18 July 2025 bodo top news. Ex NDFB, ABSU etc etc news ~ Bodoinfo.com

दिनै 18 जुलाइ 2025 सुक्रबार साननि दासिमनि मोननैसो गोनां खौरांफोरजों दिनैनि सानखौ नोंथांमोना जागायदो।

1. गवालपारा जिल्लानि कृष्णाई (पैकान) नि सोरखारि हा दखल खालामना लानायफोरखौ होखारनाय ओनसोलाव दुंहाव थासारि जादोंमोन। होखारजानाय सुबुंफोर आरो खुंथायनि गेजेराव दुंहाव थासारि सोमजिनायनि फिथाय महरै बृहस्पतिबारखालि गुलि गावनाय जाथाय जादोंमोन। गावनायाव सासे सुबुंनि जिउ खहा जायो। रायजोनि गिबि मन्थ्रि ड. हिमन्त बिस्व सर्माया जाथायनि सायाव फिनजाथाय होदोंमोन।

खौरां मोन्नाय बायदिब्ला, पुलिस खुंथायजों लोगोसे हाग्रा बिफाननि सुबुंफोरा बृहस्पतिबारनि फुंआव कृष्णईनि होखारनाय जायगायाव सौहैदोंमोन। बे हान्जाखौ नुनाय लोगो लोगो होखारजानाय सुबुंफोरा दुंहाव खालामो थासारिखौ, बाथ्रा दान्थेलायनायबो जादोंमोन। बे बाथ्रा दान्थेलायनायनि अनगायैबो होखारजानाय सुबुंफोरा पुलिस-खुंथायनि हानजायाव अन्थाय खुबैनो हमो।

बे गुलि गावनायाव बिद्यापारानि सकवात हुसैन मुंनि सासे सुबुङा जिउ गोमायो, फारसेथिं कुतुबुद्दिन आलि मुंनि सासे सुबुङा गोब्राबै जोखोम जायो। जोखोम जानाय सुबुंखौ मोजां फाहामथायनि थाखाय गुवाहाटी मेडिकेल कलेज हस्पितालआव लांनाय जादोंमोन। बे जाथायाव गोबां सुबुंफोरा जोखोम जायो होनना मिथिनो मोननाय जादों।

जायनि सायाव थासारिया गाज्रिसिन जादोंमोन आरो होखारजानाय सुबुंफोरा पाइकाननि गंसे फरायसालिनि गोजाम न'खौ सावना होदोंमोन। अदेबानि बे हाबायाव लोब्बा थानाय सानै सुबुंखौ पुलिसा सिगांनिफ्रायनो हमनानै दोनखाबाय।

गिबि मन्थ्रि ड. शर्माया गवालपारानि पाइकानआव होखारनाय आरो बृहस्पतिबारनि फुंआव सोमजिनाय सानथावै थासारिनि सायाव फिनजाथाय होदोंमोन आरो बुंदोंमोन दि पाइकाननि गोग्लैनाय ओनसोलाव बिफां गायनायजों लोगोसे खुंथायनि सुबुंफोरखौ गाग्लोबग्रा सुबुंफोरनि बेरेखायै केस होनाय जागोन।

बे जाथायाव पुलिस बिफान आरो हाग्रा बिफाननिबो गोबां सुबुंफोरा जोखोम जादों होनना मिथिना मोनदों। गिबि मन्थ्रिया गासै सा 22 सुबुंफोर जोखोम जादों होनना मिथिहोदों।

2. झारखान्डआव नक्सल उदखारिफोरनि हेंथायै जुजिनानै मुंख्लं जानाय ककराझारनि मागुरमारियाव राभापारानि प्राणेश्वर कचनि गोथै सह'आ मैया बेलासिनि 1 रिंगासोआव गावनि न'आव मोनफैदोंमोन। मुंख्लंनि गोथै सह'आ बिथांनि न'आव सौहैनायनि उनाव, नख'राव दुखुनि साया साग्लोबदोंमोन।

बिनि उनाव, नखरा दोरोङारि नेम-खान्थिजों थैनाय सुबुंखौ जोबथा मान बावनानै बिदाय होयो।

मुंख्लंनि बिमा बबिता राभा, बिसि साबित्री बसुमतारी आरो बिसोरनि बा बोसोर बैसोनि फिसाज्लाया जायगायावनो जोबथा मान बावो। बेनि अनगायैबो ककराझार सानजा बिधान सभा बियाबनि एमएलए लरेन्स इसलारी, ककराझार जिल्लानि कमिसनार मसान्दा पर्टिन, ककराझार जिल्लानि पुलिस सामलायगिरि पुष्पराज सिंह, बिटिसिनि गाहाय नेहाथारि आकाशदिपजों लोगोसे गोजौ थाखोनि सिआरपिएफनि मावख'गिरि, बारग' मन्थ्रि प्रमिलारानी ब्रह्म, बिएपि दोलोनि गागि दैदेनगिरि देरहासात बसुमथारि बिथांमोनहा बाहागो लादोंमोन।

