10 July 2025 top bodo news. India China news. Aadhar card news etc.

दिनै 10 जुलाइ 2025 बृहस्पतिबार साननि दासिमनि मोननैसो खौरांफोरा जाबाय।

 

1. भारत-चीननि सोमोन्दोआ गाज्रि जालांगासिनो नामा। सिगांनि समफोरनिफ्रायनो, चीनआ भारतनि बेरेखायै माबा नङा माबा मोनसे फावफान्दायगासिनो दं। दा चीनआ भारतनि थाखाय मोनसे दै बमा बानायगासिनो दं। चीनआ ब्रह्मपुत्र दैमायाव भारतनि सिमानि खाथियाव मुलुगनि बयनिख्रुइबो देरसिन दैमा बान्दो मावथांखि लुनो थांगासिनो दं। तिब्बताव बे दैमानि मुङा यारलुं सांप'। बे बान्दोखौ भारतनि थाखाय दै बमा बुंनाय जादों। अरुणाचल प्रदेशनि गिबि मन्थ्रि पेमा खान्डुआ फिन बेनि सायाव दुखु मोननाय फोरमायदों।

खांडूआ बुंदोंमोन दि चीनआ बे मावथांखिखौ दै बमा महरै बाहायनो हागौ। बेयो रौनिया सिगिनायनि अनगा जायखिजाया गुबुन जेंनानिख्रुइ देरसिन आयदा। यारलुं सांप' दैमायाव मुलुगनि बयनिख्रुइबो देरसिन बान्दो मावथांखिया जोबोद जिंगासिनांगौ आयदा मानोना चीनआ गेजेर हायुंआरि दै गोरोबथायाव सागान होआखै, बेनिखायनो बे गोरोबथाया बिसोरखौ इसेबो गोहोम खोख्लैनाय नङा। बेबादि थासारियाव चीनआ दैखौ होबथानो आरो हगारनो गावनि गोसोनि बिगोमा जागोन। जुदि बे बान्दोखौ चीनआ बानायो आरो हरखाबै दै हगारो अब्ला गासै सियां ओनसोला दोबै लांगोन।

 

 2. आसामनि गिबि मन्थ्रि डॉ. हिमंत बिस्वा सरमा बिथाङा मैया चिरां जिल्लानि काजलगांवनि दिसिनि अफिसाव मोनसे गोजौ थाखोनि रिभिउ मितिं खुङो, जेराव बिथाङा Orunodoi 3.0, Mukhyamantri Mahila Udyamita Abhiyan, Mukhyamantri Atmanirbhar Asom Abhiyan (CMAAA), Ration Card राननाय बायदिनि सायाव सावरायलायो।

मावख'आरि आपदेटनि बायदिब्ला, चिरां जिल्लायाव 6,000 मुलाम्फामोनग्राफोरखौ अरुन'दोई 3.0 नि सिङाव लाफानाय जागोन। बेनि अनगायैबो 1,200 लाइमोनफोरा सि.एम.ए.ए.ए.नि मुलाम्फा मोनगोन। महिला उद्यमिता अभियाननि सिङाव आरोबाव 1,200 आइजोफोरखौ हेफाजाब होनाय जागोन।

गिबि मन्थ्रिआ जिल्ला खुंथायखौ बेफोर जौगालु हाबाफारिफोरनिफ्राय थालांनाय सुबुंफोरनि सायाव जर'खा नोजोर होनानै मुलाम्फा मोनग्राफोरनि फारिलाइफोरखौ आबुं खालामनायखौ रोखा खालामनो बिथोन होदोंमोन।

गुबुनफारसे गोबाव समनिफ्रायनो सोलिबोनाय जायगायारि दाबिफोरनि फिन्नाय होनानै, गुबैयै चम्पा दैमानि सोमोनदै, बिथाङा दैमानि फारनैथिंजायनि थागिरिफोरनि थाखाय सुंजाबनायखौ गोरलै खालामनो थाखाय गंब्रै गोदान दालां लुनो फोसावदोंमोन।

