22 July 2025 bodo top news. Vice president resign. 7 bodo people arrested etc etc news. ~ Bodoinfo.com

दिनै 22 जुलाइ 2025 मंगलबार साननि दासिमनि मोननैसो गोनां खौरांफोरजों दिनैनि सानखौ नोंथांमोना जागायदो।

1. भारतनि लेङाइ हादोरगिरि जगदीप धनखड़ बिथाङा मैया समबारनि मोनायाव देहायारि जेंना एबा फाहामथायनि जाहोन दिन्थिनानै हादोरगिरि द्रौपदी मुर्मुनो गावनि बिबान एंगारनाय लाइजाम होयो। हादोरगिरि मुर्मुनो लिरनाय गावनि बिबान एंगारनाय लाइजामाव, लेङाइ हादोरगिरि धनखड़आ बुंदोंमोन, "सावस्रि जोथोनखौ गोनांथि होनो आरो सावफाहामारि बोसोनखौ मानिनो थाखाय, संबिजिरनि दफा 67 (ए) बायदियै, गोख्रै गोहोम गोग्लैनाय हिसाबै, आं भारतनि लेङाइ हादोरगिरि महरै बिबान एंगारबाय। "

बिथाङा लाइजामाव बुंदोंमोन भारतनि मानगोनां हादोरगिरि, मानगोनां गाहाय मन्थ्रि आरो मानगोनां मन्थ्रि आफादनिसिमबो गोथौयै साबायखर बावो गावनि बिबान नि समाव मदद होनायनि थाखाय। गाहाय मन्थ्रिनि हेफाजाब आरो मददआ बेसेन गोनां, आं आंनि हाबा मावनाय समाव गोबां बाथ्राफोर सोलोंबाय । होननाबो लिरदोंमोन बिथाङा"

मखजाथावदि बिथाङा बिनि सिगां 2019 मायथाइनिफ्राय 2022 मायथाइसिम सोनाब बेंगलनि रायजो बेंगिरि महरै हाबा मावदोंमोन। 11 आगस्त, 2022 मायथाइयाव वेंकैया नायडुनि उनाव धनखड़आ लेङाइ हादोरगिरि महरै बिबान सामलायदोंमोन।

2. सानसे सिगांनि हराव, फोथायजाथाव इनपुटनि सायाव बिथा खालामनानै ढेकियाजुलि पि.एस. नि सिङाव थानाय खौला मिरुनि साखाथिनि रोंचान्द्री गामियाव मोननै गुबुन गुबुन जायगायाव सिग्रोमनाय जादोंमोन। मोन्नै गुबुन-गुबुन न'फोराव नागिरनाय समाव

1. गंनै 7.65 एमएम पिस्टल

2. 16 आर.डि.एस. गोथां गुलि बारुदफोर

3. मोन्नै वाकि टकि सेट

4. गं 5 मबाइल फन बेसादफोरखौ बोखांनाय जादोंमोन।

लोगोसेनो 1. गोबदा बसुमतारी,

2. रहित बसुमतारी,

3. अखेब बसुमतारी खौ हमो।

गिबि नायबिजिरनायनिफ्राय बेखौ मोन्नाय जादों दि बिसोरो दायनिगिरिफोरनि मोनसे हानजा जाय दाखाथि, रां दाबिनाय बायदि खालामनो थाखाय मोनसे गोदान आफाद दानो नाजागासिनो दंमोन।

उनाव नायबिजिरनायाव गुबुन सोद्रोमाफोरखौबो हमो,

1. रुबुल बर' आरो

2. अनसुला इस्लारि खौ

लोगोसे अपारेसनखौ सोलिबाय थानायाव, आरोबाव सानै गोदान सुबुंफोरखौ हमनाय जादों:

1. अफ्तारसन नार्जारि आरो

2. फिलिप बसुमतारीखौ

थाई रायबरेलीनि सरासनस्रा ओनसोलनि सपाई दैमानि साखाथियाव अरुणाचल हाजोनि आफाङाव बिसोरजों थियारि खालामजानाय मोनसे मेक शिफ्ट केम्पनिफ्राय हमो।

