14 February 2024 bodo news

मंगलबाराव श्रीमन्त शंकरदेव कलाक्षेत्रआव खुंजानाय मोनसे हाबाफारि आव रायजोनि गोजौसिन नोगोरारि सन्मानखौ होनाय जादोंमोन। बे बान्थाखौ लेङाइ आफादगिरि जगदीप धनखारे, रायजो बेंगिरि गोलाप चान्द कटारिया, गिबि मन्थ्रि हिमन्त बिश्व सर्माजों लोगोसे गोबां मुंदांखा सुबुंफोरनि नुजाथिनायाव होनाय जादोंमोन।

गोजौसिन बिजिरसालिनि बारग' गाहाय बिजिरगिरि आरो रायजो सभानि एम.पि. रन्जन गगैनो रायजोनि गोजौसिन नोगोरारि मान आसाम वैभव बान्थाजों मान होनाय जादों। लेङाइ हादोरगिरिया बिथांनो बे सन्मानखौ होदोंमोन।

बेराफारसेथिं, आसाम सौरब बान्थाखौ गासै साब्रै जर'खा सुबुंफोरनो होनाय जादोंमोन। बेखौ नोजोर होनो गोनां दि द'जियरखौ दि चराइदेव मैदामखौ मोनसे बुहुमनां दोरोङारि नेरसोन थावनि बानायनो थाखाय इउनेस्कोआव दैथायहरनाय जादोंमोन। आसाम सौरब बान्थाखौ ड. किसान सान नारियानो होनाय जादोंमोन, जाय बेखौ थियारि खालामनायजों लोगोसे चराइदेव मैदामनि रैखाथि आरो इउनेस्क' बिथोनफोरखौ मावफुंनायाव जर'खा बिफाव लादोंमोन। डा. नारियानि न'आ उत्तर प्रदेशनि गाजियाबादआव।

आसाम सौरब बान्था मोनगिरिफोरा जाबाय एथलीट हिमा दास, सानस्रिग्रा एल्विस आली हजारिका आरो थुनलाइ आरो हारिमुनि बिजिरसंगिरि नदीराम देउरी।

रायजोनि थामथि गोजौसिन नोगोरारि बान्था आसाम गौरव बान्थाखौ बे खेबाव गासै सा 16 सुबुंफोरनो गथायनाय जादों।

बर फिसा तेनजिं बडसा नो बो बे बान्था खौ होनाय जादों,

गोबाव समनिफ्रायनो अर्गेनिक साहानि आबाद मावबोनाय तेनजिं बडोसाया उदालगुरियाव हाग्रानि मैदेरफोरजों थाफानानै साहा दारिमिन दानायनि मोनसे खान्थि गायसनदों।

बेखौ नोजोर होनो गोनां दि आसाम वैभव बान्थायाव गांसे मान बिलाइ, गांसे फोरमानलाइ, गंसे मेडेल आरो 5 लाख रांनि राङारि अनसुंथाइ होनाय जायो। असम सौरव बान्थायाव गांसे मान बिलाइ, फोरमानलाइ, गंसे मेडेल आरो 4 लाख रांनि राङारि अनसुंथाइ होनाय जायो। असम गौरव बान्थायाव गांसे मान बिलाइ, गांसे फोरमानलाइ, गंसे मेडेल आरो 3 लाख रांनि राङारि अनसुंथाइ होनाय जायो।

 

               दिनै आसामनि मोन 11 जिल्ला फोराव जायगायारि बन्ध फोसावदों। आलि आइ ल्रिगांगखौ दिनै 14 फेब्रुवारि आव आसामनि मिसिं हारिनि सुबुंफोरा फालिगोन। बे फोरबोखौ बोसोरफ्रोमबो फागुन दाननि सेथि बुधबाराव मिसिं सुबुंफोरा फालियो।

रायजोनि मोनफ्रोमबो बाहागोनि मिसिंनि गोहोम गोनां गोबां जिल्लाफोराव बे फोरबोखौ फालिनो थाखाय साखा-फारा जाबाय, बेनि गेजेरावनो आसाम सोरखारा रायजोनि मोन 11 जिल्लाफोराव जायगायारि बन्द' फोसावदों। बे बायदियैनो, 14 फेब्रुवारिखालि धेमाजी, सा लखिमपुर, सनितपुर, सिनिचुकिया, डिब्रुगढ़, शिवसागर, जरहाट, गलाघाट, माजुलि चराइदेव आरो बिस्वनाथआव जायगायारि बन्द' थागोन।