बेजों लोगोसे, गिबि मन्थ्रिया फोसावदोंमोन दि असम माला मावथांखिनि सिङाव गोदान लामाफोर लुनाय जागोन, जाय ओनसोलाव गामियारि फोनांजाब आरो जौगानायखौ बांहोगोन।

केबिनेट मन्थ्रि उर्खाव गोरा ब्रह्मजों लोगोसे गुबुन गुबुन बिफाननि गोजौ थाखोनि मावख'गिरिफोराबो बे मेलाव नुजाथिदोंमोन।

 

 3. रायजोआव सानफ्रोमबो गाज्रि खामानि मावनायनि जाथायफोरा बांगासिनो दं नामा। बुथारनाय, जिनाहारि, दाखाथि बायदिफोरनि थाखाय गोबां सुबुंफोरा उनदुनो हाय़ि जाना दं। नाथाय साबेसे भुगिनांनायफोरा न्याय मोनखो? सुबुंफोरनि न्यायनि थाखाय आयेन दं, खुंथाय दं। बिजिरसालिया दायनिगिरिखौ साजा होनानै भुगिनांनायखौ न्याय होनायाव गोनांथार बिफाव लायो।

नाथाय दिनैसिमबो लाख-लाख केसफोरा बिजिरसालियाव गोग्लैसोना दं होनना मिथिना मोनदों। गाहाय बिजिरसालिफोराव केसफोरनि बजाया बांदों। गासै आसामाव 5 लाखनिबो बांसिन जिल्ला बिजिरसालिफोराव गसर थिसननाय जादों। थांनाय मेसिम गाहाय बिजिरसालिफोराव दाखिल खालामजानाय केसफोरनि अनजिमाया गासै 5 लाख 23 रोजा 923 मोन। बेनि गेजेराव 4 लाख 15 रोजा 194 आ फौजादारि गसरफोर। आद्रा थानाय 1 लाख 8 रोजा 729 देवानि गसरफोरखौ दाखिल खालामनाय जादों। खारि बायदिब्ला, थांनाय मे दानाव गुबुन गुबुन जिल्ला बिजिरसालिफोरा 21,052 दायगोनां गसरफोर आरो 6,197 देवानी केसफोरखौ फोजोबदोंमोन। बेनि गेजेराव एम.पि. आरो एम.एल.ए.फोरनि बेरेखायै मोन 72 गसर दं  ।

गाहाय बिजिरसालिफोराव केसनि बजानि अनजिमाया बांनायनिफ्राय मिथिनो मोनो दि रायजोआव दायगोनां केसफोरनि बांलांनाय अनजिमानि बेरेखायै न्याय मोन्नाय सुबुंफोरनि अनजिमाया जोबोद बाङाय।, बेयो गाहाय बिजिरसालिफोराव गोग्लैसोना थानाय केसफोरल', बेनि अनगायैबो आरो लाख-लाख केसफोरा गुवाहाटी गोजौ बिजिरसालियावबो थाबथानानै दं।

बिजिरसालिफोराव केसफोरनि अनजिमाया दा साननांगौ आयदा। मानोना बेयो न्यायनि लासै लासैथारनि लामाखौ दिन्थियो।

 

 4. बुधबारनि फुङाव गुजरातनि वडोदरा जिल्लायाव मोनसे जाब्रबथाय जादोंमोन, गोबां बोसोर जानाय, गोजाम दालांनि मोनसे बाहागोआ दैमायाव गोग्लैनायनि उनाव गोबां गारिफोरा दैमायाव गोग्लैदोंमोन।

 गुजरातनि सावस्रि मन्थ्रि ऋषिकेश पाटेलआ बुंदोंमोन दि रायजोनि गेजेर गुजरात आरो सौराष्ट्र ओनसोलफोरखौ फोनांजाबग्रा दैमानि सायाव थानाय गंभीरा दालांनि मोनसे बाहागोआ बायनायनि उनाव माहिसागर दैमानि बिखायाव मोनबानिफ्राय मोनद'सो गारिफोरा गोग्लैदोंमोन। खौरां बिजोंजों रायज्लायनायाव, पाटेला बुंदोंमोन, " बे जाथायाव सा 10 सुबुंफोरा जिउ गोमादोंमोन, गुबुन साबा सुबुंफोरखौ गोथाङैनो रैखा खालामनाय जादों। ''

