Bodo news 24 may 2022 ~ Bodoinfo.com

मेट्रिक आरो हायार सेकन्दारि नि फाईनेल आनजाद नि फिथाय एबा रिजाल्ट खौ माब्ला होगोन, बेखौ गोबाव सान निफ्राय नो सोंगासिनोमोन गोबाङानो, दिनै खौरां मोनदों मेट्रिक आरो हायार सेकन्दारि नि रिजाल्ट नि। सेबा या आगोलावनो बुंदोंमोन मे दान नि गेजेरावनो आनजाद नि फिथायखौ होगोन होनना, नाथाय दायो खौरां मोननाय बादिब्ला मे दान आव रिजाल्ट खौ होनो होनाय नङा, जुन दान नि गिबि सप्ता नि गेजेराव होगोन आनजाद नि रिजाल्ट खौ, 1 निफ्राय 7 जुन नि गेजेराव। गुबुनफारसे हायार सेकन्दारि नि रिजाल्ट खौ 20 जुन खालि नङाब्ला 20 जुन नि सिगाङावबो होनो हागौ। दिनै आसु नि मोनसे दोलो आ सेबा आऱो काउन्सिल जों सावरायलायदोंमोन, बेयावनो आसु आ जेसेबां हायो थाबनो रिजाल्ट खौ होनो दाबि दैखांदों। 30 मे आव नो होनो गोनां मोन मेट्रिक नि रिजाल्ट खौ। गोबाङानो 25 मे आव होगोन होनना नंखाय खौरां फोसावदों, बेफोर गासैबो नंखाय।

खौरां मोननाय बादिब्ला दिनै बर' हारिनि माहारियारि आफाद एबसु आरो CCTOA इभिकसन खालामजाग्रा आरो सरकारनि जों गुवाहाटीयाव जानाय इभिकसननि सायाव सावरायलायनाय जादोंमोन। बे सावरायनाय हाबाफारियाव बाहागो लादोंमोन आसाम सरकारनिफ्राय ड० रनुज पेगु आरो इउ. जि ब्रह्म आरो दुलाराय बर फरायसा आफादनि आफादगिरि दिपेन बर बिथांमोना। खौरां मोननाय बायदिब्ला बे हाबाफारि आव सावरायलायनायनि उनाव गुवाहाति नि जाथायनि सायाव नायबिजिरनानै आसाम सोरखार आ होखारजानाय सुबुंफोरनो हा आरो न लुनो थाखाय राहा खालामना होगोन होनना थिरांथा लादों। सावरायलायनाय आ जानायनि सिगां नो मिरु एबसु आ दिनै फिन खनसेबाव बे जाथाय जानाय जायगायाव थांदोंमोन। दुलाराय बर' फरायसा आफादआ माब्लाबाबो थागिबि सुबुंफोरनि सायाव इनाय आरो अयथासार खालामनायखौ सहायनो हानाय नङा जेखि थासारियावनो एबसुआ गोख्रोङै सरखारखौ नारसिनबोदों आरो नारसिनलांबाय थागोन जेब्लासिम जेंनाया अरायथायै सुफुंजाया होनना बुंदों।

दिनै फुङावनो मोनसे दुखुनांथाव जाथाय आ जायो, दरं जिला नि सिपाझार आव जादोंमोन। फुङाव थाबायनाय एबा मर्निं वाक खालामनाय समावनो गंसे गोसा फैनाय ट्राक आ सौख्रांनाय आव सा 5 सुबुंफोरनि जिउ गोमायो। मर्निं वाक खालामनाय आव गासै सा 7 सुबुंफोर दंमोन, बेनिनो सा 5 या थैयो, थैनाय सा 5 नि सानै आ आयजो। सिपाझार कलेज सक नि 15 नं राजालामा याव जादोंमोन गिथावना जाब्रबथाय आ, ट्राक आ बो फांसे दंफां आव सौग्रावो, जाथाय आ जाखांनायनि उनाव जायगा निफ्राय द्राईभार आरो हेन्दिमेन आ खारखुमायो। थैनायफोरनि सा 3 आ मेट्रिक आनजाद होनाय मोन, आनजाद नि फिथाय मोननायनि सिगां नि जिउ गोमाबाय।

चिरां जिला नि बिजनि नि भारत भुटान नि सिमना नि 1 नं अग्रं नि गोदान हा याव मैया हर नि समाव मानास माहारियारि हाग्रामा निफ्राय फैनाय मैदेर नि गाग्लोबनाय आव सासे बर सुबुंनि जिउ गोमायो। थैनाय सुबुं नि मुं खौ अशिन्त्य नार्जारि 43 बोसोर बैसो नि होनना मिथिना मोनदों सासे आबादारि। हाग्रा बिफान नि सुबुंफोरा बुंनाय बादिब्ला मैदेर खौ हाग्रामा याव थांफिनहोनो नाजानाय आव नो मैदेर आ गाग्लोबदोंमोन, उनाव हाग्रा बिफान नि सुबुंफोरा थांनानै नायबिजिरो आरो थैनाय सुबुंखौ पस्तमर्तेमनि थाखाय काजलगांव जेएसबि देहाफाहामसालि आव लांनाय जायो।