दिनै 6 जुलाइ 2025 रबिबार साननि दासिमनि गोदान मोननैसो खौरांफोरा जाबाय।
बितिसि
बिसायखथिया फैगो सेप्तेम्बर दानावनो जागोन, दानिफ्रायनो बितिसियाव गासैबो
दोलोफोरखौ बेनि थाखाय थियारि जानायखौ नुनो मोनगासिनो दं। आसाम
बिधान सभानि बुंथिगिरि बिस्वजित दैमारि बिथाङा बिटिसि
बिसायख'थिनि थाखाय भारतीय जनता पार्ति (बि जे पि) दोलोनि थियारि आरो प्लेनफोरनि सोमोन्दै खौरांगिरिफोरनि सिगाङाव बुंदों। बिथाङा खौरांगिरिफोरनि सिगाङाव बुंदोंदि बिथाङा
बुंथिगिरि जानायलाय थोंजोङै जेरावबो थानायनि खाबु थाया, अदेबानि आं बिजेपि
निफ्रायनो एमएलए जादोंमोन, बे हिसाबै बुङोब्ला बिजेपि दोलोआ हारसिंनो बिसायखथि
गेलेगोन होनना बुङो। राजखान्थि हान्जायाव जेबो हारि थाया, नेम बादियै गासैबो दोलो
दानो हायो आरो बिसायखथि गेलेनो हायो। लोगोसेनो काउन्सिल, स्तेत रिजनेल, नेशनेलजों
हान्जाजों जेबो खोथा गैया, जायखिजाया दोलोआवनो मोनसे ओनसोलनि सुबुंफोरासो भतखौ
होयो आरो बिजाथि सायखयो, बेयाव बदलेन्दनिसो मानसियानो थाखायो, बेखायनो बेयाव जेबो
फाराग गैया होनना रोखा खालामना होयो बिथाङा। गुबुनफारसे बदलेन्दनि आयेन आफादखौ
दासिमबो आबुङै दाफुंना लानो हायाखै, नांगौबादि खुंथायनि सिस्तेमखौ आबुङै दाना लानो
हायाखै। आबुं अफिसारबो गैया। बायदिसिना खामानि मावनायनि गोहोखौनो दाबो लानो हायाखै
होननाबो बुङो बिथाङा, आयेन आफादाव जेब्लासिम गोख्रोङै गायसनजाया, बेयाव जेब्लासिम
जथुम जयै जयै बायदिसिना दिपार्तमेन्त नि खामानि मावनायनि आयेन दाना लानो हाया
अब्लासिम जों बदलेन्द आव जेसेबांखि थाखा फैसा हरा मानो बेखौ मावफुंनो हाया, आरो बे
सिस्तेमा थिग जायैखायनो बाजेताव हरनाय 800-1000 कौति रां मोनबाय, अदेबानि
बोसोरफ्रोमबो 200-300 कौति रां मावफुंनो हायि जाबाय थादों बोसोराव होननाबो बुङो,
लोगोसेनो बेनि दायनिगिरिया मानसिनि नङा, सिस्तेम नि सो, बेखौ जों गायसनना लानो
नांगौ, बितिसि आव सोरखार सालायनाया 20 बोसोरानो जाबाय, बे 20 बोसोराव
एदमिनिसत्रेसनखौ गायसननायाव इसे गोसो होयिनि थाखायनो बेफोरबादि माखासे जेंनाफोरा
जाबाय थादों, बेखायनो बेखौ आबुङै गायसननांगौ होनना खौरांगिरिफोरनि सिगाङाव बुङो।
रन्जन दैमारि
बिथांखौ सोरखारा उदां खालामनो हाया, बेयो आसामनि गिबि मन्थ्रि बिथांनि खौरांगिरिनि
फिननायनि सायाव रोखा जादों, आसामनि गिबि मन्थ्रि बिथांखौ सासे खौरांगिरिया
सोंदोंमोन रन्जन दैमारि बिथांनि उदां जानायनि सायाव, बेयावनो गिबि मन्थ्रिया
बुङोदि रन्जन दैमारि बिथांखौ उदां खालामनाया जोंनि आखायाव गैया,, NIA, CBI नि आखायावसो दं, नाथाय
जों बिथांखौ मोजां थासारियाव लाखिदों होनना फोरमायो बिथाङा, बेतेलियान नि केम्प आव
जों बिथांखौ जोबोद मोजाङै लाखिदों, जेलाव थानाय कयदि एबा दायनिगिरिबायदि लाखियाखै,
थांनाय साननैयाव गोबां एनदिएफबि नि दैदेनगिरि मावथिफोरा जामिन मोनदों, जों दिल्लि