पटेला बुंबावदों, "दालांखौ इं 1985 माइथायाव लुनाय जादोंमोन आरो जेब्ला गोनांथि जायो सम-सम बेनि फाहामनायनि खामानिखौ मावनाय जादोंमोन। जाथायनि गुबै जाहोनखौ मिथिनो थाखाय नायबिजिरनाय जागोन।

बिथाङा बेखौबो बुंदोंमोन दि गिबि मन्थ्रि भुपेन्द्र पाटेलआ आरोंदायारि रोंग'साफोरखौ जाथाय जायगायाव सौहैनो आरो दालां बायनायनि जाहोनखौ नायबिजिरनो बिथोन होदों ।

हादोरगिरि द्रौपदी मुर्मुआ गुजरातआव गंसे दालां बायनायनि उनाव जिउ खोमानांनायखौ दुखु फोरमायो।

गाहाय मन्थ्रि नरेन्द्र मदि बिथाङाबो गावनि जोनोम रायजो गुजरातआव जानाय दुखुनांथाव जाथायनि सायाव दुखु फोरमायदों।   गाहाय मन्थ्रि म'दिआ थैनायनि नखरफोरनि थाखाय गाहाय मन्थ्रि हायुंआरि रिलिफ फान्डनिफ्राय  खेबसेनि थाखाय 2 लाख रांनि हेफाजाब फोसावो। बेराफारसेथिं,  जोखोम जानाय साफ्रोमनोबो 50,000 रां होनाय जागोन।

गाहाय मन्थ्रिनि मावख'आ ससियेल मिडिया एक्सनि गेजेरजों फोसावदोंमोन आरो बुंदोंमोन, "जायफोरा गावसोरनि आंगोफोरखौ खोमादों बिथांमोननिसिम दुखु फोरमायो । आं जोखोम जानायफोरनि थाबैनो हामनायनि मिजिं थियो । '' होनना।

 

 5. बिहाराव बिसायख'थि फारिलाइ सोदांनायनि सोमोन्दै बिसायख'थि आय'गनि गाइदलाइननि सायाव दान्थे-बिदान्थे सोलिगासिनो दं। बेरेखा राजखान्थि दोलोफोरा नोगोरारिनि फोरमान महरै भ'टार कार्ड आरो आधार कार्डफोरखौ बोखारनायनि सायाव सोंथि दैखांदों।  बे आयदायाव,  भारतारि जुनिया सिनायथि बिगोमानि सि.इ.अ. भुवनेश कुमारा नोगोरारि फोरमान खालामनो थाखाय  "आधारआ माब्लाबाबो गुदि आईडी कार्ड नङा"  होनना मुंख'दों।

इउ.आइ.डि.ए.आइ. आ भारतारि नोगोरारिफोरनि थाखाय 'आधार'  बानायो। दुलाराय भारतारि खौरां बिजोंजों मोनसे मोगा-मोगियाव, आफादनि गाहायआ दाबि खालामदोंमोन दि इउ.आइ.डि.ए.आइ. बिबानगिरिफोरा नंखाय  'आधार कार्ड'खौ होबथानो राहा लादों। बिथाङा बेखौबो मुंख'दोंमोन दि आधार कार्डफोरखौ क्यूआर क'डनि गेजेरजों रैखाथि होनाय जायो। भुवनेशआ बुंदोंमोन दि फट'शपखौ बाहायनानै आधार कार्ड बानायनायनि मोनसे जाथाया सोराङाव फैदों। बिथाङा बुंबावदों दि साननैसोनि उनाव आधार एपआ थियारि जागोन। बिथाङा बुंदोंमोन, "'डेम' रान'आ सिगांनिफ्रायनो जाफुंसारबाय.... एपआ आधार नम्बर लाग्रानि गनायथिनि सिङाव सिनायथि कार्डखौ डिजिटेल महरै दोनथुमगोन। जायनि  जाहोनाव गासैबो थासारियाव आधार कार्डनि  'हार्ड कपी'नि गोनांथि जानाय नङा। बिसायख'थि आय'गनि बोसोन खान्थिनि सायाव दान्थे-बिदान्थेनि सायाव भुवनेशनि सुंद' बिबुंथियाव बुंनाय जादोंमोन दि आधारआ माब्लाबाबो नोगोरारिफोरनि गुदि सिनायथि बिलाइ नङा।

