साख्रि थिसननायाव बेलेबेजे। सासे साब-इन्सपेक्टरजों लोगोसे हमगार्ड खौ बजाली पुलिसा खादों। खौरां मोननाय बायदिब्ला, हमगार्ड मावथिफोरनो नंखाय फोरमानलाइ होनायनि मुङाव पुलिसा गावनो 12,000-15,000 रांसिम रां बुथुमदोंमोन। बेबादि नंखाय नफोरमानलाइफोरखौ फान्नायनि उनाव, हमगार्डफोरखौ बजाली-बरपेटायाव गोबाव समसिम थिसननाय जादोंमोन। जाय समाव गुबैयै मोन 16 फोरमानलाइफोरल' होनाय जादोंमोन; बेबादि थासारियाव बजाली पुलिसनि आखायाव नंखाय फोरमानलाइजों लोगोसे गां 63 आरजलाइ मोननो हादोंमोन।
उनाव, बजाली जिल्लानि पुलिस सामलायगिरिनि दैदेननायाव बिफानारि नायबिजिरनाय आरो मोनसे केसनि सायाव बिथा खालामनानै बजालि पुलिसा पुलिस साब-इन्सपेक्टर शैलेन्द्र दास आरो हमगार्डनि जवान प्रकाश कालिताखौ खायो। एसपि आ बुंदों दि जाथायनि सायाव गोख्रोङै नायबिजिरनाया सोलिगासिनो दं आरो गोबां पुलिसफोरा बेबादि मुगैथाव खामानिनि थाखाय फान्दायनायाव गोग्लैनो हागौ।
दिनैनिफ्राय हायार सेकन्दारि नि जोबथा
आनजाद आ जागोन, बेखौ नोजोर होनानै शनितपुर आरो लखिमपुर जिल्ला खुंथाया रायजोआव
हायार सेकेन्डारि आनजाद आरो गोजौ फरायसालिनि आनजादफोरनि थाखाय थियारि। खौरां
मोननाय बादिब्ला शनितपुर आरो लखिमपुर जिल्ला खुंथाया 16 फेब्रुवारिनिफ्राय 4
मार्चसिम आरो 12 फेब्रुवारिनिफ्राय 13 मार्चसिम जानो गोनां बे मोननै जोबथा आनजादनि
समाव गासैबो आनजाद मिरुफोराव धारा 144 फोसावदों।
जिल्ला बेंगिरि या, जिल्लायाव आनजाद मिरुफोरनिफ्राय 100 मिटारनि सिङाव साथाम एबा बिनि बांसिन सुबुं ज' जानायखौ होबथायो। बेबायदिनो आनजाद मिरुफोरनिफ्राय 100 मिटारनि बेंखनाव गासैबो रोखोमनि गोबौ हाथियार, अर फोजोंनाय़ मुवा बेसाद फोर जगायनायाव आबुङै होबथादों।बेबायदिनो, आन्जाद मिरुफोरनि 100 मिटारनि बेन्दोङाव लाउड स्पिकार, साउन्ड बानायनाय मेसिनफोरखौ बाहायनो हानाय नङा, सुबुंफोरखौ बे बिथोनखौ गोख्रोङै बाहायनो बिथोन होदों। बबेखानि, फरायसाफोर आरो आनजाद मिरुफोरनि मावनांगौ हाबायाव लोब्बा थानाय सुबुंफोरनि बेलायाव बेबायदि होबथानायखौ रेहाय होनाय जादों।
आबादारिफोरनि सोमावसारनाया फिन जागायफिननायनि लामायाव। 13 फेब्रुआरिआव आबादारिफोरजों थांखि लाजानाय 'दिल्ली चलो'नि सिगां, हारियानानि बिबानगिरिफोरा अंबालानि खाथि नि शंभुआव पान्जाब सिमाखौ सील खालामदों होनना खौरां मोनदों। आबादारिफोरनि हेंथा बे हानजा सुरनायखौ होबथानो थाखाय जींद आरो फतेहाबादआवबो रैखाथिखौ गोख्रों खालामनाय जादों।
