8 February 2024 bodo news ~ Bodoinfo.com

तामुलपुर जिल्लानि सिङाव थानाय भारत-भुटान सिमायाव थानाय खुकानजुलि फायारिं रेन्जआव मंगलबारखालि भारतारि रौनिया हानजानि त्रेइनिं सोलिबाय थानाय समावनो सासे साधारन सुबुंनि जिउ खहा जायो होनना खौरां मोनदों। गुलि, बमा बारुद नि थुख्राफोरखौ लाइनो थांनायावनो बे जाथाय आ जादों होनना खौरां मोनदों आरो दायो ओनसोलनाङैनो दुखुनि थासारि सोमजिदों। बे जाथायनि सोमोन्दै मिथिनो मोननाय बादिब्ला मैया फुंनिफ्रायनो फायारिं रेन्जआव पान्जाब रेजिमेन्ट आरो जीआर टेन माद्रास रेजिमेन्टनि हाथियार आरो बम बारुदनि फोरोंथाया सोलिगासिनो दंमोन। साननि समाव, दरंगामेला पुलिस थानानि सिङाव थानाय हरत'ला गामिनि रुंसारि सुरेम नार्जारीनि फिसाज्ला खेम्प' नार्जारी (32) आ फोरोंथाय लाबाय थानाय समावनो रेन्जआव हाबफैयो आरो बमा बारुदनि आद्रा थानाय बाहागोखौ बुथुमनायखौ जागायो।खेम्प' नार्जारीनि जायगायावनो थैदोंमोन जेब्ला बिथाङा रेन्जनि सिङाव मोनसे 81 मर्टार बमानि आद्रा थानाय बाहागोखौ मोन्दोंमोन आरो बमाखौ सिफायनो नाजादोंमोन आरो बेयावनो बमाया बेरफ्रुदोंमोन। बे खौरांखौ मोननानै दरंगामेला पुलिस थानानि पुलिसआ जाथाय जायगायाव सहैनानै गोथै सह'खौ बोखांनानै पुलिस थानासिम लाबोयो आरो पस्टमर्टेमनि राहा खालामो।

रायजोआव बिसि नि सायाव अत्यासार खालामनायनि आरोबाव मोनसे जाथाय। गावनि बिसिनि सायावनो एसिड जाथो नि मुवा जों गाग्लोबनाय। बे जाथाया बिलासिपुरनि बांगालीपारा गामियाव जादोंमोन। मिथिनो मोननाय जादों दि हाबा जानायनि साननैसो उननिफ्रायनो आजारुल शेखनि बिसिजों नांज्लायनाय जादोंमोन। जाथाया उनाव बिजिरसालिनि खाथि आव मोनहैदोंमोन। बिनि उनावबो बिसोरनि नांज्लायनायनि जेंना या सुस्रांजायाखैमोन, मंगलबारनि मोनायाव फिन नांज्लायनाय जादोंमोन आरो अजारुलआ गावनि बिसिनि मेगनखौ एसिदजों गाग्लोबदोंमोन। जायनि जाउनाव आजारुलनि बिसिया गोब्राब जोखोम जादोंमोन। जोखोम जानाय आइजोखौ गिबियाव बिलासपुर मडेल देहा फाहामसालियाव थिसननाय जादोंमोन नाथाय मोजां फाहामथायनि थाखाय ककराझार देहा फाहामसालियाव दैथाय हरनाय जादोंमोन। खौरां मोननाय बादिब्ला जाथायनि उनाव आजारुलआ खारखोमानानै दं। जाथायनि सायाव नायबिजिरनाया सोलिगासिनो दं।