बेखौ नोजोर होनो गोनां दि बोसोरनि जोबनायाव बिहारनि भ'ट होनाया जागोन। बिनि सिगाङाव, आय'गआ बै रायजोनि बिसायख'थि फारिलाइखौ फोसाबनो बिथोन होदोंमोन। बेखौ बुंनाय जायो दि जायफोरनि मुंफोरा भ'टार फारिलाइआव दं बिसोर नोगोरारिनि फोरमान होनांगोन। आधार कार्ड एबा रेशन कार्डखौ नंगुबै खाख्रि महरै गनायनाय जानाय नङा।  बैसोनि फोरमानलाइ, बर्ड एडमिट कार्ड बायदि खाख्रिफोराल' गनायजाथाव। आय'गआ जुक्थि होदों दि बे नेमखान्थिया गासै हादोराव आधार थगायनायनि जाहोनाव। राजखान्थियारि दोलोफोरा गियो दि बे बिथोननि थाखाय गोबां आरजाथाव भ'ट होग्राफोरनि मुंफोरा आय'गनिफ्राय ओंखारलांनो हागौ।

 

 6. हादोरनि मिरुआरि ट्रेड यूनियनफोर, मावख'आरि आफादफोर आरो आबादारि आफादफोरजों जयै 9 जुलाइयाव होजानाय भारत बन्द'आ आसामाव सरासनस्रा जिउ खुंनायखौ थाबथाहोदोंमोन। मटर मावसाफोरनि हरथाला हान्था-मेलानि खान्थिखौ हेंथा होदोंमोन। बेनि फिथाय महरै, सरासनस्रा सोमावसारनाया  रायजोआव  'आसाम बन्द'नि महर लादोंमोन।

रिपर्टनि बायदिब्ला, आसामाव गासै मोनब्रै रिफाइनारिफोराव दिहुन्नाया हेंथा जादोंमोन आरो खैला दिहुननायखौबो बन्द' खालामनाय जादोंमोन। बेनि अनगायैबो, मोब्लिब सेक्टर, बेंक-इन्सुरेन्स, बीएसएनएल आरो प'स्टेलनि मावफारियाफोराबो आबुं जिरायनाय नुयो। गाहाय इन्जिनियारजों लोगोसे गासैबो इन्जिनियारफोर आरो गासै थाखोनि मोब्लिब मावफारियाफोरनि बाहागो लानाया गुवाहाटीआव आसामनि मोब्लिब ब्लकनि गाहाय मावख' बिजली भवननि गासैबो खामानिफोरखौ थाबथाहोदोंमोन। पावार ग्रिड कर्प'रेसननि मावफारियाफोरा गं 7 सा-सानजा रायजोनि मोन 23 -दालायफोराव बन्द' खालामदोंमोन।

बे समावनो, साहा गुवाहाटी, सरपारा आरो ग'पेनारिजों लोगोसे आसामाव मोन गु बटलिं प्लान्टफोराबो थाथ'दों।  स्नि रोजानिबो बांसिन थिखानाय मावसाफोरा डिगबाई, नुनमाटी, नुमालीगढ़ आरो बंगाइगाव रिफाइनारिफोराव सोमावसारदोंमोन।

गुवाहाटीनि ब'न्डायाव बकाजाननि आसाम रुफिं कम्पानि, आसाम कार्बन कम्पानि, इन्डिया कार्बन कम्पानि,  सिमेन्ट फेक्टरीआ मख'जाथावमोन। खौरां मोन्नाय बायदिब्ला स्ट्राइकरफोरखौ पुलिसा नगांव सोहोराव होबथादोंमोन आरो सा 80 सोमावसारगिरिफोरखौ खादोंमोन।

