11 July 2025 bodo news. Anganwadi worker and Gaon Pradhan salary hike. monthly rupees for matric student. ~ Bodoinfo.com

दिनै 11 जुलाइ 2025 सुक्रबार साननि दासिमनि गोदान मोननैसो खौरांफोरा जाबाय।

1. रायजोनि मोनसेबो नार्सिं ह'मा रां होयैनि थाखाय गोथै सह'खौ ब्रै घन्टानि बांसिन सम लाखिनो हानाय नङा । बे गोनांथार थिरांथाया बृहस्पतिबाराव रायजो केबिनेटजों लाजादोंमोन। केबिनेट जथुमनि उनाव मोनसे खौरां मेलाव गिबि मन्थ्रि हिमन्त बिश्व सर्माया बे बाथ्राखौ बुंदों। मैया मेत्रिक आनजाद होनो गोनांफोरनो रां होनायनिफ्राय लानानै अंगनबारियाव खामानि मावनायफोरनि बेथन बारायनाय बायदि बायदिनि गोनां थिरांथाफोर लानाय जादोंमोन। बेनिनो आबुं खौरां होगोन।

दिसपुराव रायजोआरि लोकसेवा भवनाव गिबि मन्थ्रिनि दैदेन्नायाव बृहस्पतिबाराव रायजो सोरखारनि सप्तायारि केबिनेट जथुम खुंनाय जादोंमोन । केबिनेट जथुमाव गोबां गोनांथार थिरांथाफोर लानाय जादोंमोन । गिबि मन्थ्रिया जथुमनि उनाव मोनसे खौरां मेलाव केबिनेटनि थिरांथाफोरखौ फोरमायदोंमोन ।

केबिनेटआव लानाय थिरांथाफोर :