जामुगुरिहाटआव मोनसे सोमोनांथाव जाथाय जादों जेराव धोरोमनि बोलि जानानै गामिनि न'खौ नागारनो गोनां जादों। जामुगुरिहाटनि नन्दिकेश्वर गामिनि मोनसे जाथाया दा गोदान समाजनि गाज्रि खामानि मावनायखौ बेरखांहोदों। मिथिनो मोननाय बायदिब्ला सिलाबन्धा ब्राह्मण समाजा टेट फोरोंगिरि पलाश शर्मा, बिथांनि बिसि पवालि बरठाकुरजों लोगोसे सासे उन्दै हिन्जावसा गथ'खौ गामि नागारनो बिथोन होदों। मिथिना मोननाय बादिब्ला बिमा नि फारसे नि गोजान नि सोमोन्दो नि सिख्ला खौ हाबा खालामनायनि जाहोननि थाखायनो नख'रा थांनाय बा बोसोरनिफ्राय न' गैजायै बायदि जानांदोंमोन आरो दायो सिलाबन्धा ब्राह्मण हारिखौ न'निफ्राय ओंखारलांनो बिथोन होनाय जादों। मोनसे थाखोनि सुबुंफोरनि नारसिननायाव टेट फोरोंगिरि पलाश शर्माया 80 बोसोर बैसोनि बेरामि बिमाखौ न'आव हारसिं गारना थांनायनि जोबोद गिदिर थांखि लादों। बेखौ मिथिनो मोननाय जायो दि जुलिखौ ब्राह्मण समाज आरो शास्त्रीनि गाहायआ गनायथि होदोंमोन, नाथाय उनाव फिन गुबुन मोनसे समाजनि गाहायआ बिथांमोनखौ समाजारि महरै गुबुन खालामदोंमोन मानोना बिसोरो बेखौ गनायना लानो हायाखैमोन। आरो दा बिसोर गावसोरनि आजै-आजौनि हाखौ नागारनो गोनां जानाया बे ओनसोलनि मेलेमजिबि सुबुंफोरनि गेजेराव फिनजाथाय सोमजिहोदों।

एसआइ जनमणि राभानि थैनायनि सिबिआइ नायबिजिरनाया जोबबाय। सि.बि.आइ.आ नागाव सत्र बिजिरगिरिनि बिजिरसालियाव चार्जशीट दाखिल खालामबाय। सि.बि.आइ.आ मोन 3 चार्जसिट दाखिल खालामदों।

बेखौ गोसोखांहोनो हायोदि नगांव पुलिसनि साब-इन्सपेक्टर जनमणि राभाया थांनाय बोसोरनि 15 मे नि मोनायाव मोनसे सोमोनांथाव जाब्रबथायाव थैदोंमोन। जनमणि राभानि थैनाया सोमोनांहोदोंमोन गोबांखौनो। एस.आइ. जनमणि राभानि गोथै सह'खौ मोननायनि उनाव नखरा दाबि खालामदोंमोन दि बेयो मोनसे साननानै बुथारनायमोन होनना। गुबुन गुबुन दोलो आरो आफादफोरजों लोगोसे आसामनि सुबुंफोराबो बेखौ बुथारनाय सानदोंमोन जायनि थाखाय आसाम सोरखारा बे जाथायनि सायाव सि.बि.आइ. नायबिजिरनो फोसावदोंमोन।

मखजाथावदि रुंसारि जनमणि राभानि बिमाया पुलिस थानायाव थिसनजानाय एफ.आइ.आर.आव पुलिस सामलायगिरि लीना दलेनि मुंखौ मुंख'दोंमोन। बिनि उनाव, नगांवनि बै समनि पुलिस सामलायगिरि लीना दलेआ गोबाव समसिम सिबिआइजों सोंनाय फिन्नायजों मोगा-मोगि जानांदोंमोन। जनमणि राभानि थैनायनि दान्थे-बिदान्थेयाव बिथांजोनि मुं फैनायनि उनाव पुलिस सामलायगिरि लीना दलेखौ नगावनिफ्राय हाइलाकान्दि पुलिस सामलायगिरिसिम सोलायनाय जादोंमोन।