लखिमपुर, बिश्वनाथ, सनितपुर, दरं, ओदलगुरी, बंगाइगांव-चिरांग, ककराझार, धुबरी आरो काछार बायदि जिल्लाफोरावबो हेंथा दिन्थिफुंनाय जादोंमोन।

बेनि अनगायैबो, सोमावसारनायनि समाव, मावथिफोरा बे खेबाव गोबां अनजिमानि मेलफोर आरो रेलिफोराव बाहागो लादोंमोन। जायगानिफ्राय गुबुन जायगायाव पिकेटिं खालामनायाबो स्ट्राइकखौ जाफुंसार खालामनायाव मदद होयो।  

चक्का बन्द हाबाफारिनि फिन्नाय महरै आसामनि गुबुन-गुबुन जायगाफोराव गारि सालायगिरिफोराबो लामायाव ओंखारबोनायखौ नुनो मोनदोंमोन।

 

7. भारतारि दै सान्थ्रि हानजानि गेदेर जाफुंसारनाय । भारतारि दै सान्थ्रि हानजानि गोलाव जानथायनि एन्ति साबमेरिन-रकेट खान्थिनि जाफुंसार आनजाद नायनाया आबुं जाबाय । बे जाफुंसारनाया भारतारि दै सान्थ्रि हानजानि रैखाथि गोहोखौ मख'जाथाव महरै बांहोगोन होनना मिजिं थिनाय जादों ।

मावख'आरिफोरा बुंदोंमोन दि दावहानि जाहाज आई.एन.एस. कवरत्तीनिफ्राय एक्सतेन्देत रेन्ज एन्टि-साबमेरिन रकेट (इ.आर.ए.एस.आर.) नि मोखथाङारि आनजाद नायनाया 23 जुननिफ्राय 7 जुलाइसिम जाफुंसारै खालामनाय जादोंमोन। बेजों लोगोसे, भारतारि नेभिआ थाबैनो इ.आर.ए.एस.आर.  खान्थि लाबोनो हागौ।

रैखाथि मन्थ्रि राजनाथ सिंहआ रैखाथि बिजिरसं आरो जौगाथाय आफाद, भारतारि नेभि आरो खान्थिनि जौगानाय आरो आनजाद नायनायाव लोब्बा थानाय बिबानगिरिफोरखौबो बरायदों।

गुबुन-गुबुन रेन्जफोराव गासै 17 इ.आर.ए.एस.आर.फोरखौ  जाफुंसारै आनजाद नायनाय जादों  । नेभिनि बायदिब्ला आनजादफोरनि गासिबो थि थांखिफोर जेरै रेन्ज दिन्थिफुंनाय, इलेक्ट्रनिक टाइम फ्यूजनि खामानि मावनाय आरो वारहेडफोरनि दिन्थिफुंनायखौ जाफुंसारै दिन्थिफुंनाय जादों। डिआरडिअ'नि मासिगिरि समीर वी कामतआबो ईआरएएसआरनि डिजाइन आरो लुनायाव लोब्बा थानाय हानजाफोरखौ बाख्नायदोंमोन।

 

 8. मोन्नै ट्रेक थानाय नैथि रेलवे दालांखौ शराइघाट दालांनि नांजाबहोनानै बानायनाय जागोन। बेयो शराइघाट दालांनि बजाखौ जोबोद खम खालामगोन। ब्रह्मपुत्रनि सरायघाटआव बे दालांनि लुनाया थाबैनो जागायगोन। दालांआव डाबल ट्रेक आरो मोनथाम लेन लामाफोर थागोन। सा-सानजा सिमा रेलवेआ सिगांनिफ्रायनो बिडिं बिखान्थिखौ आबुं खालामखाबाय। बेनि खामानिया बे बोसोरनि सेप्तेम्बरनिफ्राय जागायनो हागौ। सा-सानजा सिमा रेलवेनि गाहाय सुबुं फोनांजाब मावख'गिरि कापिंजल किशोर शर्माया बुंदों, "दालांनि लुनाया बे बोसोरनि सेप्तेम्बरनिफ्राय जागायगोन। बे दालांनि लुनाया दिसेम्बर 2029 मायथाइसिमाव आबुं जागोन। बे दालांखौ अगियाथुरीखौ   कामाख्याजों फोनांजाबग्रा मोन्नै रेलवे मावथांखिनि सिङाव लुनाय जागोन  । गासै मावथांखिनि लुनायनि खरसाखौ 1,478 कौटि रां खालामनाय जादों। गुबुन फारसेथिं दालांनि गासै लावथाया 1.3 कि.मि., बे दालांआव गासै मोन 12 खुन्थिया थागोन। ट्रेनफोरखौ सालायनो थाखाय बे नैथि दालांखौ बेखेवनाया रोगाथाय खान्थिखौ गोख्रै खालामगोन आरो गोदान दावबायारि आरो माल रोगाग्रा ट्रेनफोरा खारगोन। ''

