23 July 2025 top bodo news. BTC election. draft voter list etc etc news. ~ Bodoinfo.com

दिनै 23 जुलाइ 2025 बुधबार साननि दासिमनि मोननैसो गोनां खौरांफोरजों दिनैनि सानखौ नोंथांमोना जागायदो।

1. असम रायजो बिसायखथि आयोगा बितिसिनि 40 बितिसि बियाबनि सिंनि ड्राफ्ट फोटो इल्टर रोलखौ दिहुनना होयो। बितिआर आव सोनाय जादों गं 81 गामिफोरखौ।

ड्राफ्ट इलेक्टरेल र'लनि बायदिब्ला, बितिसि आव दं:

गासै बियाबफोर: 40

गासै भट मिरुफोर: 3,277

गासै भत होग्राफोर दं: 26,69,396

बेनिनो हौवा भत होग्रा दं: 13,29,742

हिनजाव भत होग्रा: 13,39,637

आरो थामथि आथोन एबा गुबुनफोर दं: गासै 17

रोखाथि आरो रायजो राजानि बाहागो लानायखौ रोखा खालामनो थाखाय, ड्राफ्ट इलेक्टरेल र'ल (सावगारि गैयालासे) दा गाहायाव होनाय प्लेटफर्मफोरनि गेजेरजों भ'ट होग्राफोरा मोननो हागोन:

1. सार्कल अफिसारनि मावख'निफ्राय

2. खोन्दो जौगाखां मावख'गिरिनि मावख'

3. नोगोर खुंथाइ, टाउन कमिटि, लेङाइ रेजिसट्रि मावख', पुलिस थाना, साहा बागाननि मावख', गाव पन्चायत आरो भिसिडिसिनि मावख'फोराव।

4. अ.इ.आर.एम.एस. पर्टेल (https://ermssec.assam.gov.in) आरो जिल्ला खुंथाइनि वेबसाइटफोरावबो मोननो हागोन।

भ'ट होग्राफोरा गावसोरनि इपिक नम्बरखौ बाहायनानै गावसोरनि मुंफोरखौ नायनो हागोन एबा मावख'आरि वेबसाइटाव सिटिजेन कर्नारनि गेजेरजों गाव-गावनि पलिं स्टेशननि ड्राफ्ट र'लखौ डाउनलड खालामनो हागोन।

मखजाथावदि बे जोबथा भतार फारिलाइ नङा, बेखायनो नोगोरारिफोरा 5 आगस्त 2025 मायथाइसिमनि गेजेराव ड्राफ्ट इलेक्टरेल र'लआव हाबनायनि सोमोन्दै दाबि आरो अजद दैखांनो हागोन। माबाफोर गोरोन्थि जाना दंब्लाबो मोजां खालामना लानो हागोन।

फर्म आरो बिखान्थिफोरा रिटार्निं मावख'गिरि (आर.अ.), लेङाय रिटार्निं मावख'गिरि (ए.आर.अ') आरो अनलाइननि मावख'फोराव दं।

2. भाइरेल भिडिअ'नि उनावनो बंगाइगाव पुलिसा सन्देह' गोनां बांग्लादेशीफोरनि बेरेखा सिग्रोमदोंमोन। पुलिस हानजाया निउ बंगाइगांव रेलवे जंक्शनाव रायजोनि बायजोनि गोबां सुबुंफोरनि फोरमानलाइफोरखौ नायबिजिरदोंमोन आरो बिसोरखौ सोंदोंमोन।

बे अपारेसनखौ बंगाइगाव पुलिसा रेलवे पुलिसनि हेफाजाबाव बै समाव खालामदोंमोन, जेब्ला रायजोनि बायजोनिफ्राय गोबां सन्देह' गोनां सुबुंफोरा आसाम आरो सा-सानजायाव फैनायनि बाथ्रा सावरायजादोंमोन।

