5 July 2025 bodo news. Top bodo news. Kokrajhar news ~ Bodoinfo.com

दिनै 5 जुलाइ 2025 सनिबार साननि दासिमनि मोननैसो खौरांफोरा जाबाय।

1. दानिफ्राय ससियेल मेडियायाव हादोर बेरेखा बिबुंथि होनो हानाय नङा। हादोर बेरेखा भिडिअ'फोरखौ ससियेल मेडियायाव पस्ट एबा सेयार खालामनो हाया। मिरु सोरखारा हादोरनि बेरेखायै मुगैलायनाय गोसारहोग्राफोरखौ दबथायनो थांगासिनो दं। फोरमायथि बायदिब्ला, मिरु नखर मन्थ्रि बिफाना बेनि थाखाय मोनसे गोदान पलिसि थियारि खालामगासिनो दं। हादोर बेरेखा मावथिफोरखौ थाबैनो होबथानाय जागोन आरो बिसोरनि बेरेखायै गोख्रों राहाबो लानाय जागोन।

बेखौबो मिथिहोनाय जादों दि समाजारि बिजोंआव हादोर बेरेखा बिबुंथि होग्रा सुबुंफोरखौ नोजोर होनो थाखाय मोनसे जर'खा हानजा दानाय जागोन। बेबादि सुबुंफोरखौ सिनायथि होनाय आरो गोख्रों राहा लानाय जागोन। मख'जाथावदि, खालिस्ताननि आलादारि उदखारि गुरपतवंत सिंह पन्नुजों लोगोसे गोबां गुबुन हादोर बेरेखाफोरा ससियेल मेडियायाव सांग्रां आरो मुगैनाय गोसारहोदों। गोदान खान्थि फैनायनि उनाव बेबादि सुबुंफोरखौ होबथानाय जागोन।

गासै आयदानि सोमोन्दै आमेरिका सोरखार आरो ससियेल मिडिया प्लेटफर्मफोरजोंबो सावरायनाया सोलिगासिनो दं। सि.बि.आइ., एन.आइ.ए., रायजो पुलिस आरो इसिङारि रैखाथिजों लोब्बा थानाय गुबुन एजेन्सिफोरा भारत-बेरेखाफोरनि नाजानायखौ होबथानो आदबफोराव खामानि मावगासिनो दं। बे गासै बिखान्थिया जोबोद थाबैनो गोहोम गोग्लैनो हागौ।

मख'जाथावदि, पहलगाम उदखारि गाग्लोबनाय आरो बिनि उनाव अपारेशन सिन्दुरनि समाव ससियेल मेडियायाव गोबां हादोर बेरेखा पस्ट फोसावनाय जादोंमोन। आसामआवबो बे समाव हादोर बेरेखा बिबुंथि होनायनि थाखाय गोबां सुबुंफोरा जोबथेसालियाव दं।

2. ककराझार सदर सोहोरनि गंथाम मसाज पार्लार-सेलुनआव सुक्रबारखालि ककराझार पुलिसनि सिग्रोमनायाव सा 16 सुबुंफोरखौ खानाय जाथाया जिल्लायाव गोख्रों फिनजाथाय सोमजिहोदों। पुलिसा मैया आरएनबी र'दनि रिलेक्स यूनिसेक्स सेलुन, रयेल स्पा सेलुन आरो फ्लाइअभारनि सेरनि गुबुन मोनसे सेलुनआवबो सिग्रोमदोंमोन।

मोनसे पुलिस अपारेशननि समाव रिलैक्स यूनिसेक्स सेलुननिफ्राय सासे सेंग्रा आरो साबा सिख्लाफोरखौ हमनाय जादोंमोन । गुबुन फारसेथिं, पुलिसा रयेल स्पा सेलुननिफ्राय सा स्नि सिख्लाफोर आरो साथाम सेंग्राफोरखौ खानो हादोंमोन। बबेखानि पुलिसा फ्लाइअभारनि साखाथिनि सेलुननिफ्राय रावखौबो हमनो हायाखै ।