नार्सिं ह'मफोरा गोथै सह'फोरखौ हमथाना लाखिनो हानाय नङा रां होयैनि थाखाय। जुदि गोनांथि जायो, अब्ला केस खालामनानै रांखौ लाफिन्नो हागोन। नाथाय रां होयैनि थाखाय गोथै सह'खौ हमनाथानानै दोन्नो हाया। केबिनेटआव लानाय थिरांथाखौ 1 आगस्तनिफ्राय बाहायनाय जागोन। जुदि गोथै सह'खौ ब्रै घन्टानि बांसिन दोननाय जायो अब्ला नखरनि सोद्रोमाफोरा 104 आव नङाब्ला जायगायारि पुलिस थानायाव कल खालामनो हागोन। 4 घन्टानि बांसिन सम लाखिना दोनोब्ला लाइसेन्सखौ 3 दाननिफ्राय 6 दानसिम दोनथ'होगोन। लोगोसे 5 लाख रांसिम जरिमाना होनांगोन। गुबुन फारसेथिं नार्सिं हम'खौ बन्द' खालामनायनिबो लाहार-फाहार खालामनाय जागोन होनना बुङो।
केबिनेटआ अंगनबाड़ी मावथिफोर आरो हेल्पारफोरनि बेथनखौबो बांहोदोंमोन। अंगनबाड़ी मावथिफोरा रायजो सोरखारनिफ्राय 2000 रां आरो मिरुनिफ्राय 4500 रां मोनगासिनो दंमोन। रायजो सोरखारा बिथांमोननि बेथनखौ 1500 रां बारायबावदों, दा बिथांमोना 8 रोजा रां मोनसिगोन, बेबादिनो अंगनबारि हेल्पारफोरनि बेथनखौबो 750 रां बारायबावदों, बे हिसाबै बिथांमोना 4 रोजा रांयै मोनसिगोन।
मेत्रिक आनजाद होगोनफोरनि थाखाय मोजां खौरां। बे खेबाव बिथांमोनखौ फर्मफोरखौ आबुं खालामनाय समाव बेंक एकाउन्ट होनो थिननाय जादों। केबिनेटआ गनायथि होयो दि 1 नबेम्बरनिफ्राय मेट्रिक आनजाद जोबजासिम साफ्रोम आन्जाद होगिरिफोरनि बेंक एकाउन्टआव दानफ्रोमबो 300 रां होनाय जागोन। 5 लाख फरायसाफोरा दानफ्रोमबो 300 रां मोनगोन। बे फुन्जिखौ बिजाबफोर आरो मोनसे मोजां आदारनि थाखाय होनाय जागोन।
केबिनेटआ हजाइनि 'रबीन्द्रनाथ टेगर मुलुगसोलोंसालि' नि मुंखौ सोलायदों। यू.जी.सी. आ गनायथि मोन्नायाव गोब्राब जादोंमोन मानोना हादोराव बे मुंनिनो गुबुन मोनसे मुलुगसोलोंसालि दंमोन। जायनि थाखाय केबिनेटआ बेनि मुंखौ सोलायदों आरो बेनि मुंखौ सोलायना 'रबीन्द्रनाथ थाकुर मुलुगसोलोंसालि' दोन्दों। बेखौ दानिफ्राय बे मुंजों मिथिगोन।
से लाखनि बांसिन सुबुं अनजिमा थानाय नोगोर निगमफोराव इन्जिनियारफोरनि गोबां मासिफोर सोरजिनाय जादों । बे मासिखौ केबिनेटआ गनायथि होदोंमोन ।
मानसि-मैदेरनि दाङाबाजिखौ नोजोर होनानै रांबावजायाव 'गजमित्र बिथांखि' लानाय जादोंमोन। बेखौ केबिनेटआव गनायथि होनाय जादों। गवालपारा, उदालगुरि, नगाव, बाक्सा, सनितपुर, गलाघाट, जरहात आरो बिस्वनाथ जिल्लाफोरनि मोन 80 थावनिफोरखौ मैदेर-मानसिनि दाङाबाजिनि हटस्पट महरै सिनायथि होनाय जादों। बे थावनियाव मोनसे रेपिड एक्शन टीम दानाय जागोन। बे जायगाफोराव मैदेरफोरनि थाखाय गुबुन आदार जगायनाय जागोन।
मिशन वसुंधरा बिथांखिनि सिङाव थाम रोजानिबो बांसिन नामघर, थानसालि, फरायसालि बायदिनि थाखाय हा राननाय जायो। बेखौ केबिनेटआ गनायथि होदों। process (प्रसेस) आ सोलिबाय थागोन। 50,000 नि बांसिन आरजलाइफोर दं।
केबिनेटआ 1 अक्ट'बरनिफ्राय जागायनाय हिसाबै गामिनि गावबुरा एबा गामिनि गाहायफोरनि बेथनखौ 9,000 रांनिफ्राय 14,000 रांसिम बांहोदों। फरेस्त भिलेजाव थाग्राफोराबो मोनगोन बेखौ।
लखीमपुर जिल्लानि सुबनसिरियाव थानाय मोन्नै गामिफोर, मरनै बेबेजिया आरो बेबेजियायाव 5 जौखोन्दो त्राइबेल सुबुं अनजिमा दं । बेनिखायनो बे गंनै गामिफोरखौ सुबनसिरि हारिसायारि बेल्ट आरो ब्लकफोरनिफ्राय उदां खालामबाय । जाहाथे सरासनस्रा थाखोनि सुबुंफोरा हा पाट्टा मोन्नो हायो । बेखौ केबिनेटआव गनायथि होनाय जादोंमोन ।
सर्थेबारीनि काहा आरो फिथ्लाइ दारिमिनजों लोब्बा थानाय फालांगियारिफोरनि थाखाय केबिनेटआव जर'खा थिरांथाफोर लानाय जादोंमोन। बिसोरो गावसोरनो होनाय जि.एस.टि.नि रायजो सोरखारनि बाहागोखौ मोनफिनगोन।

