रायजोनि रांखान्थि मन्थ्रि अजन्ता नेवगआ आसाम आयेन आफादाव 2024-25 रांखान्थियारि बोसोरनि बाजेट थिसनो। रांखान्थि मन्थ्रि अजन्ता नेउगनि बाजेट आयआ 1,43,605.56 कौटि रां आरो खरसाया 1,43,890.62 कौटि रां। बाजेट खहाया 774.47 कौटि रां।
रांखान्थि मन्थ्रिआ गावनि बाजेट बिबुंथियाव बुंदोंमोन दि अरुण'दय-2.0 नि रेन्जखौ बांहोनानै बांसिन सुबुंफोरखौ लाफानो थाखाय थांनाय बोसोरनि थांखि बादियै गासै रायजोआवनो अरुण'दय-2.0 खौ जागायनाय जादों। बे बिथांखिनि सिङाव, रायजोनि आइजोफोरनि अनगायैबो, थामथि आथोननि सुबुंफोर आरो दिव्यांगफोरखौ लाफानाय जागोन।
रांखान्थि मन्थ्रिआ बुंदोंमोन दि
माखासे सर्तफोरनि सिङाव रायजोनि गामियारि ओनसोलाव सेल्फ हेल्प हानजाफोरनि
39,67,743 आइजो सोद्रोमाफोरनो साफ्रोमनोबो 10,000 रां फालांगियारि फुन्जि महरै
होनाय जागोन। बे सुबिदाखौ मोननायनि उनाव, बेबादि
साफ्रोमबो मुलाम्फा मोनग्राफोरा खमावनो 25,000 बेंक लन मोनगोन। बै रांखौ बाहायनाय
आरो दाहारखौ थि समाव सुख'योब्ला 12500 रां रेहाई मोनगोन।
मैयानि रांबावजायाव फरायसुलिफोरनि थाखायबो बिथांखि लाबोनायनि सोमोन्दै बुंनायखौ नुनो मोनदों, गिबि मन्थ्रिनि निजुत मइना बिथांखि, बेनि गेजेरजों सोलोंथाय फसंथान आव मुं थिसननायाव 10 लाख फरायसुलिफोरनो राङारि हेफाजाब होनो थाखाय मोनसे थांखि गथायनाय जादों। बेनि बायदिब्ला, हायार सेकेन्डारि, ग्रेजुवेट आरो पस्ट-ग्रेजुवेट थाखोनि थाखाय जायखिजाया सोरखारि गोजौ सोलोंथायारि फसंथानाव फरायनाय फरायसुलिफोरा बे खाबुखौ मोनगोन। बबेखानि, हाबा जानाय फरायसुलिफोरखौ बे सुबिदानि थाखाय आरजाथाव मानिनाय जानाय नङा।
बिथांखिनि बायदिब्ला, थाखो जिसेआव मुं थिसन्नायनि थाखाय 10,000 रां, ग्रेजुवेट फरायफारिफोराव सेथि बोसोराव मुं थिसन्नायनि थाखाय 12,500 रां आरो पस्ट-ग्रेजुवेट फरायफारिफोरनि सेथि बोसोराव मुं थिसन्नो थाखाय 15,000 रां मोनगोन।
बेखौ नोजोर होनो हागौ दि बे सुबिदाखौ सोलिबाय थानाय सुबिदाफोरनि अनगायै होनाय जागोन जेरै बेसेन नाङै मुं थिसननाय, स्कुटी होनाय बायदि बायदि। बेनि थाखाय रांबावजायाव 240 कौटि रां थि खालामनो थांखि लानाय जादों।
रांखान्थि मन्थ्रिनि रांबावजायाव गुबुन थांखिफोरा जादों सोरखारा राम मन्दिराव थांनाय सा 2500 गोथार थावनि दावबायग्राफोरनो राङारि हेफाजाब होगोन। बेनि थाखाय 25 कौटि रां राननो थांखि लानाय जादों। बेराफारसेथिं, जाय नखराव सासेबो मावख'गिरि गैया बिसोरनि बिनायसाफोरनो साफ्रोमनोबो उफ्रा 5 नम्बर होनाय जागोन। साहा हारिसा सुबुं समाजाव 3 जौखोन्दो सोरखारि साख्रि थिखानाय थांखि लानाय जादों।