मबाइल इन्टारनेट सिबिथायफोरखौ बन्द' खालामनाय जादों आरो मोनस्नि जिल्लाफोर - अंबाला, कुरुक्षेत्र, कैथल, जींद, हिसार, फतेहाबाद आरो सिरासआव 11 फेब्रुआरिनिफ्राय 13 फेब्रुवारिसिम बन्द' खालामनाय जादों जाहाथे सरासनस्रा सुबुंफोरनि थाखाय जेबो जेंना जाया।
बेखौ गोसोखांनो हायोदि संयुक्त किसान मोर्चा (राजखान्थि नङि) आरो किसान मजदूर मर्चाया 13 फेब्रुवारियाव गोबां दाबिफोर दैखांनानै "दिल्ली चलो" नि थाखाय खावलायदोंमोन। बेनि सिङाव, सा 200 नि बांसिन आबादारिफोरा गावसोरनि दाबिफोरखौ लानानै दिल्लीसिम हानजा सुरगोन। बिथांमोननि दाबिफोरनि गेजेराव फसलफोरनि थाखाय बाङायसिन हेफाजाब बेसेन (एम.एस.पि.) थि खालामनो थाखाय आयेन दानाय दं। बेयो बिसोरनि हेंथा सोमावसारनाय जाहाथे सोरखारा बिसोरनि दाबिफोरखौ गनायना लायो।
मिरुआ हादोरारि राजथावनि फारसे
थांनायनि सिगां आबादारिफोरनि दाबिफोरनि सायाव सावरायनो थाखाय 12 फेब्रुवारियाव
मोनसे जथुम लिंहरदोंमोन। बिनि सिगाङाव
बृहस्पतिबाराव जानाय गिबि जथुमाव सोरखारा आबादारिफोरनि दैदेनगिरिफोरनि सिगाङाव
माखासे थांखिफोर होदोंमोन। बेयो बुंबावदों दि फैगौ जथुमाया दिनै 12 फेब्रुवारियाव
जागोन। पान्जाबनि गिबि मन्थ्रि भागवत मानआबो बे मेलाव दंमोन आरो दिनैनि जानो गोनां
मेलाव नुजाथिनो हागौ। बेनिखायनो दिनैनि जथुमनि उनाव जेंनाया सुस्रां जागोन ना जाया, बेयो
नोजोर होथावना जागोन।
बेबादिनो रायजो सोरखारनि बाजेट 2024-25
नि सायाव गुबुन गुबुन दोलोनि सुबुंफोरनि फिनजाथायखौ नुनो मोनदों।
सोरखारि न'फोराव मोब्लिब गोहो बाहायनानै सम बादि आरो समान बिबांनि बिल होयैनि सानफोरा जोबबाय। बे खेबाव गासैबो सोरखारि थाग्रा न'फोराव प्रि-पेड मिटार गायसननाय जागोन। गिबि मन्थ्रि हिमन्त बिस्व सर्माया गावनो मोब्लिब बिफानखौ मोनफ्रोमबो सोरखारि न'आव गावारि प्रिपेड मिटार फज'नो बिथोन होदों। गिबि मन्थ्रिआ मोब्लिब बिफानखौ मन्थ्रिनि मावख'आरि न'आव बो प्रि-पेड मिटार फज'नो बिथोन होदों।
मन्थ्रिफोर आरो सोरखारि मावख'गिरिफोरनि थाग्रा खुलिनिफ्राय मोब्लिब बिलनि मुङाव बेथननिफ्राय जोबोद एसेल' बिबांनि बिल बुथुमनाय जादों बेयो सोराङाव फैनायनि उनावनो गिबि मन्थ्रिनि बे बिथोन आ फैयो । गिबि मन्थ्रिआ मोब्लिब बिफानखौ थाबैनो मन्थ्रि कल'निनि न'जों लोगोसे गासैबो सोरखारि न'फोराव प्रि-पेड मिटार फज'नो बिथोन होदों।
ससियेल मेडियायाव पस्ट खालामनाय मोनसे
पस्टआव गिबि मन्थ्रिआ बुंदोंमोन दि बावैसो मोब्लिब बिफाननि मावख'गिरिफोरजों
सावरायनायाव बिथांमोना मिथिहोयो दि मन्थ्रिफोर आरो मावख'गिरिफोरनि
