17 February 2024 bodo news

मैया मेत्रिक आनजाद नि गिबि सान मोन, बे गिबि सान नि आनजाद आव नो सोंनाय बिलाइ आ लिंक जानायनि गिदिर अजद, आनजाद नि 30 मिनित नि गेजेरावनो लिक जानायनि अजद होदोंमोन, नाथाय बे जाथाय आ जानायनि उनाव नायबिजिरनानै बेनि सायाव मैया जिल्ला जौगाखां कमिसनार आरो पुलिस सामलायगिरिया काछाराव गोजौ फरायसालिनि आनजादनि सोंथि बिलाइ लीक जानाय जाथायनि सायाव फिनजाथाय होदोंमोन, राजिब रायआ खौरां बिजोंनो बुंदोंमोन दि गोजौ फरायसालिनि आनजादनि सोंथि बिलाइआ काछारनिफ्राय लीक जायाखैमोन। बे जाथायजों सोमोन्दो थानाय सासे सुबुंखौ खानाय जाखाबाय।

मख'जाथावदि अजद होनाय बायदिब्ला काछारनि बशकण्डी नेना मिया आनजाद मिरुनिफ्राय सोंथि बिलाया लीक जादोंमोन। बे जाथाया मोनसे सोमोनांथाव थासारि सोमजिहोदोंमोन।

बेनि उनाव, काछार जिल्ला एसपि न'मल मेहताया काछार जिल्ला जौगाखां कमिसनार राजिब राय आरो फरायसालि नायदिंगिरि बरनिका चेतिया जों लोगोसे नेना मिया आनजाद मिरुआव सौहैदोंमोन। हान्जाया आन्जाद होगिरिफोरखौ लाफानानै से घन्टासो मोजाङै नायबिजिरदोंमोन। गिबि नायबिजिरनायनि जोबनायाव जिल्ला जौगाखां कमिसनार राजिब रायआ खौरां बिजोंनो मिथिहोयो दि मिरुनिफ्राय सोंथि बिलाइ लीक जायाखैमोन। थेवब्लाबो बशकान्दि नेना मिया फरायसालिनि सामलाय आफादनि सासे सुबुंखौ नायबिजिरनायनि थाखाय हमनानै दोननाय जादों होनना एस.पि.आ बुंदों।

गुबुनफारसे मैया आरो मोनसे सोमोनांथाव जाथाय जानायनि खौरां मोनदों, सोनाब कार्बि आंलं जिल्लानि हबाइपुर गोजौसिन गेजेरारि फरायसालिनि आनजाद मिरुआव आनजादखौ से घन्टा गोबावै खालामनाय जादोंमोन। मैया इंराजि आनजादमोन। नाथाय इंराजि सोंथि बिलाइनि उल्थायै अस'मिया सोंथि बिलाया आनजाद मिरुआव फैदोंमोन। जायनि जाहोनाव मिरुआव से घन्टा गोबावजों आनजाद खुंनांगौ जायो।

मिरुआव जेराव सा 370 फरायसाफोरा आनजादाव जिरायदोंमोन, सोंथि बिलायफोरखौ गोरोन्थि खालामनायखौ लानानै दावराव-दावसि जादोंमोन। आनजादखौ उनाव थार सोंथि बिलाइजों खुंनाय जादोंमोन नाथाय 1 घन्टा गोबाव खालामनाय जादोंमोन। जायनि जाहोनाव मैयानि आनजादआ मुंख'नाय मिरुआव बेलासिनि 1 रिंगासिम सोलिदोंमोन होनना खौरां मोनदों।

 

