20 July 2025 bodo top news. Ex Boyfriend killed GF. BTC govt land etc etc news.

दिनै 20 जुलाइ 2025 रबिबार साननि  दासिमनि मोननैसो गोनां खौरांफोरजों दिनैनि सानखौ नोंथांमोना जागायदो।

 1. फारसेथिं अखा हानानै दैबाना जादों, गुबुनफारसे अखा गैयिनि आबाद हा या गावस्रालायदों। ज'नाइ समान जिल्लानि गोबां ओनसोलफोरा सुक्रुबारनि हरनिफ्राय गोबां अखा हानायनि जाहोनाव दैजों लोमसावजादों।  लामा-फोथार न बां  दैजों लोमजोबदों। रानस्राव बोथोरनि उनाव हरखाबै अखा हानायनि जाहोनाव सिगा, रायंग विजयपुर, रामधन दिखारी आरो तेलाम गामि पन्चायतफोराव गोबां लामा फोथारफोराव दै जाजोबदों। फुख्रिनि ना, अमा बायदि दैजों बोहैलांनायनि अनगायैबो दै बानाजों भुगिनांनाय सुबुंफोरा गोबां जेंनाजों मोगा-मोगि जानांदों।

बेराफारसेथिं,  रंगोल, बिजयपुर बेकेलि चिरापुरिया आरो सेकाईजों लोगोसे गं 15-20 निबो बांसिन गामिफोरा रायां दैमानि दैनि थाखाय दैबाना जादों। बे समावनो नं 1 कार्दसुक बेकेली आरो रानकुप देवरी खौ फोनांजाबग्रा लामाया दैजों लोमसावजादों जायनि जाहोनाव हान्था-मेलानि बेलायाव गोबां जेंनाफोर जादों।

बेराफारसेथिं, सिगा सान्तापुरावबो हरसेनि अखा हानायनि जाहोनाव से दजननिबो बांसिन गामिफोरनि न'-बांफोरा दैजों लोमसावजादों। दै बानाजों भुगिनांनाय सुबुंफोरा सियां दैमानि थाखाय माहारियारि राजालामा 15 खौ फोनांजाबग्रा लामायाव मोनसे कालभार्ट बायनायनि थाखायबो जिंगा सिदों।

बेबायदिनो, हरनिफ्राय रोजा अखा हानायनि जाहोनाव, रामधन दिखरी गामि पन्चायतनि जामुगुरि आरो उलुवानी ओनसोलफोराव दैबानानि थासारिया सनिबाराव गाज्रिसिनमोन। धेमाजी जिल्लानि ज'नाइ खाजोना बेंखननि रामधन दिखारि गामि पन्चायतनि उलुवानी, जामुगुरि ओनसोलनि जिबा निबो बांसिन गामिफोरा दिखारी दैमानि दैबानाजों लोमसावदों  ।

आबादारिनि गामिफोरनि गोबां बिघा आबादनि फोथारफोरा सुबुंफोरखौ गोबां खहा खालामदों होन्ना मिथिनो मोनो।

 

2. बिटिसि बिसायख'थिनि सिगां सिगां बिटिआर सोरखारा गोबाव समनिफ्रायनो बि.टि.आर. ओनसोलनि रैखाथि होजानाय हाग्रा ओनसोलाव थानाय हा गैजायै थागिबिफोरनो हानि फोरमानलाइ होनाय हाबाफारिनि नैथि खोन्दोआ आगुआव फोसावखानाय बायदि मैया चिरां जिल्लानिफ्राय जागायो। 

बिटिसि खुंथायनि नाजानायाव चिरां जिल्लानि भारत-भुटान सिमायाव थानाय लाइमुथि बनगाव गामियाव थानाय 14 नं चिरां दुवार काउन्सिल बियाबनि सिङाव नेमबायदियै गं 862 नखरनो हानि फोरमानलाइ रान्नानै होयो।  बिटिसिनि हाग्रा बिफान, हा आरो खाजोना बिफाननि मावफुं सोद्रोमा रन्जित बसुमतारी, ककराझार लकसभा एम पि जयन्त बसुमतारी, राज्य' सभानि एमपि रौनगोरा नार्जारीजों लोगोसे गोबां सुबुंफोरनि नुजाथिनायाव मैया हानि फोरमानलाइ रान्नाय जायो।