 

                आसामनि 'रायजोआरि फिथाइ' आ मा मिथियो ना नोंथाङा, नारें खारजि खौ रायजोआरि फिथाइ  महरै गनायथि होबाय आसाम सोरखार आ। 12 फेब्रुआरिखालि रायजो केबिनेटआ नो बे थिरांथा लादोंमोन। आबाद बिफाननि मन्थ्रि अतुल बराया मंगलबाराव आसाम आयेन आफादनि बाजेट जथुमाव केबिनेटनि थिरांथाखौ फोसावो।

बिथाङा आयेन आफादाव बुंदोंमोन, "आसामनि नारें खारजि, जायहा हायुंआरि आरो गेजेर हायुंआरि हाथाइफोराव जुनियायै बाख्नायजानाय मुलियारि गुन दं, बे रायजोनि 'रायजोआरि फिथाइ' जाबाय। आं दिनै 12 फेब्रुवारियाव गिबि मन्थ्रि हिमन्त बिस्व शर्मानि दैदेननायाव आसाम बिधान सभानि गोथार न'आव लानाय बे थिरांथाखौ फोसावनायाव जोबोद गोग्गानाय मोनदों। ''

मन्थ्रि बराया बुंबावदों, "जि.आइ. टेग जाय आसामनि अनगा जेरावबो मोन्नाय जायाखै, बेयो मुंदांखा नारे खारजि आ गाम'चा बायदि जोंनि गावारि आरो स्वाभिमाननि नेरसोन। बेनिखायनो बे फिथाइखौ राइजोआरि फिथाइ महरै फोसावनायनि खौरांआ थारैनो रायजोनि आबादारिफोर आरो आबाद सेक्टरजों सोमोन्दो थानाय गासिबो सुबुंफोरखौ गोजोननाय आरो गोग्गानाय लाबोगोन। बे नोजोरगोनां आरो जारिमिनारि आगाननि थाखाय आं गिबि मन्थ्रिखौ गोसो गोथारै साबायखर बावो।

आबाद मन्थ्रिआ फोरमायदोंमोन दि 5 जानुवारि, 2018 खालि सिआरएस न' दिहिं नेमु तेङा उन्नयन समितिआ आसाम आबाद मुलुगसोलोंसालिनि हेफाजाबाव नारें खारजिखौ भुमखौराङारि गनायथि होनो थाखाय आरजलाइ होदोंमोन। नारें खारजिआ 2019 मायथाइयाव भुमखौराङारि सिनायथि मोनदोंमोन।

आसामा बोसोराव 1.58 लाख मेट्रिक टन काजु दिहुनो। थांनाय नै बोसोराव आसामनि 70,000  नारें खारजि फोरखौ लन्दन आरो गेजेर सानजानि गोबां हादोरफोराव दैथायहरनाय जादों। आसामाव नारें खारजि आबादखौ फेहेरनायनि गोबां खाबु दं।

 

         रायजोआव समबारनिफ्राय हायार सेकेन्डारिनि जोबथा बोसोरनि आनजाद जागायबाय। आनजादनि गिबि सानाव इंराजि आयदा आनजाद दंमोन। नाथाय आनजादनि गिबि सानखालि सोंथि बिलाया वाट्सएपाव भाइरेल जादोंमोन। पर्वतझोरानि बशबारी सीनियर सेकेन्डारिनि आनजाद मिरुआव आनजाद जागायनायनि से घन्टा खावसे उनाव सोंथि बिलाया भाइरेल जादोंमोन। सोंथि बिलाइ भाइरेल जानायनि दायाव पर्बतझरा सेनियर सेकेन्डारि नि गाहाय रामेन्द्र नाथ रयखौ सासपेन्द खालामनाय जादों।

