14 January morning bodo news ~ Bodoinfo.com

रेल नि गिथावना जाब्रबथाय। नर्थ ईस्त फ्रन्तियार रेलवे जन नि बिकानेर-गुवाहाति एक्सप्रेश नि जाब्रबथाय आ मैया बेलासि नि 5 बाजि आव जादोंमोन। जाथाय आ माईनागुरि आरो दोमुहनि रेल स्तेशन नि गेजेराव जादों होनना मिथिना मोनदों। खौरां मोननाय बादिब्ला रेल नि नम्बर आ 15633. रेल आ हरनि 1.45 याव बिकानेर निफ्राय फैदोंमोन। मैया मोनाबिलि नि समाव रेल नि मोननैसो दबा या लाईनश्युत जायो। ट्रेन आव 1200 सो दावबायारिफोर दंमोन, गुवाहाति सिम सा 247 सुबुंफोर फैदोंमोन। बे जाथाय जानाय आव एनदिटिभि नि बादिब्ला सा 7 सुबुंफोरनि जिउ गोमादों आरो सा 45 सो सुबुंफोर आ जोखोम जादों। थैनायनि नखर नो 5 लाख रां, गाज्रियै जोकोम जानाय नो 1 लाख आरो खम जोखोम जानाय नो 25 रोजा रां होनाय जागोन। दुखुनांथाव जाथाय नि थाखाय भारत नि हादरगिरि, गाहाय मन्थ्रि आरो आसामनि गिबि मन्थ्रि बिथांमोना दुखु मोननाय फोरमायदों।

बाक्सा याव मैया आसामनि गिबि मन्थ्रि डाँ हिमन्त बिश्व शर्मा बिथाङा फैदोंमोन। हेलिकप्तार जों ककिलाबारि आव फैनानै एग्रोफरेस्त्रि आरो बायोदायभार्सिति कलेज नि फाउन्देशन स्तन गायसनो। बाग्सा जिला याव जानाय गोदान 107 टा अंगनबारि मिरु खौ बो बेखेवना होयो। बेनि उनाव नो मोनसे मेल आव बाहागो लायो। हाबाफारि आव मन्थ्रि ईउजि ब्रह्म, बिटिआर नि गाहाय आरो गोबां एमएलए, ईएम बिथांमोना बाहागो लादोंमोन।

गोदान बर फरायसा आफाद दायोब्ला जाफुंसारनाय नङा। बर रायजोफोरा बेखौ गनायनाय नङा। सासे एबसु नि दैदेनगिरि आ गोदान आफाद दायोब्ला ब्लादसेद एबा थै बोहैनाय जायोब्ला बेनि दायनिगिरि आ गोदान आफाद दानायनि दैदेनिगिरि फोरनि दाय जागोन होनना बुंनायनि सायाव बिटिसि थिकादार आफाद नि गाहाय नेहाथारि बिक्रम दैमारि बिथाङा बुंदों। 2020 मायथाय आव बेफोरबायदि गाज्रि सोदोब खौ बोखारनो थाखाय नो गोरोबथा जादोंमोन, बेखायनो बेफोरखौ आरो बुंनांगौनि गोनांथि गैया होनना बुंदों। बिथाङा लोगोसे गोबां एबसु नि दैदेनगिरि फोरा मोजां मोजां बाथ्रा बुंदों आरो एबसु आ गिनांगौ जेबो गैया, मानोनां गोदान आफादखौ रावबो बराया होनना बो बुंदों।

आसाम सोरखार आ दायरेक्टरेत अफ बद मिदियाम आरो आदार ट्राईबेल लेंगुवेज नि बोलो खौ एलिमेन्टेरि ईदुकेशन दिपार्तमेन्ट निफ्राय सेकन्दारि ईदुकेशन निसिम हरबाय। मंगलबार खालि फोसावनाय मोनसे फोसावलाय आव बेखौ बुंदों। बिटिआर नि गाहाय प्रमद बर आ बेनि थाखाय आसाम सोरखार नि सिम साबायखर बावो। 2020 मायथाई आव बर फोरा दाबिबोनाय आ जाफुंबाय आलादा दायरेक्टरेट मोननायनि गेजेरजों।

ईस्रो नि गोदान चेयारमेन रकेत बिगियानगिरि एस सोमनाथ। ईसरो नि गोदान चेयारमेन जादों हादर नि गिबि सारि नि बिगियानगिरि या। चन्द्रयान 2 आव बिथाङानो दैदेनगिरि जादोंमोन. बिथाङा मिरु अख्रां बिगियान बिफाननि सेक्रेतारि आरो हादर नि अख्रां कमिशननि चेयारमेन बो जादोंमोन 3 बोसोर नि थाखाय। मिरु सोरखार आ सोमनाथ नो गोदान बिबान होनाय खौ फोसावना होदों।

बोसोरफ्रोमबो खुंनाय जारिमिनारि जुनबिल मेला खौ बे बोसोर आव खुंनाय जानाय नङा। रायजो आव कभिद नि गोसारनाय आ बारा जानायनि थाखाय नो 500 बोसोरनि गोजाम बे मेला खौ खुंङै नि थिरांथा लादों। आगोलनि बायदि ने सामलाय आफाद आ 20,21 आरो 22 जानुवारि आव सान 3 मेला खौ खुंनो थियारि जादोंमोनब्लाबो उनाव खुङा होनना थिरांथा लायो। सामलाय आफाद आ बुंनाय बादिब्ला बे बार आव नेम खौ ल खालामनाय बादि फिसा थार जागोन।

