25 July 2025 top bodo news. Hagrama Mahilary is ready for allaince. Digital arrest etc etc news. ~ Bodoinfo.com

दिनै 25 जुलाइ 2025 सुक्रबार साननि दासिमनि मोननैसो गोनां खौरांफोरजों दिनैनि सानखौ नोंथांमोना जागायदो।

1. जों मोननैबो दोलोआ ज जानो हायोब्ला, खौसे जानो हायोब्ला जोबोद मोजां जागोन, आं बे लाइन आव आबुंङै पजितिभ, जों ज जानायमाने बितिसि आव राजखान्थियानो थानाय नङा, बिजेपि ल नङा, गुबुन गासैबो दोलोआनो पात्ता मोननाय नङा, "बिपिएफ आरो इउपिपिएलआ बिटिआरआव सोरखार दागोन, जुदि मोननैबो दोलोआ ज जायो। बे बाथ्राखौ बिपिएफ नि गाहाय हाग्रामा महिलारि बिथाङा बुंदों। बिथाङा मैया लोगोसे जानानै बिसायखथि गेलेनो लुबैनायखौ रोखा खालामना होदों।

बिपिएफ आरो इउपिपिएलआ ज' जागोन नामा?

2025 मायथाइनि बिटिसि बिसायख'थिनि सिगां हाग्रामा महिलारि बिथांनि बे बुंनाया गोबां सुबुंफोरनि गोसोआव ज जानो हामारगोनना होनना सानखांनाया गेजेराव फैदों।

बिथाङा मैया खौरांगिरिफोरनि सिगाङाव बुंदों दि एबसुनि आफादगिरि आरो खाम्फा बरगयारि बिथांमोना हाग्रामा महिलारि बिथांनि खाथियाव थांदोंमोन आरो मोननैबो दोलोआ ज जानानै गेलेनो हायोब्ला मोजां जागोन होनना बुंदोंमोन, बै समाव आंनिफ्राय रोखा खामोन, जों ज जाना गेलेनो हायोब्ला मोजां होनना, नाथाय प्रमद बर आरो आं लोगोसे जिरायना रायलायनायनि थासारिखौ खाम्फा आरो दिपेन बर बिथांमोना लाबोनो हायाखै होनना बुङो, बाहेरा बाहेरा बुंबाय थायोब्ला जाया नङा होनना बो बुङो। आंहा गोसो दं, आं जिरायगोन, आं दिनैबो जिरायनो थाखाय रेदि होननाबो बुङो।

लोक सभायाव मिरु नखर मन्थ्रि अमित शाहजों लाबोजानाय मोनसे थांखिनि उनाव मणिपुराव हादोरगिरि खुंथाइखौ आरोबाव द' दाननि थाखाय बारायनाय जादों।

बे बारायनाया 13 आगस्त, 2025 मायथाइनिफ्राय गोहोम गोग्लैगोन।

सदनजों गनायजानाय फोसाव बिलाइयाव बुंनाय जादों: "बे सदनआ 13 आगस्त, 2025 निफ्राय द' दाननि थाखाय हादोरगिरिजों संबिजिदनि दफा 356 नि सिङाव जारि खालामजानाय मणिपुरनि सोमोन्दै 13 फेब्रुआरि, 2025 मायथाइनि फोसावनायखौ सोलिबाय थानो गनायथि होयो।"

गोबाव सम हारियारि दाङाबाजि आरो खुंथायारि गाज्रि जानायनि जाहोनाव रायजोआव गिबि खेब 13 फेब्रुआरि, 2025 मायथाइयाव हादोरगिरि खुंथाइ जाबसिननाय जादोंमोन।

मणिपुरनि गोबां ओनसोलफोराव रैखाथिनि सायाव थासारिया दुंहाव जानानै थानायनि गेजेरावबो बे बारायनाया जादों, जेराव गोरोबलायनाय आरो गोजोन गायसननायनि नाजानाया दासिमबो सोलिगासिनो दं। मिरु सोरखारा बे समखोन्दोखौ आयेन-आब्रुथिनि थासारिखौ दिदोम खालामनो आरो उननि समाव आयेन आफादनि बिसायख'थि खुंनो हाथावनाखौ बिजिरनो थाखाय बाहायगोन होनना मिजिं थिनाय जादों।

