दिनै 9 जुलाइ 2025 बुधबार साननि दासिमनि मोननैसो खौरांफोरा जाबाय।
1. दिनै बुधबार 9
जुलाइ आव हादोर नाङैनो मोनसे बन्द' होनाय़ जादों। भारत बन्द। बेंक, इन्सुरेन्स, पस्तेल सिबिथाय, खैला
खनिफोर, रोगाथायजों लोगोसे गोबां सेक्टरफोरनि 25 कौटिनिबो बांसिन मावसाफोरा बे सोमावसारनायाव बाहागो लानो थांगासिनो दं ।
खालि नोगोरारि
ओनसोलफोरसिमल' नङा, बे सोमावसारनायनि दोहौआ भारतनि गामियारि ओनसोलफोरखौबो दांहैदों। मानोना,
लेबार आफादफोरजों लोगोसे आबादारिफोरनि आफादफोर आरो आबाद मावग्रा
मर्चायाबो बन्दखौ हेफाजाब होदों।
हादोरनि मोनजि
मिरुआरि ट्रेड यूनियनफोरनि मोनसे जथाय आफादा हरथाल खालामनो खावलायदों। बिथांमोनहा
अजद होदों दि मिरुनि लेबार पलिसिआ आबुङै कर्प'रेटारि गोसो होनाय, जाय मावसाफोर, आबादारिफोर
आरो हादोरनि जारगोरा मुलाम्फाफोरनि बेरेखा।
थांनाय माखासे
दानफोरनिफ्राय, आफादा बे खान्थिनि बेरेखायै थाखथियारि खालामबाय थादों, जायनि जाहोनाव बे खेबाव गिदिर बन्द खालामनो
खावलायनाय जादों। बिथांमोनहा दाबि खालामो दि हरथाला खामानिखौल' बन्द' खालामाखै,
बेयो दुलाराय भारतारि हेंथा दिन्थिफुंनायनि नेरसोन।
थांनाय माखासे
बोसोरफोराव, लेबार आफादफोरा मिरु सोरखारनो मोन 17 दाबिफोर गथायदों। नाथाय बेखौ अजद
होनाय जायो दि सोरखारा बैफोर दाबिफोरखौ गोसो होआलासिनो मोनब्रै गोदान लेबार कड पास
खालामदोंमोन। जाय गुबैयै मावसाफोरनि मोनथायखौ खम खालामनो थाखाय बानायनाय जादों।
बेफोर कडफोरा ट्रेड यूनियनफोरनि जथाय हेंथा दिन्थिफुंनाय,
हरथाल खालामनायनि मोनथाय, मावसाफोरनि रैखाथिनि
दाथायखौ लोरबां खालामदों होनना अजद होनाय जादों।
बेनि अनगायैबो,
खामानि मावनायनि समफोरखौ बांहोनाय जादों, मजुरि दाथायाव रोखाथिखौ बाङाय खालामनाय जादों, कर्परेट कम्पानिफोरखौ आयेनारि बिबाननिफ्राय गोजानाव दोननाय जादों, जायखौ लेबार यूनियनफोरा 'सोबख'नायखौ आयेन गोनां खालामनाय' बुंदों।
खालि मावथिफोरल'
नङा , आबादारिफोरनि आफादफोराबो सोमावसारनायनि फारसे दं। संयुक्त कृषक मर्चाया
बुङो दि सोरखारा जाय रोखोमै आबाद आरो मावसाफोरखौ कर्प'रेटफोरनो गथायनो नाजादों,
बेयो भारतनि समाजारि-रांखान्थियारि सि-जोमनि थाखाय मोनसे गिथावना इसारा। बेनि
फिथाय महरै, बे सोमावसारनाया नोगोरारि आरो दारिमिनारि ओनसोलफोरनि बायजोआव थानाय
गामिफोर आरो आबादारि हाफोराव गोहोम खोख्लैगोन।
थांनाय माखासे