पुलिस अपारेसननि सोमोन्दै सिगांग्रो खौरां मोन्नानै सेलुनाव थानाय गासैबो खारखोमालाङो बेनिफ्राय। पुलिसआ रयेल स्पा सेलननि बरपेटा हाउलीनि बिगोमा मनिरुल आली आरो ककराझारनि चिरंजीवी ब्रह्मखौबो हमदोंमोन, जाय रिलैक्स यूनिसेक्स सेलुननि बिगोमा आरो दासिमबो बिसोरखौ सोंथि खालामगासिनो दं ।

बेखौ नोजोर होनो गोनां दि पुलिसा मिथिनो मोनदोंमोन मुंख'नाय युनिसेक्स सेलुनफोराव आयेन बेरेखा हाबाफोर सोलिगासिनो थायोमोन । बेनि फिथाय महरै मैया पुलिसा गिबियाव सासे बायगिरि महरै स्पायाव हाबदोंमोन आरो फोरमायथिया रोखा जानायनि उनावसो पुलिसा सिग्रोमदोंमोन । पुलिस अपारेसननि समाव गंनै सेलुनाव दावराव-दावसि जादोंमोन । रिलैक्स युनिसेक्स सेलुनाव पुलिस अपारेसनखौ क'कराझार जिल्लानि उफ्रा पुलिस सामलायगिरि नबनीता शर्माया दैदेनदोंमोन ।

लेङाइ पुलिस सामलायगिरि बिनन्द बसुमतारीआ रयेल स्पा सेलननि अपारेसनखौ दैदेनदोंमोन। मख'नो गोनांदि गोबाव समनिफ्रायनो अजद होबोदों दि स्पाफोराव गाज्रि खामानि सोलिगासिनो दं आरो दिनै पुलिसआ हरखाबै ककराझारनि मोनथाम स्पायाव सिग्रोमनानै आरोबाव सा 16 लाइमोनफोरखौ खायो।

3. आसाम आरो मेघालयनि गेजेराव गोबाव समनिफ्राय सोलिबोनाय सिमा जेंनाखौ सुस्रांनो थाखाय मोनसे गोनांथार आगान लानाय जादों। गिबि सिमा खुन्थियाखौ मैया गंनै नसुंसेनि रायजोनि गेजेराव सिमाजों सोमोन्दो गोनां दान्थे-बिदान्थे गोनां जायगाफोरनि गेजेराव मोनसेआव फसंनाय जादोंमोन। रायजोमि गिबि मन्थ्रि हिमंत बिस्वा सरमा बिथाङा एक्सनि गेजेरजों मिथिहोयो। बे सिमा खुन्थियाखौ रोखा आरो गोजोननि खुन्थिया बुंनानै गिबि मन्थ्रि हिमन्त बिश्व सर्माया बेखौबो मिजिं थिदोंमोन दि बे सिमा खुन्थियाया जोबनायाव मोनसे सोमखोर ओनसोलाव सोरखारि खुंथायनि मोनसे गोदान महर लाबोगोन।

गिबि मन्थ्रि बिथाङा लिरदोः आसाम मेघालय सिमानि गिबि स्तम्भ गायसननाय- 2022 मायथाइनि सुक्तिनि मोगथां महर मोननायनि थांखि। बबेखानि, गिबि मन्थ्रिया बेखौ रोखा खालामाखै दि सिमा खुन्थियाखौ बबेहाय फसंनाय जादों। पस्टआव बिथाङा बुंबावदों दि 1972 मायथाइयाव आसामनिफ्राय गावस्रानायनि उननिफ्राय आसाम-मेघालय सिमानि मोनसे गुवार बाहागोआ रोखा नङा जाना थादोंमोन।

बिथाङा फिन बुंफिनदोंमोन दि बे गोनो गोथोनि जाहोनाव गोबां समफोराव मोन्नैबो रायजोनि गेजेराव जेंना सोमजिदोंमोन।