बेथननिफ्राय जोबोद मुङावल' मोब्लिब बिल बुथुमनाय जादों। बे
बाथ्राखौ सोराङाव लाबोनाय लोगो लोगो गिबि मन्थ्रिआ मोब्लिब बिफानखौ गासै सोरखारि न'फोराव
गावारि प्रिपेड मिटार फज'नो बिथोन होदों। मन्थ्रिफोरजों लोगोसे
सोरखारि मावख'गिरिफोरा अनसुंथाइ मोन्नाय मोब्लिब
मोन्नो हाया होनना बो बुङो बिथाङा।
बेखौ गोसोआव लाखिनो गोनां दि भारतआ
फिनटेक गोदान दिहुनथाय आरो डिजिटेलनि बेलायाव मोनसे गोलाव लामा आवगायबाय। गाहाय
मन्थ्रि म'दिआ गोबाव समनिफ्रायनो फिनटेक गोदान
दिहुनथायखौ गुबुन हादोरफोरजों फोनांजाबनायाव गोबां गोनांथि होबोदों।
श्रीलंका आरो मॉरीशसजों भारतनि
हारिमुआरि सोमोन्दोआ जोबोद गोरा। बे आगानआ डिजिटेल सेक्टरनि जौगाथाय लाबोगोन आरो
हादोरफोरनि गेजेरावबो डिजिटेल बिजोंखौ गोख्रों खालामगोन। श्रीलंका आरो मॉरीशसआव
दावबायनाय भारतारि नोगोरारिफोरजों लोगोसे भारतआव दावबायनाय मॉरीशसनि नोगोरारिफोराबो
बेनिफ्राय मुलाम्फा जागोन।
उदालगुरि नोगोरमानि बिष्णु राभा
पाब्लिक अडिट'रियामाव मैया बि जे पि आरो इउ पि पि एल
दोलोनि मोनसे जथाय मेल खुंनाय जायो। बे मेलाव मन्थ्रि अशक सिंघाल, बिटिसिनि
गाहाय प्रमद बर', एम. पि. दिलिप सइकियाजों लोगोसे गोबां
एम एल ए आरो मावफुं सोद्रोमाफोरा बाहागो लादोंमोन।
मेलाव मन्थ्रि अशक सिंघालआ बि.जे.पि. आरो इउ.पि.पि.एल. मददगिरिफोरखौ गावनि बिजाथिफोरखौ गोबां बिबांनि भटजों देरहानांगौ होनना बुंनानै गावनि मावथिफोरखौ गोख्रों जानो बोसोन होदोंमोन। मन्थ्रिआ बेखौबो बुंदोंमोन दि क'कराझार आरो दरं-उदालगुरि लकसभा बियाबफोराव बि.जे.पि. आरो इउ.पि.पि.एल. नि बिजाथिफोरा देरहागोन।
बेराफारसेथिं, एम.पि.
दिलिप सइकियाआ बे मेलाव बाहागो लानानै कंग्रेस दोलोखौ सोंखारिनानै बुंदों दि
कंग्रेस दोलोहा दा जेबो मेसिन गैया बेनिखायनो जेबो फावफान्दायनो हानाय नङा।
कंग्रेसाव कंग्रेसनि आरो जेबो खुरखानाय जायगायानो गैया, बेनिखायनो
एम.पि. आ बेनि खुरखानाया माबोरै जाबावनो होनना दोलोखौ सोंखारिदोंमोन। मैया नि जथाय
मेलाव उदालगुरि आरो तामुलपुर जिल्लानि मावथिफोरा बाहागो लादोंमोन।
सनिबारखालि हर गेजेरनि 1.00 रिंगासोआव
ककराझार सदर सोहोरनि भातिपारायाव गिख्रंथाव अर खामनाय जाथाय जायो। बे अरआव साहानि
गलाफोर, गेलामालनि गलाफोर, हार्डवेयरजों
लोगोसे मोनस्नि फालांगियारि फसंथानफोरा खामजोबो।
जायगानि फालांगिरिफोरा सन्देह खालामदों दि गिबियाव गंसे साहानि गलायाव अर नांदोंमोन। जाउनाव, अरआ साहानि गलाजों लोगोसे गुबुन फालांगियारि फसंथानफोरावबो गोसारदोंमोन। बे समावनो, गलानि सिङाव दोनथुमनाय गंसे संग्रा गेस सिलिन्डार बेरफ्रुदोंमोन जायनि जाहोनाव अर नांनाया बारा जादोंमोन।
