7 January morning news ~ Bodoinfo.com

आलादा रायजो बदलेन्द नि थाखाय एनदिएफबि आव हाबनानै हारि नि थाखाय नांनाय सासे बारग एनदिएफबि नि जिउ गोमाबाय। आकबर बसुमतारि मुंनि बारग एनदिएफबि बिथाङा गोबाव समनिफ्रायनो बेराम आव गोग्लैना थानानै जोबथा हां बोयो। बिथाङा चिरां जिला नि गुरुभासा नि खासिबारि नि थागिबि मोन। बेराम आव गोग्लैना थानाय समाव गोबां मदद बिदोंमोन फाहामथयनि थाखाय, नाथाय रावनिफ्रायबो थोजासे मदद खौ मोनाखैमोन जायनि थाखाय बेराम खौ फेजेननो हायासै। बेल नङा, सोरखार आ होनाय 4 लाख नि एफदि खौ बो मोनाखैमोन। दुखुनांथावै बिथांनि सिमाङा सिमां आ नो जाना थाबाय।

दुलाराय बर फरायसा आफाद आ बर हारि नि सिनस्रि आफाद, माहारियारि आफाद, बेयो बर हारि नि ईन्जिन। बे आफाद आ राजखान्थियारि नङा। राजखान्थियारि मोनथाय नि थाखाय माब्लाबा सोरखार, राजखान्थियारि हान्जा दादों, नाथाय सोरखार दानायनि उनाव गावनि गुबै आखुथाय आव फैफिनदों, दानि बर फरासा आफादनि हाबाफारि आ गुन गोनां सोलोंथाय, बर माहारि खौ दानाय, बर माहारि खौ गावनि आयथें आव गसंहोनाय बायदि बायदि। गोदान बर फरायसा आफाद दानायखौ माब्लाबाबो गनायना लाया। सोरबा एबसु खौ सोरबा जेखि बुङा मानो बेयो बर नि आफाद, बे आफादखौ गोथार आरो गोग्गो हिसाबै फोथांना लाखिनो नांगोन।

25 जानुवारि आव कनट्रेक्टार एससियेशननि सोद्रोमाफोरा बिटिसि सेक्रेटारियेट आव हाबगोन गोबां गोदान अफिसारफोरखौ लोगो हमगोन, मोननैसो रायलायनो गोनां खोथा दं। गाहाय नेहाथारि बिक्रम दैमारि बिथाङा मिदिया नि गेजेरजों मिथिहोदों। बिथाङा बिकेदाब्लिउएसि नि गाहाय मिहिनिस्वर बसुमतारि बिथाङा गासैबो बर फोरखौ खौसे जानो खावलायनायनि सोमोन्दै बुंदों। जोंनि फोरा गोबां गिदिर गिदिर बाथ्रा बुंनाय खौ नुनो मोनदों, नाथाय सिङाव जेबो गैया खौ मिथिनायनि थाखाय बिकेदाब्लिउएसि नि गाहाय आ बुंदों जानांगौ होनना बुंदों बिथाङा। लोगोसे बिपिएफ आ बो आरो ईउपिपिएल आ बो गाज्रि नङामोन, सानैसो दैदेनगिरि नि साननाय हनाय आ सो आलादा मोन। गासै बर आ बिसोरनि थाखाय नो साननो गोनां सम फैदों। गुबुनफारसे बिथाङा गोदान फरायसा आफाद दानायखौ बराया एबा लुबैया होनना बो बुंदों, नथाय बिथाङा एबसु नि आफादगिरि दिपेन बर नि मोनसे बुंनाय- मिरु सोरखार आ आलादा रायजो दानायनि जेबो पलिसि गैया होनना बुंनायनि सोमोन्दै बुंदों। बे बाथ्रा खौ आगोलाव हाग्रामा महिलारि आ सो बुंदोंमोन, जायनि थाखाय हाग्रामा खौ गोबां बर फोरा नो गाज्रि मोनदोंमोन, दायो दिपेन बर खौ मा बुंगोन होनना बिक्रम दैमारि बिथाङा सोंदों।

जानो गोनां एसियान आयजो बक्सिं चेम्पियनशिप आव 66 केजि नि केटेगरि आव भारत खौ दैदेनगोन आसामनि अंकुशिता बर आ।

बोसोरनि गिबि सान आव गिबि मन्थ्रि नि मोन 6 हारि नो एसटि रिपर्त खौ होनयनि उनाव रायजो नि राजखान्थि आव दुंहाव थासारि। गिबि मन्थ्रि नि बुंनायनि उनाव नो रागा जोंनाय खौ दिन्थिदों जनगोस्थिय एक्य मन्स आ। मैया खौरांमेल नि गेजेरजों गोलाव आन्दोलन खालामगोन होनना फोसावो सुबुंखान्थि सान आ बो धर्ना होगोन, फेब्रुवारि दान आव मोनफ्रोमबो जिला जों लोगोसे गुवाहाति आव बो हाबाफारि लादों, नांगौ जायोब्ला आसाम बन्ध नि हाबाफारि खौ लागोन। बिसोर थाबैनो बेनि रिपर्त खौ रायजोफोरनो दिन्थिनो होदों, नङाब्ला सोरखार जों फिन सावरायलायनो जआ होनना बुंदों। आसामनि गिबि मन्थ्रि खौ एसटि होनो हागोन ना हाया रोखा खालामनो होदों। लोगोसे मोन 6 हारि नि बेरेखा आखु दिन्थिनो नाङा होनना बो ट्राईबेल दैदेनगिरि आदित्य खाख्लारि खौ वारनिं होदों।