2. मोनसे दुखुनांथाव खौरां, बर'नि मुंदांखा फावखुंगुर आरो आजिरा मोननाय फोरोंगिरि मेघनाथ मुछाहारी बिथांनि जिउ गोमाबाय। बैसोजों सोमोन्दो थानाय बेरामनि थाखाय ककराझार नोगोराव गावनि थाग्रा खुलियाव मैया बेलासिनि 3 रिंगासोआव रुंसारि जायो। बिथाङा 70 बोसोर बैसोनिमोन।

मुचाहारी बिथाङा बर' हारिमुआरि बेंखनफोराव सासे मान होजानाय सुबुंमोन आरो बिथाङा गोबां बर' सावथुनफोराव फाव खालामदोंमोन, जेराव गिबिसिन बर' फीचर सावथुन "आलायारन"आव मख'जाथाव फाव दंमोन।

जिउराहाजों सासे फोरोंगिरि, बिथाङा ककराझार सोरखारि गोजौसिन गेजेरारि आरो माल्टिपारपस फरायसालिनिफ्राय आजिरा लादोंमोन। बिथाङा गोबां समाजारि हाबाफारिफोरावबो बाहागो लाफादोंमोन।

बर' सावथुन, सोलोंथाय आरो समाजारि हाबायाव बिथांनि बिहोमानि थाखाय बिथांखौ गोसोखांनानै गुबुन गुबुन बिथिंनिफ्राय मान बाउनाय जायो।

3. मिरुआ बृहस्पतिबाराव आसाम, मणिपुर, मेघालय, मिज'राम, केराला आरो उत्तराखन्डआव दै बाना आरो हा खुरखानायजों खहा जानायनि थाखाय 1,066.80 कौटि रां हरनायनि सोमोन्दै मिथिहोदों।

दैबानाजों गोहोम गोग्लैनाय रायजोफोरनि गेजेराव आसामनो 375.60 कौटि, मणिपुरनो 29.20 कौटि, मेघालयनो 30.40 कौटि, मिज'रामनो 22.80 कौटि, केरालानो 153.20 कौटि आरो उत्तराखन्डनो 455.60 कौटि रां मिरुआरि बाहागोदारि महरै स्टेट डिजास्टार रेस्पान्स फान्ड (एस.डी.आर.एफ.) निफ्राय होनाय जादों।

बे बोसोराव दैज्लां बोथोराव गोबां अखा, दै बाना आरो हा गिसिखानायनि जाहोनाव बे रायजोफोरा गोबां गोहोम गोग्लैदों।

सासे मावख'गिरिया बुंदोंमोन दि गाहाय मन्थ्रि नरेन्द्र मदिनि दैदेन्नायाव आरो मिरु नखर मन्थ्रि अमित शाहनि बिथोनाव मिरु सोरखारा दैबाना, हा गिसिखानाय आरो जोमै गावनायजों खहा जानाय रायजोफोरनो गासैबो जाथावना हेफाजाब होनो थाखाय आबुङै रादाय होदों।

मिरु सोरखारा गोनांथार एन.डि.आर.एफ. हानजाफोर, रौनिया हानजाफोर आरो दैबाना, हा गिसिखानाय आरो जोमै गावनायजों गोहोम गोग्लैनाय गासैबो रायजोफोरनो अख्रां सान्थ्रि थिसन्नायजों लोगोसे गासैबो लजिस्टिक हेफाजाब होगासिनो दं।

4. जरहाट पुलिसा सानै सुबुंखौ खादों जाय गोबां बोसोरनिफ्राय आयेन बेरेखायै डाक्टारनि सिनायथिजों नोगोरमायाव फाहामथाय होगासिनो दं।

सानै दायनिगिरि, अशोक कुमार गगै आरो अमर ज्योति नाथआ जोरहाटनि मुखुबसिन ओनसोलफोरनि गेजेराव मोनसे, गोजाम अवर्ट भवन लामायाव मोनसे गावारि क्लिनिक सालायोमोन।

