14 July 2025 bodo top news. ABSU BTR ULFA etc etc news ~ Bodoinfo.com

दिनै 14 जुलाइ 2025 समबार साननि दासिमनि गोदान मोननैसो गोनां खौरांफोरजों दिनैनि सानखौ नोंथांमोना जागायदो।

1. नोंथाङा नोंथांनि साखा खबब्रै गारिखौ भारायाव होनो सानदों नामा? बिदि सानदोंब्ला सांग्रां जा। मानोना गारि भारायाव होनायनि थांखिजों नोंथांनि खस्तनि रांजों बायनाय गारिआ गेजेर हायुंआरि गारि खावनायनि फान्दायनायाव गोग्लैनो हागौ। मानोना बावैसो बेबादि जाथाया सोराङाव फैदों।

आसाम पुलिसा गेजेर हायुंआरि गारि खावनाय बेंखननिफ्राय स्करपिय', एक्स-यूवी, थारजों लोगोसे बेसेन गोसा साखा खबब्रै गारिफोर बोखांनो हादों। आसाम पुलिसा सोनाब बेंगलनिफ्राय खावनाय गं दाइन साखा खबब्रै गारिफोर बोखांनो हादों। गारिफोरखौ नेपाल थांनाय लामायाव सिलीगुड़ीनिफ्राय बोखांनाय जादोंमोन।

डि.सि.पि. अमिताभ बसुमतारीआ बुंदों, "नोगोरमानि पुलिसा गारि खावनाय रेकेटनि बेरेखायै अपारेसन खालामनायाव गोबां जाफुंसार जानो हादों । मोनसे अजदनि सायाव बिथा खालामनानै 6 जुलाइखालि सानमारी पुलिस थानायाव मोनसे केस रेजिस्टार खालामनाय जादोंमोन । बे केसनि सायाव बिथा खालामनानै पुलिसआ सिलीगुड़ीआव सिग्रोमनाय हाबाफारि लादोंमोन । सिलीगुड़ीनि गाहाय नोगोर पुलिस थानानि हेफाजाबाव गं दाइन गारिफोरखौ बोखांनाय जादों । ''

खौरां मोन्नाय बायदिब्ला गोबां गारिफोरखौ नेपालाव दैथायहरनाय जादों। आसामनिफ्राय बिसोर बेसेबां गारिफोरखौ लांदोंमोन बेनि जेबो थि फोरमायथि गैया। बबेखानि, गोबां सुबुंफोरा बे जाथायनि सोमोन्दै अजद होदों। ''

"सोनाब बेंगल पुलिसाबो बे जाथायखौ गाव हारसिङैनो नायबिजिरगासिनो दं । बे जाथायनि गुबै मास्टारमाइन्ड समनाथ मुखर्जीआबो सोनाब बेंगलाव बेफोरबायदि जाथाय खालामदोंमोन । पुलिसा गाहाय मास्टारमाइन्ड सोमनाथ मुखर्जीखौ खाबाय । बे बेंखनजों सोमोन्दो थानाय गोबां सुबुंफोर दं । बेनि नायबिजिरनाया सोलिगासिनो दं, " बिथाङा बुंबावो।

2. आसामजों लोगोसे 2026 मायथाइयाव हादोरनि मोनद' रायजोआव बिधान सभानि बिसायख'थि जागोन। बे रायजोफोरा जाबाय आसाम, बिहार, केराला, पुडुचेरी, तामिलनाडु आरो सोनाब बेंगल। बेनिखायनो बे बिसायख'थिनि सिगां भारतनि बिसायख'थि आयगा भतार फारिलाइखौ नायफिननायनि सायाव मोनसे जरिप खालामदोंमोन।

बावैसो भारतनि बिसायख'थि आय'गआ बिहारआव बिसायख'थि फारिलाइ सोदांनायनि मोनसे जरिप खालामदोंमोन। बिसायख'थि आय'गनि थान्दैफोरा रायजोनि बुथफोराव बिसायख'थि फारिलाइखौ नायबिजिरनो न'-न' थांदोंमोन।

मख'जाथावदि, आय'गजों खालामजानाय जरिबाव गोबां गुबुन हादोरफोरनि आयेन बेरेखा भ'ट होग्राफोरनि मुंफोरा सोराङाव फैदों। बिसोरो थि नङै महरै बिहाराव थादोंमोन आरो गोबां सानफोरनिफ्राय गावसोरनि भ'ट होनायखौ बाहायगासिनो दं। बिसोरनोव थि फोरमानलाइफोर गैया। जेबो अरायथा थाग्रा फोरमानलाइ गैया।

