बिटिआर गोरोबथा या थारैनो जुदि गोजोन सुक्टि मोनब्ला एनदिएफबि नि गाहाय मोन, सागान होनो लाना बो थांदोंमोन, अब्ला उनाव मानो सप्तासे नि उनाव नो जेल आव सोफिनखो, मानो जेल आव थानो नांगासिनो, अब्ला बेखौ माबोरै गोजोन गोरोबथा होनना बुंनो हागोन। बेखौ बुंदों बारग एम पि सान्सुमा खुंगुर बैसोमुथियारि बिथाङा। बिथाङा प्रमद बर नि बदलेन्द सोमावसारनाय आ थगायनाय सो मोन, बै समनिफ्राय नो सोरखार जों ईसिंङारि सोमोन्दो दंमोन बिहा, स्पेशियेलि हिमन्त बिश्व शर्मा जों होनना बुंदों। लोगोसे प्रमद बर, उर्खाव गोरा ब्रह्म आरो गोबिन्द बसुमतारि खौ, बिसोर सोरखार नि एजेन्ट बिसाबै खामानि मावगासिनो। मोन 6 हारि नो एसटि होनायनि सायाव दैदेनगिरि आ होबथानो हाया बुंनायनि फिननाय महरै बेखौ गादि नि थाखायनो बुंदों होनना बुंदों। बिथाङा एनदिएफबि नि दैदेनगिरि गोबिन्द बसुमतारि बिथांखौ बिसायखथि नि मासि बारायनायखौ फरायना नायदोंना नायाखै होनना सोंदों, बेयाव बिटिआर आव 60 सिम बारायगोन होनना बुंदों, नाथाय एसटि नि रिजार्भ महरै मोन 6 आव ल सो थागोन होनना बुंदों, अब्ला बर फोर हा मा जागोन। बिटिआर नि गाहाय प्रमद बर आरो मन्थ्रि उर्खाव गोरा ब्रह्म आ बेनि एबिसिदि खौ नो मिथिया होनना बुंदों। बिटिएदि नि हाबखानाय गामि एबा ओनसोलखौ सोलायनायनि सोमोन्दै सो लिरनाय दं बिटिआऱ गोरोबथा याव, बेयाव गोबां गामि आरो ओनसोलखौ सोनायनि नङा होनना बो बुंदों। बर हारि नि ईयुन आ गोसोम, गिथावना जाना दं, हारि खौ बासायनायनि जोबथा फरमुला या नो जाबाय बर फोरनि गेजेराव मोजां साननो रोंनाय सुबुंफोरा ज जानानै देमक्रेटिक मास मभमेन्ट खौ खालामफिननो नांगौ। गोदान सोमावसारनाय आव दानि एबसु आ बाहागो लाखाया, दिपेन बर खौ प्रमद बर नि सायाव बुंनो हाया होनना बो बुङो। बर हारि नि रैखाथि नि थाखाय दायो गोदान सोमावसारनाय आ जानो नांथारगौ, नङाब्ला बर आ जोबस्रांनायनि लामा याव, गासैखौबो खोमाना लाबाय।
मागो बैसागु नि थाखाय आसाम आव कारफिउ नि सम खौ सोलायदों। मागो खालि हरनि 10 बाजि नि सोलाय 11 बाजि आव कार्फिउ आ जागायगोन आरो फुंनि 6 बाजि नि सोलाय 4 बाजि आव जोबगोन कारफिउ आ। कारफिउ नि सम खौ खम खालामदोंब्लाबो बानायनाय न आव थानो होनाय जानाय नङा होनना बुंदों। कभिद जायोब्ला आसामनि सेंग्रा या सो जागोन होनना बुंदों। मथजाथावदि आसाम आव 2837 गोदान कभिद नि केस मोनबावदों, सा 2 नि जिउ बो गोमादों, बेनिनो कामरुप मेट्र आव 870 केस मोनदों।
घोस लाना लानानै हमजाबाय नगांव नि हान्थामेला बिफाननि नि अफिसार आ। नगांव नि हान्थामेला बिफाननि अफिसार नि मावखुलि आव नगांव नि पुलिस आ नायबिजिरदोंमोन, एसपि आनन्द मिश्रा नि दैदेननाय दोलो आ हमदों एमभिआई हेमेन दास खौ। लोगोसे पुलिस फोरा सानै मददगिरि प्रनब महन्त आरो बलबन्त कौर मुंनि आयजो मावथि खौ बो हमदों। गारि नि फिटनेस गनायथि नि फोरमाय बिलाय होदोंमोन। अफिस आव जनानै घोस लाबाय थानाय समाव नो हमो, बिनिफ्राय 2 लाख 60 रोजा रां बो मोनदों होनना मिथिना मोनदों। एमभिआई नि नगांव नि फ्लेट आवबो नागिरहैदोंमोन पुलिस फोरा, बेनिफ्रायबो 4 लाख रां मोनदों होनना मिथिना मोनदों।