बोसोरफोराव, भारतआ 26 नबेम्बर, 2020, 28-29 मार्च, 2022 आरो 16 फेब्रुआरि, 2024 मायथाइयाव हादोरनाङै स्ट्राइक नुनो मोनदोंमोन। गुबुनफारसे आसामाव बेनि बारा
गोहोम गोग्लैनाय नङा होनना साननाय जादों। खौरां बिजोंफोराव बेनि सायाव बारा
फोसावनायखौ नुनो मोनाखै। लोगोसे आसामाव बन्द होनायफोरखौ दानिया खम नुनो मोनसै।
थेवब्लाबो गुबुन रायजोफोराव मावसाफोरनि गोबां बाहागो लानायनि जाहोनाव गाहाय रायजोआरि
सिबिथाय आरो दारिमिनफोरा बन्द जानो हागौ। हिन्द मजदूर सभानि हरभजन सिंह सिद्धूआ
बुंदोंमोन दि बे सोमावसारनाया बेंकिं हाबाफारिफोर, पस्तनि
सिबिथायफोर, खैला खनिफोर, कारखानाफोर, सोरखारि
हान्था-मेलानि खान्थिफोरखौ हेंथा होगोन होनना।
आसामनि जारिमिननि
बयनिख्रुइबो देरसिन होखारनाय हाबाफारिखौ 3500 बिघासो हायाव आसाम सोरखारा धुबुरीनि
बिलासिपारानि संतोषपुर, चिराकुता आरो सरुवाबाछरा गामिफोराव जागायदों मैयानिफ्राय।
मिथिनो मोननाय
बायदिब्ला खुंथाया बिलसिपारायाव 3,500 बिघा हायाव थानाय 2,000 नखरफोरनि न'फोरखौ
बुलदजारजों सिफायदों, जायनि जाहोनाव होखारजानाय सुबुंफोरा गावसोरनि न'फोरखौ नागारना थांनो गोनां
जादों।
मैया बिलासिपारानि
सापरआव होखारनाय हाबाफारिनि गेजेराव थासारिया दुंहाव जादों। जायगानि सुबुंफोरा
पुलिस आरो खुंथाइखौ बिसोरखौ होखारनो थांनायनिफ्राय
होबथादों। खुंथायनि गारिफोरखौबो सिफायदों।
रायखांनो गोनां
दि खुंथाया मैया सापारनि संतोष्ठपुर, चारुवाबाख्रा आरो सिराकुतायाव होखारनाय हाबाफारिखौ मावफुंदोंमोन।
बेखौ दाबि खालामनाय जादों दि बे होखारनाय हाबाफारिया आसामनि जारिमिनाव बयनिख्रुइबो
देरसिन होखारनाय हाबाफारि।
सिगाङाव
थासारिया गोजोनमोन जेब्ला खुंथाया होखारनो थांदोंमोन नाथाय उनाव दुंहाव थासारिया
बांदोंमोन। होखारजानाय सुबुंफोरनि मोनसे बाहागोआ, लावथिफोर, रुवाफोर, सिखा बायदि लानानै, न'खौ सिफायनो
फैनाय बुलदजारफोरखौ सिफायनो थाखाय होसोदोंमोन आरो अन्थाइ,
इथा बायदिफोरखौ खुबैदोंमोन आरो बुलदजारफोरखौ सिफायदोंमोन।
बबेखानि, बेखौ
मिथिनो मोननाय जादों दि आथिखालाव थासारिया सामलायजागासिनो दं। "
बे समावनो,
होखारनाय जायगायाव सहैनाय शिवासागरनि एमएलए आरो पिपुल्स पार्टीनि दैदेनगिरि अखिल
गगैखौ मैया पुलिसआ दसे सम हमनानै दोनदोंमोन। बेखौ मिथिनो मोननाय जायो दि अखिल
गगैखौ गिबियाव खुंथाया होखारनाय थावनियाव थांनायनिफ्राय होबथादोंमोन। बे