सि.बि.आइ. हानजाया जनमणि राभानि थैनायजों सोमोन्दो थानाय गासै मोनद' केसफोरखौ नायबिजिरनानै नगांव जिल्ला आरो सत्र बिजिरगिरिनि बिजिरसालियाव चार्जसिट दाखिल खालामखाबाय। सि.बि.आइ. नि हानजाया थांनाय गोबां दाननिफ्रायनो नगावआव दंमोन। चार्जसिट दाखिल खालामखांनायनि उनाव सि.बि.आइ. नि हानजाया दिल्ली फारसे रावना होयो।

रायजोनि गुबुन-गुबुन ओनसोलफोराव अखा हागासिनो दं। बे अखानि जाहोनाव गुसुआ बांदों। फैगौ साननैसोनिफ्राय रायजोआव गोबां अखा हागोननि रादाब होदों बोथोर बिगियान आ। गुवाहाटीनि बरझारनि ओनसोलारि बोथोर बिगियान मिरुआ फैगौ सानथामनिफ्राय सानब्रैसिम रायजोआव गोबां अखा हागोननि इयुन रादाब होदों। रायजोनि मोन 10 जिल्लाफोराव येल' एलार्ट फोसावनाय जादोंमोन मैया।धेमाजि, चराइदेव, तिनसुकिया, दिमा हासाव, डिब्रुगढ़ आरो सनितपुराव गोबां अखा हानो हागौ। बेबायदिनो मरिगाव, हजाइ, नगावगांव, सोनाब कार्बि आं रबि लं, कामरुप, दरं, नलबाड़ी, उदालगुरी आरो धुबरीआव बो दिनैनिफ्राय सानाव येल्ल ALERT (एलार्ट) फोसावनाय जादों होनना खौरां मोनदों।

आसाम आयेन आफादनि रांबावजा जथुमनि थामथि सानाव बुधबाराव सदनाव मोनद' बिलफोरखौ थिसननाय जादोंमोन। सोलोंथाय मन्थ्रि ड° रनोज पेगुनि जानानै संसदारि हाबानि मन्थ्रि पिजुस हाजरिकाया सदनाव शहीद कनकलता बरुआ स्टेट इउनिभारसिटि बिल 2024 खौ गथायदोंमोन।

बिथाङा लोगोसे नो क'कराझार इउनिभार्सिति बिल, 2024", "आसाम स्तेत स्कुल इदुकेसन बर्द बिल-2024" "देउरि अतनमास काउन्सिल(एमेन्दमेन्त) बिल-2024", "सन'वाल कछारी अतनमास काउन्सिल(एमेन्दमेन्त) बिल -2024" "तिवा अतनमास काउन्सिल(एमेन्दमेन्त) बिल -2024" खौबो थिसनदोंमोन।

बिधानसभायाव ए.आइ.इउ.डि.एफ. नि एम.एल.ए. आमिनुल इस्लाम (जुनियर)आ "आसामाव 27 लाख सुबुंफोरा आसाम आयेन आफादनि खान्थि आरो हाबा मावनायनि नेम 54 नि सिङाव आधार कार्डनिफ्राय जानगाराव दं" आयदाखौ दैखांनानै नखर आरो राजखान्थियारि बिफाननि मन्थ्रिनि नोजोर बोनो हादोंमोन।

बिजेपि नि एमएलए सुमन हरिप्रिया, भबेश कलिता, रुपज्योति कुर्मी, रामकृष्ण घ'स, एजिपिनि एमएलए पृथ्वीराज राभा बायदि बायदिफोरा रायजो बेंगिरिनि बिबुंथिनि सायाव साबायखर बावनाय थांखिखौ हेफाजाब होनानै बिबुंथि लाखियो। बे समावनो, कंग्रेस एम.एल.ए. रकिबुल हुसेइन, जाकिर हुसेन सिकदार, सिपिआइ (एम)नि एमएलए मनरन्जन तालुकदार, एआइइउडिएफनि एमएलए आमिनुल इस्लाम बायदि बायदि सुबुंफोरा रायजो बेंगिरिनि बिबुंथिनि सायाव साबायखर बावनाय थांखिखौ हेंथा होनानै बिबुंथि लाखियो।