मुंख्लंनि बिफा बीरेश्वर कोच बिथाङा बुंदों आसामनि गिबि मन्थ्रि हिमंत बिस्वा सरमा बिथाङा गावनो फन खालामो आरो 50 लाख रां होनाय जागोन आरो नखरनि सासेनो साख्रि होगोननि खोथा होदों होनना फोरमायो।

3. मैया एनआइए केस नांनानै थानाय सा 12 बारग एनदिएफबि नि सोद्रोमाफोरा कक्राझार जोबथेसालिनिफ्राय बेइल मोननानै उदां अख्रांनि सिङाव फैनो हादों। गासै सा 13 आ ओंखारनो गोनांमोन, सा 12 या ओंखारो आरो सासेयाबो ओंखारगोन होनना सासेया बुङो। थांनाय 10 बोसोरनि बारा सम जेल जानाय गोबां सोद्रोमाफोर दं। बिथांमोना दा उदां अख्रांनि सिङाव फैनो हानानै जोबोद गोजोननाय मोननायखौ फोरमायदों।

4. दुलाराय बर फरायसा आफादा बोडोलैंड टेरिटोरियल रीजन (बीटीआर) आरो बोडो-कचारी वेलफेयार अतनमास काउन्सिल (बीकेडब्लिउएसि) नि गोबां ओनसोलफोराव धर्ना आरो एदभार्ताइजमेन्त बिलाइखौ सावनाय हाबाफारि लादोंमोन मैया, गौहाति गोजौ बिजिरसालिनि साख्रि थिसननाय आनजादाव बर रावखौ सोयिनि थाखाय।

मख'जायोदि, दुलाराय बर' फरायसा आफादा थांनाय गोलाव बोसोरनिफ्राइनो आसाम जुदिचियेल सार्भिसनि आनजादाव पेपार 50 नम्बर सोसननाय आरो जुनियर एडमिनेस्ट्रेटिभ एसिस्टेन्ट आनजादाव बर' रावनिफ्राइ पेपार 20 नम्बर सोसननाय दाबिफोरखौ लानानै दाबि दैखांबोदोंमोन

सोमावसारगिरिफोरा बुङोदि बे आगानआ नासयनाय आरो बर' रावनि संबिजिरारि आरो आयेनारि गनायथिखौ खहा खालामो, जायखौ भारतारि संबिजिरनि 8थि फारियाव सोफानाय जादों आरो आसाम मावख'आरि राव (सोदांनाय) आइन, 2020 नि सिङाव आसामनि लोगो मावख'आरि रावनि थामान होनाय जादोंमोन।

धर्ना होनायफोरा मैया गुबुन गुबुन जिल्ला गाहाय मावख'फोराव फोसावथायफोरनि कपिफोरखौ सावदोंमोन, थाबैनो सुद्रायनायनि दाबि दैखांदोंमोन।

"जों बेखौ जोंनि रावारि मोनथायफोरखौ गोथौयै नेवसिनाय महरै नुयो। बर' रावखौ संबिजिरारि महरै गनायथि होनाय जादों आरो गासैबो हादोरसा-थाखोनि थिसननायाव समान आखु होनांगौ" होन्ना सासे धर्ना होनाया बुंदोंमोन।

सोमावसारगिरिफोरा फोथायनाय फोरमायदोंमोन दि गुवाहाटी गोजौ बिजिरसालि आरो आसाम सोरखारा बे आयदानि सायाव गोख्रै आरो न्यायगोनां राहा लागोन। बबेखानि, बिथांमोनहा बेखौबो गोख्रोङै बुंदोंमोन दि जेब्लासिम न्याय मोना अब्लासिम सोमावसारनाया सोलिबाय थागोन।

5. आसाम पाब्लिक सार्भिस कमिसन (ए.पि.एस.सि.) नि सि.सि.इ, 2024 नि फिथाइखौ मैया फोसावनाय जादों।

जथाय बादायलायनाय आनजाद (सि.सि.इ.), 2024 नि गिबि आनजादनि फिथाइखौ आसाम पाब्लिक सार्विस कमिसननि वेबसाइटाव फोसावनाय जादों।