बायदियैनो, बिथाङा पुलिसखौ मदद खालामनानै होखारनाय थावनियाव हाबाखैमोन।
बैनिफ्राय एसे
गोजानाव बिथाङा जायगानि सुबुंफोरजों सावरायलायो। बिथाङा होखारजानाय सुबुंफोरखौ
जेबो दुंहाव थासारि सोमजिहोनो नाङा होननाबो बोसोन होदोंमोन। बिथाङा गिबि मन्थ्रिनो
होखारजानाय सुबुंफोरनो 500 बिघा हा होनो थाखाय सुबुंफोरनो फोरमायदोंमोन।
उनाव बिथाङा
पुलिस सामलायगिरिनि खावलायनायाव जायगाखौ नागारदोंमोन। नाथाय खावसे घन्टानि उनावनो
होखारनाय थावनियाव दुंहाव थासारि सोमजिदोंमोन।
3. बिटिआरनि गाहाय प्रमद बर' आरो एबसुनि गाहाय दैदेनगिरि बिथांमोना मंगलबाराव गोदान दिल्लीआव मिरु नखर मन्थ्रि अमित साह बिथांखौ लोगो हमदोंमोन। 2026 मायथाइनि सिगां दोलोआ एन.डि.एफ.बि. नि रन्जन दौमारीजों लोगोसे सा द' केडारफोरखौ उदां खालामनायनि सायाव सावरायदोंमोन।
बे समावनो,
प्रमद बर' आरो एबसुनि दैदेनगिरिफोरखौ मिरु नखर मन्थ्रिआ खोथा होदों दि जेलाव थानाय
रन्जन दैमारी आरो सा द' केडारफोरखौ उदां खालामनायनि खामानि मावनायनि सायाव खोथा
होदों होनना मिथिना मोनदों। बेजों लोगोसे फैगो मनसुन सेसनाव बिटिआर गोरोबथानि 4.3
दफा बादियै संबिजिरनि 125थि सोदांनाय बिल आरो संबिजिदनि 280 थि दफाखौ दफाखौ
बारहोनो नागिरदोंमोन।
मैयानि
सावरायनायाव प्रमद बर' आरो एबसुनि दैदेनगिरिफोरा नखर मन्थ्रि साहखौ कार्बि आंलं
जिल्लानि बर'-कछारी सुबुंफोरनो हाजोआरि जिल्ला गनायथि होनो खावलायदों। बेबायदिनो
बिस्वनाथ आरो सनितपुर जिल्लानि गोबां गामिफोरखौ बिटिआरआव सोफादेरनो, गुबुन गुबुन
प्रजेक्तफोरखौ मावफुंनो, पेरामिलितारि फर्स, आरमि फोराव बर लाइमोनफोरखौ सोसननाय़ बायदि
बायदिनि सायावबो सावरायलायनाय जादोंमोन होनना मिथिना मोनदों।
4. चिरां जिल्लानि काजलगाव पुलिस थानानि सिङाव थानाय कृष्णपुर गामियाव साननि समावनो गिख्रंथाव बुथारनाय जाथाया जादोंमोन । सासे सुबुङा गावनि बिसिखौ हाथुरिजों खास्रि-बिस्रियै बुथारो ।
पुलिसा गुबै
दायनिगिरि आरो फिसाय जितु हेम्ब्रम (35) खौ खाबाय। मंगलबाराव सासे जौ लोंग्रा
फिसाय जितु हेम्ब्रमआ (35) गावनि बिसि आरो सानै गथ'फोरनि बिमा पुदीन हासदा (33) खौ
साननि समाव मोनसे फिसा नख'रारि नांलायनायखौ मिरु खालामनानै हाथुराजों बुनानै गाज्रि रोखोमै बुथारदोंमोन ।
पुलिसआ जाथाय
जायगायाव सहैनानै बिसि बुथारग्रा आरो फिसाय जीतु हेम्ब्रमखौ खायो आरो थैनाय पुदीन