2. मुलुगनाङैनो थानाय वर्ल्ड रेसलिं एन्टारटेनमेन्ट, गुसुङै डब्लिउ.डब्लिउ.इ.नि गोबां अनजिमानि अनसायगिरिफोरनि थाखाय मोनसे गाज्रि खौरां, खमलायनाय मुलुगनि सासे सुपारस्टार आरो मुंदांखा रेस्टलार हल्क हगनआ मैया आरायसमनि थाखाय मेगन मिसिबबाय। आमेरिकानि खौरां बिजोंनि रिपर्टफोरनि बायदिब्ला , डब्ल्यूडब्ल्यूईनि बयनिख्रुइबो मुंदांखासिन हाथरखि हगनआ मैया 71 बोसोर बैसोआव रुंसारि जायो। हगाना डब्लिउ.डब्लिउ.इ. जारिमिनाव बयनिख्रुइबो जाफुंसार स्तार आरो गासै मुलुगआव बे गेलेमुखौ मुंदांखा खालामग्रा गाहाय गेलेगिरिफोरनि गेजेराव सासेमोन। आमेरिकानि वेबसाइट टीएमजेडनि मोनसे रिपर्टनि बायदिब्ला, हल्क हगाना फ्ल'रिडायाव गावनि न'आव रुंसारि जादोंमोन।

रिपर्टफोरा दाबि खालामो दि बे सुपारस्टार रेस्टलाराआ हार्ट एटेक जानायनि उनाव हामफिनाखैमोन आरो थैयो। रिपर्टनि बायदिब्ला, हल्क हगनआ मैया फुंनि 9.51 रिंगासोआव हार्ट एटेक जादोंमोन। बिनि उनाव, हरखाब फाहामथाय हेफाजाबगिरिफोरनि मोनसे हानजाया गोख्रैनो बिथांनि न'आव सौहैयो आरो हगनखौ गोख्रैनो एम्बुलेन्सजों देहा फाहामसालियाव लांनाय जायो, नाथाय बिथांखौ देहा फाहामसालियाव थैबाय होन्ना फोसावो।

बेखौ गोसोआव लाखिनो गोनां दि हगननि गुबै मुङा टेरी जीन बलेयामोन।

3. गिबि मन्थ्रि हिमन्त बिश्व सर्माया दाबि खालामदों दि जुदि दानि सुबुं अनजिमा बांनायनि हार आ सोलिबाय थायोब्ला 2041 मायथाइसिम आसामनि मुसलमान सुबुं अनजिमाया हिन्दुफोरनि सुबुं अनजिमाजों फ्राय समान जागोन।

डिब्रूगढ़ आव खुंनाय केबिनेत जथुमनि जोबनायनि उनाव मोनसे खौरांमेलनि गेजेरजों गिबि मन्थ्रिया बुंदोंदि 2011 माइथाइनि सेन्सास नि बादियै 34 जौखोन्दो मुशलमान सुबुंफोरनि गेजेराव 31 जौखोन्दोआनो आगोलाव आसामाव माइग्रेत जानाय सुबुंफोर।

बेराफारसेथिं, रायजोनि गासै मुस्लिम सुबुं अनजिमानि 3 जौखोन्दोआल' खिलनजिया एबा थागिबि अस'मिया मुसलमान होनना गिबि मन्थ्रिआ बुंदों।

"...अब्ला 31 जौखोन्दोआ मुसलमानफोर जाय आसामाव माइग्रेत जानाय। आरो 2021, 2031 आरो 2041 मायथाइनि थाखाय नोंथाङा नुनो मोनगोन दि फ्राय 50:50 जाहैगोन । आं खालि सुबुं सानखोनि फोरमायथिया मा बुङो बेखौल' मुंख'दों। गिबि मन्थ्रिया दाबि खालामदों।