रायखांनो गोनां दि बे जरिपनि बादिब्ला नेपाल-बांग्लादेशजों लोगोसे म्यानमारनि गोबां सुबुंफोरा आयेन बेरेखायै बिहारनि भ'ट होग्रा महरै मुं थिसनगासिनो दं आरो भट होबोगासिनो दं। दायो बे नायगिदिंनायनि उनाव आयेन बेरेखा भ'ट होग्राफोरनि मुंखौ फारिलाइनिफ्राय बोखारनाय जागोन होनना आय'गआ बुंदों। बिहारनि उनाव गुबुन रायजोफोराव फारि फारियै बिसायख'थि फारिलाइखौ नायफामनायनि खामानिखौ जागायजेनगोन।

3. होखारजानाय सुबुंफोरनि बिटिआरआव हाबनायखौ होबथानो थाखाय एबसुआ सोरखारखौ खावलायदों। आसामनि गुबुन गुबुन जायगायाव खालामनाय एभिकशन एबा सोरखारि हा दखल खालामनायफोरखौ होखारनायनि उनाव बे होखारजानायफोरा जाहाथे बितिआर ओनसोलाव हाबनो हाया बेनि थाखाय जिल्ला खुंथाय आरो सोरखारखौ बेनि सायाव राहा लानो खावलायदों। 2003 मायथाइनि बितिसि गोरोबथा 6थि सिदिउल दानायनि सिगांनि थाफैनायफोरा गोजोनै दं। बेनि बादै 2003 नि उनाव फैनाय, दा हाबफैनायफोरनि बजायखौ लानो हानाय नङा होनना एबसुनि आफादगिरि दिपेन बर बिथाङा आफादनि जानानै खौरांमेलनि गेजेरजों रोखा खालामना होयो।

4. दुलाराय बर' फरायसा आफाद (एबसु) आ आसाम मावख'आरि राव (सोदांनाय) आइन, 2020 नि आयेन बायदियै फैबाय थानाय बिटिसि बिसायख'थि 2025 नि इलेक्टरेल रलखौ असमियाजों लोगोसे बर' रावावबो फोसावनो दाबि दैखांदों।

ककराझारनि बड'फा हाउसआव मोनसे खौरां मेलआव एबसुनि आफादगिरि दिपेन बर'आ रायजो सोरखारखौ द'थि फारिलाइनि सिङाव थानाय बड'लेन्ड टेरिटरियेल रिजन (बीटीआर) नि सिङावल' नङा, गोबां बर' सुबुं अनजिमा थानाय जिल्ला आरो महकुमाफोराव गासैबो मावख'आरि थांखिफोरनि थाखाय बर' रावखौ बाहायनायखौ रोखा खालामनो गोख्रोङै खावलायदों।

बिथाङा Assam Official Language (Amendment) Act, 2020 नि धारा 5ए खौ मुंख'दोंमोन, जाय रोखायै बर'खौ आसामाव लोगो मावख'आरि राव महरै गनायथि होयो। बे आयेना थि खालामो दि रायजो सोरखारा फोसावनाय बायदियै बर' रायज्लायग्रा सुबुं अनजिमा थानाय ओनसोलफोराव बर'खौ मावख'आरि थांखिफोरनि थाखाय बाहायनो हागौ।

दिपेन बर'आ नारसिननानै बुङो दि बर'खौ भारत संबिजिदनि दाइनथि फारियाव सोजानायलाय गुबुन मावख'आरि रावफोरजों समान महरै लानांगौ होनना।

बिथाङा 14 एप्रिल 2025 मायथाइनि रायजो बेंगिरिनि फोसावलाइखौबो मुंख'दोंमोन, जाय इंराजिजों लोगोसे बिटिआरआव गासैबो मावख'आरि खामानिफोराव बर'खौ बाहायनो बिथोन होयो, फारसेथिं अस'मिया गासै रायजोनि गासिबो मावख'आरि खामानिफोरनि थाखाय गोनांथार जायो।

बेजों लोगोसे, एबसुआ रावारि सोफादेरनायनि फारसे बावैसो लानाय आगानफोरखौ बरायदोंमोन।

5. तेलुगु सावथुन मुलुगनि आरोबाव सासे गोजों हाथरखिया गोग्लैबाय। मुंदांखा फावखुंगुर प्रद्मश्रीनि बिमुंजों मान होजानाय कटा श्रीनिवास रावआ दा बे बुहुमाव गैलिया। मुंदांखा फावखुंगुरआ रबिबार, 13 जुलाइखालि हायद्राबादाव गावनि थाग्रा खुलियाव रुंसारि जायो।