बेखौबो बुंनाय जादों दि अस'मिया सावथुनफोरखौ थुलुंगा होनो थाखाय आबुं गोलाव अस'मिया सावथुनफोरनि थाखाय 10 लाख रांनि राङारि अनसुंथाइ होनाय जागोन। साफाइ कर्मि फोरनो न' होनाय जागोन। दाव आरो दावदै दिहुनग्राफोरनि थाखाय रांबावजायाव 25 कौटि रां थि खालामनाय जादों। माइक्र'फाइनेन्सखौ रेहाय होनो थाखाय रांबावजायाव 550 कौटि रां थि खालामनाय जादों।
सोरखारा पुलिस मावथिफोर आरो बिसोरनि नखरफोरनि थाखाय साबसिन थानायनि राहानि थाखाय फैगौ बा बोसोराव 10,000 गोदान न' लुनो थांखि बानायदों। रांखान्थियारि बोसोर 2024-25 मायथाइयाव गं 2,000 न'फोर लुनाया आबुं जागोन। थांखि नि थाखाय 150 कौटि रां थि खालामनाय जादों। बाजेटआव अग्निवीर महरै थिसनजानाय आसामनि लाइमोनफोरनि थाखाय आसाम पुलिसआव 10 जौखोन्दो मासि थिखानाय फोसावनाय जादों।
गाहाय मन्थ्रि नरेन्द्र मदिआ समबारखालि भिडिअ' कनफारेन्सनि जोहै 1 लाखनिबो बांसिन सुबुंफोरनो साख्रि थिसनलाइ रानदों। गाहाय मन्थ्रिआ दिल्लीयाव इन्टिग्रेटेड कमप्लेक्स कर्मयोगी भबननि गिबि खोन्दोनि अन्थाइ खाम्फाबो गायसनदोंमोन। बे कमप्लेक्सआ मिशन कर्मयोगिनि गुबुन गुबुन खुन्थियाफोरनि गेजेराव हेफाजाब आरो गोरोबलायनायखौ बांहोगोन।
गाहाय मन्थ्रि मदिआ फुंनि 10.30 रिंगायाव भिडिअ' कनफारेन्सनि जोहै गोदानै हाबफैनाय थिसनगिरिफोरनो थिसनलाइ रान्दोंमोन।
बेनि गेजेरावनो हादोरनि मोन 47 थावनिफोराव रोजगार मेला खुंफुंनाय जादों। बे हाबाफारिनि मददआव मिरु सोरखारनि बिफानफोर आरो रायजो सोरखार/जुथाइ हायुं आवथाफोराव थिसनथाइ मेलाफोर खुंनाय जादों। गोदान थिसनगिरिफोरा गुबुन गुबुन मन्थ्रिफोर/बिफानफोराव सोरखाराव हाबगोन। खाजोना बिफान, नखर बिफान, गोजौ सोलोंथाय बिफान, परमाणु गोहो बिफान, रैखाथि बिफान, राङारि सिबिथाय बिफान, सावस्रि आरो नखर अनसाइ मन्थ्रि बिफान, हारिसा आयदा बिफान आरो रेल मन्थ्रि बिफानाव गुबुन गुबुन मासिफोराव थिसनथाइ होनाय जादों।
रोजगार मेलाया हादोराव थिसननाय
बिखान्थिखौ गोजौसिन गोनांथि होनो थाखाय गाहाय मन्थ्रिनि रादाइखौ आबुं खालामनायनि
फारसे मोनसे आगान। रोजगार मेलाया बांसिन साख्रि सोरजिनायनि मुलाम्फा लागोन आरो
लाइमोनफोरखौ गावसोरनि हायुंआरि जौगानायाव थोंजोङै बाहागो लानो थाखाय मुलाम्फा
गोनां खाबु होगोन होनना मिजिं थिनाय जादों।
बिपिएफनि गाहाय हाग्रामा महिलारीनि नुजाथिनायाव समबारखालि चिरांनि समथाईबारीआव बिपिएफ दोलोनि मोनसे गिदिर जइनिं हाबाफारि खुंफुंनाय जायो। चिरां जिल्लानि समथायबारि बाथौ खेराइ फेमिलि रिसर्टआव खुंनाय जइनिं हाबाफारिआव बिजनी बिधान सभा बियाबनि बि.जे.पि., इउ.पि.पि.एल. आरो गुबुन दोलोफोरनि सा 894 सो सोद्रोमाफोरा आसारखान्थि बायदियै बिपिएफ दोलोआव हाबफैयो।