बिथाङा दाजाबदेरदोंमोन दि थांनाय सुबुं सानखोनि रोंमोन्दांथियारि खारिफोरा दिन्थियो दि दानिफ्राय माखासे बोसोरनि उनाव, आसामनि मुस्लिम सुबुं अनजिमाया 50 जौखोन्दोसिम सौहैगोन ।

बेनि गेजेराव, होखारनाय हाबाफारिनि सायाव मोनसे सोंथिनि फिन्नाय होनानै गिबि मन्थ्रिआ दाबि खालामो दि रायजोआव 29 लाख बिघासो (फ्राय 10 लाख एकड़) हाखौ दखल खालामनाय जादों।

"होखारनाय हाबाफारिया सोलिबाय थागोन... (नाथाय) आं एसेबां हा बासायफिन्नो प्लेन खालामनो हाया। आंनि जिउनि समा जोबगोन, नाथाय बेनि उनावबो गासै दखल खालामजानाय हाखौ लांदां खालामनाया जाजोबनाय नङा। बिथाङा दाजाबदेरदों।

4. सिगाङावबो गथ'साफोरखौ रटवेइलर आरो पिटबुल सैमाफोरा अरनायनि जाथायफोर जादोंमोन। बेबादि जाथाया जाहाथे जाफिना बेखौ रोखा खालामनो थाखाय आयेन आफादाव मोनसे गोदान आयेन बानायनाय जादों।

बे आयेनाव बुंनाय जादोंदि गिथावना महरै थाखो रानजानाय जुनारखौ न'आव फिसिनाय जायोब्ला थाम दानसिम जोबथेसालियाव थानो हागौ। नाथाय बे आसामनि नङा, गवा नि सो,

ग'वा जुनार फिसा आजायनाय आरो फिसिनाय जुनार (नेमखान्थि आरो खहा सुफुंनाय) बिल, 2025 नि बायदिब्ला, रायजो सोरखारा मोनसे मावख'आरि गेजेटनि गेजेरजों बबेबा मोनसे जुनिया जुनारखौ 'गाग्लोबग्रा एबा गिथावना' फोसावनो हायो। खेबसे फोसावखांनायनि उनाव, बै जुनारखौ लाखिनाय, जोनोम होनाय एबा लाबोनाया हेंथा जागोन।

बिलखौ लाबोनाय समाव, बेरेखा हान्जानि दैदेनगिरि युरी आलेमाव, गवा फरवार्ड पार्टीनि एम.एल.ए. विजय सरदेसाई आरो कंग्रेसनि कार्लस फेरेराया बे बिथिङाव गुवारै सावरायनो दाबि खालामो। बबेखानि, गिबि मन्थ्रि प्रमोद सावन्तआ रोखा खालामदोंमोन दि बे आगानखौ सुबुंफोरनि रैखाथिखौ नोजोर होनानै लानाय जादों। '

आयेना मा बुङो?

• जुदि बबेबा जुनारखौ गिथावना जुनार महरै सिनायथि होनाय जायो, अब्ला जुनाद फिसिग्रा बिफाननो 30 साननि गेजेराव बै जुनारनि बिगोमाया खौरां होनांगोन।

• जुनारखौ 60 साननि गेजेराव भाइरास गैयै खालामनांगोन।

जुदि आयेनखौ फालियाब्ला, बाङायसिन 15 साननि आरो गोबांसिन 3 दाननि जोबथेसालिजों लोगोसे 50,000 रां जुरिमाना आरो गुबुन साजा होनो हागौ।

• बिजिरसालिया गोसो जायोब्ला जोबथेसालिनि सोलायै सुबुं समाजारि सिबिथाइ जाबसिननो हायो।

बे आयेना होबावोदि जुदि सोरबा सुबुङा जोखोम जायो एबा गाग्लोबग्रा जुनारनि थाखाय थैयो अब्ला खहा सुफुंनाय बिनोबो हायो।

2024 मायथाइयाव, मिरु सोरखारा पिटबुल, रटवेइलर, आमेरिकान बुलडग, केन कर्स', मास्टिफजों लोगोसे 23 'गिथावना सैमा' फोलेरफोरनि लाबोनाय, फाननाय आरो फिसा आजायनायखौ बन्द' खालामदोंमोन।