गोबां तेलेगु सावथुनफोरजों लोगोसे बलीवुड सावथुनफोराव फाव खालामनाय फावखुंगुरआ 83 बोसोर बैसोआव बे बुहुमखौ नागारो। कटा श्रीनिवास रावआ थांनाय माखासे साननिफ्रायनो बोराय बैसोजों सोमोन्दो गोनां बेरामफोरजों जुजिगासिनो दंमोन । गासै सावथुन मुलुगा दा फावखुंगुरनि रुंसारि जानायाव दुखु फोरमायदों ।

रोंगथि गोनां फावखुंगुरनि रुंसारि जानायनि खौरांआ बयखौबो सोमोनांहोदों। तेलुगु सावथुननि मेगास्टार चिरंजीवीआ क'टा श्रीनिवासनि गोथै सह'खौ मान बावनो आरो दुखु मोन्नाय नखरनो दुखु फोरमायनो रुंसारि रावनि न'आव सौहैदोंमोन।

तेलेंगानानि गिबि मन्थ्रि रेवन्थ रेड्डीआ तेलुगु फावखुंगुर कटा श्रीनिवासनि रुंसारि जानायाव दुखु फोरमायनो थाखाय ससियेल मेडियायाव थांदोंमोन। अन्ध्र प्रदेसनि गिबि मन्थ्रि बिथाङाबो दुखु मोननाय फोरमायदों।

6. रबिबारनि हर फुंनि समाव नागालेन्ड आरो म्यानमार हादोर गेजेरारि सिमा लंवानिफ्राय अरुणाचल-म्यानमार हादोर गेजेरारि सिमा पांस'पसिम आल्फा उदां, आर.पि.एफ./पि.एल.ए. नि गुबुन गुबुन बादाफोराव ड्र'नजों मोनसे गिदिर गाग्लोबनाय जाथाय जादोंमोन। बे गाग्लोबनायाव आल्फानि गाहाय परिषदनि आफादगिरि लेफतेनेन्त जेनेरेल नयन असमजों लोगोसे गनेस असम आरो प्रदिप असम नि थैनायजों लोगोसे गोबां सोद्रोमाफोरा जोखोम जादों होनना असमिया खौरां बिजोंफोराव बुंनायखौ नुनो मोनदोंमोन।

उल्फा उदां आ उनाव गाग्लोबनायनि सोमोन्दै मोनसे बिबुंथिनि गेजेरजों रोखा खालामदोंमोन आरो सिमान लादोंमोन दि साथाम सुबुंफोरा बुथारजादोंमोन।

बे समावनो, मोनसे बिबुंथियाव, उल्फा उदांआ बुंदोंमोन दि गाग्लोबनाया भारतारि रौनियाफोरजों खालामजादोंमोन होनना। बे ड्र'न गाग्लोबनायाव उल्फा उदांनि लवार काउनसिलनि आफादगिरि लेफ्टिनेन्ट जेनेरेल नयन आसामनि जोबथा बिदाय होनाया सोलिगासिनो दंमोन बे समावनो मिसाइल गावदोंमोन होनना। गाग्लोबनायाव ब्रिगेडियानि गणेश असम आरो कर्नेल प्रदीप असमआबो जिउ गोमादोंमोन आरो गोबां गुबुन मावख'आरिफोर आरो सोद्रोमाफोरजों लोगोसे नोगोरारिफोराबो जोखोम जादोंमोन होनना।

गुबुनफारसे भारतारि रौनिया हानजाया आफ्ला उदांनि बिथायाव ड्र'न गाग्लोबनायखौ नेवसिगारदों। आयेन बेरेखा आफादा रबिबाराव दाबि खालामदोंमोन दि म्यानमारआव आफादनि मावख'खौ भारतारि रौनियाफोरा फुङाव ड्र'नजों नोजोर होदोंमोन होनना।

बबेखानि, मोनसे मावख'आरि बिबुंथियाव, भारतारि रौनिया हानजाया बेफोर दाबिफोरखौ नेवसिगारदोंमोन। गुवाहाटीनि पिआरअ' डिफेन्स लेफ्टिनेन्ट कर्नल महेन्द्र रावतआ होनाय खौरांनि बायदिब्ला, बेफोरबायदि अपारेसननि बागै भारतारि रौनियाफोरनिफ्राय जेबो खौरां गैया।