हासदानि गोथै सह'खौ बोखांनानै पस्टमर्टेमनि थाखाय बरपेटा मेडिकेल कलेजसिम दैथाय
हरो । नायबिजिरनाया सोलिगासिनो
दं।
बेराफारसेथिं,
फालांगियारि गोरोबथानि बागै रायज्लायनानै, ट्राम्पआ फिन बुंफिनदोंमोन दि भारत-पाक
दावहानि जोबनायनि आन्दोआव आमेरिकानि फालांगियारि गोरोबथाया दं। ट्राम्पआ फिन
बुंफिनदोंमोन दि जुदि भारत आरो पाकिस्ताना दावहायाव नांथाबना थायो अब्ला आमेरिकाया
फालांगियारि गोरोबथायाव हाबनाय नङा। बेराफारसेथिं, आमेरिकाया
सिगांनिफ्रायनो 14 हादोरफोरनो खाजोनानि हारखौ दैथायहरखाबाय।
आमेरिकाया जापान आरो खोला क'रिया
बायदि आमेरिकानि हेफाजाबगिरिफोरनोबो 25 जौखोन्दो खाजोनानि हारनि
लाइजाम दैथायहरदोंमोन। गुबुन हादोरफोर जायफोरा 25 जौखोन्दो खाजोनानि हार
दैथायहरदों बिसोरनि गेजेराव ट्यूनीशिया, मालयेसिया आरो
काजाकिस्तान दं। आमेरिकाया दासिम म्यानमार आरो लाउसनो बांसिन 40 जौखोन्दोनि रिपर्ट
हरदों। कंबोडिया आरो थाईलेन्डनो 36 जौखोन्दो खाजोनानि हारनि नटिस दैथायहरनाय जादों।
बेबायदिनो, जाय हादोरफोरा 35 जौखोन्दो खाजोनानि हारआव
लाइजाम दैथायहरजादों बेफोर जाबाय बांग्लादेश आरो सर्बिया। बिथाङा बस्निया आरो खोला
आफ्रीकानो 32 जौखोन्दो खाजोनानि हार आरो 30 जौखोन्दो खाजोनानि हार इन्ड'नेसियानो
लाइजाम दैथायहरदोंमोन। आमेरिकानि गोदान हारफोराव खाजोनाया 1 आगस्तनिफ्राय गोहोम
गोग्लैगोन। गोजौ खाजोनागोनां एसियानि हादोरफोरनो गांसे लाइजाम दैथायहरनाय
जादोंब्लाबो, आमेरिकाया दासिमबो मोनफ्रोमबो खाजोनाखौ बाङाय खालामनायनि मानथाखो थि
खालामदों। जुदि हादोरफोरा आमेरिकानिफ्राय बांसिन मुवाफोर लाबोयो आरो जुथाइ रायजो
आमेरिकायाव दिहुनजानाय बेसादफोरनि दैथायहरनायनि बिबांखौ बांहोनानै आमेरिकाजों
फालांगिखौ बांहोयो, अब्ला बे खाजोनाया बाङाय जागोन।
6. भारतनि नखरसेनिनो साब्रै सोद्रोमाफोरा आमेरिकायाव जिउ खोमानांबाय। रिपर्टफोरनि बायदिब्ला, 7 जुलाइखालि आटलान्टा, आमेरिकायाव मोनसे गिख्रंथाव लामा जाब्रबथाय जादोंमोन। मोनसे नखरनिनो साब्रै सोद्रोमाफोरा जिउ खोमानांदोंमोन। रिपर्टफोरनि बायदिब्ला, नख'रा सालायनो थाखाय गंसे गारि लाना ओंखारलांदोंमोन। नाथाय रावबो मोनथियाखैमोनदि बेयो बिसोरनि जोबथा दावबायनाय जागोन होनना। नख'रा हायद्राबादनि थागिरिमोन। बे दुखुनांथाव जाथायनि उनाव, दा नखरनि बाहागिफोरनि गेजेराव दुखुनि आबहावा सोमजिदों।
हायदेराबादनि