बिथाङा बुंदों असम और मेघालयनि गेजेराव गासै मोन 12 बेलेबेजे गोनां ओनसोलनि मोन 6 नि जेंनाया सुस्रांजाबाय आरो बुजिलायनाय सुक्तिनि फिथाय महरै गिबि गायसननाय जाबाय होननाबो मिथिहोयो बिथाङा।

4. भारतआ हादोरनि गिबिसिन आइजो फाइटार पाइलट मोननो हादों। भारतारि अख्रां सान्थ्रिनि लेङाइ लेफ्टिनेन्ट आस्था पुनियाया दानिफ्राय फाइटार एयारक्राफ्टखौ बिरहोगोन। बेखौ मावख'आरि महरै भारतारि दै सान्थ्रि हानजाया फोसावदों। बेयाव बेखौ मुंख'नो गोनां दि आस्था पुनियाखौ दावहा नांग्रा बिरखंनि पाइलटनि मासियाव जिरायनाय गिबिसिन भारतारि आइजो महरै गनायथि होनाय जादों।

बेखौ मुंख'नो गोनां दि आस्थाया मिग-29 खौ बिरहोगोन, जाय भारतारि अख्रां सान्थ्रिनि आखाइयाव थानाय गोदानथार दावहा नांग्रा बिरखं। आस्थाया आई.ए.एन.एस. विक्रांतनिफ्राय बे दावहारु बिरखंखौ बिरहोगोन। बेयाव बेखौ मुंख'नो गोनां दि दावहानि समाव भारतआ बे मिग-29 खौ मोनसे जर'खा आदबजों बाहायदोंमोन। बे दावहा नांग्रा बिरखंनिफ्राय 450 किल'ग्राम गिलिरनि मोनब्रै बमा आरो मिसाइलफोर हगारनो हायो।

5. रायजोआव जापानिस एन्सेफेलाइटिस बेरामनि अनजिमाया गिथावनायै बांदों, बे एखे थासारिखौ जरहातआवबो नुनो मोननाय जादों। जरहात मेडिकेल कलेज हस्पिटेल आरो जरहात मिशन देहा फाहामसालिनि बेडफोराव जिल्लाजों लोगोसे खाथि-खालानि गोबां जिल्लाफोराव एन्सेफेलाइटिस आरो एन्सेफेलाइटिस बायदि बेरामजों भुगिनांनाय बेरामिफोरा नुनो मोन्दों।

जरहाट मेडिकेल कलेज हस्पितालनि मोनसे सुलुङा बे बाथ्राखौ बुंदोंमोन। अदेबानि, मोनसे अजद दं दि मेडिकेल कलेज हस्पितालनि बिबानगिरिफोरा खौरां बिजोंनि सिगाङाव बे आयदानि सायाव बिबुंथि होनायनिफ्राय गोजानाव थायो।

दा आसामाव आबाद मावनायनि सम, फोथाराव नुनाय दाउबफोराबो जापानिस एन्सेफेलाइटिसनि मोनसे गाहाय जाहोन। बेनिखायनो मुनमि दत्ता मुंनि सासे बिबानगिरिया साफ्रोमखौबो आबाद फोथाराव थांनाय समाव गोलाव आखाय गोनां जि गान्नो बोसोन होदोंमोन। बे समावनो, सावस्रि बिफाना मुस्रियाव मुलि लागायनाय, थाम्फैनि फुंखाफोरखौ फोजोबस्रांनाय, सांग्रांथि मेल बायदि खामानिफोरखौ मावदों।

बेखौ गोसोआव लाखिनाया गोनांदि गोबां लोमजानाय, खर' सानाय, बेहोश जानायनि बेबादि लैखोनफोरखौ गोबाव खालामाजासे नायनांगौ मानोना बेफोर जापानिस एन्सेफेलाइटिसनि इसाराबो जानो हागौ।