बे सानैया जायगायाव नंखाय मेडिकेल डिग्रीजों मुंदांखा जादोंमोन आरो "मुन्ना भाई जरा" मुङै मिथिजादोंमोन।

मावख'आरिफोरनि बायदिब्ला, अशोक कुमार गगैआ गिबियाव बे जायगायावनो हमिय'पेथि क्लिनिक सालायोमोन। नाथाय माखासे समनि उनाव, बियो जेबो गनायजानाय रोंगौथि गैयाजासे एलोपेथिक मुलिनि सायाव फाहामथाय होनायखौ जागायजेनो।

बिनि लोगो अमर ज्योति नाथआबो एम.बी.बी.एस.आव फोरमानलाइ होजानाय डाक्टार होनना नंखाय दाबि खालामनानै गावखौ सासे सावफाहामारि रोंग'सार महरै सिनायथि होदोंमोन।

गोबां सावफाहामारि थान्दैफोरा (एम.आर.) गावसोरनि प्रिस्क्रिप्शन आरो फाहामथायनि आदबफोरनि गोरोबलायैनि सायाव जिंगा फोरमायनायनि उनाव दाय होनायफोरा फैदोंमोन।

सावस्रि बिफाननि जथाय सामलायगिरिनाव मोनसे नेमखान्थियारि अजद दैखांनायनि उनाव मोनसे नेमखान्थियारि नायबिजिरनाय जागायदोंमोन।

आन्जाद नायखांनायनि उनाव, सावस्रि बिफाना लाइसेन्स गैयै क्लिनिकखौ थाबैनो बन्द खालामनो बिथोन होदोंमोन। सानै सुबुंखौ एखे हरावनो जरहात पुलिसआ खादोंमोन आरो नंखाय आरो मोनथाय गैयि सावफाहामारि आदबफोरजों सोमोन्दो थानाय आयेननि बाहायजाथाव धाराफोरनि सिङाव मोनसे गसर थिसनदोंमोन।

बिबानगिरिफोरा बुंदोंमोन दि बे आयेन बेरेखा फाहामथायनि समफारिखौ मिथिनो थाखाय आरो सोरबा बेरामिफोरखौ खहा खालामदों नामा बेनि सायाव नायबिजिरनाया सोलिगासिनो दं।

5. "2003 माइथायनि सिगांनिफ्रायनो बीटीसीआव थाग्रा हारि-हारिसाफोरा हानि मुलाम्फाखौ मोनगोन। बिपिएफ दोलोआ 17 बोसोर खुंथायनि समाव 1600 नखरफोरनि हानि जेंनाखौ सुस्रांदोंमोन। जों ब्रै बोसोरावनो 3,23,000 नखरफोरनि हानि जेंनाखौ सुस्रांदोंमोन आरो 70,000 नखरफोरनो हानि पाट्टा होदोंमोन" होन्ना बिथाङा गावनि बिबुंथियाव बुंदोंमोन।

"आं राजखान्थि खालामनानै दैदेनगिरि जानो फैयाखै नाथाय समाजनि जेंनाफोरखौ सुस्रांनो थाखायल' फैदों৷ बिटिसिआव थानाय मोनफ्रोमबो हारिनि जेंनाफोरखौ सुस्रांनो आं सांग्रां जादों। गुबैयै हानि जेंनाया बैफोर ओनसोलफोराव मोनसे जेंना" होनना बिटिआरनि गाहाय मावफुंगिरि प्रमद बर'आ बुंथियो।

मिरु नखर मन्थ्रि अमित शाहजों मा सावरायनाय जादोंमोन?

