दिनै 26 जुलाइ 2025 सनिबार साननि दासिमनि मोननैसो गोनां खौरांफोरजों दिनैनि सानखौ नोंथांमोना जागायदो।
1. राजस्थानाव मोनसे दुखुनांथाव जाब्रबथाय जादों । फोरोंबाय थानाय समावनो, फरायसालिनि उखुमआ हरखाबै बायना होदोंमोन। बे जाथायाव सा स्नि गथ’फोरा जिउ गोमायो ।
बे जाथाया
सुक्रुबारनि फुङाव राजस्थाननि झालावाद जिल्लानि मनोहरथाना ओनसोलाव जादोंमोन ।
पिपल'दि गामियाव गुदि फरायसालिनि उखुमआ हरखाबै बायदोंमोन । बे जाथायाव सा 19 सो
गथ'साफोरा सिङाव थाबथाना थानांदोंमोन आरो
गोब्राबै जोखोम जादोंमोन । मोननाय खौरांनि बायदिब्ला, फरायसालिनि थाखो खथानि उखुमआ हरखाबै
गोग्लैयो जेब्ला गथ'फोरा फरायसालि सौहैनायनि उनाव आरज गाबनाय मेलाव थांनो
नागिरदोंमोन ।
जायगानि
सुबुंफोरा गोख्रैनो जाथाय जायगायाव सौहैयो आरो फरायसालिनि फोरोंगिरिफोर आरो
मावफारियाफोरनि मददजों फरायसाफोरखौ रैखा खालामनो नाजायो। बांदीपुरा पुलिस थानानि
बिबानगिरि बिजेन्द्र कुमारआ बुंदोंमोन दि सिङाव थाबथानाय गासैबो गथ'फोरखौ
रैखा खालामनाय जाबाय। बे समावनो, जिल्ला खुंथाइ, पुलिस आरो सोलोंथाय बिफाननि गोजौ
थाखोनि मावख'गिरिफोरा जाथाय जायगायाव सौहैयो आरो रैखाथि आरो रैखाथि हाबाफारिफोरखौ
गोख्रैनो नायदिङो।
बायखोन्दा
बाहागोनिफ्राय रैखा खालामजानाय गासैबो गथ'फोरखौ मनोहरथाना गुदि सावस्रि मिरुआव
थिसननाय जादों । नाथाय देहा फाहामसालियाव डाक्टारफोरा सा स्नि गथ'फोरखौ थैबाय
होन्ना फोसावदोंमोन । जोखोम जानाय गुबुन गथ'फोरनि गेजेराव सा दाइनखौ हालोदा गाज्रि
होनना खौरां मोननाय जादों । बिथांमोनखौ झालावड़ जिल्ला देहा फाहामसालियाव लांनाय
जादों ।
गिबि खौरांनि
बायदिब्ला, बे ओनसोलाव थांनाय
साननैसोनिफ्राय गोबां अखा हागासिनो दंमोन। बे अखा हाबाय थानायनि जाहोनाव
फरायसालिनि बिलडिंआ लोरबां जालांदोंमोन। खहा जानाय खथानि इन्जुरा हरखाबै
बायदोंमोन। जाथायनि खौरां मोननाय लोगो लोगो पुलिस आरो खुंथायनि मावथिफोरा जाथाय जायगायाव सौहैयो।
2. गाबोन एबा 27 जुलाइ रबिबार सानखालि फुंनि 6 बाजिनिफ्राय 8 बाजिसिम 2 घन्ता मोब्लिब एबा कारेन्त थानाय नङा, गासै बिजनि साबदिभिजननि सिंनि जायगाफोरावनो 2 घन्ता कारेन्त थाया होनना मोनसे फोसावलाइनि गेजेरजों मिथिहोदों एपिदिसिएला। बिजनि साबदिभिजनावलसो जागोन बेयो, गुबुन जायगानि जेबो खौरां मोनाखै। बे थिरांथाखौ मेइतेनेन्स आरो गुबुन खामानि नि थाखायनो लानाय जादों होनना मिथिहोदों। बेखायनो बे समखिनियाव माबाफोर खामानि मावनायनि प्लेन दंमोनब्ला बिजनि साबदिभिजननि सिंनि सुबुंफोरा नायना लायोब्लानो जाबाय। बे समखिनियाव कारेन्त थानाय नङा।