गुजरात नि गंसे टेंकार आव गेस लिक जानायनि थाखाय सा 6 सुबुंफोरनि जिउ गोमादों। 20 सो जोखोम जादों। मैया गुजरात नि सुरात नि जिआईदिसि ओनसोल नि मोनसे कम्पानि आव जानाय गेस लिक नि जाथाय आव खमावनो सा 6 सुबुंफोरनि जिउ गोमादों। टेंकार आव जेरि केमिकेल दंमोन। जेब्ला टेंकार नि सालायग्रा या जाबर फोरखौ नाला याव गारनो नागिरदोंमोन, केमिकेल आ बार जों गोरोबलायो बेयावनो जाथाय आ जायो। सालायग्रा या जाथाय जानाय जायगानिफ्राय खारखुमायो।

भारत नि गाहाय मन्थ्रि नि गोलाव जिउ नि थाखाय मैया उग्रतरा मन्दिर आव फुजा होदोंमोन। आसामनि गिबि मन्थ्रि आ बिजेपि नि आफादगिरि जों लोगो जाना होदों। मखजाथावदि 5 जानुवारि आव पान्जाब आव मोनसे जाथाय जादोंमोन, पान्जाब नि मोनसे बिसायखथि फोसावदिं मेल आव बाहागो लानो थांनाय आव रैखाथि जेंना नि जाहोन आव फ्लाईअभार आव 20 मिनिट सम मोदि नि कनभय आ थानो गोनां जादोंमोन। बे जाथायनि उनाव नो भारत आव पान्जाब सोऱखार खौ गोबाङानो बायदिसिना बुंदोंमोन। आसाम आव ल फुजा होआखै, भारत नि गोबां जायगायावनो जादों।

मैया आईएसएल आव जामशेदपुर एफसि आ नर्थ ईस्त खौ 3-2 गल जों फेजेनदों.

खोला आफ्रिका आरो भारत नि गेजेराव जानाय नैथि टेष्ट आव भारत आ 7 विकेट जों फेजेनजादों। 240 रान नि टार्गेत होनायखौ खोला आफ्रिका या सा 3 विकेट जों नो नांगौ रान खौ बुय़ो।

कक्राझार नि बिबेकानन्द लामा याव हर आव मार्चेन्ट कालिबारि मन्दिर आव सिखाव नि जाथाय जादों। मन्दिर नि भेन्टिलेटर खौ सिफायनानै मन्दिर आव हाबनानै मुसुखा याव थानाय सना रुफा फोरखौ लाना थाङो आरो नोगोद रां बो लुथिना लाना थाङो। मन्दिर नि थागिबि आ बुंनाय बादिब्ला 3 लाख सो रां नि मुवा बेसाद लाना थांदों। बेनि सिगां बो बे मन्दिर आव सिखाव जादोंमोन खननै । सिखाव जों सोमोन्दो थानायखौ हमनो हायाखै । हमजानो गिनानै सियान सिखाव आ सासाटिभि नि तार खौ हासग्रोदोंमोन। पुलिसफोरा नायबिजिरगासिनो दं।

बुल्लि बाई एप नि सोमोन्दै मिथियो ना नोंथाङा। बे एप नि बानायगिरि खौ दिल्लि पुलिस आ आसाम आव फैनानै एरेस्त खालामबाय। बे एप आव गोबां मुस्लिम आयजो फोरनि सावगारि खौ गनायथि लायालासै नो गाज्रि बानायनानै निलाम आव लाखिनाय जादोंमोन। 20 बोसोर बैसो नि निरज बिष्णई खौ जरहात निफ्राय हमदों, बियो भेल्लर ईन्सतितिउत अफ टेकनलजि नि बि टेक नि फरायसा। बे जाथाय जों सोमोन्दो थानाय दासिम सा 4 खौ हमनाय जाबाय। उत्तराखन्द नि सानै आरो बेंगालुरु नि सासे खौ हमबावदों।

11 बार लाबाय करना नि भेकसिन खौ, 12 नम्बर भेकसिन खौ लानो नागिरनाय आव हमनो हायो। जाथाय आ भारत नि नो, 84 बोसोर बैसो नि सासे सुबुङा 11 बार लादों। बिहार नि ब्रह्मदेब मन्दल मुंनि सुबुङा गुबुन गुबुन जायगायाव खन 11 लाबाय भेकसिन खौ, गावनि जों लोगोसे गुबुननि बो मबाईल नम्बर आरो एखे आधार नम्बर जों नाथाय गुबुननि खौ लायोब्लाबो हमनो हनो नांगौमोन, 12 थि आव सो हमनो हायो। भेकसिन लानाय सुबुङा बुंदों- भेकसिन खौ लानानै लाब जादों, आयथें नि सानाय, आन्थु नि सानाय मोनोम सानाय फोरा कभिद नि भेकसिन लानायनि थाखाय गैया जादों, जायनि थाखाय लाबाय थादों भेकसिन खौ। जाय जाथाय खौ मिथिनानै सावस्रि बिफाननि गोसो गैयि मावनाय खामानि खौ नुनो मोनदों। भेकसिन लानाय सुबुङा गावनो एखे नम्बर नि सोमोन्दै बुंदों आरो माब्ला लादों बेखौ बो बुंदों। दायो सावस्रि बिफान आ बेनि सायाव नायबिजिरनो बिथोन होदों। नायबिजिरनायनि उनाव दायनिगिरिखौ साजा होनाय जागोन होनना बुंदों।