2 July 2025 bodo top news. ~ Bodoinfo.com

दिनै 2 जुलाइ 2025 बुधबार साननि दासिमनि मोननैसो खौरांफोरा जाबाय।

1. रायजोआव बेकारनि जेंनाया बारा जालांनायनि गेजेरावनो मोनसे मोजां खौरां। साख्रि गैजायैफोरनि थाखाय मिजिंनि मोनसे सोरां। गिबि मन्थ्रिआ साख्रि गैजायै लाइमोनफोरनो मोनसे मोजां खौरां होदों। अक्ट'बराव रायजोआव 40,000 निफ्राय 50,000 नि गेजेराव गोदान साख्रि थिसननाय जागोन। बे बाथ्राखौ बकाखाटआव गिबि मन्थ्रि ड: हिमन्त बिश्व सर्माया रोखा खालामना होदों।

गिबि मन्थ्रिआ बुंदों, "जाय सानखालि ए.डि.आर.इ.नि फिथाइ होनाय जागोन, बै सानखालि थांनाय बोसोरसिमनि गासैबो लांदां मासिफोरखौ आबुं खालामनाय जागोन। 10 अक्ट'बराव फ्राय 40,000-50,000 सुबुंफोरखौ थिसननाय जागोन। आरो बिनि उनावबो जुदि माबाफोर लांदां मासि दं अब्ला एडीआरईनि फोसावनाया फैगौबारनि थाखाय नबेम्बर-दिसेम्बरआव ओंखारगोन। दायो पस्टफोरा बोसोर-बोसोर पस्त ओंखारबायनो थागोन आरो थिसननाय जाबाय थागोन। "

गुबुनफारसे सम्बारखालि गलाघाताव गोबां बिथांखिफोरखौ बेखेवनानै फैफिननाय समाव बकाखातनि खापजुरि पानबारि ग्रेनेद बेरफ्रुनायाव जोखोम जानाय सा 3 जवान नि देहानि हालोदनि खौरां लायो। बिथाङा बकाखाटनि आवर्ता भबनआव जोखोम जानाय जवानफोरखौ लोगो हमदोंमोन आरो पुलिस सामलायगिरिखौ साबसिन सावस्रि आनजादनि थाखाय गुवाहाटीसिम लांनो बिथोन होदोंमोन ।

गिबि मन्थ्रिआ बेखौबो बुंदोंमोन दि सोरखारा रायजोआव नोगोर खुंथायनि मावफारियाफोरनि साख्रिखौ रेगुलार खालामनायनि बेलायाव 2013 मायथाइनि सिगां मावफारियाफोरखौ सायख'गोन। बेनि उनाव गिबि मन्थ्रिया रोखा खालामदोंमोन दि नोगोरारि आफादा खामानि मावग्रा मावफारियाफोरखौ जोथोन लानांगोन।

बेबायदिनो, नबेम्बराव रायजोनि गोबां मासिफोराव फिन थिसनथाइ होनाय जागोन। गिबि मन्थ्रिआ बकाखाटआव बे बाथ्राखौ फोसावो।

आसाम दर्शन बिथांखिखौ मुंख'नानै गिबि मन्थ्रिआ बुङो दि मार्चआव मोनफ्रोमबो नामघरनो 1.5 लाख रां होनाय जादोंमोन। जुदि बेखौ आबुङै बाहायनाय जायो, अब्ला नबेम्बर-दिसेम्बरआव आरोबाव से खावसे लाख रां होनाय जागोन। आसाम दर्शन बिथांखिया गुबुन गुबुन थाखोआव सोलिगासिनो दं। आथिखालाव बेनि सिङाव 25,000 नामघरफोरनि लुनाया सोलिगासिनो दं।