मिरु नखर मन्थ्रि अमित शाहजों मा सावरायनाय जादों होनना सोंनायनि फिननायाव बर'आ बुङो, "बिटिसि सोरखारा मिरु नखर मन्थ्रिखौ एनडिएफबिनि दैदेनगिरि रन्जन दैमारीखौ हगारनायनि थाखायल' नङा नाथाय भारतनि संबिजिरनि 125 दफाखौ सोदांनायनि थाखायबो लोगो हमदोंमोन। ''

बृहस्पतिबारखालि बाक्सा जिल्लानि बरिमाखायाव मुलाम्फागिरिफोरनि जथुम्मायाव बाहागो लानानै प्रमद बर'आ गुबुन गुबुन आयदानि सायाव फिनजाथाय होदोंमोन। बिथाङा बेखौबो बुंदोंमोन दि बिटिआर गोरोबथानि दफाफोरखौ मावफुंनायजों लोगोसे संबिजिरनि 125 दफाखौ सोदांनायनि सायाव सावरायनाय जादों होनना ।

जथुम्मायाव प्रमद बर'आ बुङो दि एनआइएनि केसफोरखौ रायजो सोरखारनो गथायनानै रन्जन दैमारि आरो गुबुन एनडिएफबिनि सोद्रोमाफोरखौ जामिन होनो नाजागासिनो दं।

बेराफारसेथिं, बर'आ बुङो दि सिबिआइनि सिङाव थानाय मोन द' केसफोरखौ बोखारफिन्नो थाखाय नखर मन्थ्रिखौबो खावलायदों। बिटिआरनि मोन 40 काउन्सिल बियाबनि मुलाम्फायारीफोरनो मिथिहोनो थाखाय बेफोरबादि सावरायमेलफोरखौ खुंनाय जादों होननानैबो बुंथियो दि बेफोर बायदि सावरायमेलफोरा बिथांखिफोरखौ मोजाङै मोननो हादों ना मोनाखै, मोनफ्रोमबो बिफाननि बिथांखिफोरा मावफुंजादों ना जायाखै।

गुबुनफारसे

बिटिसि बिसायख'थिआव बि.जे.पि. नि रायजोआरि आफादगिरि दिलिप सइकियानि "दु अर दाय’’ होननाय बिबुंथिनि सायाव बिटिसिनि गाहाय प्रमद बर'आ बुङो, "राजखान्थियाव "दु अर दाय’’ नि जेबो गोनांथि गैया। बियो जा सानदों बेयो बिनिसो बाथ्रा होनना बो बुङो बिथाङा। ''

6. इनफर्समेन्ट डाइरेक्ट'रेटआ बेटिं एप केसआव सा 29 स्तारफोरनि बेरेखायै गसर थिसनो। बे फारिलाइआव साउथ नि गोबां मुंदांखा फाव खालामग्राफोरबो दं, जेरै विजय देवरकन्डा, प्रकाश राज, राणा दग्गुबाती, निधि अग्रवाल बायदि फावखुंगुरफोर दं।

हाइद्राबादाव साइबराबाद पुलिसजों होजानाय एफ.आइ.आर. नि बिथायाव मिरुआरि एजेन्सिआ बे गसरखौ रेजिस्टार खालामदोंमोन। ईडीआ आथिखालाव दायनिगिरिफोरजों एप कम्पानिफोरनि राङारि लेनदेन आरो डिजिटेल सुंजाबथायनि सायाव नायबिजिरगासिनो दं। गासैबो जाथायनि सायाव नायबिजिरगासिनो दं।

19 मार्चखालि साइबराबादनि मियापुर पुलिस थानायाव बेटिं एपखौ फोसावनायनि थाखाय सा 25 सुबुंफोरनि बेरेखायै मोनसे गसर थिसननाय जादोंमोन। दायनिगिरिफोरनि गेजेराव राणा दग्गुबाती, प्रकाश राज, मंचू लक्ष्मी आरो निधि अग्रवाल दं।

बे गासैबो फावखुंगुर आरो मीडिया गोहोम खोख्लैग्राफोरखौ भारतारि साजा आयेननि धारा आरो तेलेंगाना स्टेट गेमिं एक्टनि धारा आरो इनफरमेसन टेक्न'ल'जि एक्टनि धारा नि सिङाव दाय होनाय जादों।

