12 July 2025 bodo top news. ABSU UBPO BKWAC. todays eviction etc.

दिनै 12 जुलाइ 2025 सनिबार साननि दासिमनि मोननैसो गोनां खौरांफोरजों दिनैनि सानखौ जागायदो।

 

1. दिनैबो गोदान जायगायाव सोरखारि हा दखल खालामना लानायफोरखौ होखारनाय जागोन, गवालपारायाव। थांनाय साननैसोनिफ्राय सोरखारि हा निफ्राय सुबुंफोरखौ होखारनायखौ लानानै रायजोनि राजखान्थिया गुदुं जानानै दं। धुबुरीआव रायजो खुंथाइनि होखारनायनि उनाव, बेरेखा हानजाया हिमन्त बिस्व सर्मा बिथांनि दैदेननाय हादोरसा सोरखारखौ सोंखारिदोंमोन। बबेखानि, बेरेखा हानजानि खुगाजों गाग्लोबनाया गिबि मन्थ्रि हिमन्त बिस्व शर्मा बिथांनि थाथायखौ सोलायनो हायाखै। मोनसे खौरां मेलाव गिबि मन्थ्रिआ फोसावो दि जायफोरा रायजोआव सोरखारि हाखौ दखल खालामदों बिसोरनि बेरेखायै सोरखारनि होखारनाय हाबाफारिया सोलिबाय थागोन।

आसाम सोरखारनि केबिनेट जथुमनि उनाव गिबि मन्थ्रि हिमन्त बिश्व सर्माया मोनसे खौरां मेल खुंनानै बिबुंथि लाखियो। केबिनेटनि थिरांथाफोरखौ फोसावनायनि उनाव बिथाङा खौरांगिरिफोरनि सोंलुफोरनि फिन्नाय होगासिनो दंमोन। बेजों लोगोसे, सासे खौरांगिरिनि मोनसे सोंथिनि फिन्नायाव बिथाङा रोखा खालामदोंमोन दि सोरखारि हा आवग्रिग्राफोरनि हेंथायै होखारनाय हाबाफारिया सोलिबाय थागोन।

बिथाङा बुंदोंमोन दि बिजिरसालिया हाग्रानि हाखौ बासायफिन्नो गनायथि होदों। लोगोसेनो बिथाङा बुंदोंमोन दि होखारनायनि सिगां जायगाखौ खालि खालामनो थाखाय 10 जुलाइसिम सम होनाय जादोंमोन।

बबेखानि, गिबि मन्थ्रिया रोखा खालामदोंमोन दि 11 जुलाइआव जुम्मा नमाजनि थाखाय होखारनाय जानाय नङा आरो बेनि सोलायै 12 अक्ट'निफ्राय अपारेसनआ जागायफिनगोन। बे बायदियैनो, बिथाङा बुंदोंमोन, 12 जुलाइनिफ्राय गवालपारायाव होखारनाय हाबाफारि लानाय जादों।

 

 2. गाहाय मन्थ्रि नरेन्द्र मदि बिथाङा दिनै 12 जुलाइनि फुंनि 11 रिंगासोआव भिडिअ' कनफारेन्सनि गेजेरजों गुबुन गुबुन सोरखारि बिफानफोर आरो एजेन्सिफोराव 51,000 निबो बांसिन गोदानै थिसनजानाय लाइमोनफोरनो थिसनलाइ बिलाइ रानगोन।

रोजगार मेलाया साख्रि सोरजिनायाव गोजौसिन गोनांथि होनो थाखाय गाहाय मन्थ्रिनि रादाइखौ आबुं खालामनायनि फारसे मोनसे आगान।

रोजगार मेलाया लाइमोनफोरखौ गोहो होनाय आरो हादोर दानाय बिखान्थियाव बाहागो लानो थाखाय ओंथिगोनां खाबु होनायाव गोनां बिफाव लायो।

हादोर नाङैनो रोजगार मेलानि गेजेरजों दासिम 10 लाखनिबो बांसिन थिसनथाइ लाइजाम होनाय जाबाय।