बेखौ नोजोर होनो गोनां दि दिल्ली, हरियाणा बायदि रायजोफोराव सनदेह' गोनां बांग्लादेशी नोगोरारिफोरनि बेरेखायै सिग्रोमनाय सोलिबाय थानाय समावनो गोबांजौ सनदेह' गोनां सुबुंफोरा ट्रेनजों आसामाव हाबफैदों। रायजोनि बायजोनिफ्राय हाजिरा मावग्रा बे बांग्लादेशी नोगोरारिफोरा दिल्ली पुलिसजों हमजानायनि सिगां ट्रेनजों आसामाव खारबोदोंमोन, नाथाय जोबनायाव बंगाइगाव पुलिसनि जेयाव गोग्लैदोंमोन।

पुलिसा मंगलबारनि फुंनिफ्रायनो गुबुन गुबुन ट्रेनफोरजों आसामाव फैनाय दावबायारिफोरखौ मोजाङै नायबिजिरनायनि उनाव सा दाइन बांग्लादेशी नोगोरारिफोरखौ हमनो हादोंमोन।

हमजानाय बांग्लादेशीफोरा बुंदोंमोन, "जों बांग्लादेशनिफ्राय फैदों। मैया मोनायाव फैदोंमोन । जमालपुराव दंमोन । आं चेन्नाइआव खामानि मावनो फैदों । जों सा दाइन दं । "

रायखांनो गोनां दि थांनाय साननैसोआव हादोरनि गोबां रायजोफोराव आयेन बेरेखा बांग्लादेसिफोरनि हेंथायै गोख्रों नायबिजिरनाय जादोंमोन। दिल्ली, महाराष्ट्र, गुजरात बायदिफोराव बांग्लादेशीफोरनि बेरेखायै नायबिजिरनाया गोख्रोंसिन जाबाय। गुबुन फारसेथिं, गोबां बांग्लादेसिफोरखौ खानाय जादों आरो दैथायहरफिननाय जादों। जायनि जाहोनाव बे बांग्लादेशी नोगोरारिफोर जाय आथिखालाव गुबुन हादोरसाफोराव बायदि बायदि हाबाफोराव नांथाबना दं, आसामाव हाबनो नाजागासिनो दं। बेनि थाखाय रायजोनि पुलिस खुंथाया थियारि जाना दंखायो।

नाथाय दा सोंथिया बेनोदि बे बांग्लादेसिफोरा माबोरै भारताव हाबफैखो? उनाव बेखौ नायनाया गोनांथार जागोन दि पुलिस आरो हमजानाय बांग्लादेसिफोरा बे बिथिङाव मा बुङो।

3. डायना दायनि बुथारनाया समाजाव सोलिबाय थानाय बयनिख्रुइबो गिथावना खोमसि फोथायनायफोरनि गेजेराव मोनसे । बे दाइनिनि मुङाव सिगां समफोराव आसामनि गुबुन-गुबुन ओनसोलफोराव गोबां सुबुंफोरा जिउ खोमानांदोंमोन । बिश्वनाथ जिल्लायावबो गोबां सुबुंफोरखौ दाइनानि सन्देहआव थैनाय नुनो मोन्दोंमोन । बेयो 2015 मायथाइनि बाथ्रामोन।

बै समाव, दाइनानि सन्देहआव आसाम-अरुणाचल सिमा ओनसोलाव माखासे सुबुंफोरा सासे आइजोखौ साजा होदोंमोन।

सासे बैसो जानाय आइजोखौ गावनि न'निफ्राय होसोहरनाय जादोंमोन आरो भीमाजुलि गामियाव सासे दाइनिनि सन्देहआव खास्रि-बिस्रियै बुथारनाय जादोंमोन । बिश्वनाथनि उफ्रा जिल्ला सत्र बिजिरगिरि बिजिरसालिनि सासे रायजोआरि उकिल जान्हवी कलिताया बुंदोंमोन दि बिजिरसालिया बुथारनायाव लोब्बा थानाय साब्रै सुबुंफोरखौ गाहाय दायनिगिरि महरै दायनिगिरि खालामदोंमोन ।