मैयानि हानि फोरमान बिलाय राननायनि सोमोन्दै बिटिसिनि हाग्रा बिफाननि मावफुं सोद्रोमा रन्जित बसुमतारीआ बुङो,  "बिटिआरनि गाहाय प्रमद बर'नि बिथोन बादियै बे खेबाव भारत सोरखारनि हाग्रा दुवेल एक्त-2006 नि सिङाव बिटिआरनि मोनबा जिल्लानि हाग्रा ओनसोलाव थाग्रा 14,000 हा गैजायै नखरफोरनो 10 आगस्तनि गेजेराव हा नि फोरमानलाइ होनो थांखि लादों। बेनि गेजेराव चिरां जिल्लानि गासै 217 गामिफोरनि 4,800 नखरफोर आरो 331 फसंथानफोरनो होनाय जागोन।

बिथाङा बुंदोंमोन दि हानि फोरमानलाइफोरखौ मोनबा जिल्लायाव फारि फारियै बियाबनि बिथायाव राननाय जागोन। बेनि अनगायैबो, 25 जुलाइसिम बिटिआर ओनसोलनि रेभिनिउ गामिफोराव 15,000 निफ्राय 17,000 नखरनो हानि पाट्टा होनाय जागोन,  6,000 हा गैजायै नखरफोरनो बांसिनै 1 बिघा हा राननाय जागोन। 

 

 3. सासे रोंगथि गोनां फेस्ला फावखुंगुरनि किडनीनि जेंनानि थाखाय गावनि जिउ गोमायो। गोबाव समसिम किडनीनि बेरामजों जुजिनायनि उनाव फावखुंगुरआ सुक्रुबारखालि हायद्राबादनि गंसे देहा फाहामसालियाव जोबथा हां बोयो। मिथिनाय बायदिब्ला थैनाय समाव बिथांनि बैसोआ 53 बोसोरल'मोन। मुंदांखा तेलुगु सावथुन मुलुगनि मुं फिच वेंकटनि रुंसारि जानाया सोमोनांहोदों गोबांखौनो।

फिश वेंकट मुङै बयजोंबो मिथिजायोब्लाबो, बिथांनि गुबै मुङा वेंकट राजमोन। किडनीनि जेंनानि थाखाय बिथांखौ साननैसो सिगां हायद्राबादनि गंसे देहा फाहामसालियावनो थिसननाय जादोंमोन। बिथांनि मोनसे किडनीया फेलें जादोंमोन। बिथांखौ साननैसोनि उनावनो देहा फाहामसालिनि आई.सी.यू. बिफानाव दोननायजों लोगोसे किडनी ट्रान्सप्लान्ट खालामनांगौनि बाथ्रा दंमोन।

बे दाननि जागायजेन्नायाव मोनसे खौरां बिजोंजों मोगा-मोगियाव, वेंकट राजनि फिसाजो श्रावन्तीआ बुंदोंमोन दि गुबुन सासे सुपरस्टार प्रभासनि टीमा बिथांमोननो राङारि हेफाजाब होदों।

बिथांजोआ बुंदोंमोन दि बिनि बिफानि देहायारि थासारिया इसेबो मोजां नङा। बिथांनि हालोदआ गिथावना जानायलाय बिथांखौ आई.सी.यू.आव दोननाय जादों। दायो बिथांनो किडनी ट्रान्सप्लान्टनि गोनांथि दं, जायनि बेसेना 50 लाख रांसो जागोन।

प्रभासनि हेफाजाबगिरिफोरा श्रबन्तीजों सोमोन्दो लाखिदोंमोन आरो बिथांनो राङारि मददनि खोथा होदोंमोन। प्रभासनि हानजाया फिच वेंकटनि किडनी ट्रान्सप्लान्टआ माब्ला जागोन बेनि थार फिन्नायबो बिदोंमोन।

नाथाय उनाव वेंकटनि नखरा गुबुन मोनसे जायगायारि खौरां बिजोंनो खोन्थादोंमोन दि बे फ'ना नंखायमोन होनना। जेब्ला बियो रांखान्थियारि मददनि थाखाय थोंजोङै प्रभासनि खाथियाव थाङो, वेंकटनि नखरा हमदांनो हादोंमोन दि प्रभासआ बेबादि जेबो कल खालामाखैमोन।

सोरबा सासे नंखाय सिनायमोनै सुबुङा प्रभासनि हेफाजाबगिरि महरै फन खालामदोंमोन, प्रभासआ गावनो वेंकटनि देहायारि थासारिनि बागै जेबो मिथियामोन। वेंकटनि नखरा बुंदोंमोन दि बिसोरो दासिम जेबो राङारि हेफाजाब मोनाखै। बे समावनो, फावखुंगुर वेंकट राजआ किडनी ट्रान्सप्लान्टनि सिगां बे बुहुमखौ नागारो।

 

4. मोजां मोननाय, थगायनाय आरो मोनसे प्लेन खालामना बुथारनाय। बजालीआव मोनसे गिख्रंथाव बुथारनाय जाथाय जादोंमोन। बे मुगैथाव बुथारनाया बजालीनि सरौपेटायाव जादोंमोन।