बिपिएफनि आफादगिरि हाग्रामा महिलारीआ बुङो दि प्रमद बर' सोरखारखौ बिटिआरनि सुबुंफोरा मोजां मोनाखै जायनि जाहोनाव सुबुंफोरा बिपिएफ दोलोआव हाबहैबाय। फैगौ लकसभा बिसायख'थियाव बिपिएफ दोलोआ दरं आरो क'कराझार लकसभा मासिफोराव बिजाथि फसंगोन आरो बिपिएफनि बिजाथिया गोबां भटजों देरहागोन। हाग्रामा मोहिलारीआ बे बोसोरनि जानो गोनां लकसभा बिसायख'थिनि थाखाय मोन्नै बियाबनि थाखाय मार्चआव बिजाथि फोसावगोन। मैया नि हाबाफारि आव बिपिएफनि गोबांजौ दैदेनगिरि-मावथिफोर दंमोन।
आसाम सोरखारनि थांखिया सोरखारि
थिसनथाइफोराव समाजारि समानथि गायसननाय। आसाम सोरखारा जेसेबां हायो इसिबां नखरफोराव
सोरखारि मावथिफोरनि थाथायखौ रोखा खालामना सोरखारि साख्रियाव समाजारि समानथिनि
आबहावा सोरजिगोन।
रांखान्थि मन्थ्रि अजन्ता नेउग आ मैया
बुंदोंमोन। "बेफोरखौ नोजोर होनानै, आं बेखौ
फोसावनानै गोजोन्नाय मोनदों दि बे थिसननाय बिखान्थिखौ सोलिहोबाय थानाय समाव, जोंनि
सोरखारा समाजारि समानथि गायसन्नायाव गोसो होगोन," बेनिखायनो
जों बै नखरफोरनो सुबिदा होनो थिरांथा लादों जायहा सोरखार एबा रायजोआरि सेक्टराव
सासेबो मावख'गिरि गैया। ''
दानिफ्राय, जाय केन्दिदेत
फोरहा न आव सासेबो सोरखारि साख्रि मावनाय गैया, बिसोर
गासै नम्बर मोननायजों लोगोसे 5 जौखोन्दो उफ्रा नम्बर मोनगोन। बे
खान्थिया थाखो III आरो IV नि
गासैबो मासिफोरनि थाखाय थिसननाय बिखान्थियाव केन्दिदेतफोरनि सायख'नायनि
गुनजों गोरोबथा खालामाजासे गोहोम गोनां जागोन। बे थांखिनि थाखाय आसाम सोरखारा बे
बोसोराव मोनसे गोदान बिल लाबोगोन।
बेराफारसेथिं, 1960 मायथाइनि जागायजेन्नायनि उनाव गिबि खेबनि थाखाय चिननि सुबुं अनजिमाया 2022 मायथाइयाव जोनोम हारआ बाङाइ जालांनायनि जाहोनाव खमायदोंमोन। 2023 मायथाइयाव सुबुं अनजिमाया फिन खेबसेबाव खमायदोंमोन जेब्ला थैनायनि अनजिमाया जोनोमनि अनजिमानिफ्राय 20.8 मिलियन सुबुंफोरखौ बारदोंमोन। चीनआव सासे-गथ' खान्थिनि फिथाइ महरै 'हिनजावफोरनिख्रुइ हौवाफोरा बांसिन' जादों।
बेखौ नोजोर होनो गोनां दि हादोराव
जोनोम हारनि बाङाइ जालांनाय हारखौ गोख्रों खालामनो सांग्रां नाजानाय जादों। चीनआ 2016
मायथाइयाव गावनि दान्थे-बिदान्थे गोनां सासे-गथ' खान्थिखौ
बोखारदोंमोन, जाय जराफोरखौ सानै गथ' जोनोम
होनो गनायथि होदोंमोन। सोरखारा 2021 मायथाइयाव नेमफोरखौ फिन खेबसेबाव
सोलायदोंमोन। दायो सासे जराया साथामसिम गथ'फोर
लानो हायो। बेनि अनगायैबो, बेबी बुमआ चीननि जेंनाफोरनि अरायथा नङि
सुस्रांनाय जासिनो हानाय नङा।
सुबुं सानखोआरि सासे-गथ' खान्थिनि गिख्रंथाव जेंनाजों मोगा-मोगि जानायाव चीनआ हारसिं नङा। जापान आरो क'रियाया थांनाय माखासे बोसोरनिफ्राय बाङाइ जोनोम हारखौ मोनदांनो हादों; आमेरिकायाव जोनोमनि हारआबो गाहायाव फैगासिनो दं। नाथाय समाजनि गोसोआव गोब्राब सोलायनायफोराबो चीननि सुबुं सानखोआरि आंखालजों जुजिनो हानाय नङा जानो हागौ।
