जरहात आव सान आव नो सासे फरायसा आफादनि सोद्रोमा खौ मोनसे बुथारनाय जाथाय जाना थांदों मैया। गासै सा 3 खौ बुदोंमोन बेनिनो सासे नि जिउ गोमायो। गोबां गाज्रि सुबुंफोरनि दोलो आ बे खामानि खौ मावदोंमोन, बेनि दाय आव सा 10 खौ हमबाय होनना खौरां मोनदों। हमनाय सुबुंफोरनि मुङा निरज, बिक्राम दास, सुभास बर, अबिनाश बरा,, देब दास, बितोपन आरो अबिनाश दास। जोरहात नि एसपि बिथाङा जाथाय जानाय जायगायाव थांनानै आरो थाबावनाय सुबुंफोरखौ हमनाय जागोन होनना बुङो। मखजाथावदि मोनसे लामा जाब्रबथाय खौ लानानै जोरहात निर्मल चारियालि नि खाथि आव गोबां सुबुंफोरा सा 3 खौ बुदोंमोन। सा 3 जोखोम जानायफोरखौ जोरहात नि देहाफाहामसालि आव लांनाय जादोंमोनब्लाबो जिउ गोमायो सासे नि। बिथांनि मुङा अनिमेश भुया। 50 सो सुबुंफोरा गाग्लोबदोंमोन होनना खौरां मोनदों। आरो जोखोम जानाय सानै सुबुंनि मुङा मृदुस्मन्त बरुवा आरो प्रनय दत्त। सासे बोराय बैसो नि सुबुङा स्कुटि सालायना फैना गोग्लैदोंमोन, बियो जौ लोंना सालायदोंमोन,, बेखौनो बिसोर सौग्रवदों होनना बुंनानै बेबायदि गाग्लोबहोयो। आसामनि गिबि मन्थ्रि आ बेबायदि खालामनाय रावबो सुबुङा नो बारगनाय नङा होनना बुङो।
ओनसोलारि बोथोर बिगियान मिरु आ मैया आसामनि मोन 15 जिला याव खुवा नि थाखाय एलार्त खालामना होदों। खुवा नि थाखाय रायजो आव जाब्रबथाय आ बारा जानो हागौ, बेखौ लानानै एलार्त खालामना होदों। मोन 15 जिलाफोरनि मोननैसो आ कक्राझार, बाक्सा, चिरां, बरपेता, बङायगांव, नलबारि, कामरुप रुराल, कार्बिआंलं, गोलाघात आरो गोबां। खुवा नि समाव गारिफोरखौ मोजाङै सिमा थि खालामना होनाय गोख्रैथि जों सलायनो होदों।
राज्य सभा नि गोजां बोथोर नि शेशन निफ्राय आसामनिफ्राय जानाय एमपि रिपुन बरा जों लोगोसे गासै सा 12 एमपि खौ सासपेन्द खालामदों। गाज्रि आखु एबा नेम खौ मानियैनि साजा महरै सासपेन्द खालामो बे शेशन आ जोबनाय सम सिम। 11 आगस्त नि 254 थि शेशन आव गाज्रि आखु दिन्थिदोंमोन नेम खौ मानियाखैमोन। आबादारि बिल नि लेखा खौ बो गाकना होदोंमोन आरो गोबां दुंहाव थासारि सोमजिहोदोंमोन। मैया राज्यसभा याव आबादनि आयेन खौ बोखांना लाफिननायनि बिल खौ पास खालामनाय जाबाय। बेयो आबादारिफोरनि गिदिर देरहानाय, सोरखार आ जाना थानांबाय
जनजाति सुबुंफोरखौ होखारनाय आ गोरलै नङा आरो होखारनांगौ नि गोनांथि बो गैया मानोना फरेस्त राईत नि सिङाव रैखाथि थानाय। आरो आसामाव जुदि जनजाति फोरखौ होखारनो नाजायो जायनि हा याव नो जों दं, बे थ गिदिर दुखुनांथाव जाथाय जागोन मानोना आसामाव थानाय दास कलिटा बरा सुबुंफोरनि हा या बर राभा कार्बिफोरनि सोमोन, बेखौ बुंदों आसामनि गिबि मन्थ्रि हिमन्त बिश्व शर्मा बिथाङा। बेखायनो जाय जायगायाव हाग्रा ओनसोल आव जनजाति सुबुंनि गेजेरजों दखल खालामजादों बेनि थाखाय फरेस्त राइत एक्त आरो सावरायलायनायनि गेजेरजों खामानि मावदों, कक्राझार आव बो खामानि मावदों। जायफोरा जोंनि हारि खौ फोजोबस्रांनो नाजानानै बेदखल खालामनो आवगायदों बिसोरजों नांगासिनो दं।
भारत आ देरहानायनि खाथि थाराव मोनहैनानैब्लाबो देरहानो
हायासै। निउजिलेन्द नि बेरेखा गेलेनाय गिबि टेष्ट आ द्र जायो। भारत आ देरहानो
थाखाय 5 थि सान आ सा 9 विकेट नांगौमोन, नाथाय सा 8 ल लानो हायो। गुबुनफारसे
निउजिलेन्द नो देरहानो थाखाय 280 रान नांगौमोन 5 थि सान आव नाथाय बिसोर रान नि