16थि रोजगार मेलाखौ हादोरनि मोन 47 थावनिफोराव खुंनाय जागोन। बे थिसनथाइफोरखौ मिरु सोरखारनि मन्थ्रिफोर आरो बिफानफोराव खालामनाय जादों।

हादोरनि गुबुन गुबुन जायगानिफ्राय सायख'जानाय गोदानै थिसनजानाय बिनायसाफोरा रेल बिफान, नखर बिफान, पस्तेल  बिफान, सावस्रि आरो नखर अनसाइ बिफान,  राङारि सिबिथाय बिफान, लेबार आरो   एमप्लयमेन्ट बिफानजों लोगोसे गुबुन बिफानफोर  आरो मन्थ्रि बिफानफोराव हाबगोन।

 

 3. दिसपुरनि जनता भबनआव थानाय केबिनेट मन्थ्रि पिजुस हाजरिकानि मावख'आरि कनफारेन्स ह'लाव मैया बर' दैदेनगिरिफोर आरो केबिनेट मन्थ्रि पिजुस हाजरिकाजों मोनसे गोनांथार साववराय जथुम खुंनाय  जादोंमोन।

बे मेलाव दुलाराय बर' फरायसा आफाद- एबसु, इउनाइटेड बर' पिपुल्स अर्गेनाइजेसन (इउबिपिअ' आरो बर' कचारी वेलफेयार अट'नमास काउन्सिल (BKWAC) नि गाहाय थान्दै हानजाफोरा बाहागो  लादोंमोन।

सावरायनायाव बर' हारिनि जौगानाय, दाउगानाय आरो मोन्थायजों सोमोन्दो थानाय गोबां गोनांथार आयदाफोरखौ मिरु खालामदोंमोन, गुबैयै बड'लेन्ड टेरिटरियेल रिजन (बीटीआर) आरो बर' कछारी वेलफेयार अट'नमास काउनसिलनि।

सावरायलायनायनि समाव, मन्थ्रि हाजरिकाया गासै जौगाथायनि थाखाय आसाम सोरखारनि रादाइखौ फिन खेबसे रोखा खालामो आरो खोथा होयो दि बिटिआरआव थाग्रा गासैबो हारिनि थाखाय समान खाबुफोर होनाय जागोन।

बे मेलाव एबसुनि आफादगिरि दिपेन बर' , लेङाइ आफादगिरि खोरोमदाव वारि, बिकेडब्लिउएसिनि सिइएम मिहिनिस्वर बसुमतारी, आसाम सोरखारनि उफ्रा गाहाय नेहाथारि बि. कल्यान चक्रबर्तीआ बाहागो लादोंमोन।

 

 4. गुजरातनि आनन्द जिल्लायाव मुजफ्फरपुरनि खाथियाव महिसागर दैमायाव गंभीरा दालां बायनानै जानाय मोनसे जाब्रबथायाव थैनायनि अनजिमाया सा 21 जाबाय। जाब्रबथायाव दालांनि बायनाय बाहागोफोरजों लोगोसे गंब्रैनि बांसिन गारिफोरा दैमायाव गोग्लैदोंमोन। जाब्रबथायनि 50 घन्टा उनाव सुक्रुबाराव आरोबाव साथामनि गोथै सह'खौ बोखांनाय जादोंमोन। बेनि सिगां बृहस्पतिबार मोनाबिलिसिम सा 18 गोथै सह'फोरखौ बोखांनाय जादोंमोन।

सुक्रुबारखालि थामथि सानाव जायगायाव रैखाथि हाबाफारिया सोलिगासिनो दंमोन । रैखाथि हाबाफारियाव थिसनजानाय रौनियाफोरा 50 घन्टानिबो बांसिन समनिफ्रायनो अपारेसनखौ खालामगासिनो दं । हर थौजासिम रैखाथि हाबाफारिया सोलिगासिनो दंमोन । सुक्रुबारनि फुंनिफ्रायनो खालामनाय अपारेसननि समाव सानजौफुसिम आरोबाव साथाम गोथै सह'खौ बोखांनाय जादोंमोन ।