निफ्राय एनआइए केसखौ लाबोफिनदों जाय आसामाव माब्लाबाबो जाफेराखैमोन होननाबो
बुंबावो।
गुबुनफारसे खौरां मोननाय बादिब्ला एनआइए केस नांनानै थानांनाय सा 7 एनदिएफबि
नि केदारफोरा मैया उदां अख्रांआव फैनो मोनदों, सोमखोर बसुमतारि, लंकेश्वर बर,
शन्तोस खेरखातारि, बिनोद मसाहारि, सुर्जय गयारि, राहुल इश्लारि आरो जलेश्वर
बसुमतारि बिथांमोना जामिनाव उदां जादों।
मोनसे गिदिर जाफुंसारनाय, रैखाथि
हान्जाफोरा मणिपुरनि हाजोआरि ओनसोलफोराव मोनसे जथाय अपारेसननि समाव गोबां बिबांनि हाथियार
आरो गुलि बारुद बोखांनो हादों, जाय ओनसोलाव आयेन बेरेखा हाथियार दैग्रा हाबाफोरखौ होबथानो
थाखाय सोलिबाय थानाय नाजानायखौ दिन्थियो।
3 जुलाइनि हर गेजेरनिफ्राय
4 जुलाइनि फुंसिम खुंजानाय अपारेसनखौ मणिपुर पुलिस, आसाम राइफल्स, भारतारि रौनिया हानजा
आरो सेन्ट्रेल आर्म्ड पुलिस फर्स (सिएपिएफ) नि जथाय हानजाफोरा खालामदोंमोन। थि इन्टेलिजेन्स
इनपुटनि सायाव बिथा खालामनानै, तेंगनौपाल, कांगपोकपी, चंदेल आरो चुराचान्दपुर जिल्लाफोरनि
सिंनि आरो सनदेह' गोनां ओनसोलफोराव गोबां थावनिफोराव गुवारै नागिरनाय हाबाफारि जागायदोंमोन।
गासै 203 इउनिट गुबुन गुबुन हाथियारफोर मोननो हादों। लोगोसेनो गोबां गोला-बारुद आरो बेरफ्रुग्राबो मोननो हादों होनना मिथिना मोनदों
रायजोआव नंखाय
सनानि गाज्रि फालांगि सोलिगासिनो दं नामा। गहपुर पुलिसआ सनिबारखालि गहपुर नोगोर
खुंथायनि सिङाव थानाय धेनुधारानि वार्ड नम्बर सेआव गपाल गगैनि न'आव सिखावै सोलिबाय
थानाय नंखाय सना फाननायखौ हमनो हायो।
गहपुर पुलिसा
मोनसे स्रोद सुलुंनि उनाव गपाल गगैनि न'आव सिग्रोमनाय हाबाफारि लादोंमोन। पुलिस
अपारेसनाव गगैनि न'निफ्राय गंनै नंखाय सनानि नावफोरखौ जब्द खालामनाय जादोंमोन आरो
बे नंखाय सना फालांगिजों सोमोन्दो थानाय गपाल गगैजों लोगोसे गुबुन साब्रैखौ खानाय
जादोंमोन। हमजानाय सुबुंफोरखौ उत्तर
प्रदेशनि रामधर कुमार आरो सत्येन्द्र कुमार, लखीमपुर जिल्लानि नावबैसानि हबीबुल रहमान आरो
निजारुल रहमानजों लोगोसे धेनुधारानि गपाल गगै होनना सिनायथि होदों।
मख'नो गोनां दि बै सुबुंफोरखौ
पुलिसआ हमजानाय गपाल गगैनि न'नि सिङाव नंखाय सनानि नावफोरनि बाथ्रा बुंबाय थानाय
समाव हमदोंमोन। खौरां मोन्नाय बायदिब्ला नावबैसानि सानै फालांगिरिफोरा उत्तर
प्रदेशनि सानै फालांगिरिफोरनो फान्नो थाखाय गंनै नंखाय सनानि नाव लाबोदोंमोन। गपाल
गगैआ बेनि थाखाय गेजेरारि महरै खामानि मावदोंमोन।
बे समावनो, खौरां बिजोंनो गपाल गगैनि बिबुंथिनि बायदिब्ला,
हालेम पुलिस थानानि सिङाव थानाय चन्दामारीनि सासे सेंग्राया बे फालांगिजों लोब्बा
दं। बे बेलायाव गहपुर पुलिसआ गोख्रों नायबिजिरोब्ला बे नंखाय सनानि फालांगिजों
लोब्बा थानाय गासै बेंखनखौ सिफायनाय जागोन।
रासियाया
युक्रेननि राजथावनि कीवआव जारिमिनाव बयनिख्रुइबो देरसिन ड्र'न आरो मिसाइल