बेनिखायनो, भारतारि रौनिया हानजाया दिनैनि गाग्लोबनायखौ नेवसिनायनि उनाव, सरासनस्रायै गाग्लोबनायनि सन्देह'नि आसिआ म्यानमारनि रौनियाफोरसिम सौहैबाय।

बे बिथिङाव गिबि मन्थ्रि ड. हिमन्त बिश्व सर्मायाबो फिनजाथाय होदों।

गिबि मन्थ्रिया सिगाङावनो रोखा खालामखाबाय दि आल्फा उदांनि बादाखौ आसामनि हानिफ्राय गाग्लोबनाय जायाखै। आल्फा बादायाव गाग्लोबनायनि सायाव बिबुंथि होनानै गिबि मन्थ्रि ड: हिमन्त बिश्व सर्माया बुङो, "आं आल्फानि मोनसे खौरां मोन्दोंमोन दि दिनै हर फिंनि समाव आल्फा बादायाव सोरबा बमा बेरफ्रुहोनाय आरो ड्र'न गाग्लोबनाय जादों। आसाम पुलिसा बे गाग्लोबनायाव लोब्बा गैया। आसामनि हानिफ्रायबो जेबो गाग्लोबनाय जायाखै। बे आयदानि सायाव बांसिन फोरमायथिनि गोनांथि दं। जेब्ला बेबादि जाथाय जायो अब्ला सरासनस्रायै रौनियाफोरा बिबुंथि होयो। भारतारि रौनियाफोरनिफ्राय दासिम जेबो रोखा खालामनाय जायाखै होननाबो बुंदोंमोन बै समाव बिथाङा। "

7. आसामनि फुकन ताइतलनि सासे आइजोआ आमेरिकानि होबथाजानाय मुलुगाव हाबदों होनना मोनसे फोसावनाय जानायनि उनावनो रायजोआव गोबां फिनजाथाय जादोंमोन। रावबो साननो हायाखैमोनदि आसामनि सासे आइजोआ बेबादि होबथाजानाय मुलुगाव आगान होगोन।

डिब्रुगर पुलिसआ सनिबारखालि जाथायनि सायाव नायबिजिरनायनि उनाव तिनसुकियानि प्रतिम बरा मुंनि सासे लाइमोनखौ खादोंमोन, बेनि खौरांखौ मैयानो होखाबायमोन। डिब्रुगरनि पुलिस सामलायगिरि सिजल आगरवालआ तिनसुकियानि प्रतिम बराखौ हराव सोंनाय फिननाय खालामनायनि जोबनायाव गासैबो जाथायखौ लानानै मोनसे खौरां मेल खुंदोंमोन। बेयावनो मोननैसो गोनांथार बाथ्राफोर बुंदों बिथाङा।

एसपीआ मोनसे खौरां मेलाव बुङो, "जों अजद मोनदोंमोन दि सावगारि आरो भिडिअ'फोरखौ म'र्फ खालामनाय जादों आरो ससियेल मेडियायाव फोसावनाय जादों। गासैबो सावगारिफोरा AI सोरजिनाय आरो morph खालाममजानाय। बे अजदनि उनाव जों मोनसे केस रेजिस्टार खालामो। बे गसरखौ 12 जुलाइआव रेजिस्टार खालामनाय जादोंमोन।

बिथाङा बुंबावदों, "गाग्लोबजाग्राया मोनसे अजद होनाय समाव मोनसे इंस्टाग्राम पेजखौ मुंख'दोंमोन। जेब्ला आं बै इनस्टाग्राम पेजखौ माबोरै खुलिनाय जादोंमोन बेखौ नागिरदोंमोन अब्ला मोनसे फन नम्बर मोनदोंमोन। बै जानबुं नम्बरखौ नायग्रोमबाय थानाय समावनो आं प्रतिम बरा मुंनि सेंग्रानि सिनायथिखौ मोननो हादोंमोन, जायखौ दायो हमनाय जादों। गाग्लोबजाग्राया प्रतिम बराखौ सिनायो होन्ना रोखा खालामनायनि उनाव बिखौ हमनानै दोननाय जादों। "

तिनसुकियायाव भारा न'निफ्राय पुलिसजों खाजानाय प्रतिम बरा मुंनि सेंग्रानिफ्राय गंसे लेपटप, गंनै मबाइल फन, गंसे हार्ड डिस्क, टेबलेट, पेन ड्राइव आरो गोबां सिम कार्ड जब्द खालामनाय जादों होनना एसपिआ फोरमायो। बे खामानिखौ मावनो थाखाय गोबां software (सफ्टवेयर) बाहायनाय जादों। बे सफ्टवेयरखौ AIनि फट'-भिडिअ' बानायनो थाखाय बाहायदोंमोन। समाजारि बिजों जायखौ बाहायनानै बे सावगारि भिडिअ'खौ फोसावनाय जादों, बेखौ नायबिजिरनाय जादों। "

