इन्डि एलायेन्स आ हरखाबै लोरबां जानायनि उनाव बि.टि.आर.आव थानाय गुबुन दोलोफोरनि गोसो गुदुंनाया बांदों। इउपिपिएल आरो बिपिएफनि अनगायैबो बिटिआरनि मोन्नै गाहाय ओनसोलारि दोलो, ककराझारनि एम.पि. नब कुमार सरनियानि गण सुरक्षा पार्टी, बि.जे.पि. दैदेन्नाय लोगो आरो कंग्रेस गासैबो बे मोन्नै मासिखौ आवग्रिनो थाखाय गाव-गावनि राजखान्थियारि अनजिमा जागायदों।
लकसभा बिसायख'थियाव, बि.जे.पि. आरो इउ.पि.पि.एल. गोरोबथाया बिटिआरनि मोन्नै ल'क सभा बियाबफोर - ककराझार आरो दरं उदालगुरि बियाबफोराव बिसायख'थि गेलेगोन। नाथाय बेखौ दासिमबो थि खालामनाय जायाखै दि सोरनि बेनारनि सिङाव बिनायसाखौ थिसननाय जागोन। बेनि गेजेरावनो बिपिएफ आरो गण सुरक्षा पार्टीआ गाव हारसिङैनो मोननै बियाबाव बिजाथि फसंगोन। जायनि थाखाय दा बिटिआरनि मोननै बियाबाव थाम खनायारि जुजिलायनायनि जाथावना दं।
मिथिनो मोननाय बायदिब्ला दा बिटिआरनि नेमआ इउपिपिएल दोलोनि सिङाव दं नाथाय गोबां जाहोनफोरनि थाखाय दोलोआ बयनिबो मोजां मोनजासिन्नाय जानो हायाखै। अजद दैखांनाय बायदिब्ला बिटिआरनि जौगानायनि खामानिया जेरै मावनांगौमोन बिदि जायाखै।
लोगोसे रायजो राजाफोराबो मोनफ्रोमबो खामानि राननायाव आय'गजों खुसि नङा। बेयाव दाजाबदेरनायानो बिटिआरआव आसामी रावखौ नेवसिनायनि जाहोन। बेनिखायनो दासिमबो साननाय दं दि हाग्रामा मोहिलारीजों दैदेनजानाय बिपिएफ दोलोआ बिटिआरनि बांसिन ओनसोलाव इउपिपिएलनिख्रुइ गोख्रोंसिन। बि.जे.पि. नि मोनसे सुलुङा बुंदोंमोन दि बि.जे.पि.आ ककराझार बियाबखौ इउपिपिएलनो हगारना होगोन।
नाथाय बि.जे.पि.आ देरहानायखौ रोखा खालामनो थाखाय इउपिपिएलआव हाबनानै बारग' मन्थ्रि, बिपिएफनि गागि दैदेनगिरि चन्दन ब्रह्मखौ गोरोबथानि बिजाथि महरै दिन्थिनो लुबैदों। इउपिपिएलआ गावनिनो बिजाथिनो टिकेट होनो लुबैया। मिथिनो मोननाय बायदिब्ला चन्दन ब्रह्मआ इउपिपिएल दोलोआव हाबनायनि उनावसो बिजाथि होनाय हाबाफारिया सोलिगासिनो दं।
बबेखानि, बि.जे.पि. नि नेरसोनआवनो बिथांखौ बिसायख'थि गेलेनो नागिरनाय जादों। थामहिनबा ब्रह्मआ BJP नि सिनआवल' सुबुंफोरनि खाथियाव थांनांगौब्लाबो बिपिएफनिफ्राय फैनानै इउपिपिएल दोलोआव हाबहैनायनि बांसिन आसा दं।
बिपिएफआ ककराझार आरो दरं उदालगुरि मोन्नैबो बियाबाव बिजाथि फसंगोन। क'कराझारआव खाम्फा बरगयारी आरो दरं उदालगुरियाव दोलोनि लेङाइ आफादगिरिनि बिनायसाया रोखा जानायबायदि। बिपिएफनि गागि दैदेनगिरिफोरा बुंदोंमोन दि बिपिएफआ हारसिङैनो बिसायख'थि गेलेगोन।
बिपिएफआ उदालगुरि लकसभा बियाबाव बाङाइ सुबुं अनजिमा थानाय सुबुंफोरनो भट होगोन होनना मिजिं थिदों। मानोना बिपिएफआ मानिना लायो दि बे सुबुंफोरा बि.जे.पि. आरो कंग्रेसनो भट होआ। बेनि गेजेराव, ककराझारनिफ्राय खेबनै एम.पि. जानो हानाय नब कुमार सरनियानि गण सुरक्षा पार्टीआ बे खेबाव ककराझारनि अनगायै दरं-उदालगुरि आरो डिफुआव बिजाथि फसंनो सानगासिनो दं।
पार्टीनि गाहाय आरो एम.पि. शरनियाया बुंदोंमोन, "जों खालि सुबुंफोरनि जौगानाय आरो मोनथायनि आयदाफोरावल' सुबुंफोरनि खाथियाव थांगोन। आं हानि मोनथायखौ लानानै संसदाव गोबां खेब गारां बुंबाय थादों। सुबुंफोरनि जेंनाया बेनोदि बि.जे.पि.आ मोन्थाय होनो लुबैया। "
बिथाङा बेखौबो मिजिं थिदों दि सुबुंफोरा सिगांनि खेबनै बायदि ककराझारनि शरनियाखौ देरहागोन। बि.जे.पि. दैदेननाय लोगोयारि दोलोआ बिटिआरनि मोन्नैबो बियाबनि मोन्नैबो मासिखौ जायखिजाया रोखोमै आवग्रिनो हाजासे नाजागासिनो दं। बेजों लोगोसे, बि.जे.पि.आ बिटिआरआव बि.जे.पि.नि आफादारि बिथाखौबो गोख्रों खालामनो नाजागासिनो दं। फैगौ लकसभा बिसायख'थि जानायसिम गासैबो रोखा जालांगोन।
bodoinfo.com provides informations regarding State Government, Central Government and Private sector jobs for the aspirants of assam.
Please do not enter any spam link in the comment box. ConversionConversion EmoticonEmoticon