रायजोनि सावस्रि बिफाननि बायदिब्ला, आसामआव जापानिस एन्सेफेलाइटिस (जेई) बेरामनि अनजिमाया बांनानै 178 जाबाय, जेराव दासिम सा 9 सुबुंनि जिउ ख'हा जादों।

बेनिनो बांसिन #Kamrup आरो #Nalbari: मोननैयावबो मोन 16-16 केसफोर

#Barpeta आरो #Darrang: मोन 14-14 केस

#Kamrup (मेट्र'): 12 केस

#Nagaon: 11 केस

#Jorhat आरो #Sivasagar: मोनफ्रोमबो 10 केस

#Charaideo, #Goalpara, #Dhemaji #Morigaon: मोनफ्रोमबो 5 केस।

#Bajali, #Bongaigaon, #Dhubri, #Golaghat, #East कार्बिआंलं, #Lakhimpur: मोन 4 केस।

#Udalguri आरो #Chirang: मोनफ्रोमबो 3 केस

#Biswanath, #Hojai, #Tinsukia, #Dibrugarh: मोनफ्रोमबो 2 केस।

#Cachar, #Kokrajhar, #Majuli, #Sonitpur, #SouthSalmara आरो सोनाब कार्बि आंलं: मोन 1 केस मोनदों।

6. हिमाचल प्रदेशआ मिथिंगानि गिथावना महराव गोबां खहा जादों। मिथिंगानि गिथावना महरनि थाखाय रायजोआ जोबोद गाज्रि थासारियाव दङ। 20 जुननिफ्राय गाज्रि बोथोरनि जाहोनाव जानाय खैफोदनि जाहोनाव दासिम रायजोआव सा 69 सुबुंफोरा जिउ खोमानांबाय। एखे समावनो, खैफोदनि जाहोनाव सा 37 सुबुंफोरा दासिमबो गोमानानै दं। रैखाथि हानजाफोरा गोमानाय सुबुंफोरखौ नागिरगासिनो दं। बेबादि फोरमायनो हायै थासारिजों मोगा-मोगि जानायनि उनाव गोहोम गोग्लैनाय ओनसोलफोरनि सुबुंफोरा दुखुआव दं।

बे सुबुंफोरा सोरखारखौ मिथिंगायारि बे फोजोबस्रांनायनिफ्राय रैखा खालामनो जुनिया राहा लानो खावलायदों। जोमै बेरफ्रुनाय आरो दैबानाजों सोमजिनाय गिख्रंथाव थासारिनि गेजेराव मैया रायजोनि माण्डियाव आरोबाव सानैनि गोथै सह' बोखांनो हायो। मंगलबाराव मन्डीनि गुबुन-गुबुन ओनसोलफोराव जोमै गावनायनि जाथायफोर जादोंमोन। बेनि फिथाइ महरै मोनथाम अरायथा नङि दै बानाजों लोगोसे मोनसे जायगायाव हा गिसिखादोंमोन।

मावख'आरिफोरनि बायदिब्ला, जाथायनि जाहोनाव मैया फुंआव सानै गोमानाय सुबुंफोरनि गोथै सह'खौ बोखांनाय जादोंमोन। थैनायनि अनजिमाया सा 13 जाबायब्लाबो, आरोबाव सा 29 गोमानायफोरखौ नागिरनाया दासिमबो सोलिगासिनो दं। बे खैफोदआव गं 150 नि बांसिन न'फोर, गं 31 गारिफोर, गं 14 दालांफोर आरो गोबां लामाफोरा खहा जादों।

स्टेट इमारजेन्सि अपारेसन सेन्टारनि बायदिब्ला, दासिम खैफोदआव गासै 162 मोसौफोर थैबाय। बे समावनो, 370 सुबुंफोरखौ रैखा खालामनाय जादों आरो मोनबा रैखाथि बादाफोर गायसननाय जादों होनना खुंथाया बुंदों।