2. मैया सा 11 बारग एनदिएफबि नि सोद्रोमाफोरा बेइल मोननायनि बाथ्रा दंमोन, बेखौ बितिसि सोरखारनि इएम रन्जित बसुमतारि बिथाङा मोनसे मेलाव बुंदोंमोन, खौरां मोननाय बादिब्ला मैया बिथांमोना बेखौ मोनासै, नाथाय गाबोन 3 जुलाइ आव मोननो हागौ होनना साननाय जादों, मानोना मिथिना मोननाय बादिब्ला मैया हेयारिंया जाबाय आरो 3 जुलाइ आव बेनि अर्दारा जागोन। सा 11 नि सोमोन्दै बुंदोंब्लाबो नाथाय सासेया बेइल मोनखादों होनना उकिला बुंदों, बे हिसाबै मैयानि सानाव सा 10 आ मोननो नांगौमोन, मैयानिया बाक्सा जिल्ला नि बिजिरसालिनिमोन, बेयाव एम बाथा बिथांनिबो दं होनना खौरां मोनदों। गुबुनफारसे दिनै 2 जुलाइ आव सा 35 बारग एनदिएफबिनि सोद्रोमाफोरा बेइल मोनगोन होनना बो ईएम रन्जित बसुमतारि बिथाङा दाखालि बुंदोंमोन, मिथिना मोननाय बादिब्ला दिनैनिया कक्राझारनि बिजिरसालिनि जागोन, सा 36 नि होनना खौरां मोनदों, बेइल मोनो ना मोना बेयो दिनै रोखा जागोन, उकिल बिथाङा बुंनाय बादिब्ला बे साननैसो बेनि खामानियानो सोलिबाय थागोन, दिनै तेजपुरावबो दं होनना खौरां मोनदों, नाथाय बेनिया हेयारिं जागोन, बेइल जानाय नङा, नाथाय दिनैनि कक्राझारनिया बेइलनि होनना मिथिना मोनदों।

गुबुनफारसे बितिसि नि दानि गाहाय प्रमद बर बिथाङा मैया एनआइए नि केसाव थानाय बारग एनदिएफबिनि सोद्रोमाफोरनिखौ आसामनि गिबि मन्थ्रि आरो मिरु नखर मन्थ्रिजों सावरायलायनानै एनआइए निफ्राय आसामाव लाबोनो हाबाय आरो बेनि बेइल नि थाखाय गुबुन गुबुन जिल्ला जेराव केस नांनानै दं, बेयाव बिथांमोनखौ सेन्त्रेल जेइल निफ्राय लांनाय जाबाय आरो बेइल होनाय खामानिया सोलिबाय होनना फोरमायो, गुबुनफारसे थालांनाय सिबिआइ नि केसनि सा 6 बारग एनदिएफबि नि सोद्रोमाफोर जेराव रन्जन दैमारि बिथांनिबो दं, बेनि सायावबो हम सेक्रेतारि बिथांजों सावरायलायदोंमोन होनना फोरमायो आरो फैगो त्राइल आव बेनि सायाव खामानि मावनायनि खोथा होदोंनि सोमोन्दै बुङो आरो लोगोसेनो मिरु नखर मन्थ्रि बिथांखौ लोगो हमगोन जाहाथे एनदिएफबिनि जेंनाखौ सुस्रांनो हायो होननाबो बुङो।

3. तेलेंगानानि जारिमिनाव बयनिख्रुइबो गाज्रिसिन दारिमिनारि जाब्रबथाया समबाराव जादोंमोन । समबारनि फुङाव हायद्राबादनि साखाथिनि संगारेड्डी जिल्लानि पटानसेरु मन्डलनि पसुमिल्लाराम दारिमिनारि ओनसोलाव सिगासी इन्डास्ट्रीज लिमिटेडनि मुलि दारिमिनाव मोनसे गिदिर बेरफ्रुनाय जादोंमोन ।

बे बेरफ्रुनायाव जिउ खोमानांनाय सा 36 सुबुंफोरनि गोथै सह'खौ दासिम बोखांनो हानाय जाबाय। माखासे गुबुन सुबुंफोरनि गोथै सह'खौ फबजादों होनना साननाय जादों, जायनि जाहोनाव थैनायनि अनजिमाया बांनो हागौ।

बेरफ्रुनाय समाव दारिमिननि दुंथाया 700-800 डिग्रीसिम जानो हागौ होनना साननाय जादों, जायनि जाहोनाव बैयाव खामानि मावग्रा साबा मावसाफोरा लोगो लोगो खामजोबो।