5. रासियानि बिरखंनि गिथावना जाब्रबथाय, गिबियाव नागिरना मोनाखैमोन, नाथाय उनाव नागिरना मोनदोंमोन। खौरां मोन्नाय बायदिब्ला सा 50 दावबायारिफोरखौ लाबोनाय बिरखंआ जाब्रबथायाव गोग्लैयो, गासैबो दावबायारिफोरनि जिउ गोमादों होनना साननाय जादों।

बेखौ नोजोर होनो गोनां दि बिरखंआ रासियानि आमूर ओनसोलनिफ्राय टिन्डा सोहोरसिम दावबायगासिनो दंमोन। रासियानि खौरां एजेन्सि टासआ फोरमायदोंमोन दि साइबेरियान अंगारा एयारलाइन्स ए.एन.-34 बिरखंआ गावनि थावनिथिं बिरलांनायनि उनाव राडारजों सुंजाबथाया गैया जादोंमोन। बेनि उनावनो बे खौराङा गासै मुलुगआवनो गोसारदोंमोन। रयटर्सनि रिपर्टनि बायदिब्ला, बिरखंआव सानै पाइलट, सा द' फ्लाइट एटेन्डन्टफोरजों लोगोसे फ्राय 50 दावबायारिफोर दंमोन।

बेनिखायनो बिरखंआ गोमानायनि उनाव, बेखौ नागिरनो थाखाय गुबुन मोनसे हेलिकप्टारजों नागिरनाय हाबाफारि जागायदोंमोन। बै हेलिकप्टारनिफ्राय, नागिरग्रा हानजाया बिरखंनि बायखोन्दा बाहागोखौ नुदोंमोन।

बायखोन्दा बाहागोखौ नुनानै, बिथांमोनहा अनुमान खालामो दि बिरखंआव थानाय गासैबो 50 दावबायारिफोरा जिउ गोमादों। रासियानि इमारजेन्सि मन्थ्रि बिफाना बुंदोंमोन दि जाब्रबथाय जानाय बिरखंआ साइबेरियानि अंगारा एयारलाइन्सनिमोन। बिरखंआव साबा गथ'फोरबो दंमोन।

6. फ्रिजआव दोननाय बेदरखौ जानानै सासे सुबुंनि जिउ ख'हा जायो। बेनि अनगायैबो, साथाम सुबुंनि अबस्थाया जोबोद गाज्रि होनना बुंनाय जादों। बिथांमोनखौ देहा फाहामसालियाव थिसननाय जाखाबाय। बे जाथाया हायद्राबादाव जादोंमोन।

जाथायनि गुदि खिथानि बायदिब्ला, बनस्थलीपुरम मुंनि मोनसे ओनसोलनि नखरा न'आवनो मोनसे हाबाफारि खुंदोंमोन। हाबाफारिनि उनाव नखरफोरनि गेजेराव मोनसे जानाय-लोंनाय जायो।

गासैबो खामानिया मोजाङै जाखांनायनि उनाव, बोरमा आरो दावनि बेदरखौ फ्रिजआव दोननाय जादोंमोन आरो लोगोसे जानाय-लोंनायनि थाखाय दोनथुमनाय गुबुन आदारफोरबो दोननाय जादोंमोन। अखानायै, नख'रनि गोबां सोद्रोमाफोरा सावस्रि जेंनाजों मोगा-मोगि जायो।

देहा फाहामगिरिफोरा बुंदोंमोन दि बिसोरखौ खिनाय, गोबानाय, लोमजानाय बायदि जेंनाफोरजों भुगिनांनानै देहा फाहामसालियाव थिसननाय जादोंमोन, नाथाय सासे सुबुङा फुड पइजनिंनि जाहोनाव थैदोंमोन। थैनाय सुबुंनि मुंखौ श्री निवास यादव होनना मिथिनाय जादों। सावस्रि बिफाना सिगांनिफ्रायनो बिसोर जानाय आदारनि सेम्पल बुथुमखांबाय।