थागिरि तेजस्विनी आरो श्री वेंकटआ गावसोरनि सानै गथ'फोरजों डालासाव दंमोन। बे
समावनो, जिरायनाय सानफोराव, बिसोरो आटलान्टानि बाहागिफोरनाव थाबायनो थाङो।
आटलान्टायाव सप्तासे थानायनि उनाव डालासआव फैफिननाय समाव हर गेजेराव बे गिख्रंथाव
लामा जाब्रबथाया जादोंमोन।
जायगानि पुलिसनि
बायदिब्ला, लामायाव
गोरोन्थि लामाजों फैबाय थानाय गंसे मिनी ट्राकआ बिसोरनि गारिजों सौग्रावलायो। बेनि
जाहोनाव गारियाव अर नांदोंमोन आरो गारि सिङाव थानाय गासैबो खामनानै जिउ गोमायो।
7. बिटिसि बिसायख'थियाव बबे बियाबाव बिसायख'थि गेलेगोन बेखौ बि.जे.पि. आ दासिमबो थि खालामनो हायाखै । बे आयदानि सायाव 15 आगस्तनि उनावसो सावरायनाय जागोन । बे बाथ्राखौ गिबि मन्थ्रि हिमन्त बिश्व सर्माया रोखा खालामना होदों । बेल' नङा, गिबि मन्थ्रिया बर' सुबुंफोरनि मोनथायखौ मान होनानै बि.जे.पि.नि नेम खान्थि थि खालामनायनि इसाराबो होदोंमोन । गिबि मन्थ्रिआ बयखौबो बड'फा उपेन्द्र नाथ ब्रह्मनि सायाव राजखान्थि खालामनो नाङा होननानैबो खावलायदों ।
थांनाय समबारखालि ककराझार नोगोरमानि ग्रीन फिल्डआव
खुंफुंनाय दोलोनि मावथिफोरनि जथुम्मायाव बाहागो लाखांनायनि उनावनो बे सोमोन्दै
खौरांगिरिफोरनि सिगाङाव गिबि मन्थ्रिआ बुङो, "बिटिसिआ बर' सुबुंफोरनि जुजिनायनि फिथाय। बेनिखायनो
बि.जे.पि.आ बिसायख'थि गेलेयोब्लाबो बियो बर' सुबुंफोरनि मोनथायखौ मान होनानै
बिसायख'थि गेलेगोन। बेनि थाखाय जों थि
समाव पलिसिखौ लागोन। जोंनि थांखिया
गोजोन, लोगोआरि आरो गोरोबलायनाय आदबजों बिसायख'थि खुंनाय। बेनिखायनो
बहा तिकेत होनो नांगौ, ना समाव जिरायनानै सावरायलायगोन। बै समा 15 आगस्तनि उनाव
फैगोन। " होनना बुङो।
हादोर नाङैनो
बड'फा उपेन्द्र नाथ ब्रह्मखौ मान होनो सोरखारा लानाय थांखिखौ नोजोर होनानै गिबि
मन्थ्रिआ बुङो, "नोंथाङा
नुबाय दि बि.जे.पि. सोरखारा इउपिपिएल सोरखारनि हेफाजाबाव हादोरनाङैनो बड'फा
उपेन्द्र नाथ ब्रह्मखौ बेसेबां मान होनो नाजादों। बिथांनि गोसोखांथिखौ रैखा
खालामनो थाखाय बिथाङा जा मावनांगौ बेखौ जों मावनो थियारि। जों बिथांखौ
राजखान्थियाव लाबोनो लुबैया। राजखान्थिया मोनसे जायगायाव आरो बड'फाया मोनसे
जायगायाव। बडोफानि मुंखौ जायखिजाया राजखान्थियारि बिबुंथियाव बाहायनो नाङा। जों
बड'फाखौ राजखान्थिनिफ्राय गोजानाव लाखिनांगोन। दिनै बड'लेण्डआव
बर', बर' नङै आरो आसामजों लोगोसे भारतआवनो बड'फा उपेन्द्र