सासे 19 बोसोर बैसोनि हिन्दु हिनजावसाखौ गावनि सिगांनि मोजां मोनग्राया बुथारदोंमोन आरो गावनो जोबथा थिरांथा लानायनि महर होनो नाजादोंमोन। दायनिगिरि सिगांनि बयफ्रेन्डखौ आरिफ आहमेद होनना सिनायथि होदों।

बुथारग्रा आरिफ आहमेदआ सिख्लानि सिगांनि मोजां मोननायमोन। बे जाथाया बै समाव जादोंमोन जेब्ला सेंग्राया आथिखालाव बिथांखौ मोजां मोननायनि सोमोन्दोआ बायबायमोन।

बजाली पुलिसआ जाथाय जायगायाव सहैयो आरो नायबिजिरनायखौ जागायो। बजालीनि उफ्रा पुलिस सामलायगिरि त्रिनयन भुइयानि दैदेन्नायाव नायबिजिरनायाव खम समनि गेजेरावनो बुथारग्राफोरखौ हमनो हायो।

पुलिसा बुंदोंमोन दि गिबियाव बिथांमोनहा जोबथा थिरांथानि बागै खौरां मोनदोंमोन, नाथाय जाथाय जायगायाव सौहैदोंमोन आरो गिबि नायबिजिरनायाव मिथिनो मोनो दि बेयो गुबैयै बुथारनायसोमोन।

पुलिसनि बायदिब्ला, गिबि नायबिजिरनायाव मोन्नाय खौरांनि सायाव बिथा खालामनानै, सिख्लाया सिगाङाव दायनिगिरि आरिफ आहमेदजों सोमोन्दोआव दंमोन।

नाथाय फरायनायाव मोजां आरो एन.सी.सी.नि केडेट सिख्लाया लासै-लासै आरिफनि मोजां मोनलायनायनि जेनिफ्राय ओंखारबोदोंमोन। आरिफजों सोमोन्दोनिफ्राय ओंखारनाय लोगो लोगो आरिफआ सिख्लाखौ बायदि रोखोमै ब्लेकमेल खालामनो हमो।

बियो गावनि सिगांनि समनि बायदि रोखोमनि फट' आरो वीडिय'फोर  दिन्थिनानै सिख्लाखौ ब्लेकमेइलबो खालामदोंमोन।  गिबि नायबिजिरनायाव मिथिनो मोननाय जादों दि बे मोजां मोनलायनाय सोमोन्दोआ बायनायखौ लानानै बेनि खिथेर लानो थाखाय बुथारग्रा आरिफ आहमेदआ सिख्लाखौ बुथारदोंमोन।

दा बुथारनायनि सोमोन्दै बांसिन खौरांआ खालि पुलिसनि नायबिजिरनायावल' सोराङाव फैगोन।

 

 5. आसामाव जापानिस एन्सेफेलाइटिस बेरामा बांगासिनो दं । रायजोनि गुबुन जायगाफोरनि अनगायैबो बे बोसोरनि एप्रिलनिफ्राय दासिम सा 70 सुबुंफोरखौ गुवाहाटी मेडिकेल कलेज हस्पितालआव थिसननाय जादों ।

गुवाहाटी मेडिकेल कलेज हस्पितालाव दासिम जापानिस एन्सेफेलाइटिसजों सा 21 बेरामिनि जिउ खहा जाबाय। दासिमबो सा 29 बेरामिफोरखौ थिसननाय जादों। बे फोरमायथिखौ गुवाहाटी मेडिकेल कलेज हस्पितालनि गोरायुं ड. अच्युत बैश्यआ फोसावदोंमोन । बिथाङा बेखौबो फोरमायदोंमोन दि बे बेरामिफोरा खालि गुवाहाटीनिल' नङा नाथाय आसामनि गुबुन गुबुन जायगानिफ्रायबो।

ड. अच्युत बैश्यआ खौरां बिजोंनो बुंदोंमोन, "बे बोसोरनि एप्रिलनिफ्राय दासिम, जापानिस एन्सेफेलाइटिसनि जाहोनाव सा 70 सुबुंफोरखौ गुवाहाटी मेडिकेल कलेज हस्पिटालाव थिसननाय जादों । गुवाहाटी मेडिकेल कलेज हस्पितालाव दासिम सा 21 सुबुंनि जिउ खहा जाबाय । "