बेनिफ्रायबो मोननैसो बेसादफोर मोनदों

1. मोन्नै न'स कन्ट्री मेड राइफल (गाजा बान्डुक)

2. गंनै खुख्रि

3. गंनै मबाइल फन

4. मोननै टर्चबो मोनदों।

3. चिरां जिल्लानि बिजनी पुलिस थानानि सिङाव मोनसे अपारेसननि गेजेरजों गासै सा 11 साइबार दायनिगिरिफोरखौ हमनाय जादों। सनिबार आरो रबिबारनि हराव नायबिजिरनाय हाबाफारिखौ खालामनाय जादोंमोन।

साननैनि नायबिजिरनायाव हमजानाय सुबुंफोरनि सिनायथिखौ अफजार उद्दीन (34) । मातलेब आलि (37); आब्दुल आवाल (27); आखेर आलि (29); साद्दाम हुसैन (22); ग'लाप हुसैन आरो मीर काशिम (22) आनुवार हुसेइन, जियारुल हुसेइन, मजनु आलि आरो सुरमान आलि होनना मिथिनाय जादों

अपारेसननि समाव, पुलिसा गंसे ताता तियाग, गंसे आल्ट' K10, गंसे हुण्डाई i20, मोनसे माइक्र' एटीएम मेसिन, एटीएम कार्ड आरो गुबुन गुबुन मुंजों रेबथुमजानाय बेंक एकाउन्टफोर, गोबां सिम कार्ड आरो मबाइल फनजों लोगोसे आधार कार्द सेक बुक, भतार कार्द, तेब्लेत गंसे, देबित कार्द बायदि बायदिफोर जब्द खालामो।

पुलिसा गावसोरनि नायबिजिरनायखौ सोलिहोगासिनो दं।

4. अनलाइन लेनदेननि बेलायाव भारतआ बुहुमाव बयनिख्रुइबो दावगालांनाय हादोरफोरनि गेजेराव मोनसे। यु.पि.आइ.नि गेजेरजों मुलुगनि डिजिटेल ट्रेन्जेकसनफोरनि 50 जौखोन्दोसोआ भारतआवल'नो जायो। बावैसो सिगांनि मोनसे खारि बायदिब्ला, थांनाय जुन दानाव इउ.पि.आइ. आ 24.03 लाख कौटि रांनि लेनदेनफोर जादोंमोन। जाय थांनाय बोसोरनि बे दाननिख्रुइ 32 जौखोन्दोसो बांदों।

2016 मायथाइयाव नेशनेल पेमेन्टस कर्परेशन अफ इन्डिया (एनपीसीआई) जों जागायजेननाय, बाहायगिरिफोरा गोबां बेंक एकाउन्टफोरखौ मोनसे एपजों फोनांजाबनानै रां दैथायहरनो हायो। बेनि खावलायनाया रैखाथि आरो 24 घन्ता गोरलैयैनो सौहैनो हानाय गोहोआव थायो।

प्लेटफर्मआव आथिखालाव 491 मिलियन सुबुंफोर आरो 6.5 कौति फालांगिफोरा सिबिथाय होनायजों, 675 बेंकफोरा बे खान्थिजों फोनांजाबनाय। भारतआव गासै डिजिटेल रां होनायनि 85 जौखोन्दो आरो मुलुगनि गासै नंगुबै समनि डिजिटेल ट्रेन्जेकसनफोरनि खावसेसो इउ.पि.आइ.आ सामलायो।

रील बानायनायनि सिगां सांग्रां जा। दा जेलनि आलासि जानो गोनां जादों दरंनि सासे सेंग्रा। जाथायनि सोमोन्दै खौरां मोन्नाय बायदिब्ला, दरंनि सासे सेंग्राया आसामाव सोलिबाय थानाय होखारनायनि बेरेखायै रील बानायदोंमोन। सेंग्राया दरं जिल्लानि धुला पुलिस थानानि बेन्दोंआव थानाय लताखाटनि महमूद आलम(20)।