जाथायनि उनाव, जायगानि सुबुंफोरा अर खोमोरग्रा हानजानो खौरां हरनायनि उनावनो अर खोमोरग्रा हानजाया जाथाय जायगायाव सौहैदोंमोन, नाथाय अरआ सिगांनिफ्रायनो गं स्नि गलाफोरखौ खामजोबदोंमोन। अरआ लाख लाख रांनि खहा खालामदोंमोन होनना खहा खालामदोंमोन। जायगानि सुबुंफोरा सन्देह खालामदों दि सर्ट सार्किटनि जाहोनाव अर नांदोंमोन।
रेलवे पुलिसा सनिबाराव बंगाइगाव जिल्लानि निउ बंगाइगाव रेलवे स्टेसनाव सिग्रोमनानै गोबां बिबांनि आयेन बेरेखा गान्जा जब्द' खालामो आरो साबा सिखाव फालांगिरिफोरखौ हमनो हायो। 12504 नामनिमुवा हमसफर एक्सप्रेसआव बे सिग्रोमनायखौ खालामनाय जादोंमोन।
मोनसे आनदोनि सुलुंनि बायदिब्ला, रेलवे पुलिस मावख'गिरि बिबानगिरि संजीव चौधरीनि दैदेन्नायाव अपारेसनाव फ्राय 29 किल'ग्राम गान्जा जब्द' खालामनाय जादोंमोन। बे आयेन बेरेखा गान्जाखौ आगरतलानिफ्राय बेंगालुरुसिम दैथायहरनाय जादोंमोन। बे समावनो, पुलिसा आन्दोनि फुंखाफोरनि गेजेरजों खौरां मोन्दोंमोन आरो सिग्रोमनाय खालामदोंमोन आरो साबा लांग्राफोरखौ खादोंमोन आरो गान्जाखौ जब्द खालामदोंमोन। हमजानाय सिखाव फालांगिरिफोरनि सिनायथिखौ मेघन पचवान, रमेन देबबर्मा, इति देबबर्मा, धर्मेन्द्र पासवान आरो महम्मद मुस्ताकिम होनना सिनायथि होदों। रेलवे पुलिसा सिगांनिफ्रायनो जाथायनि सायाव नायबिजिरनायखौ जागायखाबाय।
बेबादिनो मैया युथ अडिआइ वर्ल्द कापआवबो जादों। रबिबाराव 19 बोसोर सिंनि वर्ल्द कापनि फाइनाल आव अस्त्रेलिया आरो भारत आ मोगा-मोगि जादोंमोन। टुर्नामेन्टआव मोनसेबो जेनालासै थांनाय भारतआ जोबनायाव जोबथा मेचआव जेनबाय। एखे जादों सिनियर दोलो नि बायदि नो।
भारतनि इनिंसनि जागायजेन्नायाव, अर्शिन कुलकर्णीनि महराव गिबि विकेटआ स्करबर्डआव 3 रानआव गोग्लैदोंमोन। बेनि उनाव 40 रानआव नैथि विकेट गोग्लैनाया भारतनि जेन्नायनि लामाखौ रोखा खालामदोंमोन।
सासेबो मोजां बिबानगोनां बेटिं नुनो
मोनासै। क्रीजआव थानो आरो दावहा नांनायनि सम गैया बायदि सो जाबाय। मुरुगन पेरुमल
अभिषेकआ हेफाजाब गैयै बुगिरिफोरनि गेजेराव जोबनायथिं 42 राननि
बिहोमा होदोंमोन। नाथाय बेयो देरहानायनि थाखाय थोजासे नङा।
भारतनि हानजाया अस्ट्रेलियाजों होजानाय
254 राननि देरहानायनि थांखिखौ बारनो थाखाय नाजादोंमोन।
भारतनि क्रिकेट हानजाया नाथाय 79 रान आव जेनबायसो।
Please do not enter any spam link in the comment box. ConversionConversion EmoticonEmoticon