                       रायजो सोरखार नि सिंनि गंथाम सोरखारि मावख'फोरा थाबैनो बन्द जानो हागौ। गिबि मन्थ्रि ड: हिमन्त बिश्व शर्माआ कलाक्षेत्रआव मिशन बशुनधारा थामथि बेखेवनायनि उनावनो बे इसारा खौ होनाय बायदि जादों। कलाक्षेत्रआव बिबुंथि होनानै गिबि मन्थ्रिया बुंदोंमोन दि "सोरखाराव एसेबां मावफारियाफोरनि जेबो गोनांथि गैया। दा रायजोआव मोनथाम मावख'फोरखौ बन्द खालामनो हागोन। एमप्लयमेन्ट एक्सचेन्ज थामहिनबा साख्रि नि रेजिसत्रेसन मिरु, आइ.डब्लिउ.टि. बिथोनगिरिया बन्द जानो हागौ। जिल्ला हान्था-मेला मावख'गिरिनि मावख' एबा DTO खौबो फैगौ बोसोरनिफ्राय बन्द खालामनो हागोन। ''

"मानोना बे मावख'फोरनि खामानिया आथिखालाव डिजिटेल जाबाय। दायो ड्राइभिं फसंथाना लाइसेन्स खौ होगोन। बेनिखायनो DTO आ जेबो खामानि थानाय नङा। बेनिखायनो मावख'फोरा बन्द जागोन। बेराफारसेथिं, गिबि मन्थ्रिया बेखौबो बुंदोंमोन दि जोंनो फोरोंगिरि आरो मन्डलफोर नांगौ होनना। ''

 

                      सासे बर फरायसुलि या फासि लाना गावखौ फोथैना लानाय जाथाया ककराझार सोहोराव सोमोनांथाव थासारि सोमजिहोदों। रुंसारि जानाय फरायसाखौ क'क्राझार सोरखारि फरायसालिमानि हाय़ार सेकन्दारि नि बिगियान आयदानि सेथि बोसोरनि फरायसा दिपिका ब्रह्म (17) होन्ना सिनायनाय जादों।

खौरां मोन्नाय बायदिब्ला, ककराझार सोरखारि फरायसालिमायाव गोजौसिन गेजेरारि सेथि बोसोराव बिगियान आयदानि मेलेमगोनां फरायसा दिपिका ब्रह्मआ नोगोरमानि बागानसालियाव पेयिं गेस्ट महरै थानानै फरायदोंमोन।

खौरां मोननाय बादिब्ला बिमा पुर्निमा ब्रह्मआ गावनि फिसाजोजों लोगोसे थादोंमोन। दीपिका ब्रह्म आ बृहस्पतिबारनि मोनायाव गावनि बिमानि गोथौ उनदुनायनि खाबु लानानै दरजा खेवनानै बाहेराव ओंखारलांदोंमोन।

हराव सिखारनायनि उनाव, बिमाया गावनि फिसाजोखौ बिसनायाव नुवाखैमोन  आरो गोबां नायगिरदोंमोन,  नाथाय जेब्ला बियो नागिरना मोनाखैमोन अब्ला ककराझार सदर पुलिस थानायाव खौरां हरो। बे समावनो फुङाव पेयिं गेस्त नि बिगोमा या दीपिकानि खथानि दरजाखौ खेवना थानाय़ नुयो, नाथाय दीपिका आरो बिनि बिमाखौ नुयियाव बायजोआव ओंखारलाङो।

सासे हिनजावसा या न'निफ्राय साहाथिं माखासे बिफांफोरजों बुंफबनाय मोनसे गोजान जायगायाव फासि लानानै गावखौ फोथैना लादों होनना मिथिनानै, दीपिकानि बिमाखौ फन खालामदोंमोन आरो बहा दं होनना सोंदोंमोन। जेब्ला बिनि बिमाया पुलिस थानायाव थानायनि बागै बुंदोंमोन, अब्ला न आव जाथाय जानायनि सोमोन्दै बुंनाय आव बिमा या जाथायसालि आव थाङो आरो गावनि फिसाजोनि फासि नांनाय गोथै सह'खौ नुदोंमोन।