गाग्लोबदोंमोन। युक्रेननि अख्रां
सान्थ्रिनि बायदिब्ला, रासियाया गासै 550 ड्र'न आरो मिसाइलफोर गावदोंमोन, जेराव 539 सेहेद-रोखोमनि कामिकाजे ड्र'न आरो
गुबुन डेकय ड्र'न आरो 11 बेलिस्टिक आरो क्रूज मिसाइलफोर दंमोन।
बे गाग्लोबनायाव
खमैबो 23 सुबुंफोरा जोखोम जादोंमोन। कीवनि मेयर विटाली क्लिट्सक'आ बुंदोंमोन दि गाग्लोबनाया मोनबा जिल्लाफोरखौ
गोबां खहा खालामदोंमोन। बे गाग्लोबनाया
कीवआव थाग्रा बिलडिंफोर, रेलवे दाथायफोर आरो फालांगियारि जायगाफोरखौ गोबां खहा खालामदों।
युक्रेननि
हायुंआरि रेलवे अपारेटर उक्रजालिजनित्सियाया बुंदोंमोन दि ड्र'न
गाग्लोबनाया कीवनि रेलवे दाथायखौ खहा खालामदोंमोन, जायनि जाहोनाव माखासे दावबायारि ट्रेनफोरनि
समफारिखौ नै घन्टा गोबाव खालामदोंमोन। युक्रेननि अख्रां रैखाथि गोहोआ 539 ड्र'नफोरनि गेजेराव 270 खौ फोजोबस्रांनायनि
दाबि खालामो।
रायजोनि गिबि
मन्थ्रि हिमन्त बिश्व सर्मा बिथाङा सान 5 नि थाखाय बितिसि आव फैदों, मैया 3थि
सानाव सनिबाराव बाक्सा जिल्ला कमिसनारनि मावख'आव मोनसे नायफामफिननाय मेलाव बाहागो
लादोंमोन । बे मेलाव गिबि मन्थ्रिया बिफानारि मावख'गिरिफोरखौ लोगो हमदोंमोन आरो
गुबुन गुबुन बिफाननि खामानिनि खौरां लादोंमोन ।
जथुमनि जोबनायाव
खौरां बिजोंखौ फोरमायनानै गिबि मन्थ्रिआ बुङो, "बाक्सा जिल्लायाव 45,000 अरुन'दय बेनिफिसारिफोर
दंमोन। दिनै जों नुनो मोनदोंदि आथिखालाव 60 रोजासिम अरुण'दयनि मुलाम्फा मोनग्राफोरा
बारायगोन। थामहिनबा, सा 15,000 सो अरुन'दय मुलाम्फामोनग्राफोरा बांगोन। आइजो
फालांगिनि सिङाव बाक्सा आरो मानास बियाबफोराव फ्राय 60,000 आइजोफोरा बे
बिथांखिनिफ्राय मुलाम्फा मोनगोन। बे खेबाव जों गिबि मन्थ्रिनि आत्मनिर्भर आसाम केम्पेइननि
सिङाव फ्राय 1200 लाइमोनफोरनो 2 लाख रांनि खेबसे राङारि अनसुंथाइ होगोन। "होननाबो बुङो।
बिथाङा
बुंबावदों, "बाक्सा जिल्लानि दुमनी आरो फातेमाबाद साहा बागानाव सा 3,700 सो साहा
मावदांसाफोरा एति काली दुति पात बिथांखिनि सिङाव मुलाम्फा मोनगोन। बाक्सा आरो मनाह
बियाबफोराव साफ्रोमबो 4000 मुलाम्फामोनग्राफोरनो रेसन कार्ड होनाय जागोन।
गिबि मन्थ्रिआ
बेखौबो मुंख'दों दि गुवाहाटीनि डाउन टाउन आरो सुपर
मार्केटनि फ्लाइअभारखौ गोदो गोदायनि
कामरुपनि राजा नरकासुरनि फिसाज्ला राजा भगदत्तनि मुङाव बावनाय जागोन।
बिटिआरआव बिसायख'थिनि सायाव गिबि मन्थ्रिआ मा बुंदों
बे आयदायाव गिबि
मन्थ्रिया बुंदों, "गासैबो हारि माहारिफोरा ज' जानानै बिटिएडिआव बिसायख'थि
गेलेगोन। बे बिसायख'थिया गोजोननि बिसायख'थि जागोन। सिगाङाव बे ओनसोला हिंसाजों लोमहामनानै दंमोन।
जों दिनै ओनसोलाव गोजोन लाबोनो हादों।"
बिथाङा इउपिपिएल, बिपिएफ, बि.जे.पि. आरो कंग्रेस दोलोखौबो गोजोनै बिसायख'थि गेलेनो
खावलायदोंमोन।
मख'नो गोनांदि