गासै रायजोआवनो दुंथाया बारा जागासिनो। जोबोद दुंहाव थासारिनि गेजेराव गुवाहाटीआव दुखुनांथाव जाथाय।

बांद्राय दुंहाव थासारिनि थाखाय गुवाहाटीयाव सासे पुलिसनि जिउ ख'हा जायो। सासे पुलिसआ राजालामायाव गोग्लैयो आरो थैनायखौ बोजबनानै लायो।

बे जाथाया गुवाहाटीनि दिघलीपुखुरी खाथियाव जादोंमोन। थैनाय सुबुंनि मुंखौ हितेश्वर कलिता होनना मिथिनाय जादों। हितेश्वर कलिताया गोथां गाबनि शार्ट आरो हाफ पेन्ट गानदोंमोन।

मिथिनो मोननाय बायदिब्ला जवानआ थाबायनानै पानबाजार फारसे थांगासिनो दंमोन। थैनाय हितेश्वरनि खाथियाव मोनसे बेग मोननाय जादों।

सुबुंनि गोथै सह'खौ सिगांनिफ्रायनो बोखांनो हानाय जाबाय आरो पस्टमर्टेमनि थाखाय दैथाय हरनाय जाबाय।

7. बिसायख'थि आयगा भारतनि लेङाइ हादोरगिरिनि बिसायख'थिनि थाखाय थाखथियारिखौ जागायजेनो, जगदीप धनखड़आ लेङाइ हादरगिरिनि मासिनिफ्राय बिबान एंगारनायनि उनाव, बिसायख'थि खुंनाया गोनांथार जाबाय।

मोनसे बिबुंथि फोसावनानै, भारतनि बिसायख'थि आय'गआ बुंदों, "नखर बिफाना 22 जुलाइआव फोसावनाय बिबुंथिनि फोसावथाय बायदियै भारतनि लेङाइ हादोरगिरि जगदीप धनखड़नि बिबान एंगारनायनि बागै फोरमायदों । ''

भारतनि बिसायख'थि आय'गआ बेखौबो बुंदोंमोन दि दफा 324 नि सिङाव भारतहा लेङाइ हादोरगिरिनि मासिनि थाखाय बिसायख'थि खुंनो गोहो दं। भारतनि लेङाइ हादोरगिरिनि बिसायख'थिया हादोरगिरि आरो लेङाइ हादोरगिरि बिसायख'थि आयेन 1952 आरो बेनि सिङाव थानाय नेमफोर, थामहिनबा हादोरगिरि आरो लेङाइ-हादोरगिरि बिसायख'थि नेम 1974 जों खुंजायो।

"बे बायदियैनो, 2025 मायथाइनि लेङाइ हादोरगिरिनि बिसायख'थिजों सोमोन्दो थानाय थियारिफोरा जागायखाबाय। भारतनि लेङाइ हादोरगिरिनि बिसायख'थिनि समफारिखौ थाबैनो फोसावनाय जागोन जेब्ला थाखथियारि खामानिया आबुं जागोन, "बिसायख'थि आयगा बुंदों।

बिसायख'थि आयगा बेखौबो बुंदोंमोन दि फोसावनायनि सिगां जागायखानाय गाहाय हाबाफारिफोरनि गेजेराव रायजो सभानि सायख'जानाय सोद्रोमाफोरजों लोगोसे लकसभाजों लोगोसे सायख'जानाय सोद्रोमाफोरजों लोगोसे सायख'जानाय सोद्रोमाफोरजों लोगोसे बिसायख'थि फरायसालिमाफोरनि थियारि खालामनाय, बिसायख'थि मावख'गिरिफोर/लेङाय रिटार्निं मावख'गिरिफोरखौ थि खालामनाय।

जगदीप धनखड़आ समबाराव लेङाइ हादोरगिरिनि मासिनिफ्राय हरखाबै बिबान एंगारदोंमोन । हादोरगिरि द्रौपदी मुर्मुआ मंगलबाराव बिथांनि बिबान एंगारनायखौ नाजावदोंमोन।