गुबैयै ककराझारनि पर्वतझोरायाव थानाय बाशबाड़ी हायार सेकेन्डारि आनजाद मिरुआव आनजाद जागायनायनि आनजाद जागायनायनि से घन्टा खावसे उनाव मोनसे मबाइल फनाव सोंलुफोरनि फिन्नायखौ होदोंमोन। खौरां मोननाय बादिब्ला आनजाद होगिरि सानेका खातुन मुंनि आइजो आ नो बे गाज्रि खामानि खौ मावदोंमोन, बियो मबाइल खौ लाखुमानानै हासुनाय जायगा याव थांनानै सोंनाय बिलाइ नि सावगारि खौ गावनि फिसाय नो हरदोंमोन आरो बेनि गेजेरजों फिननाय खौ लानो नागिरदोंमोन, फिसायनि मुङा नाजिमुल खान। दायो सानैनिबो बेरेखा बेबस्था लानाय जागोन होनना खौरां मोनदों, लोगोसे नो रुपसी पुलिसा जाथायजों सोमोन्दो थानाय बांसिन खौरांनि थाखाय नायबिजिरगासिनो दं। बे जाथायाव आरो सोर लोब्बा दं बेयो पुलिसनि नायबिजिरनायनि उनावसो सोराङाव फैगोन। आसामनि सोलोंथाय मन्थ्रि आ सोंनाय बिलाइ खौ लिक जायाखै होनना बो रोखा खालामना होदों।

 

        खम समनि गेजेरावनो रन्जन दैमारि बिथांखौ दिहुननो हागोन खौ आसा खालामो, बे बाथ्रा खौ बुंदों बितिआर नि गाहाय प्रमद बर बिथाङा, बेनि थाखाय आसाम सोरखार आरो भारत सोरखार जों सावरायलायबाय थादों होनना बो बुङो। मैया गसाइगांव आव जानाय इउपिपिएल दोलो नि जइन नि हाबाफारि आव बाहागो लानानै खौरांगिरिफोरनि सिगाङाव फोरमायो, मैया बिपिएफ दोलो नि सायाव मोनसे अजद बो होनाय खौ नुनो मोनदोंमोन, बिथाङा बुंदों 17 बोसोर सोरखार सालायनाय हाग्रामा महिलारि आ रन्जन दैमारि खौ दिहुननो हागौमोन, नाथाय बखनो हायासै, दिनै बेफोरखौ नातक बायदियै बुंदों होनना बो अजद होयो बिथाङा।

 

                   पुलिसआ समबारनि मोनायाव लखिमपुरआव सिग्रोमनाय खालामो आरो गोबां बिबांनि नंखाय सना, मबाइल, एसिड बायदि बोखांनो हायो। पुलिसआ जाथायजों सोमोन्दो थानाय सानै सुबुंखौ खादों। हराव बांगालमारा ओनसोलनि लखीमपुर सदर पुलिस थाना आरो नावबैसा पुलिस थानानि सिग्रोमनायाव बे गोबां बिबांनि नंखाय सना बोखांनो हायो। हमजानाय सुबुंफोरा बांगालमारा ओनसोलनि महघुलीनि बाबुल हुसैन आरो दौलतपुरनि शफिकुल इस्लाम।

 पुलिसआ मोन दाइन नंखाय सनानि थुख्रा, गंथाम नंखाय सनानि नावफोरजों लोगोसे गासै जिसे नंखाय सनानि बेसादफोर बोखांनो हायो, नंखाय सनानि लिरथाया 16 किल'ग्रामनिबो बांसिन। पुलिसआ नंखाय सनाजों लोगोसे हमजानाय सानै सुबुंनिफ्राय गंबा मबाइल फन आरो नाइट्रिक एसिडनिमोननै बथलबो बोखांनो हायो। बेखौ मिथिनो मोननाय जादों दि बे नाइट्रिक एसिडखौ नंखाय सना साफा खालामनायाव बाहायनाय जायो।

लखिमपुरनि उफ्रा पुलिस सामलायगिरि जयन्त बरुवाया सदर पुलिस थानायाव खौरांगिरिफोरनि सिगाङाव बुंदोंमोन दि साननैसो सिगां लखिमपुरनि बे दुथां सुबुंफोरा सासे रौनिया मावख'गिरिखौ थगायनायनि थाखाय नोजोर होदोंमोन। बिथाङा मध्य प्रदेशनि मुकेश कुमार।

मुकेश कुमारखौ जानुवारियाव सोलोजों लखिमपुराव, सना फाननायनि मुङाव। मुकेश कुमारा लखीमपुर सौहैनायनि उनाव, नंखाय सना सोमोन्दो थानाय रेकेटनि साथाम सोद्रोमाफोरा बिथांखौ बेंखनदोंमोन आरो गाग्लोबदोंमोन।