आबहावा आरो हाग्रा मन्थ्रि चन्द्र महन पाट'वारीआ आसाम आयेन आफादाव भारतनि संबिजिरनि 252 (1) दफानि सिङाव दै (गुबुंले जानायखौ होबथानाय आरो सामलायनाय) आयेन, 1974 नि मोनसे आयेनखौ सोदांनो थाखाय संसदखौ गनायथि होनाय मोनसे थांखि दैखांदोंमोन होनना बो खौरां मोनदों।

उत्तराखन्ड आयेन आफादाव UNIFORM CIVIL CODE एबा रोखोमसे नोगोरारि आयेन नि बिल आ पास जाबाय। बेनि उनाव उत्तराखन्डआ रायजो आ बेखौ बाहायग्रा हादोरनि गिबिसिन रायजो जानो हाबाय। उत्तराखन्ड आयेन आफादा बुधबाराव समान नोगोरारि आयेन (UCC) बिलनि सायाव सावरायफिनदोंमोन आरो गिबि मन्थ्रि पुष्कर सिंह धामीआ बोसोन होदोंमोन दि गुबुन हादोरसाफोरा बे आयेनखौनो मानिनांगौ। लोगोसे नो "बेयो मोनसे सरासनस्रा बिल नङा, भारतआ मोनसे गिदिर हादोर नाथाय जोंनि रायजोआ जारिमिन सोरजिनो आरो गासै हादोरनो दिथा दिन्थिनो खाबु मोन्दों। संबिजिर दागिरिफोरा जाय सिमां नुदोंमोन, बेयो मोगथाङाव जाफुंनो थांगासिनो दं आरो मोगथाङाव महर मोनखागोन। हादोरनि गुबुन हादोरसाफोराबो बे दिगाव थांनांगौ। जों जारिमिन सोरजिनो थांगासिनो दं होनना बुङो।

गुबुनफारसे बेरेखा कंग्रेसनि सोद्रोमाफोरा फिन खेबसेबाव बे आयेनखौ सदननि सायख' आफादनो दैथायहरफिननो थांखि दैखांदों, बेरेखा दोलोनि एम.एल.ए.फोरा बुंदों दि बिसोरो बिलनि हेंथा नङा, थेवब्लाबो बेनि राहाफोरखौ गुवारै नायबिजिरनायनि गोनांथि दं जाहाथे बेखौ बारहोनायनि सिगां बेनि गोरोन्थिफोरखौ बोखारनो हायो।

बे खेबाव सनितपुर जिल्लानि चाटियायाव थानाय नादुवानि रिभेनिउ सार्कल मावख'आ भिजिलेन्स नि नोजोराव गोग्लैदों। एन्टि करापसन ब्रान्सआ मावख'आव सिग्रोमनानै मावख'नि लाट मन्डल आरफद आलम बराखौ हमदों। खाथि आव नो थानाय गंसे हतेल आव रां लानाय समावनो हमो बिखौ। हमनायनि उनाव दायो सोंगासिनो दं।

अजद होनाय बादिब्ला खाजोना बेंखन मावख'आव हा नि बिगोमानि मुंखौ सिताबहि आव थिसननो थाखाय गांसे आरजलाइ होनाय जादोंमोन। गोबाव समसिम आरजलाइखौ गोसो होनाय जायाखैमोन। उनाव जेब्ला आरजलाइ होग्राया फिन मावख'आव सहैयो, लाट मन्दल आरफाद आलम बराया 5,000 रां घुस बिदोंमोन।