 

 9. भारतारि अख्रां सान्थ्रिनि जगुआर फोरोंथाय बिरखंआ बुधबाराव राजस्थाननि चुरू जिल्लानि रत्नागढ़ ओनसोलनि भानुदा गामियाव सरासनस्रा फोरोंथायनि समाव जाब्रबथायाव गोग्लैयो । भारतारि अख्रां सान्थ्रिआ जाब्रबथायखौ रोखा खालामो । बे आयदाखौ नायबिजिरनो थाखाय मोनसे नायबिजिरग्रा बिजिरसालिबो दानाय जादों । जाब्रबथायनि उनाव, ओनसोलाव गिनाय थासारि सोमजियो आरो गामिनि सुबुंफोरा बे जायगायाव जमा जाहोयो । जाब्रबथाय जानाय थावनिनिफ्राय सानैनि गोथै सह'खौ बोखांनाय जादों, जाय सानैबो पाइलट । बे बाथ्राखौ भारतारि अख्रां सान्थ्रिआ रोखा खालामबाय ।

जगुआर ट्रेनार बिरखंनि जाब्रबथायखौ रोखा खालामनानै, आइ.ए.एफ. आ ससियेल मिडिया प्लेटफर्म एक्सआव लिरदों, "भारतारि अख्रां सान्थ्रिआ दिनै राजस्थाननि चुरुनि खाथियाव मोनसे खान्थियारि फोरोंथायनि समाव जाब्रबथायाव गोग्लैयो। नोगोरारि सम्फथिनि जेबो खहा जायाखै। भारतारि अख्रां सान्थ्रि हानजाया बे दुखुनांथाव जाथायनि सायाव गोथौयै दुखु मोन्नाय फोरमायदों आरो बे दुखुनि समाव दुखु मोन्नाय नखरफोरजों गसंफादों। जाब्रबथायनि जाहोनखौ मिथिनो थाखाय मोनसे नायबिजिरग्रा बिजिरसालि दानाय जादों। "

 

10. मिरु रेल मन्थ्रि अश्विनी वैष्णवआ भारतारि रेलवेनि गोदान बिथांखिफोर आरो गेदेर जौगाहोनायनि बाथ्रा फोसावदों। बिथाङा मुंख'दोंमोन दि भारतारि रेलवेआ खरसाखौ बाङाय खालामनायजों लोगोसे साबसिन दावबायारि सिबिथाय बायदि राहाफोरखौ मावफुंनायनि फारसे आवगायगासिनो दं।

रेल मन्थ्रिआ बेखौबो बुंदोंमोन दि फैगौ बा बोसोराव भारत सोरखारा 1000 गोदान ट्रेनफोर जागायनो आरो 2027 मायथाइसिमाव बुलेट ट्रेनफोरखौ खारहोनो प्लेन बानायदों।  

बुलेट ट्रेन प्रजेक्ट

बुलेट ट्रेना  भारतारि रेलवेनि गोदानसिन आरो बयनिख्रुइबो हाबिलागोनांसिन गोख्रैथि रेल मावथांखि। भारतनि बुलेट ट्रेनखौ जापाननि हेफाजाबाव बानायनाय जादों। 