महमूद आलमआ होखारनायनि बागै सोरखार आरो पुलिस खुंथायनि बेरेखायै मोनसे रिल बानायनानै ससियेल मेडियायाव होदोंमोन। आसामाव सनदेह' गोनां नोगोरारिफोरनि न'फोरखौ होखारनायनि हेंथायै लाइमोनआ गिबि मन्थ्रिखौ सोंखारिनानै रिल बानायदोंमोन।

बेनि उनाव, धुला पुलिसा सेंग्राखौ हमनानै जेलाव दैथाय हरो। रायखांनो गोनां दि महमूद आलमआ खारुपेटिया फरायसालिमानि ग्रेजुवेट फरायसा।

5. जौ, द्राग्स बायदिफोरनि निसाया बेसेबां गिथावना जानो हागौ। निसाया रावखौबो सिनायनो हाया बादि जायो। बे समाव, मोनसे गिख्रंथाव जाथाय जादों। हरियाणानि नुह जिल्लानिफ्राय मोनसे मुगैथाव जाथाय सोराङाव फैदों। जेराव सासे फेग्रा मुवा सोबग्रा फिसाज्लाया गावनि बिमाखौ 20 रांनि थाखाय बुथारदोंमोन। बिमाखौ बुथारखांनायनि उनाव फिसाज्लाया हराव न'आव उन्दुना थायो। जाथाया सोराङाव फैनायनि उनाव गासै ओनसोलाव मोनसे सोमोनांथाव थासारि सोमजिदों। खौरां मोननाय लोगो लोगो पुलिसआबो जाथाय जायगायाव सहैयो। पुलिसआ दायनिगिरि फिसाज्लाखौ खायो आरो जेलआव दैथाय हरो। बिमानि गोथै सह'खौ पस्टमर्टेमनि जोबनायाव बिनि नखरनो गथायना होनाय जायो।

बे जाथाया नुह जिल्लानि जयसिंहपुर गामियाव जादोंमोन। फिसाज्ला जमशेदआ गावनि बिमाखौ रुवाजों गाग्लोबनानै बुथारदोंमोन। बेनि उनाव दायनिगिरि फिसाज्लाया गावनि बिमाजों लोगोसे हराव एखे न'आवनो उन्दुयो। नायबिजिरनायाव मिथिनो मोनो दि दायनिगिरि फेग्रा मुवा सोबग्रा फिसाज्लाया सनिबारनि मोनायाव गावनि बिमा रजिया (56) निफ्राय फेग्रा मुवानि थाखाय 20 रां बिदोंमोन, नाथाय बिमाया रांखौ होनो राजि जायाखैमोन। बेजों रागा जोंनानै फिसाज्लाया गावनि बिमाखौ रुवाजों बुथारदोंमोन। दायनिगिरिनि बिफा मुबारकआ ब्रै दान सिगां रुंसारि जादोंमोन।

नायबिजिरनायाव मिथिनो मोनो दि फिसाज्लाया सासे फेग्रा मुवा सोबग्रामोन। बिथाङा गोबाव समनिफ्रायनो गान्जा आरो आफिं जागासिनो दं।

6. मेलेरियाया भारतनि मोनसे गोजाम आरो गिथावना बेराम। जाय बोसोरफ्रोमबो लाख-लाख सुबुंफोरखौ गोहोम खोख्लैयो। गुबैयै दैज्लां बोथोरनि समाव, जेब्ला थाम्फैनि अनजिमाया बाङो, अब्ला बे बेरामा आरोबाव गोसारनो हमो। नाथाय आथिखालाव भारतआ मेलेरियानि हेंथायै मोनसे गिदिर देरहानायनि फारसे आगानसे आवगायदों। इन्डियान काउन्सिल अफ मेडिकेल रिसार्स (आइ.सी.एम.आर.) आ हादोरनि गिबिसिन हादोरारि मेलेरिया भेकसिन दिहुनदों, जायनि मुंखौ एडफाल्सीवैक्स बुंनाय जादों। बे भेकसिना जर'खायै प्लाजम'डियम फाल्सिपेरम मुंनि मेलेरियानि बेरामाव खामानि मावो, जाय मेलेरियानि बयनिख्रुइ गिख्रंथावसिन सन्देरनायफोरनि गेजेराव मोनसे।