3. गोरोन्थिया सोरनि, सानसे सिगाङाव बिपिएफ नि गाहाय हाग्रामा महिलारि बिथांनि खौसे जानो थाखाय बुंनाय बाथ्रानि खौरांखौ नोंथांमोननो होदोंमोन। दा बेनि सायाव इउपिपिएल नि गाहाय प्रमद बर बिथांखौबो बुंनायखौ नुनो मोनदों।
BTC नि CEM आरो UPPL नि आफादगिरि प्रमद बर'आ जानो हाथाव इउपिपिएल-बिपिएफ गोरोबथानि सायाव
हाग्रामा मोहिलारीनि बावैसो बिबुंथिनि सायाव फिननाय होनानै बुङो, "जों जेब्लाबो
सावरायनो थाखाय खुला थायो, नाथाय बेफोरबायदि आयदायाव गोथार नाजानायनि गोनांथि दं आरो
बेखौ फेस्ला एबा राजखान्थि खालामनो नाङा।
प्रमद बर'आ बुङो दि राजखान्थियारि
गोरोबथानि सायाव जायखिजाया सावरायनाया ओंथि गोनां जानांगौ आरो राजखान्थियारि फान्दायनायाव
बाहाय जायालासेनो सुबुंफोरनि जौगानायाव गोसो होनांगौ। हाग्रामा महिलारिखौ
आं फरायसा आफादनि आफादगिरि जाना थानाय समनिफ्रायनो मोनबोदों, मोनसेबो बाथ्राखौ
लाखिनो हाया होनना बुङो बिथाङा। लोगोसे खाम्फा बरगयारि बिथाङाबो हाग्रामा महिलारि
बिथांनि सायाव गिदिर गिदिर अजद होदोंमोन। हाग्रामा महिलारि बिथाङा आंखौ आरो एबसुनि
आफादगिरिखौलसो बुंबाय थायो, नाथाय बे सावरायनायाव एमएलए रबिराम नार्जारि बिथां,
रिहन दैमारि बिथां, आगोलनि प्रिन्सिपाल सेक्रेतारि रबिनसन मसाहारि आरो गुबुन गोजौ
थाखोनि दैदेनगिरि बिथांमोनाबोदि दंमोन बेखौ मानो बुङो होनना सोङो। ज जानायखौ
हमथाग्राया हाग्रामा महिलारियानो होनना अजद होयो खाम्फा बरगयारि या। खैफोदा सोरबा
बिपिएफ सोरबा इउपिपिएल नि नङा, खैफोदा सोरबा प्रमद बरनि सोरबा हाग्रामा महिलारि नि
नङा, बे खैफोदा बर हारिनिसो खैफोद। फैगो समफोराव बरनियाव जाहाथे खैफोद फैया, बेखौ
साननानैसो खौसे जानायनि बाथ्रा बुंदोंमोन, नाथाय बेखौ गावनि स्वार्थ आव जेंना
फैगोन साननानै हाग्रामा महिलारिया बेखौ जानो होआब्ला, रायजोफोरनि सिगाङाव खोथाजोंल
मोजां इप्रेसन होनो नागिरनानै बुङोब्ला रायजो राजाया दुखु मोननानैब्लाबो उपाय गैया
खौसेथिनि बाथ्राया जोबोद गोजाननि खोसो जागोन होनना बुङो बिथाङा। लोगोसे हाग्रामा
महिलारि बिथाङा खौसेथिखौ लुबैमारदोंब्ला गावनो आवगायनानै खामानि मावथों होनना बो
बुंबावो बिथाङा, गासैबो दोलो संगथननि दैदेनगिरिखौ लानानै सावरायलायथों, जों
इउपिपिएल दोलो हिसाबै दासिमबो जेब्लायबो सानावबो हरावबो बेनि थाखाय थियारि होनना