एस.पी.आ बुंदोंमोन, "थांखिया खालि गावारि गाग्लोबनाय आरो बिथांनि मान-सन्मानखौ गाज्रि खालामनायमोन। बिसोरहा सिगाङाव माबा मोनसे सोमोन्दो दंमोन बेखौ लानानैनो खामानिखौ मावदोंमोन। बियो दायो फट' आरो वीडिय'फोरखौ बानायनानै आरो गुबुन-गुबुन बिजोंआव होनानै रां मोनदों। "

अग्रवालआ बुंबावो, "दासिम 10 लाख रां बुथुमनाय जाबाय। बेनिखायनो बे हाबाखौ सोलिहोबाय थादोंमोन। सेंग्राया सासे मेकानिकेल इन्जिनियार। दायो जों मिथिनो मोनबाय दि फट'-भिडिअ'फोरा गासैबो नंखाय। बेनिखायनो फुकन ताइतलनि आइजोनि जेबो सावगारि भिडिअ'खौ रावबो सेयार खालामनो हानाय नङा। एसपीआ बुंदों, "जुदि बे आयदानि सायाव माबाफोर नुयोब्ला आयेनारि राहा लानाय जागोन होनना।

8. मोन 14 गोजौ थाखोनि बर' आफादफोरा रबिबारखालि ककराझारनि दुलाराय बर' फरायसा आफाद (एबसु) बड'फा हाउसनि मिरु मावख'आव बरनि जेंनाफोरनि सायाव सावरायनो आरो बर' समाजनि इयुननि थाखाय खौसेयै मोनसे सावरायलायनाय हाबाफारि लादोंमोन।

बर' साहित्य सभा, एबसु, बर' समाज, ट्राइबेल संघ, दुलाराय बर' आइजो अनसाय आफाद, बर' हरिमु आफद आरो बारग' बिएलएफ वेलफेयार एस'सियेसनजों लोगोसे गुबुन गुबुन आफादफोरनि थान्दै आरो दैदेनगिरिफोरा बे मेलाव गोख्रोङै बाहागो लादोंमोन।

बे जथुमनाया बर' फसंथानफोरनि गेजेराव खौसेथिखौ गोख्रों खालामनायनि फारसे मोनसे गोनांथार आगानखौ दिन्थियो। सावरायनाया आथिखालनि समाजारि-राजखान्थियारि जेंनाफोर, हारिमुआरि संरैखाथि, हारिनि मोनथाय आरो मोनसे गोजोन आरो दावगालु बर' समाजनि लामानि सायाव नोजोर होदोंमोन होनना मिथिना मोनदों

9. आगुनि गुबुन हादोरारि नेहाथारि हर्षवर्धन श्रृंला, 26/11 मुम्बाइ उदखारि गाग्लोबनाय जाथायनि जुनिया सोरखारि उकिल उज्ज्वल निकम, केराला बि.जे.पि. नि दैदेनगिरि सी सदानन्दन मास्टर आरो जारिमिनगिरि मीनाक्षी जैनखौ फारियै रायजो सभानि थाखाय मुं थिसननाय जादों। हादोरगिरि द्रौपदी मुर्मुआ बे साब्रै सुबुंफोरखौ रायजो सभानि थाखाय मुं सायख'दोंमोन।

हादोरगिरिया आजिरा मोननायनि थाखाय सोरजिनाय लांदां जायगाफोरखौ आबुं खालामनो थाखाय सायख'जानाय सोद्रोमाफोरनि मुंखौ रायजो सभायाव सायख'दोंमोन। हादोरगिरिया बिथांमोनखौ भारतनि संबिजिदनि 80 थि दफानि खोन्दो (1) नि दालाय-खोन्दो (ए) जों होजानाय गोहोफोरखौ बाहायनानै रायजोआरि सिबिथाय आरो वृत्तिनि साबसिनखौ गनायथि होनानै मोनसे मख'जाथाव आगानजों रायजो सभायाव मुं सायख'दों।

बे समावनो, हादोरगिरिया रायजो सभायाव गुबुन-गुबुन आयदानि सा 12 मुंदांखा सुबुंफोरखौ मुं सायख'दोंमोन।