10 December morning news.

 

    दिनै नैथि खोलोबनि बि टि सि बिसायखथिनि भट होनाय सान। कक्राझार आरो चिरां आव जागोन। बिसायखथि या जानायनि सिगां मोनसे गिथावना जाथाय जानानै थाङो मैया हर आव। कक्राझार जिला नि सिङाव थानाय बावखुंग्रि बियाब नि सिंनि नायेकगांव आव इउ पि पि एल दोलो नि आफादगिरि प्रमद बर नि गारिखौ सोरबा सिनायमोनै दुथांफोरा गाग्लोबदोंमोन, अन्थाय खुबैदों। लोगोसे बिथांजों फैफानाय गं 4 गारिफोरनि सायावबो गाग्लोबदोंमोन। गाग्लोबनानै लोगो लोगो खारखुमायो दुथांफोरा। आफादगिरि बिथाङा बिसोरनि बेरेखा कक्राझार थानायाव एजाहार हैयो। प्रमद बर बिथांजों बावखुंग्रि बियाब नि इउ पि पि एल नि बिजाथि प्रतिभा ब्रह्म आ बो दंमोन। बुलेत प्रुफ नि गारियाव थानायनि थाखायसो बारगयो होनना बुंदों। बे गाग्लोबनायखौ आफादगिरि बिथाङा बि पि एफ आ नो खालामदों होनना बुंदों, बिसोरनि अफिसनिफ्राय खालामनाय जादों। रायजोफोरखौ बे जाथाय नि फिननायखौ बेलत आव होनो होदों। बिसायखथि नि उनाव दादागिरि थानाय नङा होनना बो बुंदों, लोगोसे सोरखारखौ बो बे गाग्लोबनायफोरखौ थाबैनो हमनांगौ होनना दाबि खालामदों।

गुबुन फारसे बि पि एफ आ बे अन्थाय खुबैनाय हिंसायारि जाथायखौ गोथौयै दुखु मोननाय फोरमायदों। बेयाव बि पि एफ दोलो आ जेबो लोब्बा गैया होनना बुंदों बावखुंग्रि बियाब नि बि पि एफ नि बिजाथि दनेश्वर गयारि बिथाङा। लोगोसे बनरगांव बियाबनि बि पि एफ नि बिजाथि राजिब कुमार ब्रह्म आ बो दुखु मोननाय फोरमायदों आरो बि पि एफ नि आखाय गैया होनना बुंदों। उल्थायै बिसायखथि नि सम आ जोबनायनि उनाव बो मानो गामि गामि गिदिंहैदोंमोन होनना सोंनाय सोङो।

एबसु आ बा बे जाथाय नि सायाव दुखु मोननाय फोरमायदों। बिथांमोना 12 घन्टा सम होदों। 12 धन्टा नि गेजेराव बेबायदि गाज्रि खामानि मावनायफोरखौ हमनानै साजा होनांगौ नि दाबि खालामदों।

ए दि जि पि जि पि सिंह बिथाङा बो गोख्रों एक्शन लानाय जागोन होनना बुंदों। लोगोसे बिथाङा गासैबो बिजाथिफोरखौ मदेल कद अफ कन्दाक खौ मानिनानै सोलिनो थाखाय खावलायदों।

बिसायखथि फोसावदिंनाया 8 दिसेम्बर आव जोबदोंमोन।

दिनै सा 10,23,404 भटारफोरा भट होनो मोनगोन। गासै 111 बिजाथिफोर दं, 1407 पलिं स्तेशन आव भट खौ होगोन बिजाथि फोरनि थाखाय। गिबि खोलोबनि बिसायखथियाव गासै 21 बियाब नि थाखाय जादोंमोन। दिनै गासै 19 बियाब आव जागोन।