बे जाथाया ओनसोलाव गोख्रों फिनजाथाय सोमजिहोदों, दुखुनि साया साग्लोबहोदों। मा जाहोननि थाखाय बे जाथाय आ जाखो बेखौ दासिम मिथिनाय जायाखै, गोथै देहा खौ पस्त मर्तेम नि थाखाय लांनाय़ जाबाय, बेनि रिपर्त नि उनावसो जाथायनि सोमोन्दै मिथिनायनि सम्भावना दं, नाथाय मोनसे असमिया खौरां बिजों नि बादिब्ला फरायसुलि नि मोजां सोमोन्दो नि सासे सुबुं आ 10-12सान सो सिगां मथर साइखेल नि जाब्रबथाइ आव जिउ गोमादोंमोन होनना मिथिना मोनदों।

 

                        बितिआर सोरखार आ बर नि सोरांमन्जु थियेतार नो 15 लाख रां होगोन, मैया बितिआर नि गाहाय प्रमद बर बिथाङा खौरांगिरिफोरनि सिगाङाव बे बाथ्रा खौ फोसावना होदों, बिथाङा सोरांमन्जु थियेतार नि 50 बोसोर आबुं जानायनि मोनसे हाबाफारि आव बाहागो लानायनि उनावनो खौरांगिरिफोरनि सिगाङाव बेखौ मिथिहोयो. मखजाथावदि आगोलावबो सोरां मन्जु थियेतार नो सोरखार आ 10 लाख रां होदोंमोन, दायो आरो 15 लाख रां होबावगोन आरो इयुनावबो बे थियेतार आ थाबाय थागोनखौ आसा खालामो होनना बुंदों, 50 बोसोर आंबुं जानाय आव दुलाराय बर माहारियानो गोग्गानाय मोनदों, बिथाङा थियेतार नि बिगोमा चन्द्रकान्त मोसाहारि एबा सेखा बिथांनिसिम साबायखर बावदों बर हारि थाखाय खामानि मावनायनि थाखाय।

 

 

                मिशन बसुन्धरा 2.0 जोबनायनि उनाव गिबि मन्थ्रि हिमन्त बिश्व सर्माया सुक्रबारखालि मिशन बसुन्धर 3.0 खौ बेखेवदों।

श्रीमन्त शंकरदेब कलाक्षेत्रनि अडिट'रियामाव खुंनाय हाबाफारियाव गिबि मन्थ्रिया मिशन बशुन्धर 3.0 खौ बेखेवदों। बे हाबाफारियाव गिबि मन्थ्रि ड: हिमन्त बिश्व सर्माया बुंदोंमोन दि मिसन बासुन्धरा 3.0 आ आसामनि साहा बागानफोराव थानाय आदिबासि आरो गर्खा हारिनि सुबुंफोरनो गोरलैयैनो हानि पाट्टा होगोन। बिथाङा बेखौबो बुंदोंमोन दि मिशन बशुन्धरा 3.0 नि गेजेरजों आसामनि साहा बागानाव आदिबासिफोर आरो गरखा सुबुंफोरनो हा पाट्टा होनायनि नेमखौ रेहाय होनाय जागोन।

मिसन बसुन्धर 3.0 नि गेजेरजों हा पाट्टा होनाय नेमफोरखौ आसामाव थानाय खिलनजिया हारिनि सिडिउल कास्ट आरो सिडिउल ट्राइबनो रेहाय होनाय जागोन होननाबो ड. हिमन्त बिस्व सर्माया बुंदों। बिथाङा बुंदोंमोन दि जाय सुबुंफोरा मिशन बशुन्धरा 2.0 हा बिमुंनि थाखाय आरज गाबदोंमोन बिसोरो आसामाव थाम जोलैफोर थानायनि फोरमान बिलाय होनांगोन। जायनि थाखाय 13 लाख सुबुंफोरा आरजलाइ होनायनि उनाव 2 लाख सुबुंफोराल' हा पाट्टा मोनदोंमोन। बेयो फोरमान खालामो दि बिखान्थिया जोबोद गोरलै आरो रोखामोन।

