमनि शर्माया हादिद आलि (18) मुंनि सासे लाइमोनखौ खायो आरो घग्रापार पुलिस थानायाव लाबोयो आरो सोंनाय फिननाय खालामबाय थायो। गुबै दायनिगिरि साद्दाम आली आरो नूर इस्लाम, जाय बेजों लोब्बा दंमोन, खारखोमालांनो हादोंमोन। घागरापार पुलिसा आथिखालाव सानै सुबुंनि थाखाय मोनसे गिदिर नागिरनाय हाबाफारि लागासिनो दं।
bodoinfo.com provides informations regarding State Government, Central Government and Private sector jobs for the aspirants of assam.
Please do not enter any spam link in the comment box. ConversionConversion EmoticonEmoticon