कलिताया बुंदोंमोन, "खौरां बायदिब्ला, 2015 माइथायनि 20 जुलाइ आव जानाय जाथायनि बेरेखायै बिस्वनाथ चारियाली पुलिस थानायाव मोनसे केस रेजिस्टार खालामनाय जादोंमोन। बे केसनि सायाव बिथा खालामनानै नायबिजिरनाया जागायजेनो। नायबिजिरनायनि जोबनायाव जाथायजों लोब्बा थानाय सा 17 दायनिगिरिफोरखौ पुलिसा खायो आरो जोबथेसालिनि बेंथेसिम दैथाय हरो। गुबै दायनिगिरिफोरखौ गामिनि अनिमा रंहांपी आरो दिलिराम बे होनना सिनायथि होनाय जादोंमोन। बिसोरनि दैदेन्नायाव 30/35 सो सुबुंफोरनि मोनसे हानजाया लीला अरांनि बिमाखौ सासे दाइना बुंदोंमोन आरो ननिफ्राय बोना लांनानै दैमानि रुगुङाव खर' दानस'नानै बुथारदोंमोन।

बे केसआ गोबाव समनिफ्रायनो सोलिगासिनो दंमोन। बे समाव सासे दायनिगिरिया जिउ गोमायो आरो गुबुन सा 16 नि बेरेखायै केसआ सोलिबाय थादोंमोन। समबारनि बेलासिनि 5 रिंगासोआव।बिश्वनाथ चारिआलि उफ्रा जिल्ला आरो सत्र बिजिरगिरि कुमुद बरुवानि बिजिरसालिया दिलिराम बे, अनिमा रंहांपी, राजु बे आरो नरेन रंहांखौ फुंनि 30 रिंगायाव भारतारि साजा आयेन 302 नि सिङाव जिउ जोबजासिम जोबथेसालिनि साजा फोसावदों होनना मिथिना मोनदों।

4. मैया माहारियारि राजालामा 27 नि मुखुब बाहागोआव चिरां जिल्लानि काशिक'त्रायाव मोनद' गारिफोरनि मोनसे गिदिर लामा जाब्रबथाय जायो।

बासुगावनि नमित गायरी मुंनि सासे लाइमोनआ गाज्रि जानाय गंसे गारिनि सिङाव थाबथानानै जिउ गोमायो। बिथांनि बिनानाव रितु गयारीखौ गोब्राब थासारियाव देहा फाहामसालियाव थिसननाय जादों। गोबां गुबुनफोराबो गोब्राब जखम जादोंमोन आरो खाथिनि देहा फाहामसालियाव लांनाय जादोंमोन।

जाब्रबथाया गोबां गुलाय-गुजाय थासारि सोमजिहोदोंमोन आरो खहा खालामदोंमोन, जेराव राजालामायाव गोबां गारिफोरा गाज्रि जादोंमोन।

5. नंखाय एपइन्तमेन्त लेतारजों बितिसि नि सिङाव साख्रि लानो फैना लाना हमजादों। नूर हुसैन मुंनि नलबारीनि सासे सुबुं, जाय नंखाय थिसनथाइ लाइजाम राननायनि थाखाय हमजादों। पुलिसआ फारियै शशांक दास आरो गुबुन सानै अमुल्य बसुमतारी आरो लंकेश्वर दासखौबो खादों। मख'नो गोनां दि साब्रै दायनिगिरिफोरा बिटिआरआव हाग्रा बिफाननि साख्रिनि नंखाय थिसनथाइ बिलाइ गथायदोंमोन। जाथायनि गुवारै फोरमायनाय बायदिब्ला, नलबारि सदर पुलिस थानायाव होनाय केसनि सायाव बिथा खालामनानै नंखाय थिसननायनि मास्टारमाइन्ड शशांक दासखौ नोगोरमानि बेलतलानिफ्राय खानाय जादोंमोन। हमजानाय शशांक दासनि न'आ नलबारीनि मास्टारपारायाव दं।