ड. हिमन्त बिस्व सर्माया बुंदोंमोन दि सोरखारा 2 अक्ट'बर, 2021 मायथाइयाव मिशन बसुन्धरा 1.0 खौ जागायदोंमोन। फोसावनायनि गिबि खोन्दोआव, 8,13,981 सुबुंफोरा गावसोरनि हाजों सोमोन्दो थानाय जेंनाफोरखौ सुस्रांनो थाखाय आरज गाबदोंमोन। बिफाना गासैबो आर'जलाइफोरखौ थि समनि गेजेराव फोजोबनानै सा 5,82,688 आर'ज गाबगिरिफोरखौ मुलाम्फा होदोंमोन।

बिथाङा दाजाबदेरदोंमोन दि 24 नबेम्बर, 2022 मायथाइयाव सोरखारा मिशन बसुन्धर 2.0 जागायदोंमोन। बे बिखान्थिखौ मावनो हानाय (बोसोरारि लिज) आरो सोरखारि हायाव थाग्राफोरनि थाखायबो आरज गाबनो गनायथि होनाय जादोंमोन।

 

                     तामुलपुर नि कचुकातायाव वाइल्दलाइफ क्राइम कन्ट्र'ल बिउर', एसएसबि आरो तामुलपुर रेन्जनि सिग्रोमनाय। मोनसे आन्दोनि फुंखानि बायदिब्ला, हाग्रा बिफाना मैहुर खालामग्राफोरनि बेरेखायै मोनसे हाबाफारि लादोंमोन आरो सानजा-कचुकाता-नावकाटा लामानि ढेकिप'टायाव सासे सुबुंखौ हमदों।

हमजानाय सुबुङा सानजा-कचुकातानि रिंकु काकति (33)। बिनिफ्राय मैदेर हाथाय बो मोनदों, मैदेर हाथायनि लिरथाया 3 किल'ग्राम 731 ग्राम। हाग्रा बिफाननि मावथिफोरा सानजा कचुकाटानिफ्राय मैदेरनि हाथायजों लोगोसे सिखाव फालांगिरिखौ खायो आरो तामुलपुर हाग्रा बिफाननि मावख'आव लाबोयो। हाग्रा बिफाना हाग्रानि जिब-जुनार रैखाथि आयेननि सिङाव हाग्रा बिफान आ दायो हमनानै नांगौबादि राहा लादों।

एसएसबिनि 24 थि बेटेलियननि मावख'गिरिफोर, तामुलपुर हाग्रा मावख'गिरि मिनिस्लु बसुमतारी, नाग्रिजुलि हाग्रा मावख'गिरि समरज्योति बर', तामुलपुर हाग्रा खोन्दोनि लक्ष्मी डेका, कुमारिकाता हाग्रा मावख'गिरि बिरेन बर' आरो गुबुन गुबुन हाग्रा मावख'गिरिफोरा अपारेसनाव दंमोन।

 

                   ट्राइबेल बेल्ट आरो ब्लकनि सिङाव गोदान गामिफोरखौ सोफादेरफिन्नो थाखाय ट्राइबेल संघनि दाबिनि हेंथायै अबर' सुरक्षा समिति आसामआ रागा जोंनाय दिन्थिदों। अबर' सुरक्षा समितिआ सुक्रबारखालि बाक्सा जिल्लानि बरमायाव बे बिथिङाव मोनसे खौरां मेल खुंदों।

खौरां मेलाव आफादनि नेहाथारि माधव राजबंशीआ ट्राइबेल आफादनि नेहाथारि आदित्य खाख्लारिआ जिल्ला कमिटिफोरनो हरनाय गांसे फोसाव बिलाइनि सायाव गोख्रों फिनजाथाय होदोंमोन।