फारसे थाङालासै द्र खालामनायखौ सो नायदोंमोन। गोबां बल खौ मोजाङै होबथानानै द्र
खालामनो हायो। नैथि टेष्ट आ 3 दिसेम्बर निफ्राय जागोन।
आईएसएल आव मैया चेन्नाई आ नर्थ ईस्त खौ 2-1 गल जों
फेजेनदों। मोननैबो दोलो आ नो गोबां खाबु मोनदोंमोन गल सोनायनि। जोबनायाव 2-1 जायो।
गुवाहाति आव मोनसे सोमोनांथाव जाथाय। फंबाय आ नो बिदा
खौ बुथरदों। गुवाहाति नि बामुनिमैदाम आव जादों। खौरां मोननाय बादिब्ला 20 बोसोर
बैसो नि जिन्तु दास आ कमल दास मुंनि 22 बोसोर बैसो नि बिदा खौ रद जों बुनानै
बुथारदों। उन्दुना दंमोन बिदा या। मिथिना मोननाय बादिब्ला सानैबो लोगोसे
उन्दुयोमोन, बुथारग्रा या सिलिन्दार फाननो नागिरदोंमोन रां नि थाखाय, द्रग्स
लायोमोन बियो, बेनि थाखाय नो रां नि आंखाल जादोंमोन। बेखौ लानानै नो नांलायनाय
जादोंमोन। जथाय नि खौरां मोननाय लोगो लोगो चान्दमारि पुलिस थाङो। पुलिस निफ्राय
खारखुमानो नागिरदोंमोन, नाथाय हमनो हायो।
बिसायखथि आव बिहामजो नि जेननाय खौ सहायनो हायै आव थैदों बिखुनजो आ। बिहार आव सोलिनाय पन्सायत बिसायखथि आव गोबां सोमोनांथाव जाथाय जानाय खोनानो मोनदों। बेनि गेजेराव नो गोपालगन्ज आव जानाय जाथाय आ बांसिन सोमोनांहोदों। गोपालगन्ज नि मान्जा खोन्दो नि कर्न पुरा पन्सायत आव जादों जेराव रामशंकर प्रसाद नि 90 बोसोर बैसो नि बिसि आ थैदों। पन्सायत नि गाहाय नि मासि नि थाखय जानाय बिसायखथि आव गेलेनय माला देबि आ 17 भट आव जेन्दोंमोन। माला देबि आ जेननयनि खौरां मोननाय लोगो लोगो नो थैयो बिखुनजो आ।
24 घन्टा याव नो हिनजावसा खौ जिनाहारि खालामनाय सुबुंखौ साजा होनानै रेकर्द खालामो। बेयो बिहार नि नो जाथाय। बिहार नि अररिया याव पकसो आयेन नि सिङाव स्पेशियेल बिजिरसालि आ खम समनि गेजेराव नो साजा होयो। हादरनि गिबिसिन रायजो जानो हादों बिहार आ बेबायदि खालामनाय। बेनि सिगां 2018 मायथाइ आव मध्यप्रदेश आव सासे खौ सान 3 नि गेजेराव साजा होदोंमोन, बे रेकर्ड खौ नो सिफायो। जाथाय आ थांनाय 23 जुलाई नि मोन, बे सान खालि जिनाहारि नि जाथाय आ जादोंमोन, बेनि उनाव जाथाय नि सायाव थांनाय 18 सेप्तेम्बर आव एजाहार होयो, 24 सेप्तेम्बर आव चार्ससित होयो। बेनि उनाव 4 अक्तोबर आव जाथाय नि सायाव बिजिरसालि आव हेयारिं होयो आरो बे सानखालि नो साजा होयो।
आसामाव आनजाद नि जानाय बेलेबेजे आ जोबगोन ना माब्लाबा।
एपिएससि निफ्राय लानानै आसाम पुलिस आरो गोबां आनजाद नि बेलेबेजे आ फरायसाफोरखौ
गोबां गोसो बायहोयो। मरिगांव आव जानाय सोंनाय बिलाय लिक जानाय नि दायनिगिरि खौ
हमनो हाबाय। थायनैसो रां नि थाखाय नो बेखौ खालामदोंमोन आतिकुर ईश्लाम मुंनि
सुबुङा। खौरां मोननाय बादिब्ला 2000 रां नि थाखाय लिक खालानाय आटिकुर आ बेयावनो
खामानि मावोमोन गाहाय फोरोंगिरि नि न आव नो खामानि मानग्रा महरै थादोंमोन आरो
फरायसालि नि खामानि आव बाहायदोंमोन बिखौ। फरायसालि आव थानो मोननायनि सुबिदा लानानै
नो मोननै आयदा नि सोंनाय बिलायखौ लिक खालामदोंमोन। 25 नबेम्बर आव थाखो 9 आरो 10 नि
समाज बिगियान आयदा नि मोन।
bodoinfo.com provides informations regarding State Government, Central Government and Private sector jobs for the aspirants of assam.
Please do not enter any spam link in the comment box. ConversionConversion EmoticonEmoticon