वडोदरा जिल्ला कमिसनार अनिल धमेलियाया बुंदों,

दि 98 जौखोन्दो साल्फ्यूरिक एसिड गोनां गंसे टेंकारआबो दैयाव गोग्लैदों। बेनि थाखाय रैखाथि हानजाया गासैबो खैफोदनि जाथावनाखौ नोजोर होनानै रैखाथि हाबाफारि लागासिनो दं ।

बेराफारसेथिं, बृहस्पतिबारनि मोनायाव दैमायाव दै बारायनायनि जाहोनाव हरनि 10 रिंगासोसिम खामानि मावनायनि उनाव अपारेसनखौ बन्द' खालामनो गोनां जादोंमोन ।

बेखौ गोसोखांहोनो हायोदि बुधबारनि फुंआव जानाय जाब्रबथायाव ब्रैजि बोसोरसो गोजाम दालांनि मोनसे बाहागोआ गोग्लैदोंमोन आरो गोबां गारिफोरा दैमायाव गोग्लैदोंमोन।  

 

5. बलूचिस्तानआव गंनै बासफोरनिफ्राय सा 9 दावबायारिफोरखौ दिहुननानै उदखारिफोरा गावथारनाय जाथाय जादों। दावबायारिफोरखौ बृहस्पतिबारनि मोनायाव किदनेप खालामनायनि उनाव गावथारनाय जादोंमोन।  बे मुगैथाव बुथारनाया बलूचिस्ताननि जहाब आरो ल'राराई जिल्लाफोरनि गेजेरनि सुर-दाकाई ओनसोलाव जादोंमोन।

जहाब ओनसोलनि लेङाय कमिसनार नाबिद आलमनि बायदिब्ला, बुथारजानाय गासैबो पाकिस्ताननि पान्जाब रायजोनिमोन। बलूचिस्तान सोरखारनि बुंथिगिरि शाहिद रिन्दआ बुंदोंमोन दि  फितना अल हिन्दुस्तान मुंनि मोनसे उदखारि हानजाया बे बुथारनायाव लोब्बा दंमोन।

उदखारिफोरा बृहस्पतिबारनि हराव काकत, मस्तुंग आरो सुर-डाकाई ओनसोलफोराव गाग्लोबदोंमोन। उदखारिफोरा सुर-दाकाई ओनसोलाव गंनै बासनिफ्राय सा 10 दावबायारिफोरखौ बोख्लायदोंमोन। सा 9 सुबुंफोरखौ गावथारनाय जादोंमोन।

उदखारिफोरा आरोबाव माखासे दावबायारिफोरखौ लांखारदों ना लाङाखै बेखौ मिथिनो थाखाय नायबिजिरनाय जागायनाय जादों। उदखारिफोरखौ नागिरनानै संदाननाय हाबाफारिया सोलिगासिनो दं। बिथाङा दाबि खालामदोंमोन दि काकत आरो मस्तुंग ओनसोलाव उदखारि गाग्लोबनायखौ रैखाथि हानजाफोरा फेलें खालामदोंमोन।

सुलुंनि बायदिब्ला, गोबां दावबायारिफोरा क्वेटानिफ्राय लाहौरसिम एनएच 70 आव गंनै बासफोरजों दावबायगासिनो दंमोन। हाथियार गोनां उदखारिफोरा सुर-डाकाई ओनसोलाव सिलाय दिन्थिनानै गंनै बासफोरखौ होबथादोंमोन। आखाइयाव गोदानथार राइफलफोर लानानै, गंनै बासफोरखौ दावबायारिफोरनो सिनायथि बिलाइ दिन्थिनो थिननाय जायो।