खौरां मेलाव अबर' सुरक्षा समिति आसामआ हुमखि होयो दि ट्राइबेल बेल्ट आरो ब्लक दानाय समाव थालांनाय ट्राइबेल सुबुं अनजिमा थानाय ओनसोलफोरखौ जायखिजाया जाहोननि थाखाय ट्राइबेल बेल्ट एन्ड ब्लकनि सिङाव फिन सोफादेरनो होनाय जानाय नङा। आफादनि मिरु दैदेनगिरिआ खौरांमेलआव बुंदोंमोन दि 2003 माइथायाव बर' बिग्रायारि आफादफोरजों सावरायनानै आसाम सरकार आरो मिरु सोरखारा बिटिसि गोरोबथानि उननिफ्राय गोबां अबर फोरा गोबां आव जानगाराव थानांदों।

फिन खेबसेबाव सोरखारनि थिननायाव ट्राइबेल इउनियनआ जिल्ला कमितिफोरखौ ट्राइबेल सुबुं अनजिमा थानाय ओनसोलफोरखौ नायगिदिंनो आरो मोनसे फारिलाइ बानायनो बिथोन होदों। बेजों लोगोसे ट्राइबेल बेल्ट आरो ब्लकनि बायजोआव थानाय ट्राइबेल सुबुं अनजिमा थानाय गामिफोरखौ सोफादेरनायनि आन्दोनि थांखिया बीटीएडी ओनसोलाव गाज्रि थासारि  सोमजिगोन होनना अबर' सुरक्षा समितिनि नेहाथारि माधव राजबंशी आरो बुंथिगिरि पंकज दासआ बुंदों।

बेराफारसेथिं, बिथाङा बुङो दि हानि जेंनाजों लोगोसे बिटिएडिनि सुबुंफोरा भुगिनांनाय गुबुन गुबुन जेंनाफोरनि थाखाय मिरुआव गारां दैखांनो थाखाय नब कुमार शरनियाखौ खेबनै दैखांनाय जादोंमोन। नाथाय बिथाङा बुङो दि अबर' सुरक्षा समितिआ एम.पि. नब कुमार शरनियाखौ बे बार आव मदद खालामनाय नङा, जाय अबर' सुबुंफोरनि जेंनाफोरनि फारसे जेबो साना।

बे जाहोननि थाखायनो अबर' सुरक्षा समिटिआ फैगौ ल'क सभा बिसायख'थियाव क'कराझार ल'क सभा बियाबाव गुबुन सासे बिजाथि लाबोगोन, आफादनि नेहाथारि माधब राजबंशी आरो बुंथिगिरि पंकज दासआ मैया मोनसे खौरां मेलाव रोखा बुंथियो।

 

                       मैयानिफ्राय तेजपुराव मोब्लिबारि बास सिबिथाय जागायजेनो, आसाम हान्था-मेला निगमा तेजपुर निफ्राय गंथाम मोब्लिबारि बासफोर खारगोन, सुक्रबारखालि तेजपुराव आसामनि हान्था-मेला बिफाननि मन्थ्रि परिमल शुक्लबैद्या थामथि इ.भि. सिबिथाय मिरुखौ बेखेवदों।

रायखांनो गोनां दि गुवाहाटीनि उनाव बिश्वनाथ आरो तेजपुराव बेफोरबादि EV बिजिरसं मिरुफोर गायसननाय जादोंमोन। बेराफारसेथिं हान्था-मेला बिफाना टाटा पावारजों बुजिलायनाय गोरोबथायाव हाबनानै रायजोनि गं 200 रिचार्ज सेन्टार जागायगोन। बिथाङा बेखौबो बुंदोंमोन दि रायजोआव आथिखालाव 45 लाख गारिफोरा रेजिस्तार खालामजादों। बेफोर गारिफोरा आबहावाखौ गुबुंले खालामगासिनो दं।

बेनिखायनो इलेक्ट्रनिक मटर-गारिफोर लाबोनाया आबहावाखौ रैखाथि होनायजों लोगोसे खरसाखौबो बाङाय खालामगोन।