7. आबादारिफोरनि थाखाय मोजां खौरां। हादोरनि आबादारिफोरा थाबैनो प्रधान मंत्री किसान सम्मान निधि योजनानि सिङाव रांखौ मोननो हागौ। हादोरनि 9.88 कौटिनिबो बांसिन आबादारिफोरा पिएम किसान योजनानि 20थि किस्टिखौ मोननो हागौ बे दानावनो। बे बिथांखि, जायखौ 2019 मायथाइयाव जागायनाय जादोंमोन, दासिम मोन 19 किस्ति मोननो हाबाय आबादारिफोरा। आथिखालाव आबादारिफोरा 20थि किस्टिनि थाखाय नेगासिनो दं।

गाहाय मन्थ्रि नरेन्द्र मदिआ 9 जुलाइ आव गुबुन हादर दावबायनायनिफ्राय गावनि हादराव फैफिनगोन, बे हिसाबै 9 जुलाइ नि उनावसो मोननायनि आसा दं, मिथिना मोननाय बादिब्ला 18 जुलाइआव बिथाङा बिहार दावबायगोन। बैनिफ्राय बे बिथांखिनि 20 किस्टिफोरखौ जर'खायै मोतिहारीनिफ्राय हगारनो हागौ होनना साननाय जादों। बेखौ सानदोंसो, बबेखानि, सोरखारा बे बिथिङाव जेबो फोसावाखै। थांनाय बोसोरनि बायदि, एप्रिल-जुलाइनि किस्टियाव एसे गोबाव जादों, नाथाय बे बिथांखिनि फैगौ किस्टिखौ जुलाइनि नैथि निफ्राय थामथि सप्तासिमनि गेजेराव हगारनायनि आसा दं।

मखजाथावदि प्रधान मंत्री किसान योजनानि सिङाव, मिरु सोरखारा बोसोरफ्रोमबो आरजाथाव आबादारिफोरनो 6,000 रांनि राङारि हेफाजाब होयो। बे रांखौ थोंजोङै आबादारिफोरनि बेंक एकाउन्टाव मोनथाम समान किस्टियाव थामहिनबा 2,000 रांयै मोनफ्रोम किस्टियाव दैथायहरनाय जायो।

पि.एम. म'दिआ बिहारनि भागलपुरनिफ्राय बिथांखिनि 19थि किस्टिखौ हगारदोंमोन। बेखौ मिजिं थिनाय जादों दि 20थि किस्टिखौबो बिहारनि मोतिहारीनिफ्राय दैथायहरनाय जागोन। मखजाथावदि गाहाय मन्थ्रि म'दिआ आथिखालाव 2 जुलाइनिफ्राय 9 जुलाइनि गेजेराव मोनबा हादोर दावबायनायाव दं। बे हिसाबै बिथाङा प्रधान मंत्री किसान योजनानि 20थि किस्टिखौ हादोराव फैफिन्नायनि उनाव हगारनाय जागोन होनना मिजिं थिनाय जादों।

8. बाक्सा जिल्लानि सालबारि महकुमानि सिङाव थानाय भकपुर गामियाव मैया सानजौफुआव ट्रेक्टर जाब्रबथायाव फुकन स्वर्गियारी मुंनि सासे आजिरा मोन्नाय बिएसएफ जवानआ जिउ खोमाना लानो गोनां जायो।

पुलिसनि सुलुंनि बायदिब्ला, बिथाङा ट्रेक्टरजों गावनि फोथाराव हाल एवनो थांदोंमोन। जाब्रबथाया बै समाव जादोंमोन जेब्ला बिथाङा फोथाराव खामानि फोजोबखांनायनि उनाव ट्रेक्टरखौ लामायाव लाबोफिन्नो नाजागासिनो दंमोन। गारिआ उलथायो, जायनि जाहोनाव फुकन स्वर्गियारीया ट्रेक्टरनि सिङाव गोग्लैयो आरो गिख्रंथाव जखम जादोंमोन, बेनि उनाव जिउ गोमायो।

सासे फिसाज्ला आरो सानै फिसाजोफोरनि बिफा स्वर्गियारी बिथाङा जायगायावनो जिउ गोमायो होनना खौरां मोनदों।