आरफद आलम बराखौ एन्टि करापशन दालाइ हानजाया बुधबाराव लाट मन्डलनो दाबि खालामनाय रांनि नै रोजा रां होनानै खायो होनना खौरां मोनदों।

नोंथाङा मिथियो ना, आसामाव गासै 3003 जौनि गलाफोर दं। आबकारी मंत्री परिमल सुक्लबैद्य आ जौ नि दखान आरो लाइसेन्स नि सोमोन्दै सासे एमएलए आ सोंनायनि फिननाय आव बे बाथ्रा खौ बुंदों। मंत्री परिमल सुक्लबैद्य नि बादिब्ला गासै 3003 जौनि गलाफोर दं। बेनिनो कामरुप नोगोराव आसामाव बयनिख्रुइ बांसिन गुबुन हादोरारि जौनि गलाफोर (आइ.एम.एफ.एल. अफ) आरो बार (आइ.एम.एफ.एल.'अन) दं। डिब्रुगढ़ आरो तिनसुकिया जिल्लाफोरा फारियै नैथि आरो थामथि जायगायाव दं। कामरुप नोगोरमायाव गासै 320 गुबुन हादोरारि जौनि गलाफोर (आइ.एम.एफ.एल. अफ) आरो 204 बार (आइ.एम.एफ.एल.'अन) दं।

डिब्रुगढ़आव गासै 111 गुबुन हादोरारि जौनि गलाफोर (आइ.एम.एफ.एल. अफ) आरो 54 बार (आइ.एम.एफ.एल.'अन) दं। तिनसुकिया जिल्लायाव गासै 103 गुबुन हादोरारि जौनि गलाफोर (आइ.एम.एफ.एल. अफ) आरो 32 खेब (आइ.एम.एफ.एल.'अन) दं।

मखजाथावदि, आसाम सोरखारा 2019-20 मायथाइयाव आबकारी खाजोनायाव 2606.64 कौटि रां बुथुमदोंमोन। बेबायदिनो 2020-2021 मायथाइयाव गासै 2977.61 कौटि रां, 2021-22 मायथाइयाव गासै 3047.98 कौटि, 2022-23 मायथाइयाव गासै 3980.06 कौटि रां आरो 2023-24 मायथाइसिम (जानुवारिसिम) गासै 3816.18 कौटि रां खाजोना बुथुमदोंमोन।

मोनसे गोनांथार राय, फिसायखौ गावनि बिसिखौ बुथारनायनि थाखाय दायनिगिरि खालामनाय जादों बिजिरसालिया आरो दायो बे सुबुं खौ जिउ जोबजासिम जोबथेसालिनि साजा होदों। बिमा बुथारनाय दायनिगिरि बिफा नि साजायाव खुसि फिसाज्लाया, लोगोसे नखरनिफोरा बो। बे जाथाया 2020 मायथाइनि। बिसि अनिमा चक्रवर्तीखौ 4 मे, 2020 खालि राजथावनि आगरतलानि आदि नगर पुलिस थाना ओनसोलनि मोनसे न'आव बुथारनाय जाथाय जादोंमोन।

जाथायनि समाव अनिमा चक्रवर्ती आरो बिथांनि फिसाय गौतम चक्रवर्तीआ न'आव दंमोन। बिथांमोननि फिसाज्ला नयन चक्रवर्तीआ बै सानखालि न'निफ्राय ओंखारलांदोंमोन। अखानायै थामहिनबा 9 मेखालि नयनआ न'आव फैफिनदोंमोन आरो गावनि बिमानि गोथै सह'खौ गोग्लैना थानाय नुदोंमोन। फिसाज्लाया गोख्रैनो जाथायनि बागै ए.डी. नगर पुलिस थानायाव खौरां हरदोंमोन।