गिबि खोलोबाव 77.01 भट होनाय जादोंमोन। 12 दिसेम्बर आव सानगोन।

      सासे नेशनेल लेभेल नि बर गेलेग्रा या बेरामाव गोलैना दं। दायो बि टि आर आव गासैबो बिसायखथि नि थाखाय ल मुखुब, नाथाय सासेबो राजखान्थियारि दोलो नि नोजोराव गोलैयासै बाक्सा जिला नि गरेश्वर नि नावकाता ओनसोलनि बेतागांव नि सासे नेशनेल लेभेल नि गेलेग्रा मनिका बर आ। जायनि थाखाय सासे साधारन आबादारि नि नखरनि गेलेग्रा या बिसना याव गोलैना दं। बिथांनि देहा नि मोनसे किदनि या खामानि होयि जाबाय, जायनि थाखाय आबादारि बिफाया हा हु गासैखौबो फनजोबनानै फिसा नि फाहामथाय होबोगासिनो दं, दासिम बिफाय 8 लाख रां खरसा खालामबाय, नाथाय फिसाजो आ दासिमबो मोजां जायाखै। बिथाङा नेतबल गेलेयोमोन, लोगोसे काबादि बो। आसामनि जानानै गोगांबार गेलेनानै चेम्पिअन जादोंमोन। थाखो 9 आव फरायबाय थानाय समनिफ्राय नो गेलेनायजों सोमोन्दो लाखिनाय बिथाङा दायो बेरामि।

मनिका बर खौ मदद खालामनो गोसोब्ला 6003403890 आरो 6001084652 नम्बर आव फन खालामहरनो हागोन। बेंक एकाउन्त।

      सा सानजा भारत आव गिबिसिन मानसि नि गाइखेर बेंक गायसनदों। गुवाहाति नि सात्रिबारि देहाफाहामसालियाव। बेनि खामानि या रतारि फाउन्देशन नि दारै जागायबाय। नांगौ बिबांनि गायखेर मोनलोङि, जोनोम जागोदान गथ आरो खम लिरथायनि जों जोनोम जानाय गथफोरनि थाखाय मोजां जागोन। जोनोम जागोदान गथफोरा गोबां जेंनायाव गोलैनांगो जायो। बेखौ नोजोर होयोब्ला मोजां खामि जानायखौ नुनो मोनो। बे गाइखेर बेंक आ भारतनि मादाव 15 थि फारिलाइ आव दं।

       ए एस ति सि आ मुम्बाई आव आसामनि केन्सार बेरामिफोरनि थाखाय भारत बेन्ज बास दान होयो। आसाम भबन निप्राय मुम्बाई नि ताता मेमरियेल देहाफाहामसालिसिम लांगोन बेरामिफोरखौ। बेखौ मैया बेखेवो ए एस टि सि नि चेयारमेन अशोक कुमार भत्ताचार्य आ। बेनि थाखाय थायसेबो रां लाया होनना बुंदों, गासैबो फ्रि।

     भारतारिफोरा फ्रि वाई फाई मोनगोन। मैया भारतनि गाहाय मन्थ्रि या केबिनेत जथुमा नि गेजेरजों गिदिर बिथांखि लादों।गासैबो नोगोरारिफोरानो फ्रि वाई फाई मोनगोन होनना बुंदों। बेनि थाखाय बिथांमोना 1 कौटि दाता सेन्तार बेखेवगोन, लोगोसे मोनफ्रोमबो रायजोआव पाब्लिक दाता अफिस बो बेखेवगोन होनना बुंदों।

       चेन्नाई नि हतेल आव थैनाय अबस्था याव नमोनदों सासे फावखुंग्रिखौ, गावखौनो बुथारना लानायनि सन्देह। नाम आ भि जे चित्रा। पुलिस आ बुंनाय बादिबाल हतेलखौ सापा खालामग्रा या नुग्रोदोंमोन। उनाव पस्त मर्तेम नि थाखाय हरनाय जायो। 28 बोसोर बैसो नि फावखुंग्रि या टि भि एक्त्रिस मोन।

• Tweet
• Share
• Share
• Share
• Share

About Mridul

bodoinfo.com provides informations regarding State Government, Central Government and Private sector jobs for the aspirants of assam.

Related Post