एडफाल्सीवेक्सआ मोनसे भेकसिन जाय देहायाव हाबनायनि सिगां मेलेरियानि सन्देरनायखौ होबथायो। बेनि अनगायैबो, बे भेकसिनया बेखौबो थि खालामो दि जुदि सोरनियावबा मेलेरिया दं, अब्ला जिउसा एबा पेरासाइटआ देहानिफ्राय ओंखारा आरो गुबुनाव गोसारा। थामहिनबा, बेयो देहाखौल' रैखा खालामाखै नाथाय मेलेरिया सन्देरनायनिफ्रायबो रैखा खालामो। बेखौ ओरैबादि डिजाइन खालामनाय जादों दि बेयो देहायाव मोनसे रोखोमनि होबथानो हानाय गोहो सोमजिहोयो जाय मेलेरियाखौ देहायाव फिन हाबनो होआ।

भेकसिननि जुनिया आखुथायफोर

बेयो आबुङै भारताव बानायजानाय, जायनि ओंथिया बेयो "मेक इन इन्डिया" हाबाफारिनि बाहागो। थामहिनबा, दा भारतआ मेलेरियानि भेकसिननि थाखाय बायजोआरि रायजोनि सायाव सोनारनाय नङा आरो गावनि हादोरावनो बेनि मोननायखौ गुवारै थि खालामनो हागोन। एडफाल्सीवेक्स भेकसिनया भारताव मेलेरियाखौ होबथानाय आरो फोजोबस्रांनायाव हेफाजाब होगोन होनना मिजिं थिनाय जादों। जुदि बेयो गुवार थाखोआव जाफुंसार जायो, अब्ला बेखौ मुलुग थाखोआवबो भारतनि मोनसे गोनांथार बिगियानारि जाफुंसारनाय होनना मानिनाय जागोन।

7. सेन्ट्रेल बर्ड अफ सेकेन्डारि एजुकेसन (सी.बी.एस.ई.) आ गावनि गासिबो गनायथि होजानाय फरायसालिफोरखौ गासैबो हाबनाय आरो ओंखारनाय लामाफोर, थाखो खथा, करिडर आरो गुबुन सरासनस्रा जायगाफोराव गुबै-सम अदिय'भिजुएल नायदिंनायजों सुजुनाय गोजौ-रिजोलुसननि सीसीटीवी केमेरा फज'नो बिथोन होदों।

सिबिएसइनि गोदानसिन बिथोननि थांखिया फरायसालि केम्पासफोराव फरायसाफोरनि रैखाथि आरो गाहामखौ बांहोनाय आरो सोलोंथाय बर्डनि फोसावथायनि बायदिब्ला बिसोरखौ "बदमाशी आरो गुबुन खैफोदफोर" निफ्राय रैखाथि होनाय।

सी.बी.एस.ई. आ बिथोन होदों दि फरायसाफोरनि रैखाथिखौ रोखा खालामनायाव मदद होनो थाखाय सि.सि.टि.भि. रेकर्डिंखौ बाङायसिनाव 15 सानसिम लाखिनांगौ आरो गोनांथि जायोब्ला बिबानगिरिफोरजों नायबिजिरफिन्नो थाखाय गोरलैयै मोननो हानाय खालामनांगौ।

हासुग्रा खथानि खाथियाव सि.सि.टि.भि. केमेरा फज'नाय जागोन नामा?

सी.बी.एस.ई. नि बिथोन बायदिब्ला, खिखरसालि आरो हासुग्रा खथानि अनगायै फरायसालिनि गासैबो सरासनस्रा जायगाफोराव सि.सि.टि.भि. केमेरा फज'नांगोन।

फरायसालिनि रैखाथिखौ बांहोनो थाखाय सि.सि.टि.भि. केमेरा फज'नायनि बागै सी.बी.एस.ई.नि गोदानसिन बिथोना फरायसालिफोराव गथ'फोरनि रैखाथि आरो रैखाथिनि सायाव एन.सी.पी.सी.आर. नि मेनुयेलजों गोरोबनाय।

सी.बी.एस.ई. आ सी.बी.एस.ई.जों गनायथि होजानाय फरायसालिफोरनि गासैबो गाहाय आरो सामलायगिरिफोरनो बिथोन दैथायहरदों।