मखजाथावदि हान्था-मेला मन्थ्रिआ सुक्रुबारखालि तेजपुरनि जयमती फोथारनि खाथियाव इ.भि. रिचार्ज पइन्टनिफ्राय ए.एस.टि.सि. बास स्टेन्डसिम गंसे इलेक्ट्रनिक बासजों दावबायदोंमोन आरो बास स्टेन्डाव नायदिंगिरिनि मावख' बिलडिंखौबो बेखेवदोंमोन।

 

                    मणिपुराव फिन हिंसानि आरोबाव मोनसे जाथाय जादों। गोबांजौ सोमावसारगिरिफोरा बृहस्पतिबाराव चुराचान्दपुराव पुलिस सामलायगिरिनि मावख'खौ गाग्लोबदोंमोन। बे दाङाबाजियाव साथाम सुबुंफोर थैदों आरो गोबां सुबुंफोरा जोखोम जादोंमोन।

बे हिंसायाव खमैबो 30 सुबुंफोरा जोखोम जानायनि खौरां मोननाय जादों। बे जाथाया चुराचान्दपुर जिल्लायाव जादोंमोन, जेराव रायजोनि कुकी हारिसानि गोहोम दं। मणिपुराव बेयो फिन खेबसेबाव रैखाथि हानजाफोरजों दाङाबाजिनि जाथाय।

पुलिसनि सुलुंनि बायदिब्ला, मोनसे हानजाया चुराचान्दपुराव पुलिस सामलायगिरिनि मावख'आव गाग्लोबदोंमोन। बावैसो सिगांनि मोनसे वीडिय'आव सिलाय गावग्राफोरजों नुजानायनि उनाव जिल्ला पुलिसनि गाहाय कनस्टेबलखौ होखारनायनि उनाव जाथाया जागायजेन्दोंमोन। बेनि बेरेखा नो बे मुगैथाव गाग्लोबनाया जादोंमोन।

मणिपुर पुलिसा बुंदों दि थासारिखौ मोजाङै नोजोर होनाय जादों। ससियेल मिडिया एक्सआव मोनसे पस्टआव मणिपुर पुलिसआ लिरदों, "दिनै 300-400 सो सुबुंफोरनि मोनसे हानजाया पुलिस सामलायगिरिनि मावख'आव दावराव-दावसि खालामो आरो पुलिसनि सायाव अन्थाय खुबैयो। रेपिड एक्शन फर्स (आरएएफ) आरो गुबुन रैखाथि गोहोआ मोदै गग्रा गेसनि गुलि गावनानै थासारिखौ सामलायनो नाजादोंमोन।

चुराचान्दपुरनि पुलिस सामलायगिरि शिवानन्द सुर्वेआ फैगौ बिथोनसिम हेड कन्सटेबल सियामलापालखौ बोखारदोंमोन। मखजाथावदि मणिपुराव थांनाय बोसोरनि 3 मेआव हिंसाया जागायजेन्दोंमोन।

रिपर्त नि बादिब्ला, कुकी आरो मेइतेइ हारिफोरनि गेजेराव जानाय दाङाबाजियाव दासिम सा 180 सुबुंफोरा बुथारजाबाय।

 

                     बर' बिजोंनि थाखो ड'नि सानखान्थि आरो बिगियान आयदाखौ फिनै बर' रावनि सोंथि बिलाइजोंनो गुनउत्सब-2024खौ खुंफिननांगौनि सायाव दिनै आसामनि समग्र शिक्सानि मिसन डाइरेक्टर ड० अम प्रकास, आइ.ए.एसनि हांख्रायनाय लेखायै एबसु आरो बर' थुनलाइ आफादा गुवाहाती कालिपारायाव थानाय आसाम समग्र शिक्सानि कनफारेन्च हलआव सावरायलायदों ।