बेरफ्रुनाया ओरैबादि गिदिरमोन दि कारखानानि 14 इन्सि रोजा प्लिंथ बीमनि गोग्लैनायनि जाहोनाव खहानि बिबाङा बारा जादोंमोन। बे बेरफ्रुनाया बै समाव जादोंमोन जेब्ला दारिमिननि लेङाइ आफादगिरि एलनग'भाना क्वालिटि कन्ट्रल बिफाननिफ्राय फैगासिनो दंमोन, बे बेरफ्रुनायाव सुबुंनि गोथै सह'खौ 50 मिटारसो गोजानाव गोसारना दंमोन।

गाहाय मन्थ्रि मदि आरो तेलेंगानानि गिबि मन्थ्रि रेवन्त रेड्डीआ बे जाथायाव गोथौ दुखु मोननाय फोरमायदों । बिथाङा खहा जाजानाय नखरफोरनो गासैबो रोखोमनि रैखाथि होनो खोथा होदों, तेलेंगानानि गिबि मन्थ्रिया मंगलबाराव बेरफ्रुग्रा थावनियाव दावबायहैदोंमोन।

सासे मावख'आरिफोरा बुंदोंमोन दि बै समाव दारिमिननि सोरगिदिं 147 सुबुंफोर दंमोन । बेनि गेजेराव सा 29 आ जायगायावनो जिउ गोमायो आरो गुबुनफोरा देहा फाहामसालियाव थैयो । थैनाय सुबुंफोरनि गेजेराव माखासेखौल' सिनायथिनाय जाबाय आद्रा थानाय साबा थैनायफोरनि सिनायथिखौ दासिमबो मिथिनो मोननाय जायाखै । बेरफ्रुनायाव गोबां सुबुंफोरा जोखोमबो जादों आरो आथिखालाव गुबुन गुबुन देहा फाहामसालियाव फाहामथाय लागासिनो दं ।

4. गाहाय मन्थ्रि नरेन्द्र मदीनि दैदेन्नायाव मंगलबाराव मिरु केबिनेटआ मोनब्रै गोनांथार थिरांथाफोर लायो । केबिनेटआ दिहुनथाय बिथिङाव जर'खा गोसो होनायजों लोगोसे मोनफ्रोमबो बिथिङाव साख्रि सोरजिनायाव हेफाजाब होनो थाखाय साख्रिजों सोमोन्दो गोनां थुलुंगायारि बिथांखिफोरखौ गनायथि होनायजों लोगोसे मोनब्रै गाहाय थिरांथाफोर लायो। बे बिथांखिनि गेजेरजों फैगो 2 बोसोराव हादोराव 3.5 कौटिनि बांसिन साख्रि सोरजिनायाव थुलुंगा होनायनि थांखि लानाय जादों।

मोनसे मावख'आरि प्रेस रिलिजनि बायदिब्ला, 1 आगस्त, 2025 आरो 31 जुलाई, 2027 मायथाइनि गेजेराव सोरजिनाय साख्रिफोरनि थाखाय 99,446 कौटि रां खरसाजों एमप्लइमेन्त लिंक्ड इनसेन्टिभ स्किमआ बाहाय जागोन।

बे बिथांखिनि गेजेरजों गोदानै थिसनजानाय मावफारियाफोरनो जर'खा गोसो होनाय जागोन। बिसोरनो दान मोनसेनि इ.पि.एफ. मजुरिखौ मोननै किस्टियाव 15000 रांसिम होनाय जागोन। सेथि खिस्थिखौ द' दान सिबिथाइनि उनाव होनाय जागोन आरो नैथि किस्टिखौ 12 दान सिबिथाइनि उनाव होनाय जागोन। नाथाय जाय मावख'गिरिफोरा 1 लाख रांसिम बेथन मोनो बिसोरखौल' बे बिथांखिनि थाखाय आरजाथाव मानिनाय जागोन। ELI scheme नि गेजेरजों 1.92 कौटि गोदानै थिसनजानाय मावफारियाफोरा मुलाम्फा जानो हागौ।