बुङो।
चार्ली पाटिलआ
गावखौ जिल्ला कमिसनारनि हेफाजाबगिरि महरै सिनायथि होनानै, बिस्वनाथ जिल्ला
कमिसनारनि मावख'आव गले-गले थांबाय थायोमोन। बे समनि गेजेराव, बियो जिल्ला कमिसनार
मुनिन्द्र नगेटनो होनांगौ जायो होनना बुंनानै बियो गोबां सुबुंफोरनिफ्राय 1.40 लाख
रां बुथुमदोंमोन। बे जाथायखौ चार्ली पाटिलआ खालामदोंमोन जेब्ला जिल्ला कमिसनार
मुनिन्द्र गट्टेखौ बिस्वनाथनिफ्राय दिमाहासाव जिल्लायाव त्रेन्सफार जादोंमोन।
बेल' नङा, चार्ली
पाटिलआ दाइरेक्तर अफ वेल्फेयार अफ प्लेन ट्राइब्स एन्द बेकवार्द क्लासनि गेजेरजों
अनसुंथाइ मोन्नाय ट्रेक्टरफोर होनायनि मुङाव गोबां सुबुंफोरनिफ्राय रसिद होनानै रां
बुथुमदोंमोन। बिनि सायाव गोबां सोरखारि बिथांखिफोरनि मुङाव रां खांनायनि अजदबो दं।
मिथिनो मोननाय
बायदिब्ला 12 जुलाइआव रां बुथुमनाय आरो 18 जुलाइआव रां हरफिन्नायनि
खोथा होनायनि उनावबो रांखौ होफिनैनि थाखाय भुगिनांनाय सुबुंफोरा पुलिसनि हेफाजाब लादोंमोन।
भुगिनांनायफोरा दा नंखाय ए.डी.सी. चार्ली पाटिलनि बेरेखायै गोजौ थाखोनि नायबिजिरनो दाबि
खालामगासिनो दं।
5. पेलेस्टाइनखौ
मोनसे हादर महरै गनायथि होनायनि उननिफ्रायनो फ्रान्सनि हादरगिरि इमानुएल मेक्र'नआ
गेजेर हायुंआरि थाखोआव गोब्राब सोंखारिजानायजों मोगा-मोगि जानांदों। 25 जुलाई,
2025 मायथाइयाव, बिथाङा फोसावदोंमोन दि फ्रान्सआ फैगौ सेप्तेम्बरआव जुथाइ हादोर
महासभायाव नेमखान्थि बायदियै पेलेस्टाइनखौ गनायथि होगोन। बिथाङा बुंदोंमोन दि बे
थिरांथाया गेजेर सानजायाव मोनसे गोजोर आरो न्यायगोनां गोजोननि समायखिराखौ रोखा
खालामनो थाखाय लानाय जादों।
मेक्र'नआ
गाजायाव सोलिबाय थानाय दावहानि गोख्रैथिखौ बाङाय खालामनो थाखाय सुबुं माहारियारि
दावहा दोनथ'नो खावलायदों, जाहाथे सुबुंफोरनो हरखाब हेफाजाब होनो हायो। बिथांनि
बायदिब्ला, दा गाजानि सुबुंफोरनि गुदि गोनांथिफोर
जेरै जामुं, दै, सावस्रि जोथोनखौ रोखा खालामनाया जोबोद गोनांथार।
फ्रान्सआ सिगांनिफ्रायनो 2023 मायथाइयाव पेलेस्टाइननि सुबुंफोरनो 100 मिलियन
युर'नि सुबुं अनफावरि हेफाजाब होनो खोथा होदोंमोन,
जायखौ जुथाइ हादोरनि गेजेरजों होनाय जादोंमोन।
नाथाय बे
थिरांथाया इजराइलखौ रागा जोंहोदों। इजराइलनि गाहाय मन्थ्रि बेन्जामिन नेतन्याहुआ
मेक्र'ननि फोसावनायखौ "उदखारिफोरनि थाखाय मोनसे बान्था" आरो
"इराननि प्रॉक्सी रायजो सोरजिनायनि मावखान्थि" बुंदोंमोन। बिथांनि