मख'नो गोनांदि नलबारिआव नंखाय थिसनथाइ बिलाइ हरनायनि जाहोनाव बे केसखौ चिरां पुलिसआ नलबारि पुलिसनो दैथाय हरदोंमोन । नलबाड़ीनि राजखान्थि दैदेनगिरि नूर हुसेनखौबो हमजानाय मास्टारमाइन्ड शशांक दासनि सिमान लानायनि सायाव बिथा खालामनानै खानाय जादोंमोन । नलबाड़ी जिल्लानि पुलिस सामलायगिरि सुप्रिया दासआ बुंदोंमोन दि हमजानाय सुबुंफोरखौ गावसोरनि माराथन सोंनाय फिन्नाया सोलिगासिनो दं ।

नलबाड़ी जिल्लानि पुलिस सामलायगिरिनि बायदिब्ला, बेंखनआ गासै सा 18 सुबुंफोरनो नंखाय थिसनथाइ बिलाइ होदोंमोन। पुलिस सामलायगिरि सुप्रिया दासआ बुंदों, "नलबाड़ी सदर पुलिस थानायाव रेबथुमनाय केसफोरनि सायाव बिथा खालामनानै बिसोरखौ खानाय जादों। चिरां जिल्लानि ब्लक हाग्रा मावख'गिरिनि मावख'निफ्राय मोनसे खौरां फैदोंमोन दि सा 18 सुबुंफोरा खामानियाव हाबनो थाखाय थिसनथाइ बिलाइ लानानै बै मावख'आव सहैदोंमोन। नाथाय थिसनजानाय लाइजामफोरा नंखाय बायदि नुयो। ब्लक हाग्रा मावख'गिरिफोरा बुङो दि बिसोरखौ नंखाय थिसननाय लाइजाम होनना सन्देह खालामनाय जादों। बेखौ साख्रिनि थगायनाय होनना सन्देह खालामनानै काजलगाव पुलिस थानायाव खौरां हरो। काजलगाव पुलिस थानानि पुलिसा गिबि नायबिजिरदोंमोन आरो मिथिनो मोनो दि नलबारीनि सासे सुबुङा बे थिसनथाइ लाइजामफोरखौ रानदोंमोन। बेनि उनाव केसखौ बेयाव दैथायहरनाय जादोंमोन। बेनि उनाव, नलबाड़ी सदर पुलिस थानानि पुलिसआ बिखौ गुवाहाटीनि बेलतलानिफ्राय खायो। "

6. चिरां जिल्ला एक्साइस बिफाननि सुपारिनटेन्डेन्ट गौरांग चौधुरी आरो एक्साइज इन्सपेक्टर दिब्यज्योति शर्माखौ बिबानखौ मोजाङै मावि एबा गोसो गैयैनि थाखाय सासपेन्द खालामनाय जादोंमोन।

आसाम रायजो बेंगिरिजों सागान होजानाय मोनसे बिथोनआ चिरां जिल्ला आबकारी बिफाननि सामलायगिरि गौरांग चौधरी आरो दिब्यज्योति शर्माखौ गावनि खामानि मावग्रा ओनसोलाव आयेन बेरेखा जौनि गुफा गायसननाय, सोरखारि खाजोनाखौ खहा खालामनाय आरो रायजो राजानि सावस्रिखौ हुमखि होनाय बायदि जाथायनि उनावबो जेबो राहा लायालासिनो गावसोरनि मावनांगौ हाबायाव सांग्रांथि गैयैनि दायआव समबारनिफ्राय सासपेन्द खालामो होनना मिथिना मोनदों।