पुलिसआ जाथाय जायगायाव सहैयो आरो गोथै सह'खौ बोखांनो हायो आरो पस्टमर्टेमनि थाखाय दैथाय हरो। पुलिसा बुथारनाय जाथायनि सायाव नायबिजिरनायखौ जागायदोंमोन। नायबिजिरग्रा पुलिस मावख'गिरिया गासैबो फोरमानफोरजों लोगोसे मोनदोंमोन दि अनिमानि फिसाय गौतम चक्रवर्तीआ गासैबो जाथायाव लोब्बा दंमोन। नायबिजिरनायनि जोबनायाव बिजिरसालियाव बिसारनि बिखान्थिया जागायजेन्दोंमोन।

बिजिरगिरिया बुधबारखालि जिउ जोबजासिम जोबथेसालिनि साजा फोसावदों। लोगोसे 10,000 रांनि राङारि जुरिमानाबो फोसावनाय जादोंमोन। बिजिरगिरिया बिथांखौ 10,000 रां होनो हायाब्ला आरोबाव द' दाननि जोबथेसालिनि साजा फोसावदों। बे बिबुंथिखौ सोरखारनि जानानै उकिल अरबिन्द देवआ खालामदोंमोन।

पाकिस्तानाव संसदारि बिसायख'थिनि सिगां बमा बेरफ्रुनायनि मोननै जाथाया सोराङाव फैदों। बुधबाराव मावख'आरिफोरा बुंदोंमोन दि खोला-सोनाब पाकिस्तानाव मोनसे राजखान्थियारि दोलोनि बिसायख'थि मावख' आरो सासे उदां बिजाथिनि बिसायख'थि मावख'आव बमा बेरफ्रुनायाव खमैबो 24 सुबुंफोर थैदों आरो सा 24 सो सुबुंफोरा जोखोम जादोंमोन।

रायजोआरि सोरखारनि बुंथिगिरि जान असाक्जाया बुंदोंमोन दि गिबिसिन बमा बेरनाय जाब्रबथाया बलूचिस्तान हादोरसानि पाशिन जिल्लायाव जादोंमोन। बे बेरफ्रुनाय जाथायाव खमैबो सा 14 सुबुंफोरा जिउ गोमायो। जोखोम जानायफोरखौ थाबैनो खाथिनि देहा फाहामसालियाव थिसननाय जादोंमोन। पुलिसनि बायदिब्ला, माखासे जोखोम जानायफोरा दासिमबो गोब्राब थासारियाव फाहामथाय लागासिनो दं।

आरोबाव मोनसे जाथाया बुधबाराव बलूचिस्ताननि किल्ला सैफुल्ला सोहोराव राजखान्थिगिरि फजलुर रहमाननि जामियत उलेमा इस्लाम पार्टीनि बिसायख'थि मावख'आव जादोंमोन। बमा बेरफ्रुनायाव खमैबो सा 10 सुबुंफोर थैदोंमोन, पाकिस्ताननि संसदारि बिसायख'थि जानायनि सानसे सिगां जानाय ब'मा बेरफ्रुनायनि दायखौ दासिम रावबो लायाखै। जोथोन लाग्रा नखर मन्थ्रि ग'हर एजाजआ बमा बेरनायखौ गोख्रों रावजों सोंखारिदों।

मख'जाथावदि हादोराव बावैसो सिगां उदखारि गाग्लोबनायनि उनाव गोजोन थासारि लाबोनो थाखाय गासै पाकिस्तानाव रोजा-रोजा पुलिस आरो पेरामिलिटारी फर्सफोरखौ थिसननाय जादोंमोन, गुबैयै बलूचिस्तानआव। बबेखानि, बे बेरफ्रुनाया सुबुंफोरखौ गिखांहोदों। आफगानिस्तान आरो ईराननि सिमाजों नांजाबनाय बलूचिस्तानआव रैखाथि हानजानि सायाव गाग्लोबनायाव रैखाथि हानजानि आखाइ दं होनना सन्देह खालामनाय जादों।