गिबि मन्थ्रि हिमन्त बिश्व सर्माया सनिबारखालि बाक्सा जिल्लानि आवारता भबनआव
जिल्लानि मोन 27 आफादफोरजों लानानै गुबुन गुबुन आयदानि सायाव सावरायदोंमोन।
नायबिजिरनाय मेलाव आसामनि गागि मन्थ्रि रन्जित कुमार दास, मन्थ्रि जयन्त मल्लबरुवा, बि जे पि नि आफादगिरि दिलिप सइकिया आरो मन्थ्रि
उर्खाव गोरा ब्रह्म बिथांमोनहा नुजाथिदोंमोन ।
बे खेबाव दैनि
सोलायै जल जीवन मिशननि पाइपनिफ्राय ओंखारदों खुसिया। बे जाथाया हजाइ जिल्लानि
मराझारनि बरहौर गामियाव जादोंमोन। बारहाव गामिनि रशीद आहमेदनि न'नि दैनि टेपआव ओंखारदों
खुसिया। भिडिअ'आ दा ससियेल मेडियायाव
भाइरेल जादों।
अजानबस्ति दै
जगाय बिथांखिनिफ्राय गामियाव दै जगायनाय जायो। सुबुंफोरा जल जीवन मिशननि बे
बिथांखिनि गेजेरजों गोगो लोंग्रा दैनि जायगायाव थि सम बादियै नङि आरो गुबुंले दै
जगायनायनि अजदबो होदों।
जायगानि
सुबुंफोरा अजद दैखांदों दि दै जगायनाय बिथांखिनि गाहाय पाइपफोरखौ फोथारनि
गेजेरजों, खिख'रनि नालाफोरनि गेजेरजों दैथायहरनाय जायो, जायनि जाहोनाव दैनि टेपफोराव खुसिया, जिबौ, गाज्रि दै गगासिनो दं।
सुबुंफोरा बे
बिथिङाव मन्थ्रि जयन्त मल्ल बरुवाजों लोगोसे गिबि मन्थ्रिखौबो आखाय होनो दाबि
दैखांदों। जायगानि सुबुंफोरा बे आयदानि सायाव थार नायबिजिरनो आरो नांगौ राहा लानो
दाबि खालामदों। दैनि टेपाव खुसिया बे जाथाया गासै ओनसोलाव गुवारै फिनजाथाय
सोमजिहोदों।
गाहाय मन्थ्रि
नरेन्द्र मदिआ सनिबारखालि उत्तर प्रदेशनि संभलआव मोनसे लामा जाब्रबथायाव जिउ खहा
जानाय सुबुंफोरनि थाखाय दुखु फोरमायो। बिथाङा थैनाय नखरफोरनो गाहाय
मन्थ्रि हायुंआरि रिलिफ फान्डनिफ्राय साफ्रोमनोबो 2 लाख रां आरो जोखोम जानायफोरनो
50,000 रां अनसुंथाइ होनो फोसावो। बे जाथायाव हौवा गोदानजों लोगोसे सा दाइन
सुबुंफोरा जिउ गोमादोंमोन।
रायखांनो गोनां
दि सुक्रुबारनि मोनाबिलियाव उत्तर प्रदेशनि सम्भल जिल्लानि जुनवाई पुलिस थाना
ओनसोलाव मोनसे लामा जाब्रबथायाव हौवा गोदानजों लोगोसे सा दाइन सुबुंनि जिउ खहा
जायो आरो गुबुन सानैआ गोब्राबै जोखोम जायो।
जाब्रबथाया बै समाव जादोंमोन जेब्ला जुनवाई पुलिस थाना ओनसोलनि
हरगबिन्दपुरनि थागिरि सुरज (24) आ बदोन फारसे थांगासिनो दंमोन। हौवा गोदान सुरजजों
लोगोसे गावनि बिगुमै आशा (26), बियादै बिष्णु (06), बियादै ऐश्वर्या (02) आरो
गुबुनफोरजों गारियाव जिरायदोंमोन। गारिऑखौ बांद्राय गोसा सालायनायाव सालायगिरिया
सामलायनायखौ खोमायो। बेनि थाखायनो गारिआ जनता इन्टार कलेजनि इन्जुराव
सौग्रावदोंमोन आरो बेयाव
गोबां सुबुंफोरनि जिउ गोमादोंमोन।
bodoinfo.com provides informations regarding State Government, Central Government and Private sector jobs for the aspirants of assam.
Please do not enter any spam link in the comment box. ConversionConversion EmoticonEmoticon