बेनि उनाव बेखौ गंसे बासनिफ्राय स्नि आरो गुबुन बासनिफ्राय साथामखौ बे जायगानिफ्राय एसे गोजानाव लांनाय जादोंमोन। दावबायारिफोरखौ लांनायनि सिगां, उदखारिफोरा सानै बास सालायगिरिफोरखौ ओनसोलखौ नागारनो थिनदोंमोन। सासे दावबायारि, जाय माबोरैबा उदखारिफोरनिफ्राय खारखोमादोंमोन, पुलिसनो खोन्थादोंमोन दि बियो गुलि गावनायनि सोदोब खोनादोंमोन।

बेनि सायाव दा नायबिजिरनाया सोलिगासिनो दं।

 

 6. गेलेगिरि राधिका यादबनि बुथारनाया दायो गोबां सावरायजागासिनो दं। बिफायानो फिसाजोखौ बुथारनाय जाथाय। बृहस्पतिबारखालि फुंनि 10:30 रिंगानि मोनसे जाथाय। राधिकाया ओंखाम संनायाव मुखुबमोन। उनथिंजायनिफ्राय फैनानै, बिफाया राधिकायाव मोनसेनि उनाव मोनसे गासै गरथाम गुलि गावदोंमोन। राधिकाखौ गुलि गावनानै हायाव गोग्लैनायनि उनावबो बिफाया थाथ'आखैमोन। बिनि उनावबो फिन गरनै गुलि गावनाय जादोंमोन।  गासै गरबा गुलिफोरा राधिकानि मोदोमाव हाबदोंमोन। बे बुथारनाय जाथाया राधिकानि बिफा दीपक यादवनि गेजेरजोंनो खालामजादोंमोन। बे जाथाया जानायनि उनावनो गोबां बाथ्राफोरा सोराङाव फैदों।

राधिकाया गावनि बिमा-बिफाजों सेक्टर 57, गुरुग्राम, हरियाणायाव थानाय गावनि नआवनो थायोमोन। राधिका यादबआ सासे रायजो थाखोनि तेनिस गेलेगिरिमोन। राधिकाया बावैसो गावनि टेनिस एकादेमीबो जागायदोंमोन। बेनि अनगायैबो,  राधिकाया इंस्टाग्राम रील,  वीडिय'नि गेजेरजोंबो मोजां राङारि आय आर्जिगासिनो दंमोन। राधिकाया रांखान्थियारि महरै गोख्रैयै गाव-थोजासे जानो हमदोंमोन।

राधिकानि बिफा दीपक यादबआ बेफोरखौ थारैनो गनायना लानो हायाखैमोन।

पुलिसनि बायदिब्ला, राधिकानि बिफा, दायनिगिरि दीपक यादवआ सोंनाय फिन्नायाव सिमान जादों दि बिनि गामि वजीराबादनि सुबुंफोरा बिनि फिसाजोनि आयजों जानायनि थाखाय बिखौ गोबां बाथ्राफोर बुंदोंमोन, जंखायदोंमोन। सोंनाय फिन्नायाव दीपकआ पुलिसनो बुंदोंमोन, "जेब्ला आं वजीराबादआव थायोमोन, अब्ला गायखेर लायनो थाङोब्ला गामिनि सुबुंफोरा आंखौ जंखायोमोन। बिसोरो आंनो बुङोमोन, आं आंनि फिसाजोनि आयजों जायो होनना। बेनि थाखाय आं जोबोद दुखु मोन्दोंमोन, आंनि खर'आ गुदुं जायो। सुबुंफोरनि मोनसे थाखोआ आंनि फिसाजोनि आखुनि बागैबो रायज्लायोमोन। आं बिखौ टेनिस एकादेमिखौ बन्द' खालामनो थिनदोंमोन, नाथाय बियो खोनासङाखैमोन। "