बेखौ गोसोखांहोनो हायोदि थांनाय 8 जुनखालि जथाय बादायलायनाय आनजाद (सि.सि.इ.), 2024 नि गिबि आनजादखौ रायजोनि 35 मिरुफोराव खुंनाय जादोंमोन।

आनजादनि थाखाय सा 57,222 सुबुंफोरा आरजलाइ होदोंमोन। बे आनजादनि गेजेरजों रायजो सोरखारनि सिङाव थानाय गुबुन गुबुन बिफानफोराव मोन 289 लांदां जायगाफोरखौ आबुं खालामनाय जागोन।

बे आनजादखौ गासै मोनथाम खोन्दोआव खुंनाय जायो - गिबि (प्रिलिम्स), मेन्स आरो इन्टारभिउ। जायफोरा गिबि आनजादाव उथ्रिसार जाबाय बिसोरो थिसननाय बिखान्थिनि नैथि खोन्दो थामहिनबा गाहाय आनजादनि थाखाय नुजाथिनांगोन।

6. आबाद गाहाय रायजोआव आसार साउन दानफोराव आबादारिफोरनि मुखुबथिया बांलाङो नाथाय बे खेबाव बोथोरा थगायनाय बादि जादों। दा बे समाव आबादारिफोरा गोबां मुखुब जाना थायोमोन दुब्लिनि खामानिफोरखौ लानानै। नाथाय बे खेबाव बोथोरा आबादारिफोरखौ हेफाजाब होआखै। अखा हायैनि जाहोनाव आबादारिफोरा आबाद मावनायखौ दावगाहोनो हायाखै। अखा हायाखै, दैनि आंखालाव फोथारफोरा रानलांनो हमदों, गावस्रानो हमदों। आबादारिफोरा गावसोरनि खर’आव, खाफालाव आखाइ होनांदों।

गुबैयै गाहाय आसाम आरो सा आसामनि आबादारिफोरा गावसोरखौ थियारि खालामनानैबो फोथाराव हाबनो हायाखै । अखा हायैनि थाखाय जेंनायाव गोग्लैदों । अखा हायैनि जाहोनाव सोरबा माइ गायनो हायाखै आरो सोरबा माइ गायखांबायब्लाबो दैनि आंखालाव हा या गावस्राना दं।

दै जगायनायनि मुङाव सोरखारा कौटि-कौटि रां खरसा खालामबोगासिनो दं नाथाय आसामनि आबादारिफोरनि बे गोब्राब समाव नाथाय बेफोरबादि बिथांखिफोरा रैखा होनो हायाखै। बेनिखायनो रायजोनि गोरिब आबादारिफोरा बे समाव अखानि थाखाय एम्बुनि हाबानि सायाव सोनारनो गोनां जादों। सा आसाम आरो गाहाय आसामनि गुबुन गुबुन ओनसोलनि सुबुंफोरा दा सानफ्रोमबो एम्बुनि जुलि खालामगासिनो दं। आसामनि आबादारिफोरा दा गोदोनि बै बयजोंबो अनसायजानाय फोथायनायखौ फोथांफिन्नानै फोथाराव आबाद नि थाखाय जुजिगासिनो दं।

गुवाहाटीनि ओनसोलारि बोथोर बिगियान मिरुनि गागि बोथोर बिगियानगिरि सन्जय शोइलआ बुंदोंमोन दि आसामाव थांनाय से खावसे दानाव अखा हानाया सरासनस्रानिफ्राय 39 जौखोन्दो गाहायाव फैदों। बे समाव बजाली जिल्लायाव 87 जौखोन्दो, बाक्सा जिल्लायाव 69 जौखोन्दो, बरपेटा जिल्लायाव 74 जौखोन्दो, बंगाइगावआव 61 जौखोन्दो, चिरां जिल्लायाव 61 जौखोन्दो, दरंआव 79 जौखोन्दो, धेमाजिआव 57 जौखोन्दो, धुबुरीआव 69 जौखोन्दो, कामरुप (गामियारि) आव 62 जौखोन्दो। डिब्रुगढ़आव अखाया 39 जौखोन्दो बाङाइ जादों अखाया। बेनि गेजेराव, थांनाय से खावसे दानाव मेघालयआव 55 जौखोन्दो आरो अरुणाचल प्रदेशआव 46 जौखोन्दो अखा हानाया गाहायाव फैदों।

7. छत्तीसगढ़ गोजौ बिजिरसालिया मोनसे गोख्रों खौरां होदों दि जुलिनि सोमोन्दो दंब्लाबो बिसिनि गावारि प्राइभेसि सिफायनो नाङा। बावैसो फाथैलाय बिसिनायनि केसनि हियारिंनि समाव, बिजिरगिरि राकेश महन पान्डेआ बेखौ रोखा खालामदोंमोन दि बिसिनि गावनि मबाइल एबा बेंक एकाउन्टनि पासवर्ड बिनो एबा होनो थाखाय नारसिननाया नखरारि हिंसानि सिङाव गोग्लैनो हागौ।