बे खोन्दोफोरा थगायसुला हाबाफारिफोर, गेमिंनि आयेन बेरेखा फोसावनाय आरो अनलाइन थगायनाय बायदि अजदफोराव बाहायजायो।

स्टारफोरा गावसोरनि सायाव होनाय गोब्राब अजदफोरनि सायाव खुगा बेखेवनो हमबाय। मोनसे ससियेल मीडिया पस्टआव, प्रकाश राजआ बुंदोंमोन दि बिथाङा 2016 मायथाइयाव मोनसे गेमिं एपखौ फोसावदोंमोन। नाथाय गावनि गोरोन्थिखौ हमदांनो हानानै, बिथाङा 2017 मायथाइयाव थाथ'दोंमोन। फावखुंगुरआ लिरदोंमोन दि बिथाङा बै समनिफ्राय जेबो गुबुन गेमिं एपखौ फोसावाखै।

बेराफारसेथिं, राना दग्गुबातीआ बुङो दि बिथाङा 2017 मायथाइयाव रोंग'थि-बिथायारि गेमिं प्लेटफर्मखौ फोसावदोंमोन। बिथाङा दाबि खालामो दि बे एपआ आबुङै नंगुबै होनना।

7. गाहाय मन्थ्रि नरेन्द्र मदीया नामीबियायाव गावनि दावबायनायखौ फोजोबखांनायनि उनाव बुधबाराव दिल्ली फारसे रावना होदोंमोन । नामीबियाया मोनबा हादोरफोराव दावबायनायनि जोबथा हादोरमोन । गाहाय मन्थ्रि म'दिआ नामीबियायाव संसदनि जथाय जथुम्मायाव बिबुंथि होदोंमोन ।

बायजो हायुंआरि मन्थ्रि बिफाना मोनसे एक्स पस्टआव लिरदों, "घाना, त्रिनिदाद आरो टबेग', आर्जेन्टीना, ब्राजील आरो नामीबियानि मोनसे जोबोद दिहुनथायारि आरो जाफुंसार मोनबा हादोरफोरनि दावबायनाया जोबबाय।" "

गोदान दिल्ली दावबायनायनि सिगां गाहाय मन्थ्रि म'दिआ नामीबियानि हादरगिरि नेतुम्ब' नन्दी-नादैतवाहजों सावरायदोंमोन। बे जथुमायाव फारसेआरि सोमोन्दोखौ मोनसे गोदान थुलुंगा होनायाव गोसो होनायनि मिजिं थिजादों।

सावरायलायनायनि जोबनायाव भारत आरो नामीबियाया मोनसे दारिमिनारि जौगाथाय मिरु गायसननायनि सायाव मोनसे गोरोबथायाव सागान होदोंमोन। मोन्नैबो हादोरा सावस्रि आरो मुलिनि बिथिङाव हेफाजाबनि सायाव गुबुन मोनसे गोरोबथायाव सागान होदोंमोन। नामीबियाया भारतजों मदद होजानाय सी.डी.आर.आइ. (क'लिशन फर डिजास्टार रिजिनेल इनफ्रास्ट्रक्चर) आरो ग्लबेल बाय'फ्युल्स एलाइन्सआवबो हाबबाय।

बे समावनो, नामीबियानि संसदनि मोनसे जथाय जथुम्मायाव बिबुंथि होनानै, गाहाय मन्थ्रि म'दिआ बुंदोंमोन दि आफ्रिकाया खालि गोथां मुवानि फुंखाल' जानो नाङा, नाथाय "फुन्जि सोरजिनाय आरो गोजोर जौगानायनि बेलायाव सिगांथिं आवगायलांनांगौ"।