रायजो आव आरो सासे सोरखारि मावथि आ घोस लाना लानानै हमजाबावदों। गामियारि सावस्रि नायदिंगिरि हितेश देका खौ हमदों। थैनायनि फोरमान बिलाय नि थाखाय नो रां लादोंमोन, थैनायनि फोरमान बिलायनि मुङावबो रां होनो गोनां जानाय आ लाजिनांथाव। कामरुप नि रानि नि कमिउनिटि हेल्थ चेन्टार आव खामानि मावोमोन, रां लानाय समाव नो हमो। आगोलावनो 2000 रां लाखाबायमोन, मैया आरो 3000 रां बिदोंमोन, जाख्लनाय होबथाग्रा बिफान आ दायो गुवाहाति आव लांनानै सोंगासिनो दं।
मैया आसामनि गिबि मन्थ्रि आ रायजो नि सोलोंथाय गोनां बेकार सुबुंफोर नि साख्रि होनाय खामानि खौ जागायगासिनो, बेनि बाहागो महरै मोन 3 बिफान आव 546 सुबुंफोरनो साख्रि होदों। बेनिनो 218 आ एसिस्तेन्त ईन्जिनियार, 155 या टेकनिकेल अफिसार आरो 173 जुनियर एदमिनिसत्रेतिभ एशिस्तेन्ट नि साख्रि होदों। लोगोसे 1 लाख नो साख्रि खौ 10 मे नि गेजेराव सोफुंगोन होनना बुंदों। फैगो बोसोर निफ्राय ईन्जिनियार नि साख्रि खौ मोनसे ल आनजाद नि गेजेरजों नो होगोन होनना बुंदों, गुबुन गुबुन बिफान नि साख्रि नि जायखिजाया मोनसे खौ सायखनो हागोन आनजाद होग्रा या।
आईपिएल नि गाहाय स्पन्सार जागोन टाटा या। बिसिसिआई आ बोखारबाय भिभो खौ। मंगलबार खालि आईपिएल नि गाहाय बृजेश पेटेल आ फैगो सिसन आव गाहाय स्पन्सार जागोन होनना बुंदों। भिभो आ 2018-2020 मायथाईसिम 2200 कौटि रां आव सुक्टि खालामदोंमोन गाहाय स्पन्सार नि। नाथाय 2020 मायथाई आव भारत आरो चिन नि गेजेराव नांलायनाय नि थाखाय भिभो नि जायगायाव द्रिम एलेभेन खौ गाहाय खालामदोंमोन स्पन्सार नि, नाथाय उनाव 2021 आव भिभो नो नो होफिनदोंमोन।
भारत आरो खोला आफ्रिका नि गेजेराव जानाय 3 थि टेष्ट नि गिबि सान आव भारत आ 223 रान आव नो अल आउट जादों। कोहलि आ 79 रान बुदों। गुबुनफारसे खोला आप्रिका या 17 रान आव सासे विकेट थांदों।
आईएसएल आव जामशेदपुर आ उरिस्या खौ 1-0 गल जों फेजेननानै पईन्टस टेबल आव 19 पईन्टस जों गिबि नम्बर आव दं।
मोनसे दुखुनांथाव खौरां। खर आव गरनै गुलि गावना लानानै सासे खौरांगिरि आ गावखौनो बुथारना लादों। खौरांगिरि नि मुङा बिकाश मरान। जाथाय आ हरनि 11 बाजि सो आव जादोंमोन, उन्दुनाय खथा याव नो खर आव गावना लायो। तिनसुकिया नि खौरांगिरि बिथांनि बेबायदि खालामना लानाय आ बयखौबो सोमोनांहोदों। बिथाङा आसामनि गोबां ईलेकट्रनिक खौरां बिजों आव खामानि मावोमोन। दायो गावनि बिमा, बिसि आरो सा 3 गथ फोरखौ गारना थांबाय। पुलिस फोरा नायबिजिरगासिनो दं, मा जाहोननि थाखाय बेबायदि खालामखो दासिम मिथिनाय जायाखै।
कक्राझार आव सा 5 जुवारि फोरखौ हमदों। बिसोरनिफ्राय नोगोद 2.60 लाख रां बो जब्द खालामनो हादों। पुलिस फोरा खालामनाय नायबिजिरनाय आव आयेन बेरेखा टिर गेलेनाय आरो नागालेन्द नि लटारि टिकेट फानग्रा फोरखौ हमदों। हमजानाय सा 5 नि मुङा राजु मन्दल, सन्जय दास, नव साहा, शुभजित कोर आरो निताई कर्मा. बिसोरखौ उनाव जेल हाजो आव लाना थाङो। कक्राझार पुलिस आ जुवारि फोरनि बेरेखा अपारेशन खौ खालामबाय थागोन होनना बुंदों।
bodoinfo.com provides informations regarding State Government, Central Government and Private sector jobs for the aspirants of assam.
Please do not enter any spam link in the comment box. ConversionConversion EmoticonEmoticon