8. नंखाय पुलिसनि द्रेस गाननानै गाज्रि खामानि, ब्लेकमेइल। बेंगालुरुनि सानै सिख्लाफोरा मोनसे गिख्रंथाव साइबार थगायनायनि बोलि जानांदों।

अजदनि बायदिब्ला, थगायग्राफोरनि मोनसे हानजाया मुम्बाइ पुलिसनि महर लादोंमोन आरो मोनसे भिडिअ' कल (डिजिटेल एरेस्ट) खालामनानै बिसोरखौ अनागारि खालामदोंमोन। बे जाथाया 17 जुलाइआव जादोंमोन।

सुलुंनि बायदिब्ला, बै सानखालि सानै सिख्लाफोरनाव मोनसे कल फैदोंमोन। फन कलआव, दायनिगिरिफोरा बिसोरखौ मुम्बाइ पुलिस महरै सिनायथि होदोंमोन।

थगायग्राया बुंदोंमोन दि सानै सिख्लाफोरा जेट एयारवेजजों सोमोन्दो थानाय राङारि थगायनायनि मोनसे जाथायाव लोब्बा दं। बिनि अनगायैबो, बेखौ बुंनाय जादोंमोन दि बेबादि फोरमान दं दि बिसोरो मानसि लांखारनाय आरो बुथारनाय बायदि दायफोराव लोब्बा दं।

थगायग्राफोरनाव सिख्लानि आधार नम्बरजों लोगोसे गोबां गावारि खौरांफोर दंमोन। नंखाय एरेस्ट वारन्टफोरबो दं होनना बुंदोंमोन। थगायग्राफोरा अब्ला बिसोरनिफ्राय 58,477 रां लादोंमोन, दाबि खालामदोंमोन दि बिसोरनो आर.बि.आइ. आरो सि.बि.आइ. नि बिथोनफोरनि सायाव बिथा खालामनानै 'भेरिफिकेसन'नि थाखाय रां होनांगौ।

बेल' नङा। थगायग्राफोरा वाट्सएपाव भिडिअ' कल खालामनानै सानै सिख्लाफोरखौ लंथं जानोबो नारसिनदोंमोन। बेखौ 'देहायारि आनजाद' महरै बुंनानै बिसोरनि मोदोमाव गुलिनि दागो एबा टैटू दं ना गैया नायनाया गोनां होनना बो बुंदोंमोन! बिथांमोनखौ हुमखि होनाय जादोंमोन आरो बुंनाय जादोंमोन दि बिसोरो दा 'डिजिटेल आरो हाउस्त एरेस्त'आव दं, आरो केमेराफोरखौ बन्द खालामनाया बांसिन खैफोद लाबोगोन होनना।

बेयो फ्राय गु घन्टासिम बेबादिनो सोलिबाय थादोंमोन। नाथाय मोनाबिलिनि 8 रिंगासिमाव सासे सिख्लाया जाथायनि बागै सासे लोगोनो खौरां हरो। बैनिफ्रायनो नंखाय बाथ्रानि गासैबो जाथाया नुजाथिदोंमोन।

अखानायै, सानै सिख्लाफोरा पुलिस थानायाव थांदोंमोन। उनाव बिथांमोनहा शिवाजीनगराव साइबार एन्ड इक'नमिक अफेन्सेस विंग (सीईएन क्राइम ब्रान्च) आव मोनसे एफ.आइ.आर. होदोंमोन। थगायग्रानि फन नम्बर आरो इउ.पि.आइ. ट्रेन्जेकसननि गुदि खिथाखौ पुलिसनो गथायनायनि उनाव अभिषेक मुंनि सासे सुबुंनि मुंआ सोराङाव फैदोंमोन।

पुलिसनि बायदिब्ला, नायबिजिरनाया जागायबाय। दायनिगिरिफोरखौ सिनायनो आरो थाबैनो खानो नाजागासिनो दं। सिख्लाफोरा थाबैनो राहा लानो खावलायदों जाहाथे बिसोरनि भिडिअ' कलनि जेबो फुटेज ससियेल मेडियायाव फोसाव जाया।