आसामनि सोलोंथाइ मन्त्रि डा० रनुज पेगुआ मासि लानानै दैदेननायाव सावरायनाया

1. गुनउत्सब- 2024 याव थाखो ड'नि सानखान्थि आरो बिगियान आइदाया इंराजि रावजों सोंथि बिलाइ फैनायाव एबसु आरो बर' थुनलाइ आफादा जयैनो आनजादखौ होबथानायखौ बिथा खालामनानैनो सायाव मोजाङै सावरायनाय जायो आरो सावरायनायनि उनाव गुनउत्सबखौ बिथा खालामनानैनो बर' बिजोंनि थाखो ड'नि थाखाय स्पिसेल इउनिट टेस्ट खुफुंनो थांखि लानायजों लोगोसे

2. गोदान सोलोंथाइ खान्थि-2020 बादियै इंराजि आरो बर' रावनि बिजाबखौ थाबैनो गेबेङै सेबखांनाय

3. समग्र शिकसायाव ट्रेन्सलेटरनि लांदां जानाय मासिखौ थाबैनो आबुं खालामनाय

4. सेबायाव लांदां जानानै थानाय अकाडेमिक अफिसारखौ आबुं खालामनाय

5. आसाम स्टेट टेक्स बुकआव प्रडाक्सन एण्ड पाब्लिकेसन करपरेसनाव लांदां जानानै थानाय मासिखौ आबुं खालामनाय

6. SCERT याव बर'नि सासे लेक्सारारनि मासि सोर्जिनाय

7. थाबैनो सनितपुर आरो बिस्वनात जिल्लानि EGS फरायसालिफोराव मोननैयै अरायथा मासि सोर्जिनानै फोरोंगिरि थिसननाय

8. बर' बिजोंनि फोरोंगिरिफोरा गुबुन बिजोंङाव फोरों हैनायखौ लाबोफिननाय

9. गोदानै बर' बिजोंनि गं 35 मडेल गोजौ फरायसालिखौ थाबैनो गायसननाय(जेराव सरकारि आरो भेन्चार फरायसालिफोर गैया)

10. ICDS एबा अंगनबादिनि बिजाबखौ बर' रावाव सेबखांनाय

11. थाखो जिनैनि फरा बिजाबनि राव सोलायनायनि मावबादा खुंनाय

12. थाखो जिसे आरो जिनैनि बर' रावाव राव सोलायखांनाय आर्टस आइदानि बिजाबफोरखौ बेसेन लाया जासे राननाय आरो

13. CTET नि L1 खौ बर' रावाव लाबोनो थाखाय भारतनि एबा मिरु सरकारनि सोलोंथाइ मन्त्रिखौ लोगो हमहैनाय आइदाफोरखौ लानानैनो दिनैनि सावरायनाया जायो ।

बे सावरायनायाव दुलाराय बर' फरायसा आफादनि मानावगेदेद आफादगिरि मुस्रि दिपेन बर'नि दैदेननायाव मिरु एबसुनि मोनसे थान्दै हानजाया बाहागो लायो ।

सावरायनायाव मिरु एबसुनिफ्राइ फारियै लोगो गाहाइ नेहाथारि मुस्रि दिनेस ब्रह्म, बुंथिगिरि अबित नार्जारी, नेहाथारि आनान्द दैमारी, सुबुं फोनांजाब नेहाथारि सोमदोन ब्रह्म आरो सोलोंथाइ नेहाथारि सोमावसार बसुमतारीया ।

आरो बर' थुनलाइ आफादनिफ्राइ मानावगेदेद आफादगिरि ड० सुरथ नार्जारी, लोगो आफादगिरि सिताराम बसुमतारी, गाहाइ नेहाथारि नील'कान्त गयारी, नेहाथारि कामेस्वर बर', ड० प्रनबज्योती नार्जारी, बिनय कुमार नार्जारी, सहेन ब्रह्म आरो रांगिरि सतिस ब्रह्मबो बाहागो लायो ।

• Tweet
• Share
• Share
• Share
• Share

About Mridul

bodoinfo.com provides informations regarding State Government, Central Government and Private sector jobs for the aspirants of assam.

Related Post