साख्रि होग्राफोरनि थाखाय मुलाम्फाफोर

गोदानै थिसनजानाय मावख'गिरिफोरनि अनगायैबो, इ.एल.आइ. बिथांखिया साख्रि होग्राफोरनोबो मुलाम्फा होगोन :
1 लाख रांसिम बेथन मोननाय मावथिफोरनि सायाव साख्रि होग्राफोरा इन्सेन्तिभ मोनगोन।
खमैबो द' दाननि थाखाय नै बोसोरनि थाखाय अरायथा साख्रि मोन्नाय साफ्रोम उफ्रा मावख'गिरिनि थाखाय दानफ्रोमबो 3,000 रांसिम
दिहुनथाय सेक्टरनि थाखाय फोसावनाय आरो थुलुंगानायखौ ब्रैथि बोसोरसिम बांहोनाय जागोन।

मिरु मन्थ्रि अश्विनी वैष्णवआ बुंदोंमोन दि दिहुनथाय सेक्टरा इ.एल.आइ. बिथांखिनि मिरुआव थागोन।

5. पुलिसआ मैया रायजोनि गुबुन गुबुन जायगाफोराव होबथाजानाय बेदरनि बेरेखायै गोख्रों हाबाफारि लादों। बेनि बाहागो महरै, पुलिसआ ककराझार जिल्लानि फकिराग्राम, जयपुर आरो ककराझार सदर सोहोरनि मस्जिद र'डआव थानाय मोनब्रै हटेलफोराव सिग्रोमदोंमोन आरो होबथाजानाय बेदरखौ जब्द खालामदोंमोन।

पुलिसआ ककराझारनि मस्जिद लामायाव मोनब्रै हटेलफोर फारियै मुस्लिम हटेल, दादाजी हटेल, आलिफ हटेल आरो आमिर भाई हटेलआव सिग्रोमदोंमोन आरो 10 किल'ग्रामसो बन्द' खालामजानाय बेदरखौ जब्द खालामदोंमोन। ककराझार सदर पुलिस थानानिफ्राय ससेल गोजानाव थानाय हटेलफोरनि सायाव गोबाव समनिफ्रायनो बन्द' खालामजानाय बेदरखौ उदाङै फाननायनि अजद दं।

मैया, पुलिसा बेफोर गासै मोनब्रै हटेलफोराव सिग्रोमदोंमोन आरो होबथाजानाय बेदरखौ जब्द खालामदोंमोन आरो साब्रै बिगोमाफोरखौ सोंनाय फिन्नायनि थाखाय हमदोंमोन। बे समावनो, पुलिसआ फकिराग्रामनि इस्लाम हटेलनिफ्राय 10 किल'ग्राम होबथाजानाय बेदरबो बोखांनो हायो आरो बिगोमाखौ हमो। मिथिना मोननाय बादिब्ला आसामनि गुबुन गुबुन जायगाफोरावबो बेबादि नागिरनाय जादोंमोन

हाज'नि बुलुट हाथाइयावबो गोख्रों नायबिजिरनाय जादोंमोन।

खान हटेल, जेनेट रेस्टुरेन्ट, जुमी ह'टेलाव नायग्रोमनाय।

हटेलफोरनिफ्राय गोबां बिबांनि मोसौ बेदरनि जामुंफोर जब्द खालामनाय जादोंमोन।

हाज' पुलिसा साब्रै फालांगिरिफोरखौ खादों।

हमजानाय फालांगिरिफोरखौ महशेद आली, चांदीदुल इस्लाम, जमीर भुइयान होनना सिनायथि होदों।

हाज' पुलिसा गासैबो जाथायनि सायाव नायबिजिरनायखौ जागायदों।

6. मैया 1 जुलाइमोन। रायजोआव मैयानिफ्राय गोलोम बोथोरनि बन्द'आ जागायबाय। सोलोंथाइ बिफाना बे गोलोम बोथोरनि बन्दनि समाव फरायसाफोरा मा मावनांगौ बेनि सायाव दिथा बिथोन फोसावदों। कामरुप मेट्र'पलिटान जिल्लानि जिल्ला मिशन कर्डिनेटर दिपिका चौधुरीआ कामरुप नोगोरमानि गासैबो सोरखारि, आरो सोरखारि नङि फरायसालिफोरनो बे बिथोनखौ होदों।