बायदिब्ला, 7 अक्ट'बर, 2023 मायथाइयाव हामासनि गाग्लोबनायनि उनाव बेबादि थिरांथा लानाया
गनायजाथाव नङा। इजराइलनि बायजोआरि मन्थ्रिआ बे आगानखौ लाजिनांथाव
होनना बुंदोंमोन आरो बुंदोंमोन दि बेयो गोजोन बिखान्थियाव हेंथा होनो हागौ।
बेराफारसेथिं, फ्रान्सनि बे आगानआ सोनाब इउर'पनि हादोरफोरनि
गेजेरावबो गलाय-गथाय फिनजाथाय सोमजिहोदों। बबेखानि माखासेफोरा बेखौ पेलेस्टाइननि
सुबुंफोरजों खौसेथिनि मोनसे फोरमायथि महरै नायो, गुबुनफोरा गियो दि बे थिरांथाया ओनसोलारि
दावराव-दावसिखौ आरोबाव गोब्राब खालामनो हागौ। बेखौ गोसोआव लाखिनांगौ दि फ्रान्सआव
मुस्लिम सुबुं अनजिमानि जौखोन्दोआ इउरपनि गुबुन हादोरफोरजों रुजुनायाव गोबां, जाय बे थिरांथानि राजखान्थियारि गोहोमथिखौबो
गोजोंसिन खालामदों।
मिथिनाय
बायदिब्ला बे एपफोर, वेब प्लेटफर्मफोरखौ सफ्ट
पर्न'ग्राफि आयदाखौ फोसावनायनि थाखाय बन्द' खालामनाय जादों। बेफोरनि गेजेराव 'ऑल्ट बालाजी', 'उल्लू', 'बिग शट्स एप', 'देसी फ्लिक्स', 'बूमेक्स', 'नवरास लाइट', 'गुलाब' बायदि बायदि दं।
हादोरनि खारिथि
आरो फोसावथाय मन्थ्रि बिफाना अजद होदों दि बे वेब प्लेटफर्मफोरा फोरमायथि
बिरोंदामिन आयेन, 2000 नि धारा 4
(जरखायै धारा 67 आरो 67 ए), भारतारि
न्याय आयेननि धारा 294,
2023 आरो आयजो आफादफोरनि
आयेन बेरेखा फोरमायथि (होबथानाय) आयेन, 1986 नि धारा 4 खौ सिफायदों।
सोमोन्दोआव,
आईटी एक्टनि धारा 67 आरो 67 एआ जायखिजाया इलेक्ट्रनिक बिजोंआव जेबो गाज्रि एबा
आथोनारि दिन्थिफुंनाय बिबुंथि एबा नुथाय दिन्थिनो हाया। बेबायदिनो, भारतारि साजा
आयेननि धारा 294 आ मेथाइनि नुथाइफोराव गाज्रि आवफावफोरखौ बाहायनायखौ
होबथायो।
आरोबाव, 1986
मायथाइनि आयेननि बायदिब्ला, आइजोफोरखौ जायखिजाया बिजोंआव गाज्रि महरै दिन्थिनो
हाया। मन्थ्रि बिफाना दाबि खालामदों दि बिफानजों होजानाय फारिलाइआव मुंख'नाय वेब
प्लेटफर्मआ बेफोर गासैबो आयेनफोरखौ सिफायदों।
खारिथि आरो
फोसावथाय मन्थ्रि बिफाना सिगांनिफ्रायनो एप आरो वेब प्लेटफर्मफोराव
बिबानगिरिफोरनाव सौहैखाबाय। मन्थ्रि बिफाना बेखौबो थि खालामनो थाखाय गोख्रों राहा
लानो थांगासिनो दं जाहाथे बे हादोराव होबथाजानाय एप्स आरो वेब प्लेटफर्मफोरा
गोरलैयै मोननो हाया।
bodoinfo.com provides informations regarding State Government, Central Government and Private sector jobs for the aspirants of assam.
Please do not enter any spam link in the comment box. ConversionConversion EmoticonEmoticon