बुलेट ट्रेननि गिबि प्र'ट'टाइपआ 2026 मायथाइयाव सौफैनायनि आसा दं आरो बेनि उनाव 2027 मायथाइयाव मोनसे मावख'आरि लन्च जागोन होनना साननाय जादों। आईआईटी माद्रास आरो आईआईटी रुड़कीआ भारतआव बे बुलेट ट्रेन मावथांखिनि डिजाइन आरो बिजिरसंनायनि मोनसे गेदेर बाहागोजों लोब्बा दं। 

मुम्बाइ-आहमेदाबाद बुलेट ट्रेन मावथांखिनि थाखाय गुजरातनि वलसाड जिल्लायाव थानाय दमन गंगा दैमा दालांनि लुनाया आबुं जाबाय। मोनसे बिबुंथिनि बायदिब्ला, बे मावथांखिनि थाखाय गुजरातआव सानथांखि लानाय गं 21 दैमा दालांफोरनि गेजेराव बेयो 16थि दैमानि दालां। बुलेट ट्रेन मावथांखिनि थाखाय वलसाड जिल्लायाव थानाय गासैबो मोनबा दैमा दालांफोरा आबुं जाबाय।   

भारतारि रेलवेनि जौगानायखौ नोजोर होनानै रेल मन्थ्रिआ फोरमायो दि थांनाय 11 बोसोराव 35,000 किल'मिटार गोदान रेलवे लामा लुनाय जादों। बिथाङा बुंदोंमोन दि बेयो सिगांनि सोरखारफोरनि मोनफुंनायफोरनिख्रुइ गोबां गुन बांसिन। 

 

 11. दा नोंथांमोननि थाखाय मोननैसो गुसुं खौरांफोर होनो सानदों...

1. गुवाहाटी मस्जिदाव अमा बेदर दोननायनि दायआव सासेखौ खानाय जादों। मृदुपवन पाठक मुंनि सासे सेंग्रानि बेरेखा पानजाबारीनि मस्जिदाव अमा बेदर दोननायनि अजद होदों। बियो थफ्लायाव सासे सिख्लानि मुं आरो जानबुं नम्बरखौबो दोनदोंमोन। सेंग्रानि सायाव मोजां मोनलायनायनि जाहोननि थाखाय बेबादि हाबा मावनायनि दाय होनाय जादों।

2. गवालपारायाव मोनसे मुगैथाव जाथाय जादों। थानसालिनि मोदाइ-मोदाइजोफोरनि मुसुखाफोरखौ दुथांफोरा बुफायदोंमोन। पुलिसआ जाथायजों सोमोन्दो थानाय सासे साहब उद्दीनखौ खादों। खोमसिनि खाबु लानानै दुर्गा मन्दिरनि मुसुखाफोरखौ दुथां सुबुङा बुफायदोंमोन।

3. गोबां आफादफोरजों होजानाय भारतनि बन्दआ गासै हादोराव गलाय-गथाय गोहोम खोख्लैदों। आसामाव, बन्दआ गासै गोजोनमोन, नाथाय हादोरनि गुबुन बाहागोफोराव मोननैसो जाथायफोर जागासिनो दं। सोनाब बेंगलावबो गोबां हिंसायारि जाथायफोर जादोंमोन। राहुल गान्धी बिथाङा बिहारआव हेंथा दिन्थिफुंनायाव बाहागो लादोंमोन।

4. एसियानि बयनिख्रुइबो बैसोगोरासिन मैदेरा दा गैलिया। मध्य प्रदेशनि पन्ना टाइगर रिजर्वआव मैदेरा जोबथा हां बोयो। केरालानिफ्राय लाबोनाय वत्सलाया मध्य प्रदेशनि बे हाग्रा ओनसोलाव बयनिबो थाखाय अनजाथावमोन। केरालानिफ्राय नर्मदापुरमाव लाबोनायनि उनाव वत्सलाखौ पन्ना टाइगर रिजर्वआव लांनाय जादोंमोन।

 

 

• Tweet
• Share
• Share
• Share
• Share

About Mridul

bodoinfo.com provides informations regarding State Government, Central Government and Private sector jobs for the aspirants of assam.

Related Post