आसाम आयेन आफादनि रांबावजा जथुम्माया दिनैनिफ्राय जागायबाय। आयेन आफादा फोसावनाय समफारि बायदियै आसाम आयेन आफादनि रांबावजा जथुमाया 5 फेब्रुवारिनिफ्राय 28 फेब्रुवारिसिम सोलिगोन। लकसभा बिसायख'थिनि सिगां, 2024-25 मायथाइनि थाखाय बि.जे.पि.जों खुंजानाय आसाम सोरखारनि रांबावजाखौ जर'खायै गोनांथार साननाय जायो।
नाथाय जथुम्मानि जागायजेन्नायाव बेरेखा हानजानि बेरेखा सोमावसारनायाव सदनखौ दोन्थ'नाय जादोंमोन। जेब्ला रायजो बेंगिरिया सदननि हाबाफारि बायदियै बरायनाय बिबुंथि होयो अब्ला बेरेखा हान्जाया रागा जोंदोंमोन। बेनि फिथाय महरै रायजोनि रायजोबेंगिरि गुलाब चन्द कटारियाया गावनि 1 मिनिटनि बिबुंथिखौ फोजोबो। बुंथिगिरि बिस्वजित दैमारिआ 45 मिनिटनि थाखाय सदनखौ दोन्थ'नो फोसावो।
28 फेब्रुवारिसिम सोलिबाय थानाय रायजो बिधानसभानि बाजेट जथुमनि सिगां दिसपुराव गोख्रों रैखाथिनि राहा खालामनाय जादों। आसामनि रांखान्थि मन्थ्रि अजन्ता नेवगआ 12 फेब्रुवारियाव आयेन आफादाव 2024-25 माइथायनि थाखाय रायजोनि रांबावजा थिसनगोन।
बिधानसभानि बाजेट जथुमआ दिनै फुंनि 9.30 रिंगायाव भारतनि संबिजिरनि 176 (1) दफानि सिङाव रायजो बेंगिरि गुलाब चान्द कटारियानि बिबुंथिजों जागायजेनो। बिनि उनाव बुंथिगिरिया 2024 मायथाइनि बिधान सभानि बाजेट जथुमनि थाखाय आसाम आयेन आफादनि मावथांखि बोसोनगिरि आफादनि फोरमायथिखौ फोसावगोन। बुंथिगिरिया आसाम आयेन आफादनि नेम खान्थि आरो खुंथायनि नेम खान्थि 9 (1) नि सिङाव बुंथिगिरिनि पेनेलनि रनसायनायाव सोफाजानाय सोद्रोमाफोरनि मुंफोरखौ फोसावनानै सदननि हाबाफारिखौबो सिगांथिं लांगोन।
दिनै गिबि मन्थ्रि ड. हिमन्त बिश्व सर्माया 2022-23 माइथायनि थाखाय आसाम खारिथि आय'गनि बोसोरारि रिपर्टखौ सदनाव गथायगोन। संसदारि हाबानि बिफानफोराव आसामाव संसदारि आरो बिधान सभा बियाबफोरनि जोबथा सिमा खानायनि थाखाय हादोरसा गेजेट फोसावथायखौ 11 आगस्त, 2023 खालि सदनाव गथायनाय जागोन।
बे जथुम्मायाव गोबां गोनांथार आयदाफोरनि सायावबो सावरायनाय जागोन। गोबां गोनांथार बिलफोरखौ सदनाव दैखांनाय जागोन। बावैसो सान सिगां गिबि मन्थ्रि हिमन्त बिस्व शर्माया रोखा खालामदोंमोन दि बे बिधानसभा जथुम्मायावनो आसाम गोबां हाबा लानायनि बेरेखा बिल लाबोनाय जागोन। बेनि अनगायैबो गोदान आसाम दावबायथाय (जौगाथाय आरो रेबथुमनाय) बिल, 2024 जों लोगोसे गोबां गुबुन गोदान बिल आरो सोदांनाय बिलफोरखौ बाजेट जथुमाव थिसननाय जागोन।
bodoinfo.com provides informations regarding State Government, Central Government and Private sector jobs for the aspirants of assam.
Please do not enter any spam link in the comment box. ConversionConversion EmoticonEmoticon