3 बोसोरनि उनाव आगोलनि बादि जाफिनगोन अस्कार बान्था नि हाबाफारि आ। फैगो 27 मार्च आव जानो गोनां 94 थि एकादेमि एवार्द(अस्कार) आव आगोलनि बादि फोसावग्रा थागोन। 2018 नि उनाव गिबि खेब बेबायदि थिरांथा। बे बार नि हाबाफारि खौ आगोलनि महर होनाय जादों। फैगो 27 मार्च आव हलिउद नि हाईलेन्द चेन्टारनि दलबि थियेटार आव जागोन बान्था नि हाबाफारि आ।

भारत आरो खोला आफ्रिका नि गेजेराव जानाय 3 थि टेष्ट आव भारत आ नैथि ईनिंष आव 198 रान आव नो अल आउत जादों। भारत आ आफ्रिका नो 212 रान नि टार्गेट होदों । खोला आफ्रिका या 3थि सान जोबनाय आव 101 रान आव सा 2 विकेट थांदों।

आईएसएल आव मैया हायदाराबाद आ चेन्नाई नि बेरेखा गेलेनाय आव 1-1 गल जों द्र जादों। हायदाराबाद आ 11 ता मेस गेलेनानै 17 पइन्त्स जों 3 थि आरो चेन्नाई आ 15 पइन्त्स जों 6 थि आव दं।

हाबा नि बैसो खौ 18 बोसोरनि सोलाय 21 खालामनाय आ हादरनि हिनजावसा फोरखौ आत्मनिर्भर खालामगोन। बेखौ बुंदों भारत नि गाहाय मन्थ्रि नरेन्द्र मोडि आ। बिथाङा बुंदों हादरनि फिसाजो फोरखौ आत्मनिर्भर बानायनो थाखाय नो हाबा नि बैसो खौ 18 निफ्राय 21 खालामनायनि प्रस्ताब लादों। मखजाथावदि मोडि केबिनेट आ साननैसो सिगाङाव बे प्रस्ताब खौ लादोंमोन, बे प्रस्ताब खौ लानायनि उनावनो गोबां राजखान्थियारि दोलो फोरा बेनि बेरेखा खालामदोंमोन। एमपि आशाउददिन उवेशि आ 18 बोसोर बैसो आव भट होनो हायो आरो हाबा जानो हाया बे माबायदि बाथ्रा जाखो होनना बुंदों।

बिटिआर सोरखार नि ईएम राकेश ब्रह्म बिथाङा रां रानना होदों। बिपिएफ नि सोरखार नि समाव सोरखारि न होगोन होनना बुंनानै चेयारमेन फोरा रां लादोंमोन आरो न फोरखौ मोजां लुना होआखैमो बेनि थाखाय नो पुलिस थाना याव केस होनाय जादोंमोन, नाथाय उनाव गोबां आ नो कोर्ट, पुलिस थाना याव थाङालासै न फोरखौ लुना होदोंमोन आरो जाय जायनिफ्राय रां खौ लादोंमोन बे रां खौ बो ईएम नो हैदोंमोन आरो बे रां खौ न न थांनानै रानना हैदों ईएम बिथाङा। 38 सुबुंफोरा बे रां खौ मोनदों। गोबां केस रेजिस्तार जानायफोरनि बेरेखा नायबिजिरनाय आ सोलिगासिनो दं होनना बुंदों।

गोदान मटर आयेन बादियै 4 बोसोरनि उन्दै गथ खौ थामथि सालायग्रा महरै थि खालामनाय जागोन। 4 बोसोर नि बारा जानाय गथ खौ थामथि दावबायारि नि जायगायाव साननाय जागोन। बेबायदि थासारि आव नोंथाङा जुदि गावनि बाईक एबा स्कुटि सालायगासिनो आरो गावनि गथ आरो बिसि नि बैसो आ 4 नि बारा, नोंथांनि ईनभईस खौ दाननाय जागोन। मटर आयेन 194ए नि बादियै नोंथआंनि ईनभईस आ रां। गोबां सुबुंफोरा नो गावनि गथ जों मटरसाईकेल जों दावबायो। बेबायदि सुबुंफोरनि गेजेराव नोंथाङा बो सासेब्ला नोंथांनि ट्रेफिक ईनभईस दाननो हागौ, 1000 रां सो। हेलमेट लायाब्लाबो रां होनो नांगोन। 1000 रां जों लोगोसे लाईसेन्स आ 3 दान नि थाखाय दानजानो बो हागौ।

अन्ध्र प्रदेश नि सोरखारि मावथि फोरनि थाखाय मोजां खौरां। 62 बोसोर बैसो सिम बारायबाय। गिबि मन्थ्रि वाईएस जगन मोहन रेड्डि आ मावथि आफादनि दैदेनगिरि फोरजों रायलायनायनि उनाव नो बे थिरांथा खौ लायो आरो लोगोसे 23.39 जौखोन्दो दरमाहा बारायनायनि सोमोन्दै फोसावो। बे नेम खौ 1 जुलाई 2018 निफ्राय लानाय जागोन होनना बुंदों नाथाय़ रांखान्थियारि लाभालाभ खौ थांनाय बोसोरनि 1 एप्रिल निफ्राय होनाय जागोन।