8. समबाराव बांग्लादेश अख्रां सान्थ्रिनि फोरोंथाय बिरखंआ ढाकायाव गंसे फरायसालिमा आरो फरायसालिनि केम्पासाव गोग्लैनायाव खमैबो सा 19 सुबुंफोर थैदोंमोन।

नेशनेल इनस्टिट्यूट अफ बार्न एन्ड प्लास्टिक सार्जारिनि सासे डाक्टारआ खौरां बिजोंजों रायज्लायनायाव बुंदोंमोन दि गथ'साफोर आरो बैसोगोराफोरजों लोगोसे सा 50 निबो बांसिन सुबुंफोरा खामनायनि जाहोनाव देहा फाहामसालियाव थिसनजादोंमोन।

मावख'आरिफोरा बुंदोंमोन दि बांग्लादेश अख्रां सान्थ्रिनि एफ-7 बीजीआई बिरखंआ ढाकानि साहा ओनसोल उत्तरायाव माइलस्टोन स्कुल आरो कलेज केम्पासाव गोग्लैयो।

जाब्रबथायखौ रोखा खालामनानै, बांग्लादेश रौनिया हानजानि सुबुं फोनांजाब मावख'आ मोनसे सुंद' बिबुंथि फोसावनानै बुंदोंमोन दि जाब्रबथाय जानाय एफ-7 बीजीआई बिरखंआ अख्रां सान्थ्रिनिमोन। सासे सुबुंनि थैनाय आरो साब्रै गुबुन सुबुंफोरखौ जखम जानायनि बागै फोरमायनायनि अनगायै, बिबुंथियाव गुबुन जेबो गुदिखिथा होनाय जायाखैमोन।

9. भिजानि जेंना आरो रोखा नङैनि जाहोनाव, आमेरिकानि मुलुगसोलोंसालिफोराव मुं थिसननाय भारतारि फरायसाफोरनि अनजिमाया जोबोद बाङाइ जालांदों। हायदेराबादनि गोबां सोलोंथाय बोसोनगिरिफोरा बुङो दि थांनाय बोसोरनि रुजुनायाव बे अनजिमाया 70 जौखोन्दोसो बाङाइ जाबाय।

रोंग'साफोरनि बायदिब्ला, गाहाय जेंनाया भिजा एपइन्तमेन्तनि स्लटफोरखौ दोनथ'नाय आरो भिजा नेवसिगारनायनि हारआ हरखाबै बांनाय।

हायदेराबाद अभारसिज कनसालटेन्ट्सनि संजीव रायआ बुङो, "सरासनस्रायै, बांसिन फरायसाफोरा भिजा बिखान्थिखौ फोजोबखांनायनि उनाव बिरखंआव गाखोनो थाखाय थियारि। नाथाय बे खेबाव सानफ्रोमबो पर्टेलखौ रिफ्रेस खालामनायनि उनावबो जों स्लट मोनाखै। बोसोरनि बे समा बयनिख्रुइबो गाज्रिसिन सम। "

उइन्ड' अभारसिज एजुकेसन कन्सल्टेन्सीनि अंकित जैनआ बुङो, "गोबाङानो स्लट बुक खालामदों नाथाय बेनि गेरेन्टी गैया। जानो हागौ आमेरिकानि खुंथाया खालि आनजाद नायगासिनो दं। नाथाय बेयो फरायसाफोरनि गेजेराव गोनो गोथो आरो जिंगासिनाय सोमजिहोदों। "

बेबादि थासारियाव गोबां फरायसाफोरा गुबुन थावनिफोरखौ सायख'दों। सासे फरायसाया बुङो, "आं आरोबाव नेथ'नो हाया। गासै बोसोरानो ओरैनो थांनो हागौ। बेनिखायनो आं दा जार्मानियाव फरायगासिनो दं। "

गोबाङानो फोथायो दि जुदि बे ट्रेन्डआ सोलिबाय थायो, अब्ला फैगौ साननैसोआव स्लटफोरखौ खुलिनाय जायाब्ला मुं थिसननाय फरायसाफोरनि अनजिमाया 80 जौखोन्दो बाङाइ जागोन।