बेयावनो सल'आ जोबा, दीपकआ पुलिसजों सोंनाय फिन्नायाव बुङो, "थासारिया जोबोद गाज्रिमोन। मानोना बेयो जोंनि सन्मानजों लोब्बा दंमोन। आंनि मान-सन्मानआव दुखु मोनदोंमोन। आंनाव लाइसेन्स गोनां पिस्टल दंमोन। जेब्ला राधिकाया ओंखाम संग्रा खथायाव ओंखाम संगासिनो  दंमोन, आं बिखौ उनथिंजायनिफ्राय गरथाम गुलि गावदोंमोन। आं आंनि फिसाजोखौ बुथारबाय। नायबिजिरनाया सोलिगासिनो दं।

 

 7. एलन मस्कनि भारतआव फैनायनि लामाया गेवबाय। स्टारलिंकआ जोबनायाव भारत सोरखारनि जोबथा गनायथि मोनो। एलन मस्कनि स्टारलिंकआ भारतआव फैगासिनो। बयनिख्रुइबो धोनिसिन सुबुं एलन मास्कनि बे सेतेलाइत इन्टारनेट सिबिथाया हादोरनि दावगानाय लामाखौ सोलायनो हागौ। गोबाव समनिफ्रायनो स्टर्लिंआ भारतआव फैगोनखौ लानानै सावरायलायनाय जागासिनो दंमोन। नाथाय गुबुन गुबुन बिथांखिफोर आरो गनायथिफोरनि थाखाय थाबथानानै दंमोन। जोबनायाव, इन्डियान नेशनेल स्पेस प्रमसन एन्ड एप्रुभेल सेन्टारआबो स्टारलिंकखौ गनायथि होयो। बेनिखायनो दा भारताव स्टारलिंकनि इन्टारनेट सिबिथाय जागायजेन्नायाव आरोबाव जेबो हेंथा गैला।

 थांनाय दानाव, स्टर्लिंआ भारतआव इन्टारनेट सिबिथाय होनो थाखाय फोरमायथि आरो फोसावथाय मन्थ्रि बिफाननिफ्राय गनायथि मोन्दोंमोन। नाथाय ग्रीन सिगनेलखौ भारतारि अख्रांमा सामलायग्रा बिबानगिरिनिफ्राय मोननाय जायाखैमोन। जोबनायाव, बे हेंथाया स्टारलिंकनि थाखाय बोखारजाबाय।

बेजों लोगोसे, स्टारलिंकआ सुबुंफोरनि गेजेराव गोबां सावरायलायनाय लाबोनो हादोंमोन। स्टारलिंकआ आथिखालाव भारताव थामथि सेतेलाइत इन्टारनेट जगायग्रा।  बेनि सिगाङाव, वनवेब आरो रिलायंस जियो सैटकमआ बे लाइसेन्सखौ मोननो हादोंमोन। नाथाय स्टारलिंकआ बादायगिरिफोरनिफ्राय जोबोद सिगां मानोना बे सेतेलाइत इन्टारनेटआ आथिखालाव 70 नि बांसिन हादोरफोरखौ सिबिथाय होगासिनो दं।

बे गनायथिजों, स्टारलिंकआ भारताव गावनि बिथायारि सानजथाइ लुनायखौ जागायजेनगोन। बेयो सोरखारनिफ्राय स्पेक्ट्रम बायगोन। एलन मस्कनि कम्पानिया दासिमबो भारताव सिबिथाय जागायनायनि थि अक्ट'खौ फोसावाखैब्लाबो, माखासेफोरा अनुमान खालामगासिनो दि सिबिथाया दाननैनि गेजेराव जागायनो हागौ होनना।

बेनि बेसेना बेसेबां जागोन?

गुबुन गुबुन रिपर्टफोरनि बायदिब्ला, भारताव स्टारलिंक इन्टारनेटनि दानारि बेसेना 3,000 सो रां जानो हागौ। सेटेलाइट डिश आरो वाइफाइ राउटारजों लोगोसे बे हार्डवेयर किटखौ गिबि खेबनि थाखाय बायनांगोन।

• Tweet
• Share
• Share
• Share
• Share

About Mridul

bodoinfo.com provides informations regarding State Government, Central Government and Private sector jobs for the aspirants of assam.

Related Post