मख'नो गोनांदि 19 जुनखालि चिरां जिल्ला एक्साइस बिफानखौ मिथिहोयाजासे बंगाइगांव जिल्लानि आबकारी बिफाननि गाहाय़ आरो गुवाहाटीनि संगालिफोरनि मोनसे हान्जाया जयै जिल्लानि भारत-भुटान सिमायाव थानाय सान्तिपुर ओनसोलाव सिग्रोमदोंमोन आरो गोबां बिबांनि आयेन बेरेखा आरो नंखाय जौ बानायग्रा फेक्टरिखौ बोखांदोंमोन। आबकारी बिफाना बे आयेन बेरेखा नंखाय जौ फेक्टरिनिफ्राय 50 लाख रांनि आयेन बेरेखा जौनि गोथां मुवा आरो गुबुन गुबुन ब्रेन्दनि जौ जब्द खालामो।

बिथोनाव बुंनाय जादों दि जाथायनि उनाव, आबकारी आय'गनि सानै गोजौ थाखोनि आबकारी मावख'गिरिफोरनो जाहोन दिन्थिनायनि नटिस दैथाय हरनाय जादोंमोन, नाथाय सानै मावख'गिरिफोरनि जाहोन दिन्थिनायनि नटिसनि फिन्नायजों गोजोननाय मोनैनि थाखाय होखारथ'नाय जादों होनना मिथिना मोनदों।

7. हादोरगिरि द्रौपदी मुर्मु बिथाङा जगदीप धनखड़ बिथांनि भारतनि लेङाइ हादोरगिरि महरै बिबान एंगारनायखौ गनायना लाबाय। हादोरगिरिनि गनायथिनि उनाव, नखर मन्थ्रि बिफाना लेङाइ हादोरगिरि जगदीप धनखड़नि बिबान एंगारनायनि सोमोन्दै गोख्रै गोहोम गोग्लैनायनि सोमोन्दै मोनसे फोसावथाय फोसावदोंमोन।

घनश्याम तिवारी, जाय मासिगिरि, मंगलबारखालि सानजौफुनि 12 रिंगायाव रायजो सभानि सोंथि घन्टानि थाखाय जथुमनायनि दान्दिसे उनावनो सोद्रोमाफोरखौ फोसावथायनि बागै फोरमायो ।

तिवारीआ फोसावदोंमोन दि नखर बिफाना संबिजिरनि दफा 67 (ए) नि सिङाव भारतनि लेङाइ हादोरगिरि जगदीप धनखड़नि बिबान एंगारनायखौ 22 जुलाई, 2025 मायथाइनि फोसावथायनि गेजेरजों हरखाबै गोहोम गोग्लैनानै दैथाय हरदों। भारतनि लेङाइ हादोरगिरिया नेम बादियै रायजो सभानि बुंथिगिरि।

धनखड़आ समबारनि मोनाबिलियाव हादोरगिरि द्रौपदी मुर्मुनो गावनि बिबान एंगारनाय लाइजामखौ दैथाय हरदोंमोन। हादोरगिरिनो लिरनाय गांसे लाइजामाव, बिथाङा बुंदों, "सावस्रि जोथोनखौ गोनांथि होनो आरो सावफाहामारि बोसोनखौ मानिनो थाखाय, आं संबिजिरनि दफा 67 (ए) बायदियै गोख्रै गोहोम गोग्लैनानै भारतनि लेङाइ हादोरगिरिनि बिबानखौ एंगारदों। "

बेनि गेजेराव, गाहाय मन्थ्रि नरेन्द्र मदिआ बुंदोंमोन, "जगदीप धनखड़आ भारतनि लेङाइ हादोरगिरिनि मासिजों लोगोसे गुबुन गुबुन मासिफोरजों जोंनि हादोरखौ सिबिनो गोबां खाबु मोनदों। बिथांनि मोजां देहानि थाखाय हामब्लायथि जासियो। " होनना।