जोथोबनि बेरेखायै 30,649 गसर
थिसननाय जादों।
समबारखालि सदननि फ्ल'रआव
एजिपिनि एमएलए रामेन्द्र नारायण कलिताया सोंनाय मोनसे सोंथिनि फिन्नायाव मन्थ्रि
पिजुस हाजरिकाया बे फोरमायथिखौ फोरमायो। 2020-21 मायथाइनिफ्राय
जानुवारि 2024 मायथाइसिम समान-समान। रायजोआव 22,826 लांखारनाय
जाथाय जादों। बेजों लोगोसे, खावनायनि 52,803 केस आरो
दाखाथिनि 559 जाथायफोर जादों। बे बोसोरफोरनि गेजेराव, 12,967 सुबुंफोरा
उदखारि हान्जानि राहा लादों। जाब्रबथायनि जाहोनाव थैनायनि अनजिमाया सा 12,219। बेनि
गेजेरावनो गुवाहाटी नोगोरमायाव आइजोफोरनि गोदना निफ्राय सेइन खौ लांनाय जाथाय आ
314 जादों, बेफोरनि अनगायैबो साइबार गाग्लोबनाय जाथायफोरा बो गोबां जादों होनना
मिथिना मोनदों।
आसाम रायजोनि केबिनेटआ समबाराव जादोंमोन। गिबि मन्थ्रि हिमन्त बिश्व शर्मानि मासि सामलायनायाव दिसपुर पाब्लिक सार्भिस बिलडिंआव केबिनेट जथुम खुंफुंनाय जादोंमोन। बे केबिनेटआव गोबां गोदान थिरांथाफोरखौ गनायथि होनाय जादों। बेफोरनि गेजेराव मोनसेया आसाम माला 2.0 नि सिङाव लुनो गोनां मोन 12 मावथांखिफोरनि थाखाय थिखानाय 1510.98 कौटि रांनि गनायथि।
केबिनेट जथुमनि जोबनायाव मोनसे खौरां
मेलाव केबिनेट मन्थ्रि जयन्त मल्ल बरुवाया बुंदोंमोन दि हा गैजायैफोरनो हा पाट्टा
होनाय बिथांखिया 16 फेब्रुवारियाव जोबगोन। बेनि उनावनो वसुन्धरा 3.0 बिखान्थिया
फैगौ समाव जागायगोन। नोगोरारि ओनसोलाव थाग्रा हा गैजायै सुबुंफोर आरो बसुन्धरा 3.0
नि सिङाव धोरोमारि खुंथायफोरनो हा पाट्टा होनाय जागोन।
खौरां मेलाव बिथाङा मिथिहोयो दि 23
फेब्रुवारिनिफ्राय 29 फेब्रुवारिसिम हा गैजायैफोरनो हानि पाट्टा होनाय वसुन्धरा
2.0 खान्थिनि सिङाव हा पाट्टा मोनग्रा सुबुंफोरनो रानना होनो थाखाय गिबि मन्थ्रि
आरो केबिनेट मन्थ्रिफोरा जिल्ला-जिल्लानि जथुम खुंगोन। बिथाङा बेखौबो फोरमायदोंमोन
दि केबिनेटआ बे बोसोराव 3.5 जौखोन्दो सुदनि थाखाय थिखानाय 107.30 कौटि रांखौ
हगारनो थिरांथा लादों, जायखौ रायजो सोरखारा 'अपन घर' बिथांखिनि
सिङाव सोरखारि मावफारियाफोरजों न'नि लननि थाखाय रेहाय होनाय जागोन।
केबिनेटआ 1 मार्चनिफ्राय 10 मार्चसिम आसामाव आसाम सोरखारनि जौगालु दावबायनायखौ गनायथि होयो। बे समाव आसामनि गुबुन गुबुन जायगाफोराव मावफुंजानाय आरो मावफुंनो गोनां 23,000 कौटि रांनि 2,276 मावथांखिफोरनि अन्थाइ खाम्फाखौ बेखेवनाय जागोन आरो गायसननाय जागोन।
Please do not enter any spam link in the comment box. ConversionConversion EmoticonEmoticon