बिसोर मुकेश कुमारनिफ्राय बिथांनि मबाइल फनखौबो सिख'ना लादोंमोन। नाथाय रौनिया मावख'गिरिया खारखोमालांनो हादोंमोन। जाथायनि सोमोन्दै पुलिसा मैया मोनायाव अपारेसन खालामदोंमोन। रायखांनो गोनां दि रौनिया मावख'गिरिनिफ्राय सिख'ना लानाय मबाइल फनआबो पुलिस अपारेसनाव बोखांनो हानाय मबाइल फनफोरनि गेजेराव दं।

 

                 हादोर नाङैनो आबादारिफोरा हादोरनि राजथावनि दिल्लीयाव गावसोरनि दाबिफोरखौ आबुं खालामनो थाखाय जुजिनो साखाफारा जागासिनो दं। बेबायदिनो, गोबां आबादारिफोरनि हान्जा सुरनाया पान्जाबनि राजथावनि चन्डीगढ़आव हाबनानै हारियाना फारसे आवगायनो साखाफारा जागासिनो दं। बेखौ गिनाय जादों दि दिन्थिफुंनायनि समाव पुलिस आरो आबादारिफोरनि गेजेराव दाङाबाजि बायदि थासारि सोमजिगोन होनना।

बेखौ नोजोर होनानै चन्डीगढ़ खुंथाया गोबां गोनां थिरांथाफोर लादों। आबादारिफोरनि सोमावसारनायखौ नोजोर होनानै चन्डीगढ़नि गोबां फरायसालिफोराव गथ'फोरनि रैखाथिनि थाखाय बन्द' फोसावदों। मंगलबाराव जानो गोनां आनजादफोरखौबो दोन्थ'नाय जादोंमोन। फरायसालिफोरा बे बिथिङाव बिमा-बिफाफोरनो खौरां दैथायहरदों। फरायसालिफोरा बेखौबो बिथोन होदों दि आबादारिफोरनि सोमावसारनाय दिन्थिफुंनाय समाव बिमा-बिफाफोरा गावसोरनि गथ'फोरखौ फरायसालियाव दैथायहरनायनि अनगायै न'आवनो दोननांगौ।

बे समावनो, आबादारि आफादनि दैदेनगिरि सरवान सिंह पंढेर आरो जगजीत सिंह दलेवालआ समबाराव मिरु सोरखारजों नैथि खेबनि सावरायनायनि उनाव दिल्लीनिफ्राय गावसोरनि थांनायनि बाथ्रा फोसावो। बिथांमोनहा बुंदोंमोन दि बे जथुमाया सिगांनि बायदि फेलें जादों।

बिथांमोनहा बुङो, "जों दा दिल्लीयाव थांनो आरो हेंथा दिन्थिफुंनो थाखाय नारसिनजादों। बे हाबाफारिनि सिङाव आबादारिफोरनि मोनसे गिदिर कनभयआ मंगलबारखालि फुंनि 10 रिंगायाव दिल्ली फारसे आवगायगोन। बेराफारसेथिं, आबादारिफोरनि दिल्ली फारसे दावबायनायखौ होबथानो थाखाय हारियाना सोरखारा लानाय राहाफोरा पान्जाब आरो हारियाना गोजौ बिजिरसालिसिम सौहैबाय। दिल्लीनि सासे उकीला सिमा बन्द' आरो इन्टारनेट होबथानायखौ जुजिनानै आर'जलाइ होदोंमोन।

 

 

मरिगावआव ओरैबादि समाव मोनसे सोमोनांथाव आरो दुखु नांथाव जाथाय जादों, फिसाज्लाखौ बिनि बिमाया बुथारनाय जाथाय, बिमाया गावनि थाम बोसोरनि फिसाज्लाखौ बुथारदों।

 बिमाया बुथारनानै थाम बोसोरनि गथ'नि गोथै सह'खौ गावनि बिसना सिङाव दोनखोमादोंमोन। बुथारनायनि गुबै जाहोनखौ दासिमबो मिथिनो मोननाय जायाखै। मरिगाव पुलिसआ जाथाय जायगायाव सहैखाबाय आरो बुथारग्रा बिमाखौ खाबाय। थैनाय सुबुंखौबो पस्टमर्टेमनि थाखाय मरिगाव सिभिल देहा फाहामसालियाव दैथाय हरनाय जादोंमोन। जायगानि सुबुंफोरा पुलिसजों थार नायबिजिरनाय आरो दायनिगिरिफोरखौ थि साजा होनो दाबि खालामदोंमोन।

 