बिथांनि बायदिब्ला, नालबाड़ी आरो कामरुप गामियारि जिल्लाफोरनि सुबुंफोरखौ गुवाहाटी मेडिकेल कलेज हस्पितालाव बयनिख्रुइबो बांसिन फाहामथाइ होनाय जायो। बेफोरनि गेजेराव नलबारि जिल्लानिफ्राय 17, कामरुप रुरेलनिफ्राय 17, दरंनिफ्राय 11, धुबुरीनिफ्राय 1, नगावनिफ्राय 3, बरपेटानिफ्राय 2, बजालीनिफ्राय 3, कामरुप नोगोरनिफ्राय 5, मरिगावनिफ्राय 1, बाक्सा  निफ्राय 2, गलाघाटनिफ्राय 2, सनितपुरनिफ्राय 3, बंगाइगावनि सा 1, उदालगुरिनि सासे आरो मेघालयनि सासे सुबुंखौ लाफानानै गासै सा 70 बेरामिफोर। बिथांमोनहा फाहामथाय लागासिनो दं।

बेफोरनि गेजेराव  गासै सा 21 बेरामिफोरा जापानिस एन्सेफेलाइटिसजों थैबाय, जेराव नलबाड़ीनिफ्राय सा स्नि, कामरुप रुरेलनि साब्रै, दरंनि सानै, बजालिनि सानै, धुबुरीनि सासे, नगावनिफ्राय सासे, सनितपुरनिफ्राय सासे,  बंगाइगावआव सासे,  उदालगुरिआव सासे, बरपेटानि सासे दं। बे बाथ्राखौ मासिगिरिया फोरमायदोंमोन।

 

6. सिखना जोहोलाव नेशनेल पार्कनि हाग्रानि मैदेरनि फालोआ सनिबारनि फुंआव क'कराझार जिल्लानि कारिगांव आउटपस्टनि सिङाव थानाय 9 नं ब्रह्मपुर गामियाव हरखाबै फुंनि 3:30 रिंगासोआव हाबफैना साडी बसुमथारि मुंनि सासे सुबुंनि गंथाम न'फोरनि खहा खालामो। गोबां सम्फथिनि खहाया जादों, खाफाल मोजांदि, रावबो जोखोम जानायनि खौरां मोननाय जायाखै।

जायगानि एम.एल.ए. लरेन्स इस्लारीआ जाथाय जानाय जायगायाव सौहैयो आरो थासारिनि खौरां लायो। बिथाङा गोहोम गोग्लैनाय नखरफोरजों सावरायदोंमोन आरो बिसोरनो गोनांथार मदद आरो रैखाथि राहाफोर होनो खोथा होदोंमोन।

हाग्रा मावख'गिरिफोराबो थासारिखौ नायबिजिरनो आरो आरोबाव जाथायफोरखौ होबथानो राहा लानो थाखाय ओनसोलाव सौहैबाय।

 

7. आसाम आरो सा-सानजानि रेलवे दावबायारिफोरनि थाखाय मोजां खौरां। बुरलुंबुथुरनि सायाव नैथि रेलवे दालांखौ सरायघाटआव लुनाय जागोन। दालांनि लुनाया थाबैनो जागायगोन। बे दालांआव मोनसे डाबल रेल लाइन, मोनथाम लेननि लामा थागोन। गासै मावथांखिनि लुनायनि खरसाखौ 1,473.77 कौटि रां थि खालामनाय जादों। दालांनि गासै लावथाया 1.3 किल'मिटार जागोन। बे थांखिखौ दिसेम्बर 2029 मायथाइसिमाव फोजोबनो थि खालामनाय जादों।

अगियाथुरी-कामाख्या डाबल रेल लाइननि बाहागोआ जादों शराइघाटनि गंसे गोदान दालां। बे मावथांखि, जायखौ रांखान्थियारि बोसोर 2023-24 मायथाइयाव गनायथि होनाय जादोंमोन, मोजाङै दावगादों। फेब्रुआरि 2024 मायथाइयाव, रेलवे बर्डआ गुवारै अनुमान खालामनायखौ गनायथि होदोंमोन आरो मार्च 2025 मायथाइसिम डिजाइन सावगारि आखिनाय आरो फोरमायथिखौ जोबथा महर होनायनि उनाव थिखानाय बिबानगिरिजों गनायथि होजादोंमोन।

बे समावनो, दालां लुनायनि थाखाय इ.पि.सि. (इन्जिनियारिं, बायनाय आरो लुनाय) बिडिं बिखान्थिखौ जागायजेननाय जादों, जेराव खाथिनि लामाफोर, रेल भायाडाक्ट, हानि हाबाफोर आरो सोमोन्दोगोनां बिथायारि सानजथाइफोर दं। लुनायनि खामानिया जागायजेन्नायजों लोगोसे बेनि टेन्डारखौ थाबैनो थि खालामनाय जानो हागौ।

• Tweet
• Share
• Share
• Share
• Share

About Mridul

bodoinfo.com provides informations regarding State Government, Central Government and Private sector jobs for the aspirants of assam.

Related Post