नाथ ब्रह्मखौ ट्राइबेलफोरनि गाव-खुंथायनि सोमावसारनायनि मुसुखा नेरसोन महरै सुबुंफोरा
गनायना लादों।" होननाबो बुङो
गिबि मन्थ्रि
हिमन्त बिश्व सर्माया मेलाव बिटिसि बिसायख'थिया
बे बोसोरनिनो फैगौ सेप्तेम्बर दानाव जागोन
होनना रोखा खालामना होदों।
A. गुवाहाटी मेडिकेल कलेज हस्पितालआव अर नांनाय
जाथाय। जीएमसीएचनि अर्थ'पेडिक सेक्शनाव अर
नांदोंमोन आरो गोख्रैनो गोसोम उखुन्दैजों साग्लोबदोंमोन। बे जाथायनि उनाव,
बेरामिफोर आरो बिमा-बिफानि गेजेराव दावराव-दावसि जादोंमोन। अर खोमोरग्रा हानजाया
गोख्रैनो जाथाय जायगायाव सहैयो आरो अरखौ खोमोरनो हायो।
B.
गिबि मन्थ्रि हिमन्त बिश्व शर्माया चापरखौ होखारनायनि सायाव बिबुंथि होदों।
बिथाङा बुंदोंमोन दि होखारनाया 10 जुलाइनिफ्राय जागायफिनगोन। चापरयाव, 90 जौखोन्दो
सुबुं अनजिमाया गाव हारसिङैनो खारलांबाय, बबेखानि आद्रा थानाय 10 जौखोन्दोआ होखार
जानांदों। अखिल गगैखौ हमनायनि सायाव गिबि मन्थ्रिआ बुङो दि अखिल गगैआ अखिल गगैनि
थाखाय खामानि मावगोन आरो आं आंनि खामानिखौ मावलांबाय थागोन।
C.
ब्रिक्स जथुम जोबनायनि उनावनो गाहाय मन्थ्रि नरेन्द्र मदीया ब्राजीलाव थांदों।
ब्राजिलनि रैखाथि मन्थ्रि मन्टेइरो फिलह'आ बिथांखौ गोसो गोथारै बरायदोंमोन।
ब्राजीलनि दोरोङारि साम्बा रेगे आरो शिव तांडवखौ गाहाय मन्थ्रि म'दिखौ बरायनो
थाखाय दिन्थिफुंनाय जादोंमोन। गाहाय मन्थ्रि म'दिआ ब्राजिलनि हादरगिरि लुइज
इनासिअ' लुला दा सिल्भारनि हांख्रायनायाव लेटिन आमेरिकानि हादोराव थांदों।
D. राजथावनि दिल्लीयाव मोनसे दुखुनांथाव जाथाय
जादों। मंगलबाराव सासे लाइमोन आइजो आरो सासे द' दाननि हिनजावसा गथखौ
खास्रि-बिस्रियै बुथारनाय जादोंमोन। पुलिसा सन्देह खालामदों दि बुथारनाया
हिनजावसानि बयफ्रेन्डजों खालामजादोंमोन। पुलिस मावख'गिरिफोरा बुंदोंमोन दि जाथायनि
सायाव नायबिजिरनाया सोलिगासिनो दं।
E.
गिबि मन्थ्रि हिमन्त बिश्व सर्माया बेरेखा हानजाखौ भट बेंकनि राजखान्थियाव
लोब्बा थानायनि दाय होदों। बेजों लोगोसे, गिबि मन्थ्रिआ बेरेखा हानजाखौ हा दखल
खालामग्राफोरनि फारसे थानायनिबो दाय होदोंमोन।
bodoinfo.com provides informations regarding State Government, Central Government and Private sector jobs for the aspirants of assam.
Please do not enter any spam link in the comment box. ConversionConversion EmoticonEmoticon