               ट्रेफिकनि नेमफोरखौ सिफायनानै हेलमेट गानालाबानो स्कुटी सालायबाय थायोमोन सासे सेंग्राया। लामायाव, बिखौ ट्राफिक पुलिसआ हमदोंमोन।

बेनि उनाव मा जानायमोन बेयो साननो हाथावै। बे जाथाया बेंगालुरुनि।

सेंग्रानि मुङा सैयद सफी। सैयद शफीकखौ विल्सन गार्डेननि खाथियाव नेमफोरखौ सिफायनायनि दायआव ट्राफिक पुलिसआ खादोंमोन।

सासे ट्राफिक कनस्टेबलआ स्कुटिनि साबिखौ सिख'ना लाना थाङो आरो हेड कन्सटेबल सिद्धरामेश्वर कौजलगीआ गावनि मबाइलाव भिडिअ' बानायनानै खौरां रेकर्ड खालामनो नाजायो।

बे समावनो सेंग्राया कनस्टेबलनि आसिखौ अरनानै स्कुटीनि साबिखौ सिख'ना लाना थाङो। भिडिअ'आव सेंग्रानि गारांखौ खोनानो मोनो।

बियो मुंख'दोंमोन दि बियो देहा फाहामसालियाव थांनो थाखाय ओंखारबोदोंमोन आरो गावनि होंगो-दोंगोनि थाखाय हेलमेट गान्नो बावगारदोंमोन।

बिनि भिडिअ'आ भाइरेल जायोब्लाबो जेबो जेंना गैया होनना लाइमोनआ बुंबावदों। शफीआ हेड कन्स्टेबलखौबो भिडिअ' बानायनायनिफ्राय होबथादोंमोन।

बेनि उनाव, बियो खारखुमानो नाजादोंमोन, नाथाय पुलिसआ गोख्रैनो बिखौ हमदोंमोन।

 

                मुंदांखा रोजाबगिरि आरो फावखुंग्रि मल्लिका राजपुत (35) आ फासि लाना गावखौ फोथैना लायो। मंगलबारआव मल्लिका राजपुतनि गोथै सह'खौ सुल्तानपुरआव गावनि न'नि खथायाव गंसे फेनजों फासि नांनाय हालोदआव मोननाय जादोंमोन।

मल्लिका राजपुतनि थैनायनि उनाव जायगानि सुबुंफोरा जायगायाव होंगो दोंगो जादोंमोन। बेनि खौरांखौ मोननाय लोगो लोगो कोतवाली नगर

पुलिसआ जाथाय जायगायाव सहैयो आरो गोथै सह'खौ पस्टमर्टेमनि थाखाय दैथाय हरो।

पुलिसा नायबिजिरनायाव नांथाबनानै दं। मल्लिका राजपुतनि बिमा सुमित्रा सिंहनि बायदिब्ला, बिथांनि फिसाजो मल्लिकाया मोनायाव सिगांनि बादि नो खथायाव थाङो आरो दरजाखौ सिंनिफ्राय बन्द खालामो। फुङाव, जेब्ला गोबाव समसिम दरजाखौ खुलियाखैमोन, दरजा खौ सिफायनाय जादोंमोन, बिनि उनाव बियो गावनि फिसाजोखौ फासि नांनाय नुयो।

मिथिनाय बायदिब्ला मल्लिकाया गावनि नखरजों माबा मोनसे जेंनाखौ लानानै नांलाय-खमलाय जादोंमोन। बेनि उनाव, पुलिसखौ लिंहरनाय जादोंमोन आरो बाथ्राया सुस्रां जादोंमोन। नाथाय फावखुंग्रिया गावखौ फोथैना सो लायो उनाव।

मल्लिका राजपुतआ बलीवुडनि फावखुंग्रि कंगना रनौतजोंबो खामानि मावदोंमोन। कंगनाजों रिभलभार रानी सावथुन आव।

मल्लिकाखौ हेफाजाबारि फावआव नुनो मोननाय जादोंमोन। मेथाइफोरनि अनगायैबो, मल्लिकाहा गोबां सिरियेल, एल्बम फोरावबो गावनि रोंग'थिखौ दिन्थिदोंमोन दं। दायो बेनि सायाव पुलिसफोरनि नायबिजिरनाया सोलिगासिनो दं।

• Tweet
• Share
• Share
• Share
• Share

About Mridul

bodoinfo.com provides informations regarding State Government, Central Government and Private sector jobs for the aspirants of assam.

Related Post