थाखो 1 निफ्राय 10 सिमनि फरायसाफोरनि आबुं जौगाथायनि मोजांनि थाखाय, हमवर्क महरै मोननैसो हाबाफोरखौ होनो बिथोन होनाय जादों।

गोलोम बोथोरनि बन्दनि समाव फरायसाफोरा मावनो गोनां हाबाफारिफोर

थाखो 1 निफ्राय 10 सिम फरायसाफोरा गोलोम बोथोरनि बन्दनि समाव गावसोरनि बिफानिफ्राय जागायजेन्नानै मोन 4 जेनेरेशननि फेमिलि त्रि एबा नख'र बिफां आखिनांगोन।
थाखो 1 निफ्राय 5 सिम फरायसाफोरा सानफ्रोमबोनि जिउआव मोजां आखल आखु आरो सोद्रोम आखुनि सोमोन्दै 10-15 सारिनि गेजेराव लिरनांगोन।

थाखो 6 निफ्राय 10 सिम फरायसाफोरा मा खालामनांगोन होनना सोङोब्ला

थाखो 6 निफ्राय 10 सिम फरायसाफोरा गावसोरनि बिबौ-बिबौनि जिउनि फारि एबा दावबायनाय एबा लाइफ जार्निखौ लिरनांगोन।
नख'रनि जायखिजाया सोद्रोमाजों इन्तारभिउ ला, सोंथि थियारि खालाम आरो बिसोरनि फिन्नायफोरखौ गांसे बिलाइयाव लिरना दोन।
गुबुन-गुबुन खौरां बिलाइफोर आरो सावरायनायफोरनिफ्राय सानफ्रोमबोनि खौरां बुलेटिनफोर थियारि खालामनाय आरो सावगारि आरो खौरांफोरखौ हाखा'नानै बेफोरखौ बानाय।
नख'रारि हाबायाव बिमा-बिफाखौ हेफाजाब होनो थाखाय फारिलाइफोर थियारि खालामनांगौ आरो बिसोरो बिसोरनिफ्राय मा सोलोंदों बेखौ 150-200 सोदोबफोरनि गेजेराव लिरनांगौ।
बिमा एबा नखरनि गुबुन सोद्रोमाफोरनिफ्राय संनाय खावनायखौ सोलों आरो गावनि मोनसे रेसिपि बिजाब बानायनांगोन।

बेखौ गोसोआव लाखिनो गोनां दि फरायसाफोरा फरायसालि खुलिनायनि उनाव बैफोर हमवर्कखौ फरायसालियाव गथायनांगोन।

7. कर्नाटकनि हासन जिल्लायाव थांनाय दानसेआवनो सा 18 सुबुंफोरा हार्ट एटेकजों थैदों। हार्ट एटेकजों थैनाय सुबुंफोरनि गेजेराव 18 निफ्राय 40 बोसोर बैसोनि गेजेरनि लाइमोनफोरबो दं।

कर्नाटकनि सावस्रि मन्थ्रि दिनेश गुन्डु रावआ थैनायनि सायाव नायबिजिरनो बिथोन होदों।

बिथाङा बुंदोंमोन दि जयदेव इनस्टिटिउट अफ कार्डियोवास्कुलर साइन्स एन्ड रिसार्चनि सामलायगिरिनि दैदेननायाव नायबिजिरनाय जागोन।

खौरां बिजोंजों रायज्लायनायाव, सावस्रि मन्थ्रिआ बुङो, "जेब्लानो जों बेनि बागै मिथिनो मोनो, जों नायबिजिरनो बिथोन होदों। जों मिथिनो लुबैयो दि बेनि आन्दोआव मा जाहोन दं?""दानसेआव सा 18 सुबुंफोरा हार्ट एटेकजों रुंसारि जादों। मोनसे जिल्लायाव हार्ट एटेकनि जाहोनाव गोबां सुबुंफोरनि थैनाया साननो गोनां। बेनिखायनो नायबिजिरनो बिथोन होनाय जादों। "