मोनसे आयेनारि वेबसाइटनि फोरमायथिनाय बायदिब्ला, केसनि खोनासंनायनि समाव, बिजिरगिरिया बुंदोंमोन, "फिसाय आरो बिसिनि गेजेराव सोमोन्दोआ जेसेबांखि खाथि जाया मानो, सासेनि गावारि प्राइभेसिखौ गुबुन सासेआ सिफायनो हाया।" "

बिथांनि नोजोरनि बायदिब्ला, हाबा जायोब्लाबो, फिसायहा बिसिनि फन, रायलाइनाय, राङारि फोरमायथिनि सायाव गावारि मोनथाय गैया।

जाथायनि गुबै आयदाया जाबाय फिसायनि सन्देह'मोन। गावनि बिसिनि आखुखौ सन्देह खालामनानै, पुलिसनि खाथियाव मबाइल कल डिटेल रेकर्ड (सीडीआर) नि थाखाय खावलायदोंमोन। सि.डि.आर.नि आरजलाइखौबो जायगानि नखरारि बिजिरसालिया नेवसिगारदोंमोन। उनाव बेयो छत्तीसगढ़ गोजौ बिजिरसालिसिम थांदोंमोन। नाथाय बिजिरसालिआबो बिथांनि आरजलाइखौ नेवसिगारदोंमोन।

गोजौ बिजिरसालिया बुंदोंमोन दि खालि रोखा सन्देहनि बिथायाव बिसिनि गावारि प्राइभेसिखौ हेंथा होनो हाया। बिजिरसालिनि बायदिब्ला, हाबा जानाय जिउआव गावजों गाव फोथायनाय, रोखाथि आरो आनदोनि गेजेराव मोनसे समानथि लाखिनाया जोबोद गोनांथार।

8. नगांवनि कथियातली तुबुकी ग्रान्टआव सोमोनांथाव जाथाय, फिसायआ गावनि बिसिखौ खास्रि-बिस्रियै बुथारदोंमोन। दिम्बेस्वर गगैआ गावनि बिसिखौ न' सिङाव बुथारदोंमोन। आइजोनि गोथै सह'आ साननै न' सिङाव गोग्लैना दंमोन। खुरमा-बाहागिफोरा न'नि दरजाखौ सिफायदोंमोन आरो आइजोनि गोथै सह'खौ नुदोंमोन।

आइजोनि मोदोमाव जोखोमनि सिन नुनो मोनो। पुलिसआ जाथाय जायगायाव सहैयो आरो आइजोनि गोथै सह'खौ पस्टमर्टेमनि थाखाय नगांव सिभिल देहा फाहामसालियाव दैथाय हरो।

जाथायनि बायदिब्ला, नख'रा आबाद मावनो थाखाय काथियातलीआव थायोमोन। दिम्बेस्वर गगैया गावनि बिसिखौ बुथारदोंमोन आरो बियो गावनि फिसाखौ लानानै गावनिनो न'आव थांदोंमोन। दिम्बेस्वर गगैनि न'आ बकाखाटआव।

आइजोनि गोथै सह'खौ बोखांनायनि उनाव, दिम्बेस्वर गगैआ बकाखाटआव गावखौ गथायदोंमोन। खौरां बिजोंजों रायज्लायनायाव, दिम्बेस्वर गगैया बिसिनि आयेन बेरेखा मोजां मोनलायनायनि थाखाय गावनि बिसिखौ बुथारदों होनना सिमान लादोंमोन।

रायखांनो गोनां दि नगावनि जाय जायगायाव नखरा थायोमोन बै जायगानि खाथियावनो आइजोनि बिबनि न'आबो । बे जाथाया सोराङाव फैदोंमोन जेब्ला बिसोरो सान्नैसिम जेबो खौरां मोनैनि उनाव नआव सोंनो थांदोंमोन।

दायनिगिरि दिम्बेश्वरआ खौरांगिरिफोरनि सिगाङाव बेबादि बुंदोंमोन "बियो खेबब्रै एबा बा खेब गुबुनजों खारलांदोंमोन, बेनिखायनो आं बुथारदों, मा खालामनो," जेब्ला आंबियो आंनि जायासैनोब्ला आं बिखौ रावनिबो जानो होआ।। खौरांखौ मोजाङै दामना हो होननासो बुंबावो उनाव बियो। ''