भारतआ बुहुमनां आयदाफोराव आफ्रिकानि बिफावखौ मान होयो होन्ना फोरमायनानै बिथाङा बुंदोंमोन दि मोन्नैबो हानजाया गोहो आरो गादबनायजों नङा, बाहागोआरि आरो सावरायनायजों थि खालामजानाय इयुन दानो थाखाय जयै खामानि मावनांगोन ।

बिथांनि दावबायनाय समाव, गाहाय मन्थ्रि म'दिनो हादोरगिरि नेतुम्ब' नन्दी-नदैतवाहया नामीबियानि गोजौसिन नोगोरारि बान्था अर्डार अफ द मस्ट एन्सियेन्ट वेलवितसिया मिराबिलिस होनाय जादोंमोन । बेयो गाहाय मन्थ्रि म'दिनि नामीबियायाव गिबि दावबायनायमोन।

8. भारतनि सासे आइजो खौ गुबुन हादराव फैगो 16 जुलाइआव फासि होनाय जागोन। बुथारनायनि दायनि थाखाय। बेनि सायावनो गोजौसिन बिजिरसालिया बृहस्पतिबाराव येमेनआव केरालानि नार्स निमिषा प्रियानि थैनायनि साजा बिथोननि बेरेखायै दाखिल खालामनाय मोनसे आर'जलाइनि सायाव खोनासंनो गनायथि जायो । नार्स निमिषाखौ येमेनाव 16 जुलाइआव फासि होनाय जागोन । गोजौसिन बिजिरसालिया समबाराव बेनि सिगां बे आयदानि सायाव खोनासंनो हागौ ।

सेभ निमिषा प्रिया इन्टारनेसनेल एक्शन काउनसिलनि जानानै नुजाथिनाय सासे गागि उकिलआ बिजिरगिरि सुधांशु धुलिया आरो जयमाल्या बागचीनि मोनसे बेन्सनि सिगाङाव गोनांथार हियारिंनि थाखाय आरजलाइ होदोंमोन ।

गागि उकिलआ जुक्थि होदोंमोन दि शरिया आयेन बायदियै जायखिजाया सुबुंखौ हगारनो हायो जुदि बुथारजाग्रानि सोमोन्दोआरिआ 'दिया' (दाबि खालामनाय खहा सुफुंनाय) खौ नाजावनो राजि जायो। बै option (अपसन) नि थाखाय सावरायनो हायो। उखिलआ खावलायदोंमोन दि प्रियाखौ 16 जुलाइआव फासि होनायनि सोमोन्दै बुंनानै सुक्रुबाराव गसरनि सायाव थिरांथा लानो खावलायदों।

प्रियानि सायाव इं 2017 माइथायाव येमेननि नोगोरारि तलाल अब्दो महदीखौ बुथारनायनि दाय दं । बिजिरसालिया सिगांनिफ्रायनो प्रियाखौ दायनि थाखाय फासिनि साजा होखाबाय ।

बे आर'जलाइखौ मिरुआव दाखिल खालामनाय जादोंमोन, जेराव थि आयेन बायदियै भुगिनांनाय नखरनो 'दिया' थाबैनो होनो सुबिदा होनानै बिथांजोनि जिउखौ रैखा खालामनो थाखाय गोहोम गोनां राजथान्दैयारि आखाय होनायखौ सुबिदा खालामनो बिथोन बिदोंमोन । आर'जलाइयाव बुंनाय जादों, "फिथाइगोनां राजथान्दैयारि सावरायनायजों लोगोसे, बेयो येमेननि थागिरि भुगिनांनाय नखरनो 'दिया' (ख'हा सुफुंनाय) होनो थाखाय सावरायनायखौ सुबिदा खालामनो हागौ। "

आर'जलाइगिरिया निमिषा प्रियानि जिउखौ रैखा खालामनो थाखाय भारतारि बिबानगिरिफोरनिफ्राय गोख्रोङै आरो गोख्रै आखाय होनो खावलायदोंमोन मानोना फासि होनायनि अक्ट'आ